ལོ་རྒྱུས་ནང་བོད་རྒྱ་མི་རིཊ་མཉམ་གནས་ཐུབ་ན་མ་འོངས་པར་ག་རེ་བྱས་ནས་མི་ཐུབ་པ་རེད།

བོད་དོན་རྒྱབ་སྐྱོར་བ་རྒྱ་རིགས་དགེ་རྒན་ཆེན་མོ་ཞིག་གིས་ང་ཚོར་རང་དབང་ཆ་ཚང་བ་ཞིག་བྱུང་བའི་ཉིན་མོ་དེར་བོད་རྒྱ་མི་རིགས་གཉིས་ལམ་ཁ་ག་འདྲ་ཞིག་ལ་འགྲོ་མིན་དེ་སོ་སོར་རག་ལས་པ་རེད་ཅེས་བརྗོད་སོང་།
ཟླ་འདིའི་ཕྱི་ཚེས་ ༡༡ ཉིན་གྱི་ཕྱི་དྲོའི་ཆུ་ཚོད་༤།༣༠ སྟེང་དྷ་ས་ཡོངས་གླིང་སློབ་གྲྭའི་ཚོགས་ཁང་དུ། དབུས་བོད་ཀྱི་བུད་མེད་ལྷན་ཚོགས་དང་། དབུ་མའི་ལམ་མི་མང་ལས་འགུལ་ཁང་། ཆིག་སྒྲིལ་ཚོགས་པ། དྷ་ས་ཚོང་པ་ཚོགས་པ། དབུས་གཙང་ཆོལ་ཁ། དྷ་ས་མདོ་སྟོད་ཆོལ་ཁ། མདོ་སྨད་ཆོལ་ཁ་བཅས་ཚོགས་པ་བདུན་གྱི་གོ་སྒྲིག་འོག རྒྱ་རིགས་དགེ་རྒན་ཆེན་མོ་ཤ་མིང་ཞུ་བ་ཞིག་གིས་དབུ་མའི་ལམ་གྱིས་རྒྱ་རིགས་མི་མང་ཁྲོད་བཞག་པའི་ཤུགས་རྐྱེན་ཞེས་པའི་བརྗོད་གཞིའི་ཐོག་གཏམ་བཤད་གནང་། མཛད་སྒོའི་ཐོག་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་དང་བོད་མི་མང་སྤྱི་འཐུས་བློ་བཟང་ཆོས་འབྱོར་ལགས། དེ་བཞིན་སྤྱི་འཐུས་ཐུབ་བསྟན་ལུང་རིག་ལགས། སྤྱི་འཐུས་ཟླ་བ་ཚེ་རིང་ལགས། གཞན་ཡང་ཚོགས་འདུ་གོ་སྒྲིག་ཞུ་མཁན་ཚོགས་པ་ཁག་གི་འགན་འཛིན་དང་དྷ་ཤོད་བོད་ཁྱིམ་གྱི་སློབ་ཕྲུག་ཁག་ཅིག དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་༢༠༠ ལྷག་ཅིག་འཛོམས་འདུག

མཛད་སྒོའི་ཐོག་བོད་མི་མང་སྤྱི་འཐུས་བློ་བཟང་ཆོས་འབྱོར་ལགས་ནས་ལས་རིམ་ངོ་སྤྲོད་དང་འབྲེལ་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ནས་དགེ་རྒན་ཆེན་མོ་ཤ་མིན་ངོ་སྤྲོད་གནང་དོན། རྒྱ་རིགས་དགེ་རྒན་ཆེན་མོ་ཁོང་ནི་རྒྱ་ནག་སི་ཁྲོན་ཞིང་ཆེན་ནས་ཡིན་པ་དང་། ཁོང་གི་སློབ་སྦྱོང་གི་རྒྱུད་རིམ་ཚང་མ་རྒྱ་ནག་ནས་གནང་ཡོད་འདུག ད་ལྟའི་ཆར་ཨ་རིའི་ནེའུ་ཡོག་གྲོང་ཁྱེར་ནང་དུ་ཡོད་པའི་གཙུག་ལག་སློབ་གྲྭ་ཆེན་མོ་ཞིག་ཏུ་ཆབ་སྲིད་དགེ་རྒན་ཆེན་མོ་གནང་གི་ཡོད་པ་རེད། ཁོ་དང་བོད་ཀྱི་བར་ཕྱི་ལོ་ ༢༠༠༨ ལོ་ནས་འབྲེལ་བ་བྱུང་ཡོད་པ་དང་། ༢༠༠༩ ལོ་ནས་ཁོས་བོད་དོན་དང་འབྲེལ་བའི་བོད་དོན་རྒྱབ་སྐྱོར་ཚོགས་པའི་ཚོགས་འདུ་དང་། རྒྱ་རིགས་དང་འབྲེལ་བའི་ཚོགས་འདུ་སོགས་བོད་དོན་དང་འབྲེལ་བའི་ཚོགས་འདུ་མང་པོའི་ནང་དུ་མཉམ་ཞུགས་གནང་ཡོད་འདུག དེ་བཞིན་བོད་དོན་ཐོག་སྔ་རྗེས་སུ་རྩོམ་ཡིག་མང་པོ་ཞིག་སྤེལ་ཡོད་པ་དང་ཁོས་བྲིས་པའི་རྒྱ་ཡིག་གི་དེབ་མང་པོའི་ནང་དུ་ཚན་པ་མང་པོ་བོད་དོན་སྐོར་ཡིན་པ་རེད། ཁོས་༧ གོང་ས་མཆོག་ལ་ནང་ཆོས་སྐོར་ནས་སྔ་རྗེས་སུ་བཅར་འདྲི་བྱས་ཡོད་པ་དང་། བཀའ་བློན་ཁྲི་ཟུར་ཟམ་གདོང་རིན་པོ་ཆེའི་མདུན་ནས་ནང་ཆོས་དང་ལྟ་གྲུབ་སྐོར་ལ་བཀའ་སློབ་ཞུས་མྱོང་ཡོད་པ་རེད། ཉེ་ཆར་ཕྱི་ཟླ་༦ པའི་ནང་༧ གོང་ས་མཆོག་ཨ་རིར་ཆིབས་བསྒྱུར་བསྐྱངས་སྐབས་རྒྱ་རིགས་སློབ་ཕྲུག་ཚོས་ངོ་རྒོལ་བྱེད་མདོག་སྟོན་སྐབས། ཁོས་རྒྱ་རིགས་སློབ་ཕྲུག་ཚོར་༧ གོང་ས་སྐྱབས་མགོན་ཆེན་པོ་མཆོག་ངོ་ཤེས་རྒྱུ་གལ་ཆེན་ཡིན་པ་དང་དངོས་ནས་༧ གོང་ས་མཆོག་ལ་རྒྱུས་མངའ་བྱུང་བ་ཡིན་ན་ ༧ གོང་ས་མཆོག་མི་ག་འདྲ་ཞིག་ཡིན་པ་ཤེས་ཀྱི་རེད་ཅེས་རྒྱ་རིགས་སྤྱི་ཚོགས་ནང་ལ་གོ་རྟོགས་སྤེལ་བའི་རྩོམ་ཡིག་སྤེལ་མཁན་དེ་ཁོ་རང་རེད། ཁོ་རང་འདིར་ཕེབས་དགོས་དོན་གཙོ་བོ་དེ་ལྔ་དང་ལྔ་བཅུའི་ཚོགས་འདུར་བཅར་རྒྱུ་དང་། ཚེས་༡༣ ཉིན་རྒྱ་རིགས་ལས་དོན་གྱི་གལ་ཆེའི་རང་བཞིན་སྐོར་ལ་ཚོགས་འདུ་ཚོགས་བཞིན་ཡོད་པ་སོགས་ལ་བཅར་བ་རེད། ཅེས་བརྗོད་སོང་།

དེའི་རྗེས་དགེ་རྒན་ཆེན་མོ་ཤ་མིང་ལགས་ཀྱིས་གཏམ་བཤད་མགོ་འཛུགས་དང་ཁོ་རང་བོད་དང་འབྲེལ་བ་བྱུང་སྟངས་སྐོར་ནས། ང་རང་ལ་མཚོན་ན་རྒྱ་ནག་ཏུ་ཡོད་སྐབས་བོད་ཀྱི་བདེ་སྡུག་ལས་དབང་ཟེར་བ་སོགས་ལ་དོ་སྣང་གང་ཡང་མེད་ལ་དོ་སྣང་བྱ་འདོད་ཀྱང་མེད། རྒྱ་ནག་གིས་བོད་སྐོར་ལ་སློབ་སྦྱོང་སྤྲོད་སྟངས་དེ་བོད་ནི་ཆེས་རྗེས་ལུས་དང་ཆེས་མུན་ནག་ཆེས་ཀླ་ཀློ་ལྟ་བུ་ཞིག་ལས། བོད་ཀྱི་ཆོས་དང་རིག་གཞུང་དག་ཐུན་མོང་མ་ཡིན་པ་དང་ཕན་ཐོགས་ཅན་ཞིག་ཡིན་པ་སློབ་གསོའི་ནང་དུ་ཡོད་པ་མ་རེད། དེ་བཞིན་ཆབ་སྲིད་ཀྱི་ངོས་ནས་༧རྒྱལ་བ་རིན་པོ་ཆེ་དང་བོད་མི་བཙན་བྱོལ་བར་ཏཱ་ལའི་རུ་ཚོགས་དང་རྒྱ་ནག་ཁ་བྲལ་གཏོང་མཁན་རེད་ཅེས་སློབ་གསོ་སྤྲོད་ཀྱི་ཡོད་པ་ལྟར། དེ་འདྲའི་སློབ་གསོ་ཐེབས་ཡོད་པའི་མི་ཞིག་རྗེས་སུ་ ༢༠༠༨ ལོར་ཨ་རིའི་ནེའུ་ཡོག་གྲོང་ཁྱེར་ནང་༧ གོང་ས་མཆོག་དང་ཞལ་མཇལ་ཐུབ་པ་བྱུང་བ་རེད། ༢༠༠༨ ལོ་ནས་༧ གོང་ས་མཆོག་དང་མཇལ་འཕྲད་བྱུང་བ་ནས་ཁོ་རང་དང་དགེ་རྒན་ཆེན་མོ་གཞན་ཞིག་བཅས་༧རྒྱལ་བ་རིན་པོ་ཆེ་གདན་འདྲེན་ཞུས་ཏེ། རྒྱ་རིགས་མི་མང་དང་སློབ་ཕྲུག་ཚོར་ཚོགས་འདུ་གོ་སྒྲིག་བྱས་པ་ཡིན་ལ། ད་ཐེངས་༧ གོང་ས་མཆོག་དང་མཇལ་བཅར་ཐུབ་པ་ནས་རྩིས་པ་ཡིན་ན་ད་ལྟ་བར་ཐེངས་༡༥ ལྷག་ལ་མཇལ་འཕྲད་ཞུས་པ་ཡིན། དུས་དེ་ནས་བཟུང་བོད་མི་རིགས་དང་བོད་ཀྱི་རིག་གཞུང་ཆོས་ལུགས་སོགས་ག་འདྲ་ཞིག་ཡིན་པ་ཤེས་པའི་གོ་སྐབས་བྱུང་བ་མི་ཚེའི་ནང་སྐལ་བ་བཟང་བོ་ཡིན། ཞེས་བརྗོད་སོང་།

ཡང་དབུ་མའི་ལམ་ལ་ངོས་འཛིན་བྱུང་ཚུལ་དང་དབུ་མའི་ལམ་གྱིས་རྒྱ་རིགས་མི་མང་ནང་ཤུགས་རྐྱེན་ཐེབས་ཚུལ་སྐོར་བརྗོད་སྐབས། ཁོང་རང་༧ གོང་ས་མཆོག་དང་མཇལ་བཅར་ཞུ་བའི་སྐབས་བོད་ཀྱི་ཆོས་དང་རིག་གཞུང་། ལོ་རྒྱུས་དང་ཆབ་སྲིད་སོགས་ཀྱི་སྐོར་ལ་སྐད་ཆ་མང་པོ་དྲིས་ཡོད་པ་དང་། ༧གོང་ས་མཆོག་ནས་ཆབ་སྲིད་ཀྱི་ཐད་ནས་ང་ཚོས་རང་བཙན་དགོས་ཞེས་བཤད་ཀྱི་མེད་པ་དང་རང་བཙན་མི་དགོས་ཞེས་བཤད་ན་ལོ་རྒྱུས་ཐོག་ནས་ང་ཚོ་རང་བཙན་མ་རེད་ཅེས་ཞུ་ཡི་མེད་པར། ང་ཚོས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་འོག་ནས་ཆེས་མཐོའི་རང་སྲིད་རང་སྐྱོང་དགོས་ཞེས་བཤད་ཀྱི་ཡོད་པ་རེད་ཅེས་གསུངས་བྱུང་། དབུ་མའི་ལམ་གྱིས་རྒྱ་རིགས་མི་མང་ནང་ཤུགས་རྐྱེན་ཆེ་ཤོས་དེ་རྒྱ་མི་རིགས་ལ་ངོ་རྒོལ་བྱེད་ཀྱི་མེད་པ་དང་རྒྱ་ནག་རྒྱལ་ཁབ་ལ་ངོ་རྒོལ་བྱེད་ཀྱི་མེད་པར། ད་ལྟའི་རྒྱ་ནག་གཞུང་གིས་བོད་ཐོག་འཛིན་བཞིན་པའི་སྲིད་བྱུསདེ་འགྲིག་གི་མི་འདུག་ཅེས་ངོ་རྒོལ་བྱེད་ཀྱི་ཡོད་པ་དེས། རྒྱ་རིགས་སྤྱི་ཚོགས་ནང་བག་ཆགས་དང་ཤུགས་རྐྱེན་ཆེན་པོ་བཞག་ཡོད། ཅེས་བརྗོད་སོང་།

བོད་ཀྱི་དབུ་འཁྲིད་ཚོས་འགྲེལ་བཤད་གནང་བ་བཞིན་ང་ཚོ་བོད་རྒྱ་གཉིས་ལོ་རྒྱུས་ནང་ཐང་དང་སུང་མིང་རྒྱལ་རབས་སྐབས་མང་པོ་མཉམ་གནས་བྱེད་ཐུབ་ཡོད་པ་རེད། ལོ་རྒྱུས་ནང་བོད་རྒྱ་མི་རིགས་གཉིས་ཡུན་རིང་མཉམ་གནས་ཐུབ་སར་མ་འོངས་པར་གནས་མི་ཐུབ་པ་གང་ཡང་ཡོད་པ་མ་རེད་ལ། ཉེ་བའི་ལོ་ངོ་དྲུག་བཅུའི་རིང་རྒྱ་ནག་གཞུང་གིས་བོད་ནང་སྲིད་བྱུསའཛིན་སྟངས་མ་འགྲིག་པས་བོད་རྒྱ་བར་ཀྱི་འབྲེལ་ལམ་ལ་གཏོར་བཤིག་ཆེན་པོ་ཐེབས་ཡོད་ཀྱང་། ད་ལྟའི་བོད་ཀྱི་དངོས་ཡོད་གནས་སྟངས་དང་རྒྱལ་སྤྱིའི་སྤྱི་ཚོགས་ཀྱི་ཆབ་སྲིད་གནས་བབ། རྒྱ་དཀར་ནག་གི་ཆབ་སྲིད་གནས་བབ་གང་ལ་བལྟས་པ་ཡིན་ནའང་། ང་ཚོའི་དགོས་མཁོ་དང་འཚམས་ཤོས་དང་ཡག་ཤོས་དེ་དབུ་མའི་ལམ་ཡིན་པར་ངོས་འཛིན་བྱེད་ཀྱི་ཡོད་པ་དང་། དབུ་མའི་ལམ་ལ་རྒྱུས་མངའ་བྱུང་བ་ནས་དབུ་མའི་ལམ་དེ་དངོས་ཡོད་གནས་ཚུལ་དང་མཐུན་པ་གནད་འགག་ཆེན་པོ་ཞིག་ཡིན་པ་མཐོང་གི་ཡོད་སྐོར་བརྗོད་སོང་།

རྒྱ་ནག་ནང་དུ་མི་མང་པོ་ཞིག་གིས་དབུ་མའི་ལམ་སྐོར་ལ་གང་ཡང་གོ་ཡི་མེད་པ་དང་རྒྱ་ནག་གཞུང་གིས་དབུ་མའི་ལམ་གྱི་སྲིད་བྱུསརྒྱ་ནག་ནང་དུ་དམ་དྲག་བྱེད་ཀྱི་ཡོད་པའི་སྐོར་ལ་ཁོང་གིས། རྒྱ་རིགས་ཤེས་ཡོན་པ་མང་པོ་ཞིག་གིས་དབུ་མའི་ལམ་གྱི་སྲིད་བྱུས་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་བྱེད་ཀྱི་ཡོད་ན་ཡང་། རྒྱ་ནག་གི་དམ་དྲག་ལ་བརྟེན་ནས་རྒྱ་ནག་ནང་གི་ཤེས་ཡོན་ཅན་མང་པོ་ཞིག་གིས་དབུ་མའི་ལམ་གྱི་སྲིད་བྱུས་སྐོར་གོ་ཐོས་བྱུང་ཐུབ་ཀྱི་མེད་པ་དང་། ཁ་ཤས་ཀྱིས་དབུ་མའི་ལམ་གྱི་སྐོར་ལ་གོ་བ་ཡིན་ནའང་དངོས་ནས་དེ་འདྲ་ཞིག་ཡིན་ནམ་བསམ་ནས་དོགས་པ་སླེབས་ཀྱི་ཡོད་པ་རེད། ཁོ་ཚོར་དབུ་མའི་ལམ་དེ་དངོས་ནས་དེ་འདྲ་ཡོད་པ་རེད་ཅེས་བཤད་པ་ཡིན་ན་ཧང་སང་བ་དང་། དེ་སྔོན་དེ་འདྲིའི་སྲིད་བྱུས་ཤིག་ཡོད་པ་རྩ་ནས་ཧ་གོ་མ་མྱོང་ཞེས་དགའ་ཚོར་ཆེན་པོས་བཤད་པ་རེད། དེ་འདྲ་ཡིན་པའི་རྒྱུ་མཚན་གྱིས་རྒྱ་ནག་གཞུང་གི་དབུ་མའི་ལམ་གྱི་ནང་དོན་དང་དབུ་མའི་ལམ་དེ་ག་འདྲ་ཞིག་ཡོད་པ་རྒྱ་ནག་ནང་ལོག་གི་མི་མང་ལ་ཤེས་བཅུག་གི་མེད་པ་དང་། གཉིས་པ་དེ་༧ གོང་ས་མཆོག་གི་མཛད་པ་དང་དགོངས་གཞི་དེ་རྒྱ་ནག་ནང་དུ་ག་དུས་ཡིན་ནའང་བཀག་སྡོམ་བྱས་ཏེ་རྒྱ་ནག་མི་མང་ལ་ཤེས་བཅུག་གི་མེད་པ་རེད། ཡང་མིན་ན་དབུ་མའི་ལམ་གྱི་ནང་དོན་འགེབ་ཐབས་དང་ཡང་མིན་ན་དབུ་མའི་ལམ་གྱི་ནང་དོན་དེ་འཁྱོག་བཤད་ཀྱིས་རྒྱ་ནག་མི་མང་ལ་ངོ་སྤྲོད་བྱེད་ཀྱི་ཡོད་པ་རེད། དབུ་མའི་ལམ་གྱི་ནང་དོན་བཀབ་པ་ཡིན་ན་བཀབ་པ་རེད་དེ་འཁྱོག་བཤད་བྱས་ཏེ། དབུ་མའི་ལམ་སྐྱག་རྫུན་རེད། དབུ་མའི་ལམ་རང་བཙན་དང་ཁ་བྲལ་རེད་ཅེས་འཁྱོག་བཤད་བྱེད་ཀྱི་ཡོད་པ་རེད། གལ་ཏེ་དབུ་མའི་ལམ་དེ་ཤེས་བཅུག་གི་མེད་པ་མ་གཏོགས་ཤེས་བཅུག་པ་ཡིན་ན་དེ་ལ་ཤུགས་རྐྱེན་ཆེན་པོ་ཞིག་ཡོད་པ་དང་དེས་མི་མང་པོ་ཞིག་གི་བསམ་བློར་འགྱུར་བ་ཐེབས་ཀྱི་ཡིན་པ་ཤེས་ཀྱི་ཡོད་པ་རེད། མཚམས་རེར་ངའི་ཚོར་སྣང་ལ་དབུ་མའི་ལམ་གྱིས་རྒྱ་རིགས་ཚང་མར་མགོ་སྒུར་གྱི་ཡོད་པ་དང་། དབུ་མའི་ལམ་གྱིས་མི་ཚང་མ་བསྡམས་ནས་ཡོད་པས་གང་ཡང་བྱ་ས་མེད་པ་རེད་ཅེས་རྒྱ་ནག་གཞུང་གིས་མི་ཁག་ཅིག་ལ་དེ་ལྟར་བཤད་བཅུག་གི་མེད་དམ་བསམ་གྱི་འདུག་ལ། ཡང་རྒྱ་རིགས་ཁག་ཅིག་གིས་དབུ་མའི་ལམ་དེ་རྒྱ་རིགས་ཁག་ཅིག་གིས་༧རྒྱལ་བ་རིན་པོ་ཆེར་མགོ་སྐོར་བཏང་ནས་བཏོན་པ་ཡིན་མདོག་གི་འགྲེལ་བཤད་བརྒྱབ་མཁན་ཡོང་གི་འདུག ༧རྒྱལ་བ་རིན་པོ་ཆེ་ལ་མཚོན་ན། འཛམ་གླིང་གི་བསམ་པའི་གཙོ་འཛིན་རེད་ལ་རྣམ་དཔྱོད་མཚོ་ལྟར་ཟབ་པའི་མི་ཞིག་ང་ཚོ་རྒྱ་རིགས་ཚོས་ག་འདྲ་བྱས་ནས་མགོ་སྐོར་གཏོང་ཐུབ་པ་རེད། ང་རང་ལ་མཚོན་ན་༧རྒྱལ་བ་རིན་པོ་ཆེ་ལ་ཉེ་བོ་དང་དབུ་མའི་ལམ་ལ་རྒྱབ་སྐྱོར། བོད་དོན་ལ་དོ་སྣང་བྱས་པ་དེས་རྒྱ་ནག་གཞུང་གི་གསང་བའི་ལས་ཁུངས་ཀྱིས་ཉེན་བརྡ་བཏང་བ་བྱུང་སོང་ལ། ང་རང་ཕྱིར་རང་གི་མེས་རྒྱལ་ལ་འགྲོ་མ་ཐུབ་པར་མི་ལོ་ཧྲིལ་བོ་དགུ་ཟིན་ཡོད་ན་ཡང་། རང་གི་མེས་རྒྱལ་བློས་བཏང་ནས་༧རྒྱལ་བ་རིན་པོ་ཆེའི་ལམ་ཁ་བདམས་པ་དེ་འགྲིག་འདུག་བསམ་པ་ལས་བློ་ཕམ་དང་འགྱོད་སེམས་གང་ཡང་མེད། ཅེས་ཟེར།

མ་འོངས་པར་དབུ་མའི་ལམ་གྱིས་རྒྱ་བོད་བར་གྱི་རྩོད་རྙོག་སེལ་ཐུབ་པ་དང་རྒྱ་ནག་ལ་འགྱུར་བ་ཐེབས་རྒྱུ་ཡིན་པའི་སྐོར་ལ་ཁོང་གིས། ད་ནང་ཞོགས་པར་ང་དང་རྒྱ་རིགས་ཤེས་ཡོན་ཅན་ཁག་ཅིག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་མཇལ་འཕྲད་ཞུས་པ་ཡིན། སྐབས་དེར་སྲིད་སྐྱོང་མཆོག་གིས་བོད་རེ་བས་ཕོངས་དང་རྒྱ་དོགས་པས་ཕོངས་ཞེས་པའི་གཏམ་དཔེ་ཞིག་གསུངས་བྱུང་། ང་རང་ངོས་ནས་བོད་པ་ཚོར་དབུ་མའི་ལམ་ལ་རེ་བ་མུ་མཐུད་བརྒྱབ་དགོས་པ་རེད་ལ་དོགས་པ་གང་ཡང་བྱ་དགོས་མ་རེད། དེ་བཞིན་སྡིངས་ཆ་འདི་བརྒྱུད་རྒྱ་རིགས་གྲོགས་པོ་ཚོར་དབུ་མའི་ལམ་ལ་དོགས་པ་གང་ཡང་བྱ་དགོས་མ་རེད་ལ། དེ་ག་དུས་ཡིན་ནའང་རྒྱ་བོད་གཉིས་སྨན་གྱི་ལམ་ཆགས་ཀྱི་ཡོད་དུས། རེ་བ་བརྒྱབ་མཁན་གྱིས་བརྒྱབ་དོགས་པ་མི་དགོས་སར་དོགས་པ་མ་བྱས་པ་ཡིན་ན། ང་ཚོར་འབྲས་བུ་ཡོད་པ་བརྒྱ་ཆ་བརྒྱ་གདེང་ཚོད་ཡོད་པའི་ངང་ནས་བཤད་ཀྱི་ཡོད། ད་ལྟ་བོད་ལ་མཚོན་ན་དབུ་མའི་ལམ་གྱི་འོག་ནས་རང་སྐྱོང་རྩོད་ཀྱི་ཡོད་པ་རེད་ལ། ང་ཚོ་རྒྱ་རིགས་ཚོར་མཚོན་ན་རང་དབང་རྩོད་ཀྱི་ཡོད་པ་རེད། ཡིན་ན་ཡང་། མ་འོངས་པར་ང་ཚོ་ཚང་མར་ཆ་ཚང་བའི་རང་དབང་ཞིག་བྱུང་བའི་ཉིན་མོ་དེར། བོད་རྒྱ་མི་རིགས་གཉིས་ལམ་ཁ་ག་འདྲ་ཞིག་ལ་འགྲོ་མིན་དེ་བོད་མི་རིགས་དང་རྒྱ་མི་རིགས་སོ་སོར་རག་ལས་པ་ལས། བཙན་དབང་བྱས་ཏེ་ངེས་པར་དུ་མཉམ་འདུག་བྱ་དགོས་པ་རེད་ཅེས་བཤད་ས་མེད་པ་རེད། དེ་ཡིན་དུས་ང་ཚོ་ཚང་མས་ད་ལྟའི་གནས་སྟངས་ལ་གཟིགས་ནས་ཁེར་རྐྱང་མ་ཡིན་པར་ཐུན་མོང་གི་ཁེ་ཕན་གྱི་ཐོག་ནས་རང་དབང་རྩོད་དགོས་པ་གལ་ཆེན་པོ་རེད། མ་འོངས་པའི་རྒྱ་ནག་དེ་འགྱུར་བ་འགྲོ་རྒྱུ་ཡིན་པ་ཐག་ཆོད་ཚར་རེད་ལ། ད་ལྟའི་ཆར་རྒྱ་ནག་ནང་དུ་བསམ་བློའི་མཐོ་རླབས་མང་པོ་ཞིག་འཕྱུར་བསྡད་ཡོད་པ་རེད། དེ་ག་རེ་རེད་ཅེས་ན། རྒྱ་ནག་མི་མང་ཁྲོད་ཆོས་ལ་དད་པ་བྱེད་མཁན་མང་པོ་ཞིག་ཡོང་གི་ཡོད་པ་དང་། དེའི་ནང་ནས་བོད་བརྒྱུད་ནང་བསྟན་ལ་དད་པ་བྱེད་མཁན་མང་པོ་ཞིག་ཡོང་གི་ཡོད་པ་རེད་ལ། རྒྱ་ནག་ཁྱོན་ཡོངས་སུ་བོད་བརྒྱུད་ནང་བསྟན་དང་ཆོས་ལ་དད་པ་བྱེད་མཁན་མང་རུ་ཕྱིན་པ། ཆོས་ལ་བསམ་བློ་གཏོང་མཁན་མང་པོ་བྱུང་བ་ཡིན་ན། རྒྱ་ནག་ནང་དུ་གནར་གཅོད་དང་སྡུག་བསྔལ་མྱོང་བསྡད་པའི་གྲངས་ཉུང་མི་རིགས་ཁག་ལ་བྱམས་བརྩེ་དང་སྙིང་བརྗེ་འདྲ་མཉམ་དགོས་པའི་བསམ་བློ་གཏང་སྟེ་འགྱུར་བ་འགྲོ་བར་ཏག་ཏག་ཡིད་ཆེས་ཡོད། ད་ལྟའི་ཆར་རྒྱ་ནག་གི་དཔལ་འབྱོར་དེ་ཧ་ཅང་ཡར་རྒྱས་ཕྱིན་ཡོད་པ་རེད་ལ་དེ་བདེན་པ་ཆགས་ཀྱི་ཡོད་པ་རེད། ཡིན་ན་ཡང་། དེ་དང་ཆབས་ཅིག་རྒྱ་ནག་ནང་ལོགས་སུ་སྤྱི་ཚོགས་ཀྱི་གནས་ཚུལ་མང་པོ་ཞིག་ཐོན་ཡོང་གི་ཡོད་པ་དང་། དེ་ལ་བརྟེན་ནས་རྒྱ་ནག་གིས་རྒྱལ་སྲུང་གི་དངོས་རྫས་ཀྱི་གྲངས་འབོར་ལས་རྒྱལ་ནང་གི་བདེ་འཇགས་སྲུང་སྐྱོབ་བྱེད་པའི་དངོས་རྫས་ཀྱི་གྲངས་འབོར་མང་རུ་ཆགས་བསྡད་ཡོད་པ་རེད། དེ་ཡིན་དུས་རྒྱ་ནག་གི་དྲག་གནོན་བྱེད་བཞིན་པའི་སྲིད་བྱུས་མཁྲེགས་པོ་དེ་མ་འོངས་པར་རྒྱུན་རིང་གནས་ཐབས་མེད་པར་འགྱུར་བ་ཞིག་མ་ཐེབས་ཀ་མེད་ཆགས་བསྡད་ཡོད་པ་རེད། ཅེས་བརྗོད་སོང་།

ཁོས་བོད་པ་ཚོས་དབུ་མའི་ལམ་དེ་བོད་ཙམ་མ་ཡིན་པར་འཛམ་གླིང་ཡོངས་ལ་གལ་ཆེན་ཆགས་ཡོད་པ་དང་། བོད་པ་ཚོས་འཚེ་མེད་ཞི་བའི་ལམ་ནས་རྒྱ་གཞུང་ལ་ངོ་རྒོལ་བྱེད་བཞིན་པའི་སྐོར་ལ། སྤྱིར་ད་ལྟའི་ཆར་འཛམ་གླིང་གི་དཀའ་ངལ་མང་ཆེ་བ་ས་མཐོ་ས་དང་རི་མཐོ་སར་གནས་པའི་ས་ཁུལ་ཁག་ཏུ་བྱུང་གི་ཡོད་པ་རེད། དཔེར་ན། ཁམ་བྷོ་ཊེ་ཡཱ་དང་ཝེ་ཐི་ནམ། རྒྱ་གར་དང་བྷང་ལ་དྷེ་ཤི། པ་ཀི་སི་ཐན་དང་རྒྱ་ནག་སོགས་འཛམ་གླིང་གི་ས་ཁྲའི་དབྱིབས་ནས་བལྟས་པ་ཡིན་ན། རི་མཐོ་ས་མཐོའི་ཡུལ་གྲུ་ཁག་ཏུ་དཀའ་ངལ་དེ་བྱུང་གི་ཡོད་དུས། དེ་དག་སེལ་ཐབས་ལ་ནང་ཆོས་ནང་ཡོད་པའི་རྒྱ་གར་གྱི་ལྟ་གྲུབ་སོགས་ཀྱི་ཕན་ཐོགས་ཆེན་པོ་བྱུང་གི་རེད་ལ། དེའི་ནང་དུ་གྷན་དྷི་མཆོག་གི་འཚེ་མེད་ཞི་བའི་ལྟ་གྲུབ་དང་། ༧ གོང་ས་མཆོག་གི་བོད་ཀྱི་དཀའ་རྙོག་སེལ་ཐབས་ཀྱི་དབུ་མའི་ལམ་སོགས་མ་འོངས་པར་བོད་ཙམ་མ་ཟད་འཛམ་གླིང་ཡོངས་པ་ཕན་ཐོགས་ཡོང་གི་རེད། ༧ གོང་ས་མཆོག་གིས་ནམ་རྒྱུན་འཚེ་བ་མེད་པ་མང་པོ་ཞིག་གསུངས་བསྡད་ཡོད་པ་རེད་ལ། སྤྱིར་འཚེ་བ་མེད་པ་ཞེས་པ་དེ་གཞན་ལ་ངོ་རྒོལ་བྱས་པ་དེ་འཚེ་བ་མེད་པ་ཆགས་ཀྱི་ཡོད་པ་རེད་ལ། གཞན་དང་མཉམ་ལས་མ་བྱས་པ་དེ་ཡང་འཚེ་བ་མེད་པ་ཆགས་ཀྱི་ཡོད་པ་རེད། འཚེ་བ་མེད་པའི་ལམ་ཅེས་པར་ལམ་མང་པོ་ཡོད་པ་རེད། ང་རང་ལ་མཚོན་ན། བོད་མི་ཚོས་འཚེ་མེད་ཞི་བའི་ངོ་རྒོལ་གནང་བཞིན་པར་མཉམ་ཞུགས་མང་པོ་གནང་མྱོང་ཡོད་ལ། བོད་མི་ཚོས་རང་བསྲེགས་ཀྱིས་འཚེ་མེད་ཞི་བའི་ལམ་ནས་ངོ་རྒོལ་གནང་བཞིན་པ་དེ་ཧ་ཅང་རླབས་ཆེན་པོ་དང་། ཧ་ལས་པའི་སྙིང་སྟོབས་ཆེན་པོ་རེད་དེ་ང་ཚོར་ཚུར་རག་པ་དེ་ཙམ་ཞིག་ཡིན་དུས། ང་རང་རྒྱ་རིགས་ཤིག་གི་ངོས་ནས་སེམས་ནང་ཕངས་པོ་བྱུང་སོང་བསམ་པ་ཡོང་གི་འདུག ད་ལྟའི་ཆར་ང་ཚོ་རྒྱ་མི་རིགས་ཡིན་ན་རེད། བོད་པ་ཚོ་ཡིན་ནའང་རེད། ཕྱོགས་གཉིས་ཀྱིས་རང་དབང་ཆེད་དུ་འཐབ་རྩོད་བྱེད་ཀྱི་ཡོད་པ་རེད། མ་འོངས་པར་ང་ཚོ་ཕྱོགས་གཉིས་ཀར་ཐུན་མོང་གིས་རང་དབང་ཞིག་རག་པ་ཡིན་ན། དེ་དུས་རྒྱ་མི་རིགས་ཚོས་བོད་པ་ཚོར་ཐུབ་ཚོད་དང་བརྙས་བཅོས་བྱས་ཏེ་བོད་པ་ཚོས་རྒྱ་ནག་ལས་ལོགས་སུ་འགྲོ་ཡི་ཡིན། རང་བཙན་གྱི་ལམ་ཁར་འགྲོ་ཡི་ཡིན་ཞེས་ལམ་ཁ་ག་འདྲ་ཞིག་ལ་འགྲོ་ཡི་ཡོད་ནའང། སྐབས་དེར་བོད་པ་ཚོར་ངའི་ངོས་ནས་རྒྱབ་སྐྱོར་ཡོད། སྤྱིར་ང་ཚོ་མི་ཞིག་ལ་མཚོན་ན། གཉེན་སྒྲིག་བྱེད་པའི་རང་དབང་ཡོད་པ་རེད་ལ་ཁ་ཁ་བྱེད་རྒྱུའི་རང་དབང་ཡོད་པ་རེད། བོད་མི་རིགས་ལ་མཚོན་ན་རང་བཙན་བྱེད་རྒྱུའི་ཐོབ་ཐང་ཆ་ཚང་ཡོད་པ་རེད། ཡིན་ན་ཡང་། ད་ལྟའི་དངོས་ཡོད་གནས་བབ་ལ་བལྟས་ཏེ་ངེས་པར་དུ་རང་དབང་གིས་ལོགས་སུ་བུད་པ་ཡིན་ན་དགེ་མཚན་གང་ཡང་ཡོད་པ་མ་རེད། ཅེས་ཟེར།

མཇུག་ཏུ་མི་ཞིག་གིས་ད་ལྟ་གོང་གི་གཏམ་བཤད་ནང་དུ་བོད་རྒྱ་མི་རིགས་གཉིས་མཉམ་གནས་བྱས་ཏེ་བསྡད་པ་རེད་ཅེས་བརྗོད་སོང་། མཉམ་གནས་ཞེས་པ་དེ་བོད་རྒྱ་མི་རིགས་གཉིས་ཁྱིམ་མཚེས་བྱས་ཏེ་མཉམ་གནས་བྱས་པ་རེད་ཅེས་བཤད་བཞིན་ཡོད་དམ། བོད་རྒྱ་ཁོངས་བྱས་ཏེ་མཉམ་གནས་བྱས་པ་རེད་ཅེས་བརྗོད་བཞིན་ཡོད་དྲིས་པར། བོད་རྒྱ་གཉིས་ལོ་རྒྱུས་ནང་འཆམ་མཐུན་གྱིས་མཉམ་གནས་བྱས་ཡོད་པ་རེད་ལ་མ་འཆམ་པའི་དུས་ཡང་བྱུང་ཡོད་པ་རེད། དེ་ང་རང་གིས་འདས་པའི་ལོ་རྒྱུས་ཀྱི་གནས་ཚུལ་ཞིག་བཤད་པ་ཡིན། སྔོན་མའི་རྒྱ་ནག་གི་རྒྱལ་ཁབ་ལ་ཕྱིར་བལྟས་བྱས་པ་ཡིན་ན་སྐབས་དེ་དུས་ཀྱི་རྒྱལ་རབས་ཚང་མ་ཆོས་ལ་དད་པ་ཡོད་མཁན་རྐྱང་རྐྱང་ཡིན་པ་དང་། ད་ལྟའི་ཆར་གུང་ཁྲན་ཏང་བསླེབས་པ་དང་ཆོས་དད་མེད་མཁན་རྐྱང་རྐྱང་གི་གཞུང་ཞིག་ཆགས་པ་རེད། དེ་ཡིན་དུས་ཕན་ཚུན་མཉམ་གནས་བྱེད་རྒྱུར་དཀའ་ངལ་བྱུང་བ་རེད། མ་འོངས་པར་རྒྱ་རིགས་མི་མང་གི་སེམས་ནང་ཆོས་དད་སླེབས་པ་ཡིན་ན་མཉམ་དུ་གནས་རྒྱུར་དཀའ་ངལ་གང་ཡང་ཡོད་པ་མ་རེད། ཅེས་བརྗོད་སོང་།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༧/༡༠/༡༢

Leave a Reply

One thought on “ལོ་རྒྱུས་ནང་བོད་རྒྱ་མི་རིཊ་མཉམ་གནས་ཐུབ་ན་མ་འོངས་པར་ག་རེ་བྱས་ནས་མི་ཐུབ་པ་རེད།

  1. རྒྱ་རིགས་ཤེས་ཡོན་པ་མང་པོ་ཞིག་གིས་དབུ་མའི་ལམ་གྱི་སྲིད་བྱུས་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་བྱེད་ཀྱི་ཡོད་ན་ཡང་། རྒྱ་ནག་གི་དམ་དྲག་ལ་བརྟེན་ནས་རྒྱ་ནག་ནང་གི་ཤེས་ཡོན་ཅན་མང་པོ་ཞིག་གིས་དབུ་མའི་ལམ་གྱི་སྲིད་བྱུས་སྐོར་གོ་ཐོས་བྱུང་ཐུབ་ཀྱི་མེད་པ་དང་། ཞེས་གསུང་སྔ་ཕྱི་གཉིས་པོ་འགལ་ཟླར་མཐོང་། ཅི་ལ་ཞེ་ན། རྒྱ་དམར་གྱིས་དམ་དྲག་ལས་དབུ་མའི་ལམ་གྱི་སྲིད་བྱུས་གོ་ཐོས་བྱུང་ཐུབ་ཀྱི་མེད་ན། དེ་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་ཇི་ལྟར་བྱེད་དམ་སྙམ་པས་རང་ཚིག་སྔ་ཕྱི་གཉིས་པོ་འགལ་བ་ལྟ་བུར་མཐོང་། དེ་མིན་ཁོང་གི་གསུང་བཤད་དེ་ད་ལྟའི་ཆ་ནས་བལྟས་ན་དངོས་ཡོད་གནས་ཚུལ་ལ་བདེན་རྒྱབ་དང་རང་དབང་ལ་གཞི་བཅོལ་ཏེ་གསུངས་པ་ཞིག་ཏུ་མངོན། ལར་ནས་ད་ལྟའི་གནས་བབས་ལ་བསམ་གཞིག་གིས་རང་བཙན་བརྩོད་ཕྱོགས་ལའང་ཁོང་གི་གསུང་བཤད་དེ་ཅུང་དངོས་བདེན་ལ་ཕྱོགས་ཏེ་གསུངས་པའི་ཚོར་བ་བྱུང་། སྤྱིར་༧གོང་ས་མཆོག་གིས་ཀྱང་ང་ཚོར་ད་ལྟའི་གནས་བབ་དང་བསྟུན་ནས་ཁེ་ཕན་བླང་དགོས་པའི་ཆབ་སྲིད་ཀྱི་ལྟ་གྲུབ་རྨ་མེད་པའི་ཐོག་ནས་ཡང་ནས་ཡང་དང་། དུས་ནས་དུས་སུ་གསལ་པོར་གསུངས་ཡོད་ཀྱང་། ལ་ལས་བསམ་བཞིན་མགོ་རྨོངས་འཇུག་པའི་ཟུར་ཟ་དང་ལོག་འགྲེལ་འདྲ་མིན་རྒྱོབ་བཞིན་པ་དེ་དག་ནི་རང་གི་ཁེ་ཕན་ཁོ་ན་སྒྲུབ་ཐབས་ཙམ་ལས་སྤྱི་སྨན་གྱི་བསམ་འཆར་ཞིག་ཏུ་གཏན་ནས་མ་མཐོང་ངོ།།