གཞས་མ་གྲཊ་ཅན་ཞིག་གི་མཁལ་མ་བརྗེ་བོ་བརྒྱབས།

ཁ་སང་ཨ་རིའི་ན་གཞོན་གཞས་མ་གྲགས་ཅན་སེ་ལི་ན་གྷོ་མེ་ཛ་ཡིས་མོ་རང་གི་མཁལ་མ་གཅིག་འཕྲོ་བརླག་ཏུ་ཕྱིན་ཏེ་གྲོགས་མོ་ཞིག་གིས་མཁལ་མ་སྦྱིན་པ་བཏང་ཡོད་སྐོར་བསྒྲགས་འདུག

འཛམ་གླིང་གི་ན་གཞོན་གཞས་མ་གྲགས་ཅན་སེ་ལི་ན་གྷོ་མེ་ཛ་(Selena Gomez)ལ་དགའ་མོས་བྱེད་མཁན་མང་པོ་ཞིག་གིས། གཞས་མ་ཁོང་གིས་གླུ་གཞས་གསར་པ་འགྲེམ་སྤེལ་བྱེད་ཀྱི་མི་འདུག་ཅེས་འཁང་ར་མང་པོ་བྱས་ཡོད་པར་བརྟེན། ཁ་སང་མོ་རང་གི་སྤྱི་ཚོགས་དྲྭ་བ་ཨིན་སི་ཊ་གྷ་རཱམ་(Instragram)སྟེང་། མོ་དང་གྲོགས་མོ་སྨན་ཁང་ནང་ཉལ་ཁྲི་གཉིས་ཀྱི་སྟེང་དུ་གཅིག་གིས་གཅིག་ལ་ལག་པ་འཇུས་ཏེ་ཉལ་ཡོད་པའི་པར་རིས་ཞིག་བཀྲམ་སྟེ། མོའི་མཁལ་མ་འཕྲོ་བརླག་ཏུ་ཕྱིན་ཏེ་མོ་རང་གི་གྲོགས་མོ་འཆམ་ཤོས་རན་སི་ཡ་རཱ་ཡེ་སཱ་(Francia Raisa)ཡིས་མཁལ་མ་སྦྱིན་གཏོང་བྱས་ཡོད་སྐོར་བསྒྲགས་ཡོད་པ་རེད།

པར་རིས་དེའི་འོག་ཏུ་གཞས་མ་གྷོ་མེ་ཛ་ཡིས། ང་ལ་དགའ་མཁན་མང་པོ་ཞིག་གིས་ད་ལོའི་དབྱར་གཞུང་དུ་ང་རང་ཅུང་ཟད་སེམས་ཁམས་མ་སྐྱིད་པ་ཡོད་པ་ཤེས་འདུག་ལ། ཁ་ཤས་ཤིག་གིས་ངས་ཅིའི་ཕྱིར་གཞས་གསར་པ་འགྲེམ་སྤེལ་བྱེད་ཀྱི་མེད་པའི་སྐོར་དྲི་བ་དྲིས་བྱུང་། དེ་ནི་ཁོང་ཚོས་ང་ལ་དགའ་བོ་དང་དོ་སྣང་ཡོད་པའི་རྟགས་མཚན་ཞིག་ཡིན་སྟབས། རང་ཉིད་ལ་དགའ་སྤོབས་ཤིག་སྐྱེས་པ་མ་ཟད། སེམས་ལ་ཚོར་བའང་ཤུགས་ཆེན་པོ་ཞིག་སྤྲད་བྱུང་། ཞེས་དང་།  ངའི་མཁལ་མར་དཀའ་ངལ་འཕྲད་ནས་བརྗེ་དགོས་བྱུང་བར་བརྟེན། སྐབས་དེར་ངའི་རྨ་ཁ་གསོ་བཞིན་པའི་སྒང་ཡིན། ཞེས་བརྗོད་འདུག

གཞས་མ་གྷོ་མེ་ཛ་ཡིས་ཕྱི་ལོ་ ༢༠༡༥ ལོར་ཐོག་མར་རང་གི་མཁལ་མར་བརྟག་དཔྱད་བྱས་ཡོད་པ་དང་། ཕྱི་ལོ་ ༢༠༡༦ ལོར་ན་ཚ་དྲག་སྐྱེད་མ་བྱུང་བར་སྡུག་ཏུ་ཕྱིན་ཏེ། སྨན་བཅོས་ཀྱི་བརྒྱུད་རིམ་ཁྲོད་དུ་མོས་སེམས་འཚབ་དང་སེམས་སྡུག་ཆེན་པོ་མྱངས་རྗེས། མཐའ་མ་དེར་བཤའ་བཅོས་བྱས་ནས་མོའི་མཁལ་མ་གཅིག་བརྗེ་བོ་རྒྱག་དགོས་བྱུང་ཡོད་འདུག

ཁ་སང་གཞས་མ་གྷོ་མེ་ཛ་ཡིས་ད་དུང་མ་འོངས་པར་དེ་དང་འབྲེལ་བའི་པར་རིས་ཁ་ཤས་ཤིག་མོ་རང་གི་སྤྱི་ཚོགས་དྲྭ་བ་བརྒྱུད་སྤེལ་རྒྱུ་ཡིན་སྐོར་བརྗོད་ཡོད་པ་དང་། ད་ལྟ་གནས་སྐབས་མོས་སྨན་ཁང་གི་སྨན་པ་དང་ལས་རོགས། དེ་བཞིན། མོའི་གྲོགས་མོ་འཆམ་ཤོས་རཱ་ཡེ་སཱ་ལ་སྙིང་དབུས་ནས་བཀའ་དྲིན་ཆེ་ཞུ་ཡི་ཡོད་སྐོར་བརྗོད་པ་དང་འབྲེལ། གྲོགས་མོ་རཱ་ཡེ་སཱ་ཡིས་བློས་གཏོང་ཆེན་པོའི་ཐོག་ནས་ང་ལ་མོ་རང་གི་མཁལ་མ་གཅིག་བྱིན་པ་ནི་རྔན་པ་ཡག་ཤོས་དེ་ཡིན། ང་ལ་མོ་ནི་ཧ་ཅང་བཀའ་དྲིན་ཆེན་པོ་དང་། ང་རང་མོ་ལ་ཧ་ཅང་གིས་དགའ་བོ་ཡོད། ཅེས་བརྗོད་འདུག

གཞས་མ་གྷོ་མེ་ཛ་ནི་ད་ལྟ་རང་ལོ་ ༢༥ ཡིན་པ་དང་འཛམ་གླིང་ནང་སྤྱི་ཚོགས་དྲྭ་བ་ཨིན་སི་ཊ་གྷ་རཱམ་ཐོག་རྗེས་འཇུག་པ་མང་ཤོས་ཡོད་མཁན་ཞིག་ཡིན་པ་དང་། མོའི་གྲོགས་མོ་འཆམ་ཤོས་རཱ་སེ་ཡཱ་ནི་ད་ལྟ་རང་ལོ་ ༢༩ ཡིན་ཞིང་། ཨ་རིའི་བརྙན་འཕྲིན་གྱི་འཁྲབ་སྟོན་པ་ཞིག་ཡིན་ལ། ད་ལྟ་ཨ་རིའི་བརྙན་འཕྲིན་ཁང་གི་མུ་འབྲེལ་ལྟད་མོ་ཨ་རིའི་ན་གཞོན་གྱི་གསང་བའི་མི་ཚེ་(The Secret Life of the American Teenager)ཞེས་པ་དེ་འཁྲབ་སྟོན་བྱེད་བཞིན་ཡོད་འདུག

དབང་པོ་བགྲོ་འགྲེམ་འབྲེལ་མཐུད་ཚོགས་(The United Network for Organ Sharing)པས་བརྗོད་པ་ལྟར་ན། ཕྱི་ལོ་ ༢༠༡༦ ལོར་ཨ་རིའི་ནང་དབང་པོ་བརྗེ་བོ་རྒྱག་མཁན་མི་གྲངས་ ༣༣༠༠༠ ལྷག་བྱུང་ཡོད་པ་ལས། མི་གྲངས་ ༡༣༠༠༠ ལྷག་གིས་མཁལ་མ་བརྗེ་བོ་བརྒྱབས་ཡོད་པ་དང་། དེའི་ནང་ནས་མཁལ་མ་ ༥༦༢༩ ནི་མི་གསོན་པོས་སྦྱིན་པ་བཏང་བ་ཡིན་འདུག

གསར་འགོད་པ། ཉི་མ་ཚེ་རིང་།

བསྐྱར་བཅོས།: ༢༠༡༧/༠༩/༡༥

Leave a Reply

One thought on “གཞས་མ་གྲཊ་ཅན་ཞིག་གི་མཁལ་མ་བརྗེ་བོ་བརྒྱབས།