ཨ་ཇོ་བསོད་ནམས་སྟོབས་རྒྱལ།
རུལ་སུངས་ཞེས་པའི་བརྡ་དོན་ལ་གོ་བ་འདྲ་མིན་ཡོད། དཔེར་ན། ཆབ་སྲིད་ཀྱི་རུལ་སུངས་དང་། དཔལ་འབྱོར་གྱི་རུལ་སུངས། དབང་ཆའི་རུལ་སུངས་སོགས་རྣམ་གྲངས་འདྲ་མིན་ལ་སྐབས་ཐོབ་གོ་བ་བླང་ཆོག་པ་ཞིག་ཡིན། རུལ་སུངས་ཀྱི་དྲི་ངན་འདི་ཆེ་བ་རྒྱལ་ཁབ་དང་ཆུང་བ་ཁྱིམ་ཚང་ཡན་གྱི་གཞུང་སྒེར་ཁྱབ་ཁོངས་གང་འདྲ་ཞིག་ཏུ་ཡོད་ཕྱིན་དེ་ཉིད་ངེས་པར་དུ་ཕམ་རྒྱུ་ཡིན་པ་ནི་རུལ་སུངས་ཀྱི་ཆོས་ཉིད་རེད། ང་ཚོས་རྒྱ་ནག་གི་ཉེ་རབས་ཀྱི་བྱུང་རབས་ཏེ་གོ་མིན་ཏང་དང་གུང་ཁྲན་ཏང་གཉིས་ཀྱི་འཐབ་རྩོད་ཆེན་མོའི་རྒྱུད་རིམ་ལ་ཞིབ་ལྟ་ཞིག་གནང་ན་ཤེས་ཐུབ། གོ་མིན་ཏང་ལ་མཚོན་ན་དུས་སྐབས་དེའི་ནང་དམག་དོན་དང་། དེ་མིན་གྱི་ཆབ་སྲིད་སྒྲིག་འཛུགས་གང་ཞིག་ལ་བལྟས་ཀྱང་ཚང་མ་ཕུལ་བྱུང་ཤ་སྟག་ཡིན། གསར་དུ་སྒྲིག་འཛུགས་བྱས་པའི་ཐབ་གསར་གཞིས་གསར་གུང་ཁྲན་ཏང་གི་ལག་འོག་ཏུ་ཕམ་རྒྱུ་ཡིན་པ་ཁོ་ཚོའི་མཐོ་རིམ་དཔོན་རིགས་ཚོའི་རྨི་ལམ་དུའང་མེད། དགོས་མཁོ་ཆེ་བའི་གསང་བའི་སྒྲིག་འཛུགས་ནང་དུའང་ཆེད་ལས་ཕུལ་བྱུང་གི་མི་སྣ་ཤ་སྟག་ཡོད་པ་རེད། ཡིན་ནའང་ཁོ་ཚོ་གུང་ཁྲན་ཏང་གི་ལག་འོག་ནས་ཕམ་སོང་བ་རེད། ཁོ་ཚོ་འདི་ལྟར་ཕམ་དོན་ཡང་ཁོ་ཚོའི་སྒྲིག་འཛུགས་ཀྱི་ཁྱབ་ཁོངས་གང་སར་རུལ་སུངས་ཀྱིས་ཁྱབ་པ་འདི་གཅིག་པུས་ལན་པ་རེད། རུལ་སུངས་ཀྱི་ཁྱབས་ཁོངས་ནང་ངོ་ལྐོག་རྒྱབ་མདུན་དང་། ངོ་དགའ་སྤྲེལ་ལད་སོགས་གཡོ་སྒྱུ་དང་ཁྲམ་པའི་བྱ་སྤྱོད་གང་ཡིན་ནའང་བེད་སྤྱོད་གཏོང་ས་ཡོད་པར་བརྟེན་གུང་ཁྲན་ཏང་གིས་དེ་དག་བེད་སྤྱད་དེ་གོ་མཚོན་གྱི་དཔུང་ཤུགས་ཁྲི་འབུམ་ལས་ཀྱང་ལྷག་པའི་རྒྱལ་ཁ་བླངས་ཡོད་པ་རེད།
རང་རེའི་སྐྱབས་བཅོལ་བའི་མི་ལོ་ལྔ་བཅུའི་འགྲུལ་ཐག་རིང་མོའི་ནང་དུ་བསམ་གཞིགས་ཤིག་བྱས་ན་ང་ཚོར་དབུ་ཁྲིད་ཁྱད་དུ་འཕགས་པ་ཞིག་ཡོད་པས་སྐྱབས་བཅོལ་བའི་སྤྱི་ཚོགས་གཞན་དང་མ་འདྲ་བའི་སྒྲིག་འཛུགས་ཤིག་འཛུགས་སྐྲུན་བྱེད་ཐུབ་ཡོད་ཀྱང་། དེ་རིང་ང་ཚོ་ཁ་ཐབས་འདི་འདྲ་ཞིག་ལ་གྱུར་བ་འདི་ཡང་རུལ་སུངས་གཅིག་པུས་ལན་པ་ང་ཚོའི་ཉེ་རབས་ལོ་རྒྱུས་ནང་གི་གུར་སེར་པོ་ནས་ཉི་ཧོང་དོན་གཅོད་ཀྱི་རུལ་སུངས་བར་གྱི་ཆབ་སྲིད་དང་དཔལ་འབྱོར་གྱི་རུལ་སུངས་དེ་དག་དང་། དེ་ནས་དེ་རིང་གི་ཨ་སྒོར་ས་ཡ་གཅིག་དང་ཕྱེད་ཀའི་རུལ་སུངས་བར་གྱི་རུལ་སུངས་ཀྱི་རྣམ་གྲངས་ཆེ་ཆུང་མང་པོས་ང་ཚོའི་རྩ་དོན་གྱི་གནས་བབས་ལ་ཕམ་ཁ་སྤྲད་པ་རེད། དེ་སྔ་གོ་མིན་ཏང་གི་སྒྲིག་འཛུགས་ནང་དང་ད་ལྟ་ང་ཚོའི་སྤྱི་ཚོགས་ནང་རུལ་སུངས་ཐེར་འདོན་བྱེད་མཁན་མེད་པ་མ་ཡིན་ནའང་གོ་མིན་ཏང་དང་། ང་ཚོའི་རུལ་སུངས་ཐེར་འདོན་པ་ཚོས་རུལ་སུངས་ལ་དམིགས་པའི་གཅིག་གྱུར་གྱི་ཐེར་འདོན་མེད་པར་གང་ཟག་ལ་དམིགས་ནས་རུལ་སུངས་ཐེར་འདོན་བྱེད་དགོས་མིན་ལ་བསམ་གཞིགས་བྱེད་ཀྱི་ཡོད། དཔེར་ན། དེ་སྔོན་བུད་མེད་ལྷན་ཚོགས་ཀྱི་ཚོགས་གཙོའི་ཧིན་སྒོར་འབུམ་གཉིས་ཙམ་གྱི་རུལ་སུངས་ཐེར་འདོན་བྱེད་ཕོད་མཁན་དེ་ཚོས་ད་ལྟའི་ཨ་སྒོར་ས་ཡ་གཅིག་དང་ཕྱེད་ཀའི་རུལ་སུངས་ཐེར་འདོན་བྱེད་མི་ཕོད་པ་དང་། སྤྱི་རྒྱུ་སྒེར་བདག་གི་གྱོད་དོན་བསྐྱར་སློག་ཡང་སློག་བྱས་ནས་གཞུང་དང་མི་མང་གི་ཁེ་ཕན་སྲུང་སྐྱོབ་བྱེད་ཕོད་མཁན་དེ་ཚོར་ས་ཡ་གཅིག་དང་ཕྱེད་ཀའི་རུལ་སུངས་ལ་དོགས་འདྲི་ཙམ་ཞིག་བྱེད་ཕོད་པའི་བློ་ཁོག་མེད་པ་དེ་ཚོ་རེད། ང་ཚོའི་རུལ་སུངས་ཐེར་འདོན་བྱེད་སྟངས་དེ་གང་ཟག་ལ་དམིགས་ནས་སྐབས་བསྟུན་ཞུ་གི་ཡོད་པས་རུལ་སུངས་ཐེར་འདོན་བྱེད་ཐབས་ཀྱང་རུལ་སུངས་སུ་གྱུར་པ་རེད། དེར་བརྟེན་ང་ཚོའི་ཁ་གཏད་གུང་ཁྲན་ཏང་གི་སྒྲིག་འཛུགས་ནང་ང་ཚོ་ལས་ལྷག་པའི་རུལ་སུངས་ཀྱིས་ཕྱོགས་ཡོངས་སུ་ཁྱབ་ཡོད་ཀྱང་ང་ཚོས་དེ་ཚོ་བེད་སྤྱོད་གཏང་མ་ཐུབ་པར་ཁོ་ཚོས་ང་ཚོའི་རུལ་སུངས་བེད་སྤྱོད་གཏོང་ཐུབ་པའི་ཁོར་ཡུག་བསྐྲུན་པ་རེད།
ང་ཚོའི་སྤྱི་ཚོགས་ནང་ས་ཡ་གཅིག་དང་ཕྱེད་ཀའི་རུལ་སུངས་ཀྱི་སྐད་ཆ་དེ་ཇི་ལྟར་སླེབས་པ་ཡིན་ནམ། དེ་ནི་ཨ་རིའི་དོན་གཅོད་གནས་དབྱུང་བཏང་བའི་སྐད་ཆ་ནས་འཕྲོས་ཏེ་སླེབས་པ་རེད། ཀ་པའི་ཕྱོགས་ནས་ཨ་རིའི་དོན་གཅོད་གནས་དབྱུང་གཏོང་བའི་རྒྱུ་མཚན་ནི་དེ་སྔའི་ཨ་རིའི་དོན་གཅོད་ཀྱིས་བོད་ཀྱི་ཐེབས་རྩ་ནས་དོན་ཁང་གསར་ཉོའི་དགོས་དངུལ་ཨ་སྒོར་ས་ཡ་གཅིག་དང་ཕྱེད་ཀ་བླངས་པའི་རྩིས་ཁྲ་ཡོད་ཀྱང་དོན་ཁང་གི་རྩིས་ཁྲའི་ནང་དེ་གསལ་མེད་པས་དོན་གཅོད་ལས་ཐོག་པས་རང་གི་དཔལ་འབྱོར་རིག་པའི་ཆེད་ལས་བེད་སྤྱོད་བཏང་ནས་གསལ་པོ་བཟོ་རྩིས་བྱས་པ་དེས་འཛིན་སྐྱོང་གི་རུལ་སུངས་ལ་དོ་ཕོག་ཆེན་པོ་འགྲོ་གི་ཡོད་པར་བརྟེན། བཀའ་ཤག་ལྷན་རྒྱས་ཀྱི་གཅིག་མཐུན་རུལ་སུངས་ཀྱི་སྟོབས་ཤུགས་ལ་བརྟེན་ནས་དགའ་ལྡན་ཕོ་བྲང་ལ་སྙན་སེང་ཞུས་ནས་རུལ་སུངས་ཐེར་འདོན་དོན་གཅོད་ལས་ཐོག་པ་གནས་དབྱུང་བཏང་པ་རེད་ཅེས་ཤོད་ཀྱི་ཡོད། དེ་བཞིན་ཁ་པའི་ཕྱོགས་ནས་དོན་གཅོད་ལས་ཐོག་པས་རུལ་སུངས་ཀྱི་ནག་ཉེས་ཆེན་པོ་ཞིག་བསགས་ཡོད་པས་བཀའ་ཤག་ནས་དེའི་སྐོར་དགའ་ལྡན་ཕོ་བྲང་ལ་སྙན་སེང་གོ་བསྡུར་ཞུས་ཐོག་དགའ་ལྡན་ཕོ་བྲང་ནས་དོན་གཅོད་ལས་ཐོག་གནས་དབྱུང་ཐོག་ཁོ་པའི་རྒྱབ་ལྗོངས་ཀྱི་རུལ་སུངས་ཐེར་འདོན་མི་དགོས་པ་བྱས་པ་རེད་ཅེས་ཤོད་ཀྱི་ཡོད། ཀ་པ་དང་ཁའི་ཕྱོགས་སོ་སོའི་སྐད་ཆ་གཉིས་ཀར་མཐུན་ས་ཞིག་ཡོད་པ་ནི་དགའ་ལྡན་ཕོ་བྲང་ནས་ཕྱོགས་སོ་སོར་འགེབ་སྲུང་བྱས་པ་དེ་རེད། དེ་ལྟར་ན་ཕྱོགས་གཉིས་ཀས་དགའ་ལྡན་ཕོ་བྲང་སོ་སོའི་ཕྱོགས་སུ་འཐེན་ཐབས་བྱས་ཏེ་དགའ་ལྡན་ཕོ་བྲང་ནག་པོ་བཟོ་ཡི་ཡོད་པ་གསལ་པོ་རེད། ད་ལྟའི་ང་ཚོའི་སྤྱི་ཚོགས་སླར་ཡང་མི་བསམ་ས་ནས་ཟང་ཟིང་དུ་གྱུར་ཅིང་། དེ་ནི་ཨ་རིའི་དོན་གཅོད་ལས་ཐོག་གནས་དབྱུང་བཏང་བའི་རྙོག་གླེང་ནས་འགོ་ཚུགས་པ་དང་དེ་དང་ལྷན་དུ་དོན་རྐྱེན་དེའི་རྒྱབ་ལྗོངས་དང་འབྲེལ་བའི་ཐོག་ནས་ཨ་སྒོར་ས་ཡ་གཅིག་དང་ཕྱེད་ཀའི་རུལ་སུངས་ཀྱི་སྐད་ཆ་ཞིག་ཡོངས་ཁྱབ་བྱས་པ་རེད། ད་ལྟ་བཀའ་ཤག་ནས་རང་རེའི་སྤྱི་ཚོགས་ལྷིང་འཇགས་དང་། དགྲ་ཕྱོགས་ནས་དཀྲུགས་གཞི་མེད་པ་བཟོ་དགོས་ན་ངེས་པར་དུ་ཨ་རིའི་དོན་ཁང་དང་འབྲེལ་བའི་ཨ་སྒོར་ས་ཡ་གཅིག་དང་ཕྱེད་ཀའི་རྩིས་ཁྲའི་རུལ་སུངས་ཡོད་མེད་ཁ་གསལ་བཟོ་དགོས་ལ་དོན་གཅོད་ལས་ཐོག་པར་རུལ་སུངས་ཀྱི་གནད་དོན་ཡོད་མེད་ཀྱང་གསལ་པོ་བཟོ་དགོས་པ་རེད། ས་ཡ་གཅིག་དང་ཕྱེད་ཀའི་རུལ་སུངས་རྙོག་དྲ་དེ་དངོས་བདེན་ཡིན་ཚེ་བཀའ་ཤག་ནས་ཨ་རིའི་དོན་གཅོད་གསར་པ་ཤེས་རིག་བཀའ་བློན་ལས་ཐོག་པ་དངོས་གྲུབ་ཚེ་རིང་དོན་གཅོད་ཀྱི་ཞབས་སྟེགས་ཐོག་འཁོད་མཚམས་ཁོང་གི་ལོ་མང་གི་ཁ་བདེ་ལྕེ་བདེའི་ཉམས་མྱོང་ལ་བརྟེན་ནས་ས་ཡ་གཅིག་དང་ཕྱེད་ཀའི་གླེང་རྙོག་དེ་རིམ་པ་བདུན་གྱི་ས་འོག་ཏུ་སྦས་རྩིས་ཡོད་ངེས་ཀྱང་། ད་ལྟ་ས་ཡ་གཅིག་དང་ཕྱེད་ཀ་དེ་སྤྱི་ཚོགས་ནང་ཐོན་ཟིན་པར་བརྟེན་དེ་དོན་གཅོད་གསར་རྙིང་འཕོ་འགྱུར་གྱི་ཐབས་ཤེས་ལ་བརྟེན་ནས་སྦས་ས་རག་ཐབས་མེད་པས་བཀའ་ཤག་ནས་ངེས་པར་དུ་ཕྱག་མི་འཇུ་ཐབས་མེད་ཆགས་པ་རེད། དེ་ལྟར་ན་ང་དང་ངའི་གྲོགས་པོ་ཚོས་བཀའ་ཤག་ལ་གསོལ་འདེབས་ཞུ་རྒྱུར། རུལ་སུངས་ལ་བརྟེན་ནས་འཆི་སོན་གྱི་ས་མཚམས་སུ་སླེབས་པའི་བོད་མི་ས་ཡ་དྲུག་གི་རྩ་དོན་དང་། ཕྱོགས་སོ་སོའི་དབང་ཆ་འཐབ་རྩོད་ཀྱི་རུལ་སུངས་ལ་བརྟེན་ནས་ཐོར་ཞིག་འགྲོ་ཉེར་ཐུག་པའི་བཙན་བྱོལ་བོད་མིའི་སྤྱི་ཚོགས་འདི་ལྷིང་འཇགས་དང་དགྲ་ཕྱོགས་ནས་བེད་སྤྱོད་མ་ཡོང་བའི་ཆེད་དུ་གོང་གསལ་དོན་གནད་ལ་གབ་གཡོལ་མེད་པར་ཕྱི་གསལ་ནང་གསལ་བཟོ་རོགས་གནང་ཞུ་རྒྱུ་ཡིན། བདེན་པ་ཉིད་རྣམ་པར་རྒྱལ་གྱུར་ཅིག།། །།
ད་ཐེངས་ང་ཚོ་བཙན་བྱོལ་བོད་མིའི་སྒྲིག་འཛུགས་ཀྱི་བྱ་སྤུ་གནོན་ཟེར་བ་འདིའི་གླེང་ཀ་ཡོང་གཞི་ནི། དང་པོ་ཨ་དོན་ཟུར་པ་སྐལ་རྡོར་དོན་གཅོད་སྐབས་TCDFབོད་མིའི་སྤྱི་ཚོགས་ཡར་རྒྱས་ཐེབས་རྩ་ཞེས་པ་གཞུང་འབྲེལ་མིན་པའི་ཚོགས་པ་NGOཞིག་བཙུགས། འགན་འཛིན་ལྷན་ཚོགས་ཀྱི་ཚོགས་གཙོར་དེ་དུས་ཀྱི་ཨ་དོན་སྐལ་རྡོར་ཡོད། དེའི་མོང་ཐོག་ཨ་གཞུང་ནས་རོགས་དངུལ་འབོར་ཆེན་ཞིག་བླངས་ཡོད་པ་དེ་ཡིན་འདུག་སྙམ། ཚོགས་པ་དེ་སྲིད་སྐྱོང་བློ་སངས་དང་སྐལ་རྡོར་གྱིས་ཨ་དོན་སྤེན་ཚེ་ལ་རྩིས་སྤྲོད་བྱ་རྒྱུ་ཕར་བཞག སྤེན་ཚེ་འགན་འཛིན་ལྷན་ཚོགས་སུ་འཇུག་རྒྱུ་དེ་བས་ཀྱང་བྱས་མེད་ཁར། དོན་གཅོད་སྤེན་ཚེ་ལ་ཐེ་བྱུས་ཡེ་ནས་མེད་པར་བཟོ་རྩིས་བྱས་ཡོད། ཚོགས་པ་དེ་ད་ལྟ་ཡང་སྐལ་རྡོར་ཚང་རང་ལ་བཅོལ་ནས་ཡོད། ད་དུང་། བློ་སངས་ཀྱིས་ཚོགས་པ་འདིའི་མ་འོངས་འཛིན་སྐྱོང་ནང་དོན་གཅོད་རིམ་པ་སུ་ཞིག་ཕེབས་ནའང་། ཚོགས་པ་དེར་ཐ་ན། འགན་འཛིན་ལྷན་ཚོགས་ཀྱི་ཚོགས་མི་ཞིག་གི་མཚན་ཐོག་ཙམ་གྱི་གནས་བབ་མི་སྤྲོད་རྒྱུ་དང་། བོད་མིའི་སྒྲིག་འཛུགས་དང་ཨ་དོན་གཉིས་ཀ་ལ་བྱུས་གཏོགས་མེད་པ་བཟོས་ཏེ་རིམ་པས་སྒེར་བདག་ཅན་དུ་འགྱུར་འཆར་ཡོད་པར་སྤེན་ཚེས་མཐོང་ནས། སྤེན་ཚེས་འདྲི་བརྩད་བྱས་པ་ལ། བློ་སངས་ཀྱིས་སྤེན་ཚེར་གསལ་བཤད་དྲང་པོ་ཞིག་བྱེད་རྒྱུ་ཕར་བཞག བློ་སངས་འདྲོགས་ཐག་ཆོད་ནས་བཀའ་ཤག་གི་དབང་ཚད་བེད་སྤྱོད་ལོག་པར་བཏང་འདུག ལས་དོན་ཚང་མ་དེ་ནས་འཁྲུགས་སོང་འདུག ཨ་ཁ་དེ་དུས་བློ་སངས་ཀྱི་བྱེད་སྟངས་ལ། སུས་བལྟས་ཀྱང་། བློ་སེང་གིས་གཏན་གཏན་ངོ་མ་རང་རང་དོན་ཁོག་བཅུག་གི་བྱུས་ངན་ཞིག་བཤམས་ཡོད་པ་དེ་གསལ་པོར་མཐོང་ཐུབ་པ་མི་འདུག་གམ། བློ་སངས་ཀྱིས་རྫུན་རྐུབ་ཕྱི་ལ་བརྡོལ་འགོ་དེ་ནས་བརྩམས་འདུག་པ་མཐོང་ཐུབ། ད་ལྟ་ནི། NGOཚོགས་པ་དེ། ཕྱོགས་གཅིག་ནས། སྐལ་རྡོར་ཚང་ལ་ཨ་རིའི་ཁྲིམས་མཐུན་ལྟར་བལྟས་ན། སྐལ་རྡོར་ལ་བདག་དབང་ཆ་ཚང་ཡོད་པ། ཡང་། བོད་མིའི་སྒྲིག་འཛུགས་ངོས་ནས་བལྟས་ན། སྐལ་རྡོར་ལ་དབང་ཚད་ཚ་ཚང་བ་ཞིག་ཡོད་ལ་མེད་ལ་བྱས་ནས་བཅོལ་ཡོད། འོ་ཡ། གང་ལྟར་རིམ་པས་སྤེན་ཚེ་ལ་གཞི་ནས་དེས་རྐྱེན་པས་བྱ་སྤུ་གནོན་མ་བྱས་པའི་སྐྱོན་འཛུགས་འོག་གནས་དབྱུང་བཏང་བྱུས་བཤམས་པ་ཞིག་ཀྱང་རེད་འདུག ཡ་ཡ། ད་ཆ་ཡང་། བློ་སངས་ཀྱིས་དངོས་གྲུབ་ཚེ་རིང་རྫུན་བྱུས་དེ་སྤས་བསྐུང་ཆེད་ཨ་དོན་དུ་བསྐོ་གཞག་བྱས། རིང་མིན་བློ་སངས་ཁོ་པ་རང་ལ་བདེན་པ་ཡོད་མདོག་སྟོན་ཆེད་NGO དེའི་འགན་འཛིན་ལྷན་ཚོགས་ནང་དངོས་གྲུབ་ཚེ་རིང་ད་བར་མེད་ཀྱང་ད་གཞི་ནས་དོན་གཅོད་མིང་ཐོག་ནས་མགྱོགས་པོ་འཇོག་རྒྱུར་ཚོད་དཔག་བྱ་གིན་ཡོད་བཟོ་ཡང་འདུག དེ་ལ་ཡང་རྫུན་རྐུབ་ཞིག་ཡོད་པའི་དྲི་ངན་ལོས་ཚོར་ཐུབ། ཧ་ཧ། མ་གཞི་ང་ཚོའི་སྤྱི་ཚོགས་ནང་འདི་དང་འདི་འདྲའི་གཞུང་འབྲེལ་ཡིན་ལ་མིན་ལ་ཡི་གཟུགས་ཤེས་གང་ཡང་མིན་པའི་ལྡན་མི་འདུ་བྱེད་ཀྱི་སྒེར་སྤྱོད་ཚོགས་པ་ཆེ་ཆུང་འདྲ་མིན་མང་པོ་སྔར་ནས་བྱུང་ཡོད་ལ་ད་ལྟའང་མཐོང་རྒྱུ་ཡོད། མདོ་དོན་ཡང་སྙིང་། ས་གནས་ཨ་གཞུང་གི་NGOའགྲོ་ལུགས་བོད་མི་སྤྱི་དམངས་ཚོས་ཅི་ལ་ཤེས། དེས་ན། བོད་མི་ཚོས་གསལ་པོར་མཁྱེན་དགོས་པ་ཞིག་ནི། བློ་སངས་དང་སྐལ་རྡོར་གཉིས་ཀྱིས་TCDFའདི་འཕྲལ་ཕུགས་གཉིས་ཀར་བོད་མིའི་སྒྲིག་འཛུགས་དང་དོན་གཅོད་ཟེར་བ་ལ་བྱུས་གཏོགས་ཏིལ་འབྲུ་ཙམ་ཡང་མེད་པ་བཟོས་འཆར་ཡིན་པ་དང་། རིམ་པས་བློ་སངས་སྲིད་སྐྱོང་གི་ལས་འཁུར་འཁྱུར་ཟིན་མཚམས་སུ་ཁོ་པ་དང་གྲོགས་པོ་སྐལ་རྡོར་སོགས་མི་འགས་སྒེར་དབང་སྤྱོད་པའི་སྤྱི་རྟ་སྒལ་རལ་ལ་དམིགས་ཏེ་བསྐྲུན་ཡོད་པར་སྤེན་ཚེས་མགོ་ཚོད་ཡོད་འདུག ཡ་ཡ། ད་མ་འོངས་པར་ལྟད་མོ་བཟང་ངན་གང་ཡོང་ངོ་མ་ལོ་ཤས་རྗེས་ནས་མ་གཏོགས་མཐོང་མི་ཡོང་། སྤྱི་དོན་ལ་འགན་ངོ་མ་ལེན་འདོད་ན། TCDFཚོགས་པ་འདི་ཨ་རིའི་བོད་མིའི་སྤྱི་དོན་ཚོགས་པ་ཚོར་ཁྲིམས་མཐུན་འགན་འཁུར་དང་ཐེ་གཏོགས་གང་ལ་གང་འཚམས་ཤིག་བྱེད་རྒྱུ་ཡོད་པ་ཞིག་བཟོ་ཐུབ་ན་སྤྱི་རྒྱུ་སྒེར་བདག་ཏུ་མི་འགྲོ་བར་འགོག་བསྲུང་གནང་ཐུབ་ངེས་རེད། མདོར་ན། ད་ཐེངས་ཀྱི་བྱ་སྤུ་གནོན་ཟེར་ནའང་འདྲ། ཨ་དོན་འཕོ་འགྱུར་གྱི་གནད་དོན་ཟེར་ནའང་འདྲ། ཨ་སྒོར་ས་ཡ་གཅིག་དང་ཕྱེང་ཀའི་དོན་རྐྱེན་ཟེར་ནའང་འདྲ། དོན་ངོ་མའི་རྩོད་གཞི་ནི། ཨ་ན་མན་ན། སྐྱབས་དཀོན་མཆོག་གསུམ། ༧རྒྱལ་བ་རིན་པོ་ཆེ་མཁྱེན། བོད་རིགས་སྤུན་ཟླ་ཚོ། བོད་མིའི་རྩ་དོན་ནི་མ་རེད་ལགས། རང་བཙན་དང་ལམ་དབུ་མའི་སྲིད་ཇུས་ཀྱི་རྩོད་པ་ནི་དེ་བས་ཀྱང་མ་རེད། གནད་དོན་ངོ་མ་དེ་NGOའདིའི་འཕྲལ་ཕུགས་ཀྱི་གཉེར་སྐྱོང་བྱེད་སྟངས་དང་། རོགས་དངུལ་གར་འགྲོ་གང་བྱེད་དང་། སྤྱི་རྒྱུ་སྒེར་བདག་འགྲོ་ཉེན་ཡོད་པའི་བྱི་རིལ་མངར་སྐྱུར་གཉིས་ལྡན་ཕན་གནོད་གཉིས་ལྡན་ ༢༠༡༧ ལོར་སྲིད་སྐྱོང་བློ་སངས་ཀྱིས་གཡོས་སྦྱོར་བྱས་པ་དེ་རང་རེད་འདུག ཆོལ་གསུམ་བོད་མིའི་ཆིག་སྒྲིལ་ནི་འཐོར་ལ་ཉེ་བས་ ༢༠༡༨ ནས་ག་ལེར་ཅིག་གསོ་བར་སྨོན།། །།
འགོ་ཁྲིད་ལམ་ལོག་ལ་སོང་ན་མི་མང་གི་ངོ་རྒོལ་བྱེད་དགོས་གལ་ཆེ།
ཉེ་བའི་ཆར་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་ཐད་ལ་མི་མང་ཁག་ཁ་ཤས་ཤིག་ནས་བོད་གཞུང་བཀའ་ཤག་གིས་བཙན་བྱོལ་བོད་མིའི་བཅའ་ཁྲིམས་དང་མཐུན་པའི་མང་མོས་ཐག་གཅོད་གནང་བར་དེར་མི་འདོད་པ་དང་དྲན་ལྡན་མིན་པའི་རྣམ་འགྱུར་གྱིས་ལས་འགུལ་བརྩམ་བཞིན་འདུག་པས་དེ་ནི་ཧ་ཅང་བློ་ཕམ་གནས་ཚུལ་ཞིག་རེད། སྤྱིར་བཏང་སྒྲིགས་འཛུགས་གཅིག་གི་ནང་ལས་བྱེད་འཕོ་འགྱུར་ཕྱིན་པ་དང་བཏང་བ་དེ་སྒྲིགས་འཛུགས་དེའི་འགྲོ་ལུགས་ཤིག་ཡིན་པ་ཤེས་དགོས་པ་ཧ་ཅང་གལ་འགངས་ཆེན་པོ་རེད། བཙན་བྱོལ་བོད་གཞུང་ནི་བོད་མི་མང་གི་ཆེད་དུ་མངགས་ནས་བཙུགས་པ་ཞིག་དང་དེ་དག་གི་ལས་གཙོ་རྣམ་པ་ནི་མི་མང་ནས་མང་གཙོའི་ལམ་ལུགས་ཀྱི་ཐོག་ནས་འོས་བསྡུའི་བྱས་ནས་མང་མོས་འོས་འདེམས་བྱུང་བའི་མི་སྣ་དང་མ་ཟད་ལྷག་པར་དུ་༧གོང་ས་མཆོག་གི་ཐུགས་བློ་གནང་སའི་གང་ཟག་ཞིག་ཡིན་པས་དུས་རྟག་ཏུ་ང་ཚོ་བོད་རིགས་སྤུན་ཟླ་ཚོས་གུས་བརྩི་དང་རྒྱབ་སྐྱོར་དེ་བཞིན་བཀའ་མོལ་སོགས་ཡག་པོ་གནང་དགོས་པ་ཧ་ཅང་གལ་འགངས་ཆེན་པོ་ཞིག་རེད་སྙམ། ང་ཚོའི་འགོ་ཁྲིད་ལ་ང་ཚོས་བརྩི་མཐོང་དང་གུས་བརྩི་མ་ཞུས་ན་རྒྱལ་ཁབ་གཞན་གྱི་མི་ཚོས་ཞུ་གི་རེད་དམ། དེས་ནས། མ་འོངས་པར་བོད་རིགས་སྤུན་ཟླ་རྣམས་ནས་ཆོལ་ཁ་ཆོས་ལུགས་དང་སྤུན་གཉེན་ཚན་སོགས་ལ་ཆོག་ཞེན་མ་གནང་བར་བདེན་པ་དང་དྲང་བདེན་ལ་རྒྱལ་སྐྱོར་གནང་ན་ང་ཚོའི་རེ་བ་དེ་དེ་ནས་བསྒྲུབ་ཀྱི་རེད་བསམ་པའི་ཡིད་ཆེས་དང་རེ་བ་བྱེད་བཞིན་ཡོད།