བོད་མིའི་ངོ་བོ་ཞེས་པའི་བརྗོད་གཞིའི་ཐོག་བགྲོ་གླེང་གནང་སྐབས་ས་རཱ་མཐོ་སློབ་ཀྱི་ལོ་རྒྱུས་དགེ་རྒན་གཙང་ཕྲུག་སྟོབས་ལགས་ཀྱིས་བོད་མིའི་ངོ་བོ་ཟེར་དུས་དབྱིན་སྐད་ནས་བོད་པའི་ཐ་སྙད་དུ་རྡོ་ཆག་བཙན་སྒྲིག་བྱས་པ་ལྟ་བུ་ཞིག་ཏུ་མཐོང་ཡོད་སྐོར་བརྗོད་སོང་།

དེ་རིང་སྔ་དྲོའི་ཆུ་ཚོད་ ༩ པའི་སྟེང་དྷ་སའི་ཉེ་འཁྲིས་སུ་ཡོད་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་དང་ས་རཱ་མཐོ་སློབ་གཉིས་ཀྱི་གོ་སྒྲིག་འོག བོད་མིའི་ངོ་བོ་ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་སོང་བ་དང་། བགྲོ་གླེང་ཐོག་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དེང་རབས་དང་སྲོལ་རྒྱུན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་དང་། ས་རཱའི་སློབ་སྤྱི་པ་སངས་ཚེ་རིང་ལགས་དང་། ལོ་རྒྱུས་དགེ་རྒན་གཙང་ཕྲུག་སྟོབས་ལགས། དེ་བཞིན། དྷ་སའི་ཉེ་འགྲམ་ནོར་གླིང་མཐོ་སློབ་དང་། ཤེས་རབ་དགའ་ཚལ་སློབ་གླིང་། སྨན་རྩིས་ཁང་མཐོ་སློབ། བཙུན་དགོན་སྒྲོལ་མ་གླིང་། དེ་བཞིན་ས་རཱ་བཅས་ནས་ཕེབས་པའི་གཏམ་བཤད་པ་དང་སློབ་ཕྲུག་བཅས་འཛོམས་འདུག

ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་དགེ་རྒན་གཙང་ཕྲུག་སྟོབས་ལགས་ཀྱིས།  ང་ལ་མཚོན་ན་བོད་མིའི་ངོ་བོ་བཤད་རོགས་ལབ་དུས་བོད་མིའི་ངོ་བོ་ཞེས་པ་དེ་འདི་འདྲ་ཞིག་རེད་བསམ་པ་ཀླད་པའི་ནང་མེད་སྟབས་ཚིག་གསར་པ་ཞིག་ཆགས་འདུག  ང་ཚོས་བོད་མིའི་ངོ་བོ་ཞེས་པ་དེ་ནུབ་ཕྱོགས་པའི་སྐད་ཆ་ཞིག་བོད་པའི་ཐ་སྙད་ནང་རྡོ་ཆག་བཙན་སྒྲིག་བྱས་པ་ལྟ་བུ་ཞིག་ཏུ་མཐོང་གི་འདུག་སྟབས། བོད་པ་རང་གི་ཐ་སྙད་དུ་ངོ་བོ་ཟེར་བ་དེ་བོད་མིའི་ཁྱད་ཆོས་སམ་རྣམ་པ་ལ་ཟེར་གྱི་ཡོད། མི་རིགས་གཞན་དང་ལོགས་སུ་ཐོན་པའི་བོད་མིའི་ཐུན་མོང་མ་ཡིན་པའི་རྣམ་པའམ་ཁྱད་ཆོས་ལ་གོ་ཡི་ཡོད། དེ་ཡང་ནུབ་ཕྱོགས་སུ་ཡོད་པའི་བོད་ཕྲུག་ཅིག་དྷ་སར་འབྱོར་སྐབས། ང་ཚོས་ཁོ་ལ་བོད་མིའི་གཡའ་མི་འདུག་ཟེར་བའམ་ཡང་ན་བོད་པའི་ཁྱད་ཆོས་མི་འདུག་ཟེར་བ་ལས་ངོ་བོ་མི་འདུག་ཟེར་གྱི་མེད།  ངོ་བོ་ཟེར་དུས་རང་བཞིན་དང་གནས་ལུགས་ལ་འགྲོ་ཡི་ཡོད། དེ་ལས་ཁྱད་ཆོས་ལབ་པ་ཡིན་ན་ཁྱད་པར་གྱི་ཆོས་དེ་གཞན་དང་མི་འདྲ་བའམ་གཞན་ལས་ལྷག་པའི་ཡོན་ཏན་ལ་གོ་ཡི་ཡོད་པ་དང་། རྣམ་པ་ཟེར་དུས་ཡང་རྒྱ་གར་ལས་བོད་པ་ལོགས་སུ་དབྱེ་ལྟ་བུ་རིགས་སམ་དབྱེ་བ་ལ་གོ་ཡི་ཡོད། དེར་བརྟེན། ང་ཚོའི་བོད་པའི་ཐ་སྙད་ནང་ངོ་བོ་ཞེས་པའི་ཚིག་འདི་བེད་སྤྱོད་གཏོང་སྟངས་ནུབ་ཕྱོགས་ནས་འཁྱེར་ཡོང་བའམ་ཤེས་རིག་ལས་ཁུངས་ཀྱིས་དེབ་ཡང་བཏོན་ཟིན་འདུག གང་ལྟར་ཀྱང་། ང་ཚོ་བོད་པ་རང་ལ་ཡོད་པའི་ཐ་སྙད་དེ་བེད་སྤྱོད་ཡག་པོ་ཞིག་མ་བཏང་བའམ་གོ་བ་ཡག་པོ་ཞིག་མ་ལོན་པར་གློ་བུར་དུ་དབྱིན་ཡིག་ཐ་སྙད་ཞིག་འཁྱེར་ཡོང་སྟེ། བརྗོད་བདེ་དང་འཇུག་མིན་ལ་མ་བལྟས་པར་བོད་ཡིག་ནང་རྡོ་ཆག་བཙན་སྒྲིག་བྱས་པ་ཞིག་ཏུ་མཐོང་གི་འདུག་སྟབས། ང་ཚོས་མ་འོངས་པར་འདིའི་རིགས་ལ་གཟབ་གཟབ་བྱ་དགོས་པ་གལ་གནད་དུ་མཐོང་། བོད་མིའི་ངོ་བོ་བམ་ཡང་ན་བོད་མིའི་ཁྱད་ཆོས་དང་རྣམ་པ་ཟེར་དུས་གོ་བ་ལེན་དགོས་ས་གཙོ་བོ་ནི་རིགས་དང་རུས། སྐད་དང་རིག་གཞུང་།  སྲོལ་རྒྱུན་དང་གོམས་གཤིས་བཅས་ལ་གོ་དགོས་རེད་བསམ། དེ་ཡང་བོད་པའི་སྤྱི་ཚོགས་ནང་ལས་ཀ་ཆུང་གྲས་ནས་ནམ་རྒྱུན་རྒན་བཀུར་གཞོན་གཅེས་དང་། མགྲོན་ལ་ཕྱག་དང་ཞེ་ས། ཡ་རབས་བཟང་སྤྱོད་སོགས་མི་རིགས་གཞན་དང་མི་འདྲ་བའི་ཐུན་མོང་མ་ཡིན་པའི་ཁྱད་ཆོས་ཡོད་པ་རེད། ཅེས་སོགས་བརྗོད་སོང་།

དེའི་རྗེས་ཤེས་རིག་ལས་ཁུངས་ཀྱི་དེང་རབས་དང་སྲོལ་རྒྱུན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་ཀྱིས་བགྲོ་གླེང་གི་དགོས་དམིགས་སྐོར་ལ། ལས་གཞི་འདི་ཐོག་མར་ཨ་རིར་རྟེན་གཞི་བྱས་པའི་བོད་དོན་རྒྱབ་སྐྱོར་བ་དང་དམིགས་བསལ་བྱིས་པ་ཚོར་ལྟ་སྐྱོང་གནང་མཁན་ཉི་ཧོང་གི་རཱེ་མ་ཧྥི་ཇི་ཏ་ཟེར་བའི་བུད་མེད་ཅིག་གིས་ལོ་ཤས་གོང་༧ གོང་ས་མཆོག་ལ་མཇལ་འཕྲད་ཞུས་ཏེ། མོས་སེམས་འཚབ་ཆེན་པོས་བོད་པའི་གཞོན་སྐྱེས་ཚོར་བོད་པའི་ངོ་བོ་ངོ་སྤྲོད་བྱ་རྒྱུ་གལ་ཆེན་དུ་རྩིས་ཏེ་མཐུན་རྐྱེན་མཁོ་སྒྲུབ་བྱ་རྒྱུའི་ཁས་བླངས་ཡོད་པ་ཤེས་རིག་ལས་ཁུངས་ཀྱིས་ཀྱང་གལ་གནད་དུ་རྩིས་ཏེ། ཤེས་རིག་ལས་ཁུངས་ཀྱི་ནང་གསེས་སྡེ་ཚན་རྩོམ་རིག་དང་ཐ་སྙད་སྡེ་ཚན་གྱིས་འགན་འཁུར་ཏེ། བོད་པའི་སློབ་གྲྭ་ཁག་གཙོས་པའི་སྤྱི་ཚོགས་ནང་བོད་མིའི་ངོ་བོ་བམ་བོད་མི་ཞིག་ལ་ཚང་དགོས་པའི་ཆ་རྐྱེན་དང་འབྲེལ་ཏེ། བོད་མིའི་ངོ་བོ་སྲུང་སྐྱོབ་དང་མི་ཉམས་རྒྱུན་འཛིན་ཡོང་ཆེད་དུ་ལས་འགུལ་སྤེལ་དགོས་སྐོར་གྱི་གསལ་བསྒྲགས་སྤེལ་ཏེ། འཛམ་གླིང་རྒྱལ་ཁབ་ཁག་ལྔའི་ནང་གྲོས་འཛོམས་བྱུང་ཡོད་སྐོར་ཤེས་རིག་ལས་ཁུངས་སུ་འབྱོར་འདུག་ལ།  དེའི་ནང་ཆ་ཤས་ལེན་མཁན་ལོ་ ༡༦ ནས་ ༣༥ བར་ཤ་སྟག་ཡིན་པ་དང་། ད་བར་བོད་མིའི་ངོ་བོ་དང་འབྲེལ་བའི་གྲོས་འཛོམས་ཐོག་བོད་རྩོམ་ ༡༩ དང་དབྱིན་རྩོམ་ ༢༨ ཁྱོན་བསྡོམས་རྩོམ་ཡིག་ ༤༧ འབྱོར་ཡོད་པའི་གྲས་ནས་རྩོམ་ཡིག་རྩེ་ཕུད་ ༢༤ དཔྱད་འདེམས་བྱས་ཏེ་དེབ་ཅིག་པར་སྐྲུན་ཞུས་ཡོད་ལ། དཔེ་དེབ་དེ་འཛམ་གླིང་ཡུལ་གྲུ་གང་སར་གནས་པའི་བོད་རིགས་འདུས་སྡོད་ཀྱི་ས་ཁུལ་དགོན་སྡེ་ཁག་དང་སློབ་གྲྭ་ཁག  དེ་བཞིན་མི་མང་ནང་འགྲེམས་སྤེལ་ཞུས་ཡོད། མདོར་དེད་ན། ལས་གཞི་འདིའི་དམིགས་ཡུལ་གཙོ་བོ་ནི་བཙན་བྱོལ་སྤྱི་ཚོགས་ནང་བོད་མིའི་ངོ་བོ་བམ་བོད་མིའི་རང་གཤིས་ལབ་ན་ག་འདྲ་ཞིག་ལ་ངོས་འཛིན་བྱ་དགོས་མིན་ཐད་གོ་རྟོགས་སྤེལ་ཏེ་ཁྱབ་རྒྱ་ཆེ་རུ་གཏོང་ཐབས་དང་།  ལྷག་པར་དུ་གཞོན་སྐྱེས་ཚོ་བཙན་བྱོལ་གྱི་མི་ཐོག་གསུམ་པ་ཆགས་བསྡད་ཡོད་དུས། ཁོ་ཚོར་ཆེད་དམིགས་ཀྱིས་གོ་རྟོགས་སྤེལ་ཆེད་བགྲོ་གླེང་ཚོགས་པ་དང་གཏམ་བཤད་སྤེལ་བ་སོགས་ལ་ཤེས་རིག་ལས་ཁུངས་ནས་བཀོད་ཁྱབ་བཏང་བསྡད་ཡོད་པ་རེད། དེ་རིང་འདིར་ནོར་གླིང་མཐོ་སློབ་དང་། ཤེས་རབ་དགའ་ཚལ་སློབ་གླིང་། སྨན་རྩིས་ཁང་མཐོ་སློབ་། བཙུན་དགོན་སྒྲོལ་མ་གླིང་། དེ་བཞིན་ས་རཱ་མཐོ་སློབ་བཅས་ནས་བགྲོ་གླེང་ནང་མཉམ་ཞུགས་གནང་ཡོད་པ་དང་། མ་འོངས་པར་ང་ཚོས་ལས་གཞི་འདི་རྒྱ་ཆེ་རུ་བཏང་སྟེ་བོད་པའི་སློབ་གྲྭ་ཁག་ཚང་མའི་ནང་སྤེལ་རྒྱུའི་དམིགས་ཡུལ་ཡོད། ཅེས་སོགས་བརྗོད་སོང་།

གསར་འགོད་པ། སྐལ་བཟང་སྤྱིན་པ།