བོད་ཀྱི་ན་གཞོན་ ༣ ལ་ཧིན་སྒོར་འབུམ་ ༣ རེ་སྤྲད།

སྲིད་སྐྱོང་བློ་བཟང་སེང་གེ་མཆོག་གིས་མ་འོངས་པར་བོད་ལའང་ཊེ་ལེ་ཝུ་ཊ་ཞེས་པ་ཞིག་ཡོད་ན་བསམ་གྱི་ཡོད་སྐོར་གསུངས་སོང་།
 
དེ་རིང་སྔ་དྲོའི་ཆུ་ཚོད་ ༡༡།༣༠ སྟེང་། ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་སྒྲ་བརྙན་ཚན་པས་གློག་བརྙན་སྒྲིག་བཟོའི་ལས་འཆར་སྐོར་གྱི་གསར་འགོད་གསལ་བསྒྲགས་སྤེལ་ཏེ། བོད་ཀྱི་ན་གཞོན་གསུམ་ལ་གློག་བརྙན་སྒྲིག་བཟོའི་མ་དངུལ་ཧིན་སྒོར་འབུམ་གསུམ་རེ་སྤྲད་སོང་བ་དང་། གསལ་བསྒྲགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་གཙོས་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་དྲིལ་བསྒྲགས་དྲུང་ཆེ་ཚད་མཉམ་ཤར་གླིང་ཟླ་སྒྲོན་ལགས། གློག་བརྙན་སྒྲིག་བཟོའི་ལས་འཆར་གྱི་ཟུར་དཔང་བསྟན་འཛིན་བསོད་ནམས་དང་བསྟན་འཛིན་རིན་ཆེན་ལགས་བཅས་འཛོམས་འདུག
 
ཤར་གླིང་ཟླ་སྒྲོན་ལགས་ཀྱིས། འདི་ལོའི་ཕྱི་ཟླ་ ༤ པའི་ནང་ཕྱི་དྲིལ་ལས་ཁུངས་ཀྱི་སྒྲ་བརྙན་ཚན་པས་ད་ལོར་གློག་བརྙན་སྒྲིག་བཟོ་ཆེད་མ་དངུལ་གསལ་བསྒྲགས་ཤིག་སྤེལ་ཡོད་པ་ལྟར། དེ་རིང་བདམས་ཐོན་བྱུང་བའི་བོད་ཀྱི་ན་གཞོན་གསུམ་ལ་གློག་བརྙན་སྒྲིག་བཟོའི་མ་དངུལ་སྤྲོད་ཀྱི་ཡོད། ང་ཚོའི་སྤྱི་ཚོགས་ནང་གློག་བརྙན་བཟོ་བར་སྤྲོ་བ་ཡོད་མཁན་དང་གློག་བརྙན་སྒྲིག་བཟོ་ལ་སྦྱོང་བརྡར་བྱེད་མཁན་སོགས་གློག་བརྙན་དང་འབྲེལ་བའི་སྒྱུ་རྩལ་ལ་མོས་འདུན་ཡོད་མཁན་མང་པོ་ཡོད་པར་བརྟེན། ང་ཚོའི་ངོས་ནས་དཔལ་འབྱོར་གྱི་རྒྱབ་སྐྱོར་ཆེ་ཆུང་ལ་མ་བལྟས་པར་ཁོང་ཚོར་སེམས་ཤུགས་སྤར་སྟེ་མུ་མཐུད་འབད་བརྩོན་བྱེད་ཆེད་རོགས་དངུལ་དེ་སྤྲོད་ཀྱི་ཡོད་ལ། ཁོང་ཚོས་རང་གི་འདོད་པ་ལྟར་རྣམ་དཔྱོད་བེད་སྤྱོད་བྱས་ཏེ་བརྗོད་བྱ་བོད་དོན་དང་འབྲེལ་བའི་ཐོག་གློག་བརྙན་གང་མང་བཟོ་ཐུབ་པའི་རེ་བ་བྱེད་ཀྱི་ཡོད། ཅེས་བརྗོད་སོང་།

སྲིད་སྐྱོང་མཆོག་གིས་བོད་ཀྱི་ན་གཞོན་གསུམ་ལ་གློག་བརྙན་སྒྲིག་བཟོའི་མ་དངུལ་ཧིན་སྒོར་འབུམ་གསུམ་རེ་གནང་བ་དང་འབྲེལ་ཏེ། ཕྱི་དྲིལ་སྒྲ་བརྙན་ཚན་པའི་འགན་འཛིན་རྣམ་རྒྱལ་ཚེ་དབང་ལགས་ཀྱིས། ང་ཚོར་གློག་བརྙན་སྒྲིག་བཟོའི་ལས་འཆར་གྱི་མ་དངུལ་ཆེད་ཐོག་མར་སྙན་ཞུ་འབུལ་མཁན་མི་གྲངས་ ༡༢ བྱུང་བ་དང་། ང་ཚོས་འདེམས་སྒྲིག་རིམ་པ་གཉིས་བྱས་ཡོད། རིམ་པ་དང་པོའི་འདེམས་སྒྲིག་སྐབས་མི་གྲངས་ ༡༢ ནས་ ༩ བདམས་པ་དང་། འདེམས་སྒྲིག་རིམ་པ་གཉིས་པའི་སྐབས་མི་གྲངས་༩ ནས་ ༣ བདམས་ཡོད། ད་ལོ་ཕྱི་དྲིལ་ལས་ཁུངས་ཀྱི་ངོས་ནས་གློག་བརྙན་སྒྲིག་བཟོ་ཆེད་མ་དངུལ་ཕུལ་བ་ཐེངས་དང་པོ་ཆགས་ཡོད། ཁོང་ཚོའི་ཟུར་དཔང་དུ་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་གོ་སྒྲིག་པ་བསྟན་འཛིན་བསོད་ནམས་ལགས་དང་། བོད་ཀྱི་གློག་བརྙན་དུས་སྟོན་གྱི་གོ་སྒྲིག་པ་བསྟན་འཛིན་ཚེ་བརྟན་ལགས། དེ་བཞིན་བོད་ཀྱི་ནོར་ཝེ་རླུང་འཕྲིན་ཁང་གི་བསྟན་འཛིན་དཔལ་སྒྲོན་ལགས་དང་སྐལ་བཟང་རིན་ཆེན་ལགས་བཅས་ཕེབས་ཡོད་པ་རེད། ཟུར་དཔང་རྣམ་པས་ཁོང་ཚོ་གསུམ་བདམས་པར་མ་ཟད། རྗེས་སུ་ཁོང་ཚོར་གློག་བརྙན་བཟོ་སྟངས་ལ་ལམ་སྟོན་དང་ཕྱག་རོགས་གང་ཐུབ་གནང་རྒྱུའི་ཞལ་བཞེས་ཀྱང་གནང་ཡོད་པ་རེད། ཅེས་བརྗོད་སོང་།
 
ཐུབ་བསྟན་བསོད་ནམས་བཀྲ་ཤིས་ལགས་ཀྱིས་ཕོ་མོ་འདྲ་མཉམ་དང་བུད་མེད་ཀྱི་ནུས་སྟོབས་སྐོར་ལ་གློག་བརྙན་བཟོ་འཆར་ཡོད་སྐོར་བརྗོད་དོན། ང་ཚོའི་སྤྱི་ཚོགས་ནང་བུད་མེད་ཀྱི་ནུས་སྟོབས་ལ་བརྩི་བཀུར་དང་གལ་ཆེན་པོར་བརྩི་བཞིན་ཡོད་པར་ངས་ངོས་འཛིན་བྱེད་ཀྱི་ཡོད། ང་ཚོའི་བུད་མེད་ཀྱི་ནུས་སྟོབས་གལ་ཆེན་པོ་དང་བརྩི་བཀུར་བྱེད་པའི་རྒྱུ་མཚན་གང་ལ་ཐུག་ཡོད་ཟེར་ན། མི་རིགས་ཤིག་ལ་ཆ་བཞག་ན་གལ་ཆེ་ཤོས་དེ་ཕྲུ་གུ་ཡིན་པ་དང་། ཕྲུ་གུ་དེ་འཚར་ལོངས་ཡག་པོ་བྱུང་དང་མ་འབྱུང་ཟེར་བ་དེ་ཁོ་ཚོའི་བསམ་བློ་གཏོང་ཕྱོགས་ལ་རག་ལས་ཡོད་པ་དང་། ཁོང་ཚོའི་བསམ་བློ་གཏོང་ཕྱོགས་དེའང་ཁོ་ཚོ་སྐྱེད་བསྲིང་བྱེད་མཁན་ཕ་མ་ལ་རག་ལས་ཡོད་པ་དང་། ལྷག་པར་དུ་ཨ་མ་དེ་གལ་ཆེ་ཤོས་ཆགས་ཡོད་པ་རེད། མི་སུ་ཡིན་ཡང་ཁོའི་དགེ་རྒན་ཆེས་ཐོག་མ་དེ་ཨ་མ་ཆགས་བསྡད་ཡོད་སྟབས། ངས་བརྗོད་བྱ་འདི་བདམས་པ་ཡིན། ཞེས་བརྗོད་སོང་།
 
སྐལ་བཟང་འཇིགས་མེད་ལགས་ཀྱིས་བཙན་བྱོལ་ནང་གི་དམངས་གཙོའི་སྐོར་ལ་གློག་བརྙན་བཟོ་འཆར་ཡོད་སྐོར་བརྗོད་དོན། ངས་བཙན་བྱོལ་ནང་གི་དམངས་གཙོ་ལས་འཕྲོས་ཏེ་བརྗེད་ཟིན་པའི་བོད་རིགས་ཁ་ཆེ་བ་ཞེས་པའི་བརྗོད་བྱའི་ཐོག་གློག་བརྙན་བཟོ་འཆར་ཡོད། ངས་གློག་བརྙན་དེ་བརྒྱུད་ནས་སྤྱི་ཚོགས་ཁྲོད་ཤུགས་རྐྱེན་ནམ་བརྡ་ལན་གང་སྤྲོད་ཐུབ་ཀྱི་འདུག་ཅེ་ན། ང་ཚོ་བོད་རིགས་ཚང་མས་བོད་རིགས་ཁ་ཆེའི་སྐོར་ལ་སློབ་གཉེར་བྱེད་དགོས་པ་དང་། ཁོང་ཚོའི་སྐད་ཡིག་དང་རིག་གཞུང་ལའང་བོད་པ་ཚང་མར་སྲུང་སྐྱོབ་བྱ་རྒྱུའི་འགན་ཡོད་པ་དང་། ཆོས་ལུགས་མཐུན་འབྲེལ་ཟེར་ན་གང་འདྲ་ཞིག་ལ་ཟེར་གྱི་ཡོད་མེད་སོགས་དཔེ་སྟོན་བྱ་འདོད་ཡོད། ཅེས་བརྗོད་སོང་།
 
འཇམ་དཔལ་ཤེས་རབ་ལགས་ཀྱིས་བོད་གཞིས་བྱེས་གཉིས་ཀྱི་ཐུན་མོང་གི་མངོན་འདོད་སྐོར་ལ་གློག་བརྙན་བཟོ་འཆར་ཡོད་སྐོར་བརྗོད་དོན། ངས་ཐོག་མར་ ༡༩༥༠ ལོ་ནས་ ༡༩༦༠ བར་གྱི་བོད་མི་དང་བླངས་དམག་མིའི་མི་ཚེ་ལོ་རྒྱུས་གཞི་ལ་བཞག་པའི་ཐོག་གློག་བརྙན་བཟོ་འཆར་ཡོད། བརྗོད་བྱ་དེ་གཙོ་བོར་འཇོག་དགོས་པའི་རྒྱུ་མཚན་ནི། ངའི་པ་ལགས་ཡིན་ནའང་དང་པོ་དང་བླངས་དམག་ནང་ཞུགས་ཡོད་པ་རེད། པ་ལགས་ཀྱིས་ང་ལ་ཁོ་རང་གི་ལོ་རྒྱུས་བཤད་སྐབས། དེ་ནི་ཧ་ཅང་གི་སེམས་ཤུགས་སྐྱེ་འོས་པ་དང་ཡིད་དབང་འཕྲོག་པ་ཞིག་ཏུ་མཐོང་སོང་ལ། དེ་ནི་ང་ཚོའི་ལོ་རྒྱུས་ཆགས་ཀྱི་ཡོད་སྟབས། ངས་གློག་བརྙན་གྱི་ལམ་ནས་དང་བླངས་དམག་གི་ལོ་རྒྱུས་དེ་ང་ཚོའི་ན་གཞོན་གསར་པ་ཚོར་སྟོན་འདོད་ཡོད། ཅེས་བརྗོད་སོང་།
 
སྲིད་སྐྱོང་བློ་བཟང་སེང་གེ་མཆོག་གིས། གློག་བརྙན་སྒྲིག་བཟོའི་ལས་གཞི་དེ་གསར་པ་ཞིག་ཆགས་བསྡད་ཡོད་པ་རེད། ང་ཚོས་ལས་གཞི་དེ་འདྲར་རྒྱབ་སྐྱོར་དང་སེམས་ཤུགས་སྤར་དགོས་དོན་ནི། རྒྱ་གར་ལ་བྷོ་ལེ་ཝུ་ཊ།(Bollywood) ནུབ་ཕྱོགས་ལ་ཧོ་ལེ་ཝུ་ཊ།(Hollywood) དེ་བཞིན་རྒྱ་གར་ལྷོ་ཕྱོགས་ལ་ཊི་ལེ་ཝུ་ཊ་དང་ཀོ་ལེ་ཝུ་ཊ་(Tollywood) (Kollywood)སོགས་ཡོད་པ་རེད། མ་འོངས་པར་བོད་ལའང་ཊེ་ལེ་ཝུ་ཊ་(Tillywood)ཞེས་པ་ཞིག་ཡོད་ན་བསམ་པ་ཡིན། གློག་བརྙན་བརྒྱུད་བོད་དོན་དེ་རྒྱལ་སྤྱིའི་སྟེང་ལས་སླ་པོའི་ཐོག་སླེབ་ཐུབ་ཀྱི་རེད། མི་མང་བརྒྱ་ཆ་མང་ཤོས་ཀྱིས་གསར་ཤོག་དང་རླུང་འཕྲིན་ལས་གློག་བརྙན་གྱི་ལས་རིམ་ལ་དོ་སྣང་མང་ཙམ་བྱེད་ཀྱི་ཡོད་པ་བདེན་པ་རེད། དེར་བརྟེན་ང་ཚོས་གློག་བརྙན་གྱི་ལས་རིམ་བརྒྱུད་བོད་ཕྱི་ནང་གི་གནས་ཚུལ་དེ་དག་རྒྱལ་སྤྱིའི་སྡིངས་ཆའི་སྟེང་སླེབ་ཐུབ་ཀྱི་རེད་དྲན་གྱི་འདུག དེ་བཞིན་ང་རང་བསྟན་འཛིན་བསོད་ནམས་ལགས་ཀྱིས་གོ་སྒྲིག་གནང་བའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དང་། བསྟན་འཛིན་རིན་ཆེན་ལགས་ཀྱིས་གོ་སྒྲིག་གནང་བའི་བོད་ཀྱི་གློག་བརྙན་དུས་སྟོན་གཉིས་ལ་ཐེངས་འགར་ཕྱིན་པ་ཡིན། དུས་སྟོན་ཐོག་བསྟན་པའི་གློག་བརྙན་གྱི་ཐོ་གཞུང་ནང་ཕྱིའི་མིས་བོད་ཀྱི་སྐོར་ལ་བཟོས་པའི་གློག་བརྙན་ལས། བོད་དོན་སྐོར་བོད་པ་རང་གིས་བཟོས་པའི་གློག་བརྙན་ཁ་ཤས་མ་གཏོགས་མི་འདུག རྒྱུས་ལོན་བྱེད་སྐབས་བོད་པ་མང་པོ་ཞིག་ལ་གློག་བརྙན་བཟོ་པར་དཔལ་འབྱོར་གྱིས་མ་འདང་བའི་དཀའ་ངལ་ཡོད་པ་གོ་ཐོས་བྱུང་། དེར་བརྟེན་ང་རང་བོད་མིའི་སྒྲིག་འཛུགས་ཀྱི་ལས་འགན་ཁུར་བའི་རིང་བཀའ་ཤག་གི་ངོས་ནས་བོད་ཕྲུག་གློག་བརྙན་བཟོ་འདོད་ཡོད་མཁན་ལ་རོགས་རམ་ཅུང་ཟད་བྱེད་ཐུབ་ན་བསམ་བྱུང་། ངས་མ་འོངས་པར་ང་ཚོའི་བོད་པའི་གློག་བརྙན་བཟོ་མཁན་ཚོས་རིམ་གྱིས་འབད་བརྩོན་བྱས་ཏེ་གློག་བརྙན་དུས་སྟོན་དེ་ཚོའི་ནང་གི་གློག་བརྙན་ཐོ་གཞུང་བརྒྱ་ཆ་ ༩༩ ཙམ་བོད་པ་རང་གིས་བཟོས་པ་ཡིན་པའི་རེ་བ་བྱེད་ཀྱི་ཡོད་ལ། ཁོང་ཚོས་རྗེས་སུ་ས་གནས་ནས་རྒྱལ་ནང་དང་། རྒྱལ་ནང་ནས་རྒྱལ་སྤྱིའི་སྟེང་དུ་སླེབ་ཐུབ་རྒྱུ་མ་ཟད། རྒྱལ་སྤྱིའི་གློག་བརྙན་གྱི་བྱ་དགའ་ཨོ་སི་ཁཱར་(Oscar)ཡང་འཐོབ་པའི་རེ་བ་བྱེད་ཀྱི་ཡོད། ང་ཚོའི་བོད་གཞས་འཕུར་ཞེས་པ་དེ་རྒྱལ་སྤྱིའི་སྟེང་དུ་སླེབས་འདུག དེར་བརྟེན་ང་ཚོས་སོ་སོའི་རྣམ་དཔྱོད་ཀྱི་རྩལ་བཏོན་པ་ཡིན་ན་གློག་བརྙན་དེ་དག་ཀྱང་རྒྱལ་སྤྱིའི་སྟེང་དུ་སླེབ་ཐུབ་ཀྱི་རེད་དྲན་གྱི་འདུག ཅེས་གསུངས་སོང་།
གསར་འགོད་པ། ཉི་མ་ཚེ་རིང་།

བསྐྱར་བཅོས།: ༢༠༡༧/༡༠/༢༥

Leave a Reply

One thought on “བོད་ཀྱི་ན་གཞོན་ ༣ ལ་ཧིན་སྒོར་འབུམ་ ༣ རེ་སྤྲད།

  1. རྒྱུད་གྲྭ་བློ་བཟང་དབང་འངུས།

    གློག་བརྙན་བཟོ་འདོད་པ་ཚོ། དང་པོ་སྔོན་ལ་ མུམ་བྷཡི། བོལ་ལི་ཝུཌ་་་ ཡི་ གློག་བརྙན་་་ Andha Kanoon, Kala Bazaar, Nayak, PK སོགས་ཀྱི་ ཌཡི་རེག་ཊར་ དེ་ཚོ་བཅར་ཐུབ་ན་ཡག་པོ་ཡོད། བཀྲ་ཤིས་བདེ་ལེགས།