ལོ་མང་རིང་རྒྱ་ནག་གི་ཕྱུག་ཨང་དང་པོ་དང་གཉིས་པ་ཆགས་པའི་ཊ་ལིན་ཝན་ཊ་གློག་བརྙན་བཟོ་སྐྲུན་ཁང་དང་ཨ་ལི་བྷ་བྷ་མར་ཟེགས་ཡོད་འདུག

ཁ་སང་རྒྱ་ནག་གི་ཧུའུ་རན་(Hurun)དྲ་བས་འདི་ལོའི་རྒྱ་ནག་རྒྱལ་ཡོངས་ཀྱི་ཕྱུག་བདག་སྙན་ཐོ་ཕྱིར་བསྒྲགས་བྱས་པ་ལྟར་ན། རང་ལོ་ ༤༣ ཡིན་པའི་ས་ཁང་འཛུགས་སྐྲུན་གྱི་ཚོང་གཉེར་བ་ཞེ་ཅཱ་ཡེན་(Xu Jiayin)ཟེར་བ་རྒྱ་ནག་གི་ཕྱུག་བདག་ཨང་དང་པོ་ཆགས་ཡོད་པ་དང་། དེ་བཞིན། རྒྱ་ནག་གི་སྤྱི་ཚོགས་བརྒྱུད་ལམ་ཁག་གསར་དུ་འཛུགས་མཁན་མཱ་ཧྭ་ཐིན་(Ma Huateng)ཨང་གཉིས་པ་ཆགས་ཏེ། ལོ་མང་རིང་ཨང་གཉིས་པ་ཡིན་པའི་ཨ་ལི་བྷ་བྷའི་ཚོང་བདག་ཇག་མཱ་ཨང་གསུམ་པ་ཆགས་ཡོད་འདུག

ཧུ་རན་དྲ་བའི་སྙན་ཐོ་ལྟར་ན།  ལོ་ན་ ༥༩ ཡིན་པའི་ཕྱུག་བདག་ཞེ་ཅཱ་ཡེན་ནི་ན་ནིང་རྒྱ་ནག་གི་ཕྱུག་བདག་ཨང་དགུ་པ་དེ་ཡིན་པ་དང་། འདི་ལོར་ཁོའི་དཔལ་འབྱོར་ཡོང་འབབ་ལྡབ་བཞི་ཡར་འཕར་ཏེ། ལོ་མང་རིང་རྒྱ་ནག་གི་ཕྱུག་བདག་ཨང་དང་པོ་ཆགས་པའི་ཚོང་པ་ཝང་ཅན་ལིན་(Wang Jianlin)ལས་བརྒལ་ཏེ།  འདི་ལོར་ཁོའི་དཔལ་འབྱོར་ཡོང་འབབ་ལྡབ་བཞི་ཡར་འཕར་ཏེ་ཨ་སྒོར་ཐེར་འབུམ་ ༤༣ ཡོད་འདུག ཞེ་ཅཱ་ཡེན་གྱིས་ཧོང་ཀོང་དང་། པེ་ཅིན། ཧྲང་ཧེ། ཀང་ཏུང་། དེ་བཞིན། ཧྲིན་ཀྲིན་སོགས་སུ་མི་མང་ས་ཡ་ལྔ་ལྷག་ལ་ཡིད་དབང་འཕྲོག་ཐུབ་པའི་ས་ཁང་འཛུགས་སྐྲུན་བྱས་ཡོད་འདུག

ཨ་རིའི་(Fortune)གསར་ཁང་གིས་གནས་ཚུལ་སྤེལ་བ་ལྟར་ན། ཞེ་ཅཱ་ཡེན་ནི་རྒྱ་ནག་གི་ས་ཁང་འཛུགས་སྐྲུན་ཆེ་ཤོས་(Evergrande)བཟོ་གྲྭ་གསར་འཛུགས་བྱེད་མཁན་ཡིན་པ་དང་།  བཟོ་གྲྭ་དེའི་དཔལ་འབྱོར་ཡོང་འབབ་གློ་བུར་དུ་འཕེལ་རྒྱས་འགྲོ་དོན་ནི། པེ་ཅིན་གཞུང་གིས་དམ་དྲག་བྱེད་བཞིན་པའི་རྒྱ་ནག་གི་ཁྲོམ་རྭ་རྒྱ་སྐྱེད་ཀྱི་འགྲན་རྩོད་ཡིན་པར་ཐེ་ཚོམ་མེད་སྐོར་བརྗོད་ཡོད་ཀྱང་།  སི་ཨིན་ཨིན་གསར་ཁང་གི་གནས་ཚུལ་ལྟར་ན།  ཞེ་ཅཱ་ཡེན་གྱི་བཟོ་གྲྭའི་ཚོང་མང་ཆེ་བ་བུ་ལོན་ཐོག་བྲིན་རྒྱུགས་བྱེད་ཀྱི་ཡོད་པ་དང་། སྐྱེད་ཀ་མཐོ་དྲག་པ་དང་། མ་རྐང་འཛུགས་མཁན་ཁག་གི་དཔལ་འབྱོར་བགོ་འགྲེམས་སོགས་ཀྱི་དཀའ་ངལ་འོག  རྒྱལ་སྤྱིའི་(Fitch)ཚོང་གཉེར་ཁང་གིས་བཟོ་གྲྭ་དེའི་དཔལ་འབྱོར་ཡོང་འབབ་མུ་མཐུད་འཕེལ་རྒྱས་འགྲོ་ཐུབ་ཀྱི་མེད་པའི་ཉེན་བརྡ་བཏང་ཡོད་འདུག

ལོ་མང་རིང་རྒྱ་ནག་གི་ཕྱུག་བདག་ཨང་དང་པོ་ཡིན་པའི་ཝང་ཅན་ལིན་འདི་ལོའི་རྒྱ་ནག་གི་ཕྱུག་བདག་ཨང་ལྔ་པར་མར་ཟགས་ཡོད་པ་དང་། ཕྱི་ལོ་ ༢༠༡༦ ལོར་ཁོང་ཨེ་ཤ་ཡའི་ཕྱུག་བདག་དང་པོའང་ཆགས་ཡོད་འདུག

གསར་འགོད་པ།  སྐལ་བཟང་སྤྱིན་པ།