རྫ་ཚེ་རིང་བཀྲ་ཤིས།

སངས་རྒྱས་ལ་ཕྱག་འཚལ་ལོ།།

༡༽ གླེང་གཞི།

ང་ལ་མཚོན་ན། ནམ་རྒྱུན་བོད་བརྒྱུད་ནང་བསྟན་ལ་ཅུང་ཟད་ཆ་རྒྱུས་ཡོད་པའི་རྒྱ་རིགས་དང་མགོ་སེར་དེ་ཚོར་ཐུག་སྐབས། ཕ་ཡུལ་རྫ་ཆུ་ཁ་ནས་ཡིན་ལབ་ནས་ཧ་མི་གོ་ན། མི་ཕམ་དང་དཔལ་སྤྲུལ་གཉིས་ཀྱི་འཁྲུངས་ཡུལ་ནས་ལབ་ན་དེ་མ་ཐག་ཧ་གོ་གི་རེད། དེ་ནི་ཁོང་གཉིས་ང་ཚོའི་ས་ཆ་འདིའི་མཚོན་རྟགས་ཡིན་པའི་རྒྱུ་མཚན་གྱིས་རེད། བརྟན་བཞུགས་ཆེན་མོའི་སྐབས་སུ་༧ཡིད་བཞིན་ནོར་བུས་ཀྱང་ཐུགས་ཚོར་ཆེན་པོས་ངའི་སྤྱོད་འཇུག་གི་ཁྲིད་རྒྱུན་རྫ་དཔལ་སྤྲུལ་རིན་པོ་ཆེ་ནས་བརྒྱུད་པ་རེད། རྫ་ཆུ་ཁ་ནི་སྐྱེས་བུ་དམ་པ་མང་པོས་བྱིན་གྱིས་བརླབས་པའི་གནས་ཤིག་རེད་ཅེས་སྐྱེ་བོ་ཁྲི་ཕྲག་མང་པོའི་དབུས་སུ་གསུངས་ཡོད།

༢༽ བློས་བསླངས་ཀྱི་ཁ་བྱང་དང་ཉམས་ཞིབ་ཀྱི་འཆར་སྣང་།

རྒྱུ་མཚན་དེས། ང་ཚོས་ནམ་རྒྱུན་ནས་ཁོང་རྣམ་པ་གཉིས་ཀྱི་རླབས་ཆེན་གྱི་ཡོན་ཏན་དང་སྙན་གྲགས་ལ་སྤོབས་པ་བྱེད་ཀྱི་ཡོད་ཅིང་། ཆོས་ཕྱོགས་ནས་ཁོང་རྣམ་པ་གཉིས་ཀྱི་གསུང་གི་འོད་སྣང་གིས་ང་ཚོར་ཤུགས་རྐྱེན་ཐེབས་ཡོད། མ་ཟད་ང་ཚོས་ཀྱང་གང་ཐུབ་ཀྱིས་ཁོང་རྣམ་པ་གཉིས་ཀྱི་རྗེས་འབྲངས་པ་ལྟ་བུ་ཞིག་ཡིན་སྙམ་གྱི་ཡོད་མོད། ད་བར་ང་ཚོའི་དེང་རབས་ཀྱི་ལུགས་སུ་བྱས་ནས་ཁོང་རྣམ་པ་གཉིས་ཀྱི་སྐོར་ལ་དགོས་ངེས་ཀྱི་ཉམས་ཞིབ་བྱས་མི་འདུག

དུས་ད་ལྟའི་བར་གྱི་སྔ་འགྱུར་རྙིང་མ་གཙོ་བོར་གྱུར་པའི་བོད་བརྒྱུད་ནང་བསྟན་དང་བོད་ཀྱི་རིག་གནས་སྤྱིའི་ཁྱབ་ཁོངས། ད་དུང་དམངས་ཁྲོད་ཀྱི་མི་མང་དག་གི་སེམས་ཁམས་ཀྱི་ཁྱབ་ཁོངས་སོགས་སུ་འཛུལ་དེ་ཁོང་རྣམ་པ་གཉིས་ཀྱི་ལོ་རྒྱུས་དང་ཐུན་མིན་གྱི་དགོངས་པ་སོགས་ལ་དགོས་ངེས་དང་འོས་ངེས་ཀྱི་ཉམས་ཞིབ་བྱེད་རྒྱུའི་ཕྱོགས་ལ་བསམ་བློ་འཁོར་མི་འདུག

དཔེར་ན། ཀུན་བཟང་བླ་མའི་ཞལ་ལུང་གི་ཤུགས་རྐྱེན། དཔལ་སྤྲུལ་དང་སྤྱོད་འཇུག མི་ཕམ་དང་བརྒལ་ལན་རྣམ་གསུམ། མི་ཕམ་དང་གླིང་གེ་སར། མི་ཕམ་དང་རྙིང་མའི་གྲུབ་མཐའ། དཔལ་སྤྲུལ་དང་རིས་མེད། རྫ་དཔལ་སྤྲུལ་གྱི་མི་ཚེ་གཅིག་གི་རྐང་འགྲུལ། དམངས་ཁྲོད་ངག་རྒྱུན་ཁྲོད་ཀྱི་ཨ་བུ་དཔལ་དགེ མི་ཕམ་དང་རྒྱལ་པོ་ལུགས་ཀྱི་བསྟན་བཅོས། མི་ཕམ་དང་ནོར་བུ་ནོར་བུ་ཀེ་ཏ་ཀ མི་ཕམ་དང་དཔལ་སྤྲུལ་ཟུང་གི་བསམ་བློ་ཤུགས་རྐྱེན་སོགས་འདི་ལྟ་བུའི་རྣམ་གྲངས་རེ་རེ་ཡང་རབ་འབྱམས་པ་དག་གི་ཞིབ་འཇུག་གི་ཁ་བྱང་དུ་བྱེད་ཆོག་པ་ཡོད་ཅིང་། འདི་དག་ཚང་མ་ཧ་ཅང་གལ་ཆེ་བ་དང་བསྔོགས་རིན་ཡོད་པའི་བརྗོད་གཞི་ཤ་སྟག་ཏུ་འདུག འོན་ཀྱང་། འདི་དག་ཞིབ་འཇུག་རྣམ་གྲངས་སུ་བཞག་ནས་ཆེད་རྩོམ་འབྲི་མཁན་དང་ཉམས་ཞིབ་བྱེད་མཁན་གྱི་ཤེས་ཡོན་པ་དང་། དེ་དག་གི་ཆེད་དུ་སློབ་ཡོན་གྱི་མ་རྩ་འཇོག་བཞག་ནས་རབ་འབྱམས་པའི་དཔྱད་རྩོམ་འབྲི་འཇུག་རྒྱུར་སྦྱིན་བདག་བྱེད་མཁན་གྱི་འབྱོར་ལྡན་པ་སོགས་ད་བར་ཕལ་ཆེར་བྱུང་མེད་ཅིང་། (རྣམ་གྲོལ་གླིང་དུ་སློབ་གཉེར་བྱས་མཁན་གྱི་ནུབ་གླིང་པ་ཞིག་གིས་ཤེར་འགྲེལ་ཀེ་ཏ་ཀ་དང་བརྒལ་ལན་ཁག་ལ་ཞིབ་འཇུག་བྱས་པའི་དབྱིན་དེབ་ཅིག་འདུག)འདི་ནི་ང་ཚོ་རྫ་ཆུ་ཁ་པའི་ངོས་ནས་བསམ་བློ་དང་འཆར་གཞི་ལག་ལེན་བཅས་ཀྱི་སྟོང་ཆ་ཆེན་པོ་ཞིག་ཡིན།

དཔལ་སྤྲུལ་དང་མི་ཕམ་གཉིས་རྫ་ཆུ་ཁ་པས་སྒེར་བདག་དགོས་པ་ཞིག་མིན་ན་ཡང་། ཁོང་གཉིས་ཀྱི་དགོངས་པ་དང་སྙིང་སྟོབས་དར་སྤེལ་བཏང་བའི་ཐོག་ནས་ཞིབ་འཇུག་རང་བཞིན་གྱི་གྲུབ་འབྲས་བཏོན་ཏེ་ལོ་རྒྱུས་ལ་ལེགས་སྐྱེས་འབུལ་རྒྱུ་ནི་ང་ཚོར་འཁྲི་བའི་འོས་འགན་ཞིག་རེད། བྱུང་ན་མ་འོངས་པར་སློབ་གླིང་དེ་འདྲར་ཆེད་དུ་མཉམ་འབྲེལ་གྱི་གན་རྒྱ་བཞག་སྟེ། སློབ་ཡོན་གྱི་ཐེབས་རྩ་བཙུགས་ནས་བརྗོད་གཞི་འདི་རིགས་ཀྱི་ཐོག་ལ་སློབ་ཡོན་རེ་གསར་གཏོད་ཐུབ་པ་བྱུང་ན་ཧ་ཅང་ལེགས་པ་ཡིན།

༣༽ རྫ་དཔལ་སྤྲུལ་ལ་ཁྱི་རྒན་ཐོགས་དོན།

སྐབས་དོན་བརྗོད་གཞི་དངོས་ནི་མདོ་མཁྱེན་བརྩེ་ཡེ་ཤེས་རྡོ་རྗེའི་རང་རྣམ་དུ་འཁོད་པའི་དཔལ་སྤྲུལ་རིན་པོ་ཆེ་དང་འབྲེལ་བའི་བརྗོད་གཞི་ཞིག་སྟེ། རྫ་དཔལ་སྤྲུལ་བླ་བྲང་དུ་ཕེབས་ནས་རྗེ་གུང་ཐང་བསྟན་པའི་སྒྲོན་མེ་དང་ཞལ་མཇལ་གསུང་ཐོས་བྱུང་ཡོད་མིན་གྱི་སྐོར་ཡིན།
དེ་ཡང་རྫ་དཔལ་སྤྲུལ་གྱི་མཚན་གཞན་ཞིག་ལ་ཁྱི་རྒན་ཞེས་ཞུ་ཞིང་། ཁྱི་ལ་ལྟ་སྟངས་ལེགས་པོ་མེད་པའི་བོད་ཀྱི་ལུང་པ་དང་། ཁྱད་པར་དུ་རྫ་ཆུ་ཁའི་འབྲོག་པ་ཚོར་མཚོན་ན་ཁྱི་རྒན་ལབ་ན་ཧ་ཅང་བརྙས་བཅོས་ཀྱི་ཚིག་དེ་མན་ན་མེད་པ་ཞིག་རེད། འོ་ན། དཔལ་སྤྲུལ་གྱི་མཚན་ལ་ཁྱི་རྒན་ཐོགས་པ་དེ་ཁོང་གིས་རང་ཉིད་ལ་ཁེངས་བསྐྱུངས་ཀྱི་ཆེད་དུ་བཏགས་པ་རེད་དམ་ཟེར་ན་དེ་མ་རེད། དེ་ནི་ཁོང་གི་རྩ་བའི་བླ་མའི་གྲས་སུ་གཏོགས་པའི་མདོ་མཁྱེན་བརྩེ་ཡེ་ཤེས་རྡོ་རྗེས་བཏགས་པ་རེད། དེ་ཡང་ཐེངས་གཅིག་དཔལ་སྤྲུལ་དང་མདོ་མཁྱེན་བརྩེ་མཉམ་དུ་ཡོད་སྐབས་མདོ་མཁྱེན་བརྩེས་དཔལ་དགེ་ལ་ཁྱོད་ལ་དཔའ་ཡོད་ན་འདིར་ཤོག་གསུངས་ནས་བོས་གནང་ཞིང་། དཔལ་སྤྲུལ་འགྲམ་དུ་བཅར་བ་དང་། སྐྲ་ནས་བཟུང་སྟེ་ས་ལ་བརྡབས་ཤིང་དྲུད་དེ་བྱོན་པས་མཚམས་ཤིག་ནས་ཆང་དྲི་ཚོར་བ་དང་དཔལ་སྤྲུལ་གྱིས་བསམ་པར། མདོ་མཁྱེན་བརྩེ་ཁོང་གྲུབ་ཐོབ་ཆེན་པོ་ཡིན་ཡང་ཆང་གིས་བཟི་ནས་སྨྱོ་སྤྱོད་མཛད་ཀྱི་འདུག སངས་རྒྱས་ཀྱིས་ཆང་གི་ཉེས་དམིགས་མང་པོ་གསུངས་པ་ཐོག་ཏུ་བབས་འདུག་སྙམ་པ་བྱུང་བ་ཙམ་གྱི་མོད་ལ། མདོ་མཁྱེན་བརྩེས་གཞན་སེམས་ཤེས་པའི་མངོན་ཤེས་ཀྱིས་དགོངས་ནས་དེ་མ་ཐག་བཀའ་བཀྱོན་དང་སྦྲགས་ཁྱི་རྒན་ཁྱོད་ཞེས་བོས་པ་དང་། དེའི་དཔལ་སྤྲུལ་གྱི་ཐུགས་ལ་ང་འཁྲུལ་འདུག་དགོངས་ནས་ལས་གནད་བཅོས་ཏེ་བཞུགས་པས་ཟང་ཐལ་གྱི་རིག་པ་ནམ་མཁའ་གཡའ་ཐག་ཆད་པ་ལྟ་བུ་ཞིག་མངོན་དུ་གྱུར་སྟེ། སྔོན་བླ་མ་རྫ་མཚམས་པ་འཇིགས་མེད་རྒྱལ་བའི་མྱུ་གུས་ངོ་སྤྲད་པ་དེ་ནམ་ལང་པའི་སྟེང་དུ་ཉི་མ་ཤར་བ་བཞིན་དུ་སོང་བ་རེད་ཅེས་ཁོང་གི་ཐུགས་སྲས་མཁན་པོ་ཀུན་དཔལ་གྱིས་བརྩམས་པའི་རྫ་དཔལ་སྤྲུལ་གྱི་རྣམ་ཐར་དུ་གསུངས་ཡོད། དེ་ནས་བཟུང་དཔལ་སྤྲུལ་གྱིས་ཀྱང་ཀུ་རེའི་ཚུལ་དུ་ཁྱི་རྒན་ནི་ང་ལ་སྐུ་ཞོགས་མཁྱེན་བརྩེས་གནང་བའི་གསང་མཚན་ཡིན་ཞེས་གསུངས་ཀྱི་ཡོད་པ་དང་། ཁོང་གི་གསུང་རྩོམ་མང་པོ་ཞིག་ལ་ཡང་མཚན་དེ་རང་བེད་སྤྱོད་གནང་ཡོད་དེ། ཁོང་གིས་གསུང་རྩོམ་ཤིན་ཏུ་གྲགས་ཆེན་ཤེར་ཕྱིན་སྒོམ་རིམ་གྱི་མཇུག་རྩོམ་ཏུ་ཡང་ཁྱི་རྒན་ཨ་བུ་ཞེས་བྲིས་གནང་ཡོད།

༤༽ མདོ་མཁྱེན་དང་དཔལ་སྤྲུལ་གཉིས་ཀྱིས་མགར་ལུང་ལ་ཁ་ནས་རྡོ་གྲུབ་ཆེན་ལ་ཕྱི་ཕྱག་ཕུལ་བ།

མདོ་མཁྱེན་བརྩེ་ཡེ་ཤེས་རྡོ་རྗེ་མཆོག་རྡོ་གྲུབ་ཆེན་གྱིས་རིག་འཛིན་འཇིགས་མེད་གླིང་པའི་ཡང་སྲིད་དུ་ངོས་བཟུང་ནས་དབུས་འབྲི་གུང་དུ་གདན་འདྲེན་དང་། ཁམས་སྡེ་དགེའི་དབུ་བླར་བསྐོ་བ། རྫ་ཆུ་ཁར་ཡང་སྐུ་སྔ་མའི་ཞལ་སློབ་འཇིགས་མེད་རྒྱལ་བའི་མྱུ་གུ་དང་ཀི་ལུང་འཇིགས་མེད་ངོ་མཚར་གཉིས་མཇལ་སར་སྔ་ཕྱིར་ཐེངས་མང་ཕེབས་པ་སོགས་མཛད་ཡོད་ཅིང་། གཙོ་ཆེར་གསེར་སྟོད་ཡར་ལུང་པདྨ་བཀོད་དུ་རྡོ་གྲུབ་ཆེན་སྐུ་འཕྲེང་དང་པོ་འཇིགས་མེད་འཕྲིན་ལས་འོད་ཟེར་གྱི་མདུན་དུ་ཕེབས་ནས་བཀའ་ཆོས་ཞུས་པ་དང་། མཐར་གྲྭ་ཆས་ཕུད་ནས་གྲུབ་སྨྱོན་གྱི་སྤྱོད་པ་མཛད་རྗེས་ཡང་བསྐྱར་རྡོ་གྲུབ་རིན་པོ་ཆེའི་མདུན་དུ་ཆེད་དུ་གདམས་ངག་ལྷག་འཕྲོ་གསན་པར་ཕེབས་གནང་ཡོད། སྐབས་དེར་ཁོང་དང་ལྷན་དུ་དཔལ་སྤྲུལ་རིན་པོ་ཆེ་ཡང་ཡོད། དཔལ་སྤྲུལ་ཁོང་གཉིས་བླ་མ་གཅིག་གི་སློབ་མ་དང་ངོས་འཛིན་མཛད་མཁན་ཡང་རྡོ་གྲུབ་ཆེན་ཡིན་པར་གཅིག་མཚུངས་སུ་འདུག་ན་ཡང་། བསླབ་པའི་ཆ་ནས་སྐུ་ཞོགས་མཁྱེན་བརྩེ་བླ་མ་དང་དཔལ་སྤྲུལ་སློབ་མའི་གནས་རིམ་དུ་ཡོད་འདུག དེའི་སྐོར་རང་རྣམ་དུ། ལྕགས་འབྲུག་ཧོར་ཟླ་དྲུག་པའི་ཚེས་བཅུའི་ཉིན། ཞབས་སྤྱི་བོར་བླངས་ཤིང་སྨོན་ལམ་དྲག་པོ་བཏབ་ཅིང་། རྗེ་ཉིད་ཀྱིས་ཀྱང་ཆེད་གཏད་ཀྱི་ཐུགས་སྨོན་མཛད་ཅིང་ཐུགས་ཅུང་ཟད་སྐྱོ་བའི་ཚུལ་བསྟན། ཞེས་དང་། ང་རང་དངོས་ཀྱི་གྲོགས་དན་གྲོགས་མཆེད་དཔལ་དགེ་དང་ལྷག་བསམ་རབ་དཀར་གཉིས། གཞན་ཡང་གྲོགས་དན་གྱི་ཚུལ་དུ་བླ་མ་རིག་འཛིན་དང་ཡོངས་གྲགས་གཉིས་གཙོས་གནས་སྐོར་བ་ཁ་ཤས་བཅས་ལམ་དུ་ཞུགས་ནས་མཆེད་ལྕམ་ཀུན་གྱིས་ལུང་མདོ་བར་དུ་སྐྱེལ་མ་མཛད་ཅིང་ཕྱིར་ལོག མགར་ལུང་ལ་ཁར་ཞེས་པ་གདན་ས་མཐོང་བའི་སར་སླེབས་ཚེ་གཞན་ཀུན་སྔོན་ལ་སོང་། དཔལ་དགེ་དང་ང་རང་གཉིས་ནས་ཕྱག་བརྒྱ་ཕྲག་འཚལ་ཞིང་། ཚེ་རབས་ཀུན་ཏུ་རྗེ་བཙུན་བླ་མ་མཆོག་དང་འབྲལ་བ་མེད་པར་རྗེས་སུ་འཛིན་ཞིང་། ཐུགས་སྐད་ཅིག་ཙམ་མི་དཀྲུག་པ་དང་། རང་དོན་ཡིད་བྱེད་ཀྱི་འཁྲི་བ་བཙན་ཐབས་སུ་ཆོད་ཅིང་སེམས་ཅན་གྱི་དོན་དུ་ལུས་སྲོག་གཏོང་ནུས་པའི་སྨོན་ལམ་དང་གསོལ་བ་རྩེ་གཅིག་ཏུ་བཏབ་ཅིང་ལམ་དུ་ཞུགས། ཞེས་འབྱུང་།
སྐབས་དེའི་སྣང་ཚུལ་དེ་ཡང་རྗེ་བཙུན་མི་ལ་མར་པ་དང་ཞལ་གྱེས་སྐབས་ཀྱི་ཡུལ་ངོས་དང་འདྲ་སེེ་བ་ཞིག་འདུག་པས་ས་ཆ་དེར་དྲན་རྟེན་ཞིག་བསླངས་ནས་སྐབས་དེའི་རྣམ་པ་ས་རྟགས་དང་བཅས་གནས་ཐུབ་པ་ཞིག་བྱུང་ན་ཅི་མ་རུང་སྙམ་པ་ཞིག་ཀྱང་བྱུང་། འོན་ཀྱང་། རྡོ་གྲུབ་རང་རྣམ་དུ་ནི་མདོ་མཁྱེན་བརྩེ་དང་ཐ་མའི་ཞལ་གྱེས་སྐོར་མི་གསལ་སྟེ། འདི་ནི་རྡོ་གྲུབ་རིན་པོ་ཆེ་མ་འདས་པའི་ཡར་སྔོན་ཙམ་ཡིན་ཞིང་། རང་རྣམ་ནི་དེའི་སྔོན་ཞིག་ནས་རྩོམ་འཕྲོར་ལུས་འདུག

༥༽ ཨར་ཅོ་རྣམས་ཀྱི་སྒར་མཐའ་འགྲིམ་པ།

ད་དུང་རྣམ་ཐར་དེར་དཔལ་སྤྲུལ་དང་འབྲེལ་བའི་དུམ་བུ་འགའ་ཞིག་ཡོད་ཅིང་། དེ་ཡང་མདོ་མཁྱེན་བརྩེ་གསེར་རྟ་ནས་རྡོ་ཁོག་གི་རྡོའི་རྫོང་ཕུག་དང་གཡུ་མཚོ་ཞེས་པའི་མཚོ་ཁར་ཕེབས་སྐབས་ཁོང་གི་གཏེར་སྐལ་ཐུགས་རྗེ་ཆེན་པོའི་སྒྲུབ་སྐོར་འདོན་དགོས་པར་མཁའ་འགྲོས་སྐུལ་མ་མཛད་པ་དང་། ཁོང་གིས་གཏེར་ལ་དགོས་པ་མི་འདུག སྔོན་གྱི་གཏེར་སྟོན་དག་གིས་གཏེར་ཆོས་ཀྱིས་མ་ཆོག་པ་མི་འདུག ད་ནི་མཁྱེན་བརྩེ་ཞེས་པའི་མིང་ཙམ་ཡང་མི་ཐོས་ས་ཞིག་ཏུ་འགྲོ་དགོས་སྙམ་ནས་གཏེར་བློས་གཏོང་གྲབ་བྱས་ཚུལ་སོགས་ལས་བརྩམས་ཏེ་རང་རྣམ་ཐར་དུ། མཚོ་བསྐོར་ནས་ཕར་ཕྱིན་པས་གཞན་མ་རྣམས་སྔོན་དུ་སོང་ནས། དཔལ་དགེས་སྒུག་འདུག སྔོན་མ་རྣམ་གནས་མདུན་དུ་མ་སོང་ན་སྡོད་གནས་ལེགས་པོ་རང་ཡོད་ཚོད་མི་འདུག་པས་དེར་སོང་། ང་རང་ཞབས་ཕྱི་བསྡད་པ་ཡིན་ཟེར། ཞེས་དང་། ང་རང་ནས་ཉིད་སྔོན་དུ་སོང་ལ་སང་སྔ་བར་བསང་ཞིག་བཏང་རྒྱུའི་སྟབས་ཀ་ཨེ་འགྲིགས་ལྟོས། ང་རང་མཚོ་ཕ་ཀིའི་འགྲམ་ན་ལུས་སྦྱིན་ཞིག་གཏོང་ནས་འོང་བྱས། ང་གཅིག་པུར་མཚོ་ཁར་ཕྱིན་སོགས་སྟེ། འདི་དག་ལས་ཀྱང་སྐབས་དེར་ཡང་དཔལ་དགེ་ཁོང་དང་མཉམ་དུ་ཡོད་པ་དང་། དཔལ་དགེ་ནི་ཁོང་གི་གྲོགས་པོ་བློས་ཐུབ་དང་ནང་མའི་མཆེད་གྲོགས་ཡིན་པ་བླ་མའི་གདན་ས་ལ་ཕྱི་ཕྱག་འབུལ་སྐབས་དཔལ་དགེ་གཅིག་པུ་དང་མཉམ་དུ་རྗེས་ལ་བཞུགས་པ་སོགས་ཀྱིས་ཀྱང་རྟོགས་ཐུབ།
ད་དུང་། མདོ་མཁྱེན་བརྩེ་དང་ཨར་ཅོ་དེ་དག་ཁྱུ་གཅིག་ཏུ་བྱས་ནས་རྡོ་སྨད་འཛིར་ཀ་སོགས་བརྒྱུད་ནས་མཉམ་དུ་ཁྲོ་སྐྱབས་ཐུགས་རྗེ་ཆེན་པོ་ལ་མཇལ་ཁ་དང་རི་ཁྲུས་རབ་གནས་སོགས་མཛད་འདུག་ཅིང་། དེར་ཡང་དཔལ་སྤྲུལ་ཁོང་གཉིས་མཉམ་དུ་ཡོད་ངེས། ད་དུང་དེ་ནས་མདོ་མཁྱེན་བརྩེས་རོགས་པ་ཚོར་ད་ནས་ཁྱེད་ཚོས་ང་སྤྲུལ་སྐུ་ཡིན་པའི་མིང་ཙམ་ཡང་གཞན་ལ་མི་བསྒྲགས་པར་འཚོ་བ་སློང་མོ་ལ་བརྟེན་ནས་ཁྱེད་ཚོ་དང་མཉམ་དུ་འགྲོ་རྒྱུ་བྱེད་ན་དེ་ཆོག དེ་མིན་ང་ཚོ་ཁ་ཁར་བྱས་ནས་ང་གཅིག་པུར་འགྲོ་རྒྱུ་ཡིན་ཞེས་ཨུ་ཚུགས་བྱས་འདུག་ལ། དེ་ལ་མདོ་མཁྱེན་བརྩེའི་རང་རྣམ་དུ། (སྤྲུལ་སྐུ་ཡིན་པ་)སུ་ལའང་མི་བཤད་པའི་མནའ་ཐོ་བཅད་དེ། དངོས་རྫས་ཀུན་ཁོ་རང་རྣམས་ལ་བགོ་བཤའ་བྱས་ནས་བྱིན། དཔལ་དགེ་དང་ང་རང་གཉིས་ཨར་ཅོ་རྣམས་ཀྱི་སྒར་མཐའ་འབྲངས་ནས་ཕྱིན། ཞེས་དཔལ་དགེ་ཁོང་རྣམ་གཉིས་ཨར་ཅོའི་ནང་གི་ཨར་ཅོ་བྱས་ནས་ཕེབས་འདུག་ཅིང་། དེ་ནས་ཁོང་ཚོ་མཛོད་དགེ་ཐང་སྐོར་ཨ་མཆོག་སོགས་ནས་ཨ་མྱེ་དམུ་རི་ཞེས་པའི་ས་ཆ་བརྒྱུད་དེ་བླ་བྲང་བཀྲ་ཤིས་འཁྱིལ་དུ་ཕྱིན་འདུག

༦༽ རྫ་དཔལ་སྤྲུལ་བླ་བྲང་དུ་ཕེབས་ནས་གུང་ཐང་ཚང་མཇལ་བ།

དོན་དག་གལ་ཆེན་ཞིག་ནི། སྐབས་དེར་མདོ་མཁྱེན་བརྩེས་བླ་བྲང་དུ་གནས་མཇལ་དང་འབྲེལ་གུང་ཐང་རིན་པོ་ཆེ་དང་མཇལ་འདུག་ཅིང་། དེའི་ཚུལ་རྣམ་ཐར་ལས། གུང་ཐང་རྡོ་རྗེ་འཆང་ཆེན་པོའི་དྲུང་དུ། གནས་སྐོར་བ་ཀུན་ཕྱག་མཇལ་དུ་སོང་བ་ང་རང་གྲལ་མཐར་གནས་ཀྱང་ལྐོག་གྱུར་གཟིགས་པའི་ངོས་འཛིན་མཛད་ཅིང་། ཅིས་ཀྱང་གསུང་ནན་གྱིས་ཁྱོད་རང་སུ་ཡིན་བཤད་དགོས་གསུང་པས་གསང་ཚུལ་གྱིས་ང་རང་གི་ལོ་རྒྱུས་བཤད་དགོས་བྱུང་། ཆོས་འབྲེལ་ཡང་རྒྱ་ཆེར་གནང་། ཞེས་གསུང་འདུག སྐབས་དེར་ཡང་དཔལ་སྤྲུལ་རིན་པོ་ཆེ་ཁོང་དང་མཉམ་དུ་མཇལ་བ་དག་གི་མཐའ་ན་ཡོད་ངེས་སུ་འདུག་པ་དང་། མདོ་མཁྱེན་བརྩེ་དང་མཉམ་དུ་ཆོས་འབྲེལ་མང་པོ་ཞུ་རྒྱུའི་གོ་སྐབས་བྱུང་ཡོད་པར་ཡིད་ཆེས་ཆོག་པ་ཞིག་རེད། དེ་ནས་མུ་མཐུད་ཁོང་རྣམ་པ་རེ་སྐོང་དུ་ཕེབས་ཤིང་། མདོ་མཁྱེན་བརྩེ་དང་དཔལ་སྤྲུལ་གཉིས་མཚོ་སྙིང་མ་ཧཱ་དེ་ཝར་ཡང་ཕེབས་པ་དང་། མཚོ་སྙིང་ནས་ཕྱིར་འཁོར་ཙམ་ན་དཔལ་དགེ་གཙོས་པའི་གནས་མཇལ་བ་དེ་ཚོ་ཕྱིར་རང་ཡུལ་དུ་ཕེབས་པ་དང་མདོ་མཁྱེན་བརྩེ་མུ་མཐུད་རེ་སྐོང་དུ་བཞུགས་པར་གསལ།
ཁོང་རྣམ་པ་གཉིས་ཀྱིས་བླ་བྲང་ནས་མདོ་མཁྱེན་བརྩེ་དང་སྤྲུལ་སྐུ་ཡིན་པ་སོགས་གསང་ནས་ཧ་ཅང་དཀྱུས་མའི་ཚུལ་གྱིས་རྗེ་གུང་ཐང་རིན་པོ་ཆེར་མཇལ་ཁ་ཞུས་འདུག་པ་དང་། དེའི་ཁྲོད་དུ་དཔལ་སྤྲུལ་ཡང་ཡོད་ངེས་སུ་གྲུབ་ཅིང་། དེ་ཡིན་ན་གུང་ཐང་པ་དང་དཔལ་སྤྲུལ་ཡང་དངོས་སུ་མཇལ་མྱོང་ཡོད་པར་གྲུབ་ཅིང་། སྤྱིར་བཏང་། གུང་ཐང་རིན་པོ་ཆེ་ནི་ཆོས་ལུགས་རིས་མེད་ཀྱི་གུས་བཀུར་ཞུ་ཡུལ་གྱི་ངེས་པ་དོན་གྱི་སྐྱེས་ཆེན་ཞིག་ཡིན་ཞིང་། དཔལ་སྤྲུལ་རིན་པོ་ཆེས་ཞབས་དཀར་ཚོགས་དྲུག་རང་གྲོལ་མཇལ་འདོད་ཆེན་པོ་གནང་ནས་ཕེབས་སྐབས་ལམ་བར་ནས་ཞབས་དཀར་སྐུ་གཤེགས་པ་གསན་པས་ཐུགས་ཕམ་ཆེན་པོ་གནང་བའི་སྐོར་རྣམ་ཐར་དུ་འཁོད་པ་བཞིན། གུང་ཐང་རིན་པོ་ཆེ་ཡང་དཔལ་སྤྲུལ་རིན་པོ་ཆེེས་མཇལ་འདོད་ཡོད་པའི་སྐྱེས་བུ་ཞིག་ཡིན་པར་ཐག་གཅད་ནས་བཤད་ཆོག་ཅིང་། ཁོང་རྣམ་པའི་གསུང་རྩོམ་དག་ལ་བལྟས་ན་ཡང་དཔལ་སྤྲུལ་དང་གུང་ཐང་པའི་བར་དགོངས་པ་བཞེས་སྟངས་སོགས་མཐུན་ཆ་མང་པོ་ཞིག་ཡོད་ངེས་ལྟ་བུར་མཐོང་། འོན་ཀྱང་། དཔལ་སྤྲུལ་སྤྱི་ཡོངས་ནས་ཤེས་རབ་ཆེན་པོ་ཡོད་མིན་ལ་མ་ལྟོས་པར་དགོང་ལོ་ཉི་ཤུར་ཟིན་ཙམ་གྱི་རྫ་ཆུ་ཁའི་བླ་ཆུང་ཞིག་གི་སྤྲུལ་སྐུ་ཡིན་པས་སྐབས་དེར་ཤར་ཁ་ཕྱོགས་ཀྱི་དགོན་ཆེན་ཚོར་མཚོན་ན་ཧ་ལམ་ཆ་རྒྱུས་ཡོད་མི་སྲིད། གུང་ཐང་ཚང་དང་ཡང་དམིགས་བསལ་གྱི་བཀའ་མོལ་བྱུང་བའི་ལོ་རྒྱུས་མི་གསལ།

༧༽ སྐབས་དོན་དང་འབྲེལ་བའི་དོགས་གཅོད།

མཚམས་འདི་ནས་སྐབས་དེར་རྫ་དཔལ་སྤྲུལ་དགུང་ལོ་ཆུང་ཆུང་ཡིན་པས་མདོ་མཁྱེན་བརྩེ་དང་མཉམ་དུ་ཡོད་པའི་དཔལ་དགེ་དེ་དཔལ་སྤྲུལ་རིན་པོ་ཆེ་ཡིན་མིན་དང་། སྐབས་དེར་མཇལ་རྒྱུའི་གུང་ཐང་རིན་པོ་ཆེ་དེ་གུང་ཐང་སྐུ་ཕྲེང་གང་ཡིན། གུང་ཐང་དང་དཔལ་སྤྲུལ་གྱི་དགུང་ན་དང་ས་བབས་སོགས་ཀྱི་ཞལ་མཇལ་ཐུབ་ཡོད་མེད་སོགས་ཀྱི་སྐོར་ལ་དོགས་གཅོད་ཕྲན་བུ་ཞིག་བྱེད། དེ་ཡང་མདོ་མཁྱེན་བརྩེ་དང་དཔལ་སྤྲུལ་གཉིས་རྡོ་གྲུབ་རིན་པོ་ཆེའི་སྐུ་མདུན་ནས་ཐོན་ཏེ་ཐུགས་ཆེན་སོགས་བརྒྱུད་བླ་བྲང་ལ་ཕེབས་པའི་ལོ་དེ་ལྕགས་འབྲུག་ལོ་མགོ་ཡིན་ཞིང་། དེ་ནི་སྤྱི་ལོ་༡༨༢༠ལོར་ཁེལ། སྐབས་དེར་དཔལ་སྤྲུལ་རིན་ཆེ་དགུང་གྲངས་ཉི་ཤུར་ཟིན། དེ་ནི་མཁན་པོ་ཀུན་དཔལ་གྱིས་དཔལ་སྤྲུལ་རིན་པོ་ཆེའི་རྣམ་ཐར་དུ། མདོ་མཁྱེན་བརྩེས་དཔལ་སྤྲུལ་ལ་ཁྱི་རྒན་ཞེས་བོས་ནས་རིག་པ་ངོ་སྤྲོད་མཛད་ཚུལ་དང་། གཅོད་ཁྲིད་གསན་ནས་གཉན་སར་ཕེབས་ཚུལ་སོགས་བྲིས་རྗེས། བྱུང་བ་འདི་དག་དཔལ་སྤྲུལ་རིན་པོ་ཆེ་དགོང་ལོ་ཉི་ཤུ་ཐམ་པ་བཞེས་པ་ཡན་ཆད་ལ་ཡིན་ཞེས་ཆེད་དུ་གསལ་ཁ་གཏོན་གནང་བ་ཡང་ཡོངས་སུ་མཐུན།
གཉིས་པ་ནི། སྤྱིར་དཔལ་དགེ་ལ་མཚན་ནས་འབོད་ཚུལ་མི་འདྲ་བ་དཔེར་ན། དཔལ་སྤྲུལ་རིན་པོ་ཆེ་དང་། མཁན་པོ་བདེ་གཤེགས་ཚང་། ཨ་བུ་དཔལ་དགེ ཨ་བུ་རིན་པོ་ཆེ། མཁས་པ་དཔལ་དགེ་རྒྱལ་པོ་སོགས་མང་པོ་ཡོད་འདུག་ན་ཡང་། མདོ་མཁྱེན་བརྩེའི་རང་རྣམ་དུ་དཔལ་དགེ་ཞེས་པ་འདི་ཁོ་ནས་འབོད་གནང་ཡོད་ཅིང་། དེ་ནི་མཁན་པོ་ཀུན་དཔལ་གྱིས་བརྩམས་པའི་དཔལ་སྤྲུལ་རྣམ་ཐར་གོང་དུ་དྲངས་པ་ལས། མདོ་མཁྱེན་བརྩེས། དཔལ་དགེ་ཞེས་བོས་ཏེ་ཞེས་གསུངས་པ་དང་ཡང་རྦད་དེ་འགྲིགས་པ་ཡིན།

ད་དུང་སེམས་ཁུལ་གཞན་ཞིག་བྱུང་བ་ནི་སྐབས་དེར་གུང་ཐང་བསྟན་པའི་སྒྲོན་མེ་སྐུ་བཞུགས་སམ་སྙམ་པ་དེ་ཡིན། འོན་ཀྱང་། ཚེ་ཏན་ཞབས་དྲུང་གི་བསྟན་རྩིས་ལྟར་ན། གུང་ཐང་བསྟན་པའི་སྒྲོན་མེ་སྤྱི་ལོ་༡༩༦༢ལ་འཁྲུངས་ཤིང་། སྤྱི་ལོ་༡༨༢༣ཆུ་མོ་ལུག་གི་ལོར་སྐུ་གཤེགས་འདུག་ཅིང་། མདོ་མཁྱེན་བརྩེ་དང་དཔལ་སྤྲུལ་བླ་བྲང་དུ་ཕེབས་པའི་ལྕགས་འབྲུག་གི་ལོ་ནས་མར་བརྩིས་པའི་ལོ་གསུམ་པར་ཁེལ་ཡོད། དེ་ཡང་སྤྱི་ལོ་༡༨༢༠ལོར་དཔལ་སྤྲུལ་རིན་པོ་ཆེ་གུང་ཐང་ཚང་དང་མཇལ། སྤྱི་ལོ་༡༨༢༡ལོར་རྡོ་གྲུབ་ཆེན་སྐུ་གཤེགས། སྤྱི་ལོ་༡༨༢༢ཆུ་རྟ་ལོར་མདོ་མཁྱེན་བརྩེ་དང་དཔལ་དགེ་གཉིས་སླར་ཡང་ཁྲོ་སྐྱབས་ཐུགས་ཆེན་ནས་མཉམ་འཛོམས་བྱུང་། དེའི་ཕྱི་ལོ་སྟེ། སྤྱི་ལོ་༡༨༢༣ཆུ་ལུག་ལོར་གུང་ཐང་པ་སྐུ་གཤེགས་འདུག དེས་ན་རྫ་དཔལ་སྤྲུལ་གྱིས་གུང་ཐང་བ་མཇལ་ཡོད་པར་ཁ་ཚོན་གཅད་ནས་བཤད་ཆོག་པ་ལྟ་བུ་ཞིག་ཏུ་འདུག

༨༽ དཔལ་སྤྲུལ་གྱི་ཞབས་རྗེས་གཞན་འགའ་ཞིག

འདི་དག་གི་ཞོར་དུ། རྫ་དཔལ་སྤྲུལ་རིན་པོ་ཆེས་ཁྲོ་སྐྱབས་ཐུགས་རྗེ་ཆེན་པོའི་མདུན་ནས་རི་ཁྲུས་དང་རབ་གནས་མཛད་པ་དང་། སྤྱི་ལོ་༡༨༢༠དང་༡༨༢༢སོ་སོར་མ་མཐའ་ཡང་ས་ཆ་དེར་ཐེངས་གཉིས་ཕེབས་ཡོད་པ། ཐེངས་གཉིས་པའི་སྐབས་སུ་མདོ་མཁྱེན་བརྩེ་དང་མཉམ་དུ་སྨྱུང་གནས་མཛད་པ་སོགས་ཀྱང་རྟོགས་ཐུབ།
མདོ་མཁྱེན་བརྩེའི་རང་རྣམ་ལྟར་ན། ལྕགས་འབྲུག་ལོར་དཔལ་སྤྲུལ་གསེར་རྟ་ནས་རྒྱལ་རོང་། དེ་ནས་མཛོད་དགེ་དང་ཨ་མཆོག་བརྒྱུད་བླ་བྲང་དང་རེ་སྐོང་མཚོ་སྙིང་མ་ཧཱ་དེ་ཝའི་བར་དུ་ཕེབས་གནང་ཡོད་པ་དང་། རྟ་ལོའི་ལོ་མཇུག་ཏུ་ཡང་བསྐྱར་ཁྲོ་སྐྱབས་ཐུགས་ཆེ་ཆེན་པོ་བསྐོར་སར་ཕེབས་ཡོད་འདུག་པ་དང་། དེ་དང་རྗེས་འབྲེལ་ལུག་གི་ལོར་མུ་མཐུད་མདོ་མཁྱེན་བརྩེ་དང་མཉམ་དུ་དེང་གི་རྔ་བ་རང་སྐྱོང་ཁུལ་གྱི་ས་ཁུངས་སུ་དུས་ངེས་ཅན་བཞུགས་པ་སོགས་ལ་བསམ་ན་སྐབས་དེར་རྐང་ཐང་གི་འགྲུལ་བཞུད་ཁོ་ནས་དགོང་ལོ་ཉི་ཤུ་ནས་དེ་ཙམ་ཕེབས་ཟིན་ན། ཁོང་གི་སྐུ་ཚེ་ཧྲིལ་པོའི་ཞབས་ཐང་གི་འགྲུལ་བཞུད་ཀྱི་རྗེས་ཤུལ་འཚོལ་རྒྱུ་ནི་ཧ་ཅང་དཀའ་ཁག་ཅན་ཞིག་ཀྱང་ཡིན་ངེས། ཁོང་ནི་དགོང་ལོ་མཐོན་པོར་སོན་པའི་བར་དུ་ཡང་མཛད་སྤྱོད་དེ་ག་རང་རྒྱུན་བསྐྱངས་གནང་བ་རེད། འོན་ཀྱང་། དཔལ་སྤྲུལ་རིན་པོ་ཆེས་སྐུ་ཚེ་སྨད་ཀྱི་བཞུགས་ཡུལ་གཙོ་བོ་དེ་ནི་ཐོག་མར་སྐུ་འཁྲུངས་སའི་རྫ་ཆུ་ཁའི་དགེ་གོང་ས་ཆའི་ཉིན་ལུང་ཞིག་ཏུ་ཡོད་པའི་དཀར་ཆུང་སྐོ་འོར་ཞེས་པའི་འབྲོག་མཚེར་དེ་ཉིད་ཡིན་པ་དང་། མཐར་སྐུ་གཤེགས་སའང་ས་ཆ་དེ་ཉིད་རེད། གུས་པའང་ཐེངས་ཤིག་ཆེད་དུ་བྱང་ཆུབ་སེམས་དཔའ་དཔལ་སྤྲུལ་རིན་པོ་ཆེའི་སྐུ་འཁྲུངས་ས་དང་ཆོས་འཁོར་བསྐོར་ས་མཛད་པ་ཐ་མ་མྱ་ངན་ལས་འདས་པའི་གནས་གསུམ་ཀ་ཡིན་པའི་ས་མིག་དེར་ཕྱིན་ནས་སྨོན་ལམ་བཏབ་པ་ཡིན།

༩༽ དཔལ་སྤྲུལ་ལ་ལྷ་བབས་ཚུལ།

ད་དུང་དོ་སྣང་འོས་པ་གཞན་ཞིག་ནི། སྐབས་དེར་དཔལ་སྤྲུལ་རིན་པོ་ཆེས་ཆོས་སྐྱོང་གི་སྐུ་རྟེན་གནང་འདུག་ཅིང་། དེ་ཡང་ཤ་ཟ་ཁ་མོ་ཆེ་བབས་ནས་མདོ་མཁྱེན་བརྩེ་ལ་ལུང་བསྟན་ཕུལ་བ་དང་། དེ་ནས་ལུང་བསྟན་ལྟར་ཐུགས་རྗེ་ཆེན་པོར་ཕྱག་བསྐོར་རྫོགས་ནས་འབྲོང་རྫོང་ཟེར་བའི་ས་ཆ་བརྒྱུད་ཚ་ཁ་རྒྱར་བཀྲ་ཤིས་ཐང་ཟེར་བ་ཞིག་ཏུ་གདན་ཕབ་སྟེ་དཔལ་སྤྲུལ་རིན་པོ་ཆེས་མདོ་མཁྱེན་བརྩེ་མིང་སྲིང་དང་མཉམ་དུ་ཚོམ་བུ་ཚོགས་སྒྲུབ་ཀྱི་ཚོགས་ཀྱི་འཁོར་ལོ་རྒྱ་ཆེན་པོ་ཞིག་བསྐོར་ནས་ཞག་བདུན་གྱི་རིང་རྟེན་འབྲེལ་ཆེན་མོ་ཞེས་པའི་གསང་བ་རྨད་དུ་བྱུང་བའི་རྟུལ་ཞུགས་ཀྱི་སྤྱོད་པ་གནང་འདུག སྐབས་དེར་ཡང་དཔལ་སྤྲུལ་ལ་ལྷ་བབས་འདུག

དེའི་སྐོར་མདོ་མཁྱེན་བརྩེའི་རྣམ་ཐར་དུ། དེར་སྐབས་ཤིག་བླ་མ་དཔལ་དགེས་སྣ་དྲངས། སྲིང་མོ་མཆོག་གི་གཙོ་གྱུར་དམ་ལྡན་བདུན་ཙམ་ལ། ཡེ་ཤེས་མཁའ་འགྲོ་དངོས་སུ་བྱིན་ཕེབས་ཅིང་རྟེན་འབྲེལ་གྱི་སྒོ་འཕར་ཕྱེས། དབེན་པ་ཞིག་ཏུ་ཚོགས་ཀྱི་འཁོར་ལོ་རྒྱ་ཆེན་པོ་ཞིག་བསྐོར་བ་ལ། སྲིང་མོ་ཆེན་མོ་མཁའ་འགྲོ་ས་འཛིན་ཆེན་མོར་བརྫུས་ཤིང་དཀྱིལ་འཁོར་གྱི་བྱ་བ་བསྒྲུབས། གཞན་མི་ཕོ་མོ་ལྔ་ལ་མཁའ་འགྲོ་སྡེ་ལྔ་བབ་ཅིང་བརྡ་སྣ་ཚོགས་སྟོན། དཔལ་དགེ་ལ་སེང་ཧ་མུ་ཁ་བབ་ནས་ས་མཚམས་འཛིན། ཞེས་སོགས་ཏེ། འདི་དག་གིས་ཀྱང་། དཔལ་སྤྲུལ་རིན་པོ་ཆེ་གཞོན་ནུའི་དུས་སུ་མདོ་མཁྱེན་བརྩེ་རིན་པོ་ཆེ་དང་མཉམ་དུ་ཕེབས་བཞུད་གནང་པའི་ལོ་རྒྱུས་གལ་ཆེན་ཤ་སྟག་རེད།

རྟུལ་ཞུགས་ཀྱི་སྤྱོད་པ་སྐྱོང་བ་དང་ལྷ་ཕེབས་པ་འདི་དག་ཀྱང་རྨོངས་དད་དང་ཟོག་པོའི་ལས་ལྟ་བུ་ཞིག་ལས་དཔལ་སྤྲུལ་རིན་པོ་ཆེས་ལྟ་བུས་དེ་འདྲ་ཨེ་གནང་སྙམ་པའང་མ་ཤེས་པ་ཡིན་ཏེ། ཀུན་མཁྱེན་ཀློང་ཆེན་པས་རྫོགས་ཆེན་གྱི་ཆོས་གསུང་ས་ཕལ་མོ་ཆེར་སློབ་མ་ཚོར་ཡེ་ཤེས་པ་བྱིན་ཕེབས་ཀྱི་ཡོད་པ་རྣམ་ཐར་དུ་ཤིན་ཏུ་རྒྱས་པར་འཁོད་ཡོད་ཅིང་། སྤྱིར་རིག་པ་རྟུལ་ཞུགས་ཀྱི་སྤྱོད་པ་ཡང་སྐབས་སུ་བབས་ན་ངེས་པར་དང་དུ་ལེན་དགོས་པ་སྔགས་ཀྱི་དམ་ཚིག་ཡིན་ཞིང་། དཔལ་སྤྲུལ་རིན་པོ་ཆེས་ཀྱང་དེ་ག་རང་དུ་བཞེད་དེ། དེའི་དཔེ་མཚོན་གསལ་ཤོས་ནི། དཔལ་སྤྲུལ་རིན་པོ་ཆེས་རྒྱལ་སྲས་གཞན་ཕན་མཐའ་ཡས་ལ་ཕུལ་བའི་ཕྲིན་ཡིག་དེ་ཡིན་ཏེ། ཕྲིན་ཡིག་དེ་ནི་རྒྱལ་སྲས་གཞན་ཕན་མཐའ་ཡས་རྟེན་རབ་བྱུང་ཤིན་ཏུ་བཙུན་པར་བཞུགས་པ་ཉིད་སྔགས་པར་སྒྱུར་རྒྱུར་ནན་སྐུལ་གནང་བའི་གསུང་ཕྲིན་ཞིག་ཡིན། རྩོམ་ཡིག་དེའི་མིང་ལ། རྒྱལ་སྲས་གཞན་ཕན་མཐའ་ཡས་ལ་ཐབས་ལམ་མཆོགག་ིསྤྱོད་པ་ལ་དབངབའི་ཡོན་ཏན་ལ་བསྐུལ་བའི་ཟོལ་གྱིས་བསྔགས་པ་ཞེས་བྱ་ཞིང། དཔལ་སྤྲུལ་རིན་པོ་ཆེའི་བཀའ་འབུམ་དུ་བཞུགས།།

༡༠༽ མཇུག་བསྡུ་བ།

གང་ལྟར་ང་ལ་མཚོན་ན། ངག་རྒྱུན་ཙམ་མིན་པར་སེམས་ཀྱི་གཏིང་ནས་ཤིན་དུ་སྨར་བའི་བྱང་ཆུབ་སེམས་དཔའ་དཔལ་སྤྲུལ་རིན་པོ་ཆེས་འདི་ལྟར་ཁུར་སྒ་རྒྱབ་དུ་ཁུར། བེར་ཀ་ཕྱག་ཏུ་བསྣམས་ནས་ཞབས་ཐང་གིས་བོད་ཀྱི་ས་ཁུལ་ངེས་མེད་དུ་བསྐོར་བའི་ཞབས་རྗེས་འདི་དག་རེ་རེ་བཞིན་མཐོང་མ་ཐག་དགའ་སྣང་དང་སེམས་འགུལ་ཆེན་པོ་ཐེབས་པར་མ་ཟད། དཔལ་སྤྲུལ་རིན་པོ་ཆེ་དང་རྗེ་གུང་ཐང་པ་དངོས་མཇལ་བྱུང་འདུག་ཨང་སྙམ་པའི་སྣང་བརྙན་འདིས་ང་ལ་རྒྱུ་མཚན་མེད་པར་སྤྲོ་བ་ལྷག་མ་ཞིག་དྲངས་བྱུང་། དེ་བཞིན་དཔལ་སྤྲུལ་རིན་པོ་ཆེ་ས་ཆ་མང་པོར་ཕེབས་པ་དང་། ཁོང་ལ་ལྷ་བབས་པ། སྒར་མཐའ་འགྲིམ་པ། བླ་མའི་ཞབས་གཡོག་ཞུས་པ་སོགས་ཀྱི་རྣམ་ཐར་ཀྱི་ཡིག་འབྲི་རེ་རེའང་ཧ་ཅང་རྩ་ཆེན་པོ་ཡིན་པའི་ཚོར་སྣང་ཤུགས་ཆེན་པོ་བྱུང་། མ་འོངས་པར་ཡང་ང་ཚོས་སྐབས་དེའི་འབྲེལ་ཡོད་ཀྱི་མི་སྣ་གཞན་དང་དགོན་སྡེ་སོགས་ལས་ཀྱང་ཕྱོགས་མཚུངས་པའི་ལོ་རྒྱུས་ཀྱི་ཁོངས་སྣེ་མང་པོ་བསྔོགས་འདོན་ཐུབ་པ་དགོས་ཤིང་། དེའི་རིགས་ལ་ཞིབ་འཇུག་བྱས་ནས་དཔལ་སྤྲུལ་རིན་པོ་ཆེའི་ཞབས་རྗེས་འཚོལ་བའི་ལམ་ལ་མུ་མཐུད་འཇུག་དགོས་པ་ཡིན།