བོད་ཀྱི་ཆབ་སྲིད་བཙོན་ཟུར་སོག་མཁར་བློ་གྲོས་ལགས་ཀྱིས་འཛམ་གླིང་ཞི་བདེའི་ཆེད་ཞི་རྒོལ་སྐད་འབོད་གནང་བར་བརྟེན་རྒྱ་གཞུང་ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ་སོག་རྫོང་ཉེན་རྟོག་ཁང་ལ་རྩིས་སྤྲད་ཡོད་འདུག

ཉེ་སྔོན་ཕྱི་ཟླ་དང་པོའི་ཚེས་ ༢༨ ཉིན་ཆབ་སྲིད་བཙོན་ཟུར་སོག་མཁར་བློ་གྲོས་ལགས་བོད་ཀྱི་རྒྱལ་ས་ལྷ་ས་ནས་གར་ཡོད་ཅི་བྱུང་མེད་པར་གྱུར་ཡོད་ཀྱང་། ཉིན་དེར་བློ་གོས་ལགས་དངོས་སུ་མཐོང་མཁན་ཚོས་བརྗོད་པ་ལྟར་ན། ཁོང་གིས་ཕོ་བྲང་པོ་ཏ་ལར་སྐོར་བ་ཐེངས་གཅིག་བརྒྱབས་རྗེས་ཕོ་བྲང་གི་མདུན་ནས་ཞི་རྒོལ་སྐད་འབོད་གནང་ཡོད་པ་དང་། སྐར་མ་བཞི་ལྔ་ཙམ་ལས་མ་འགོར་བར་ཉེན་རྟོག་པས་ཁོང་འཛིན་བཟུང་བཙན་འཁྲིད་བྱས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་སོག་མཁར་བློ་གྲོས་ལགས་ཀྱི་འབྲེལ་ཡོད་ཅིག་ལ་དེའི་སྐོར་སྐད་ཆ་འདྲི་པར་ཁོང་གིས། ཕྱི་ཚེས་ ༢༩ ཉིན་ལྷ་སའི་ཉེན་རྟོག་པས་ཁོང་ནག་ཆུ་སོག་རྫོང་གི་ཉེན་རྟོག་པར་རྩིས་སྤྲད་ཡོད་པ་དང་། མི་རིང་བར་རྫོང་དང་ཁུལ་རིམ་པ་བརྒྱུད་ཁོང་ལ་ཞིབ་བཤེར་བྱ་རྒྱུ་ཡིན་པའི་དོགས་གཞི་བྱེད་ཀྱི་ཡོད་པ་དང་། ད་ལྟའི་ཆར་སོག་རྫོང་ལ་དམ་དྲག་ཆེན་པོ་བྱེད་ཀྱི་ཡོད་སྟབས། ཞིབ་ཕྲའི་གནས་ཚུལ་གཞན་གང་ཡང་ལེན་ཐུབ་ཀྱི་མི་འདུག ཅེས་བརྗོད་བྱུང་།

སོག་མཁར་བློ་གྲོས་ལགས་ནས་ཁོང་གིས་ཞི་རྒོལ་བྱེད་དགོས་པའི་དམིགས་ཡུལ་སྐོར་ལ་བརྙན་ཕབ་བསྒྲགས་གཏམ་ཞིག་ཕྱི་ཕྱོགས་སུ་བསླེབས་པའི་ནང་། ང་ཚོ་ཁ་བ་གངས་ཅན་པའི་ལྗོངས་ནི་མ་བཅོས་ལྷུན་གྱིས་གྲུབ་པའི་འཛམ་གླིང་ཞི་བདེའི་ལྟེ་གནས་ཤིག་ཡིན་པ་དང་། ང་ཚོ་ཁ་བ་རི་བས་འཛམ་གླིང་ཞི་བདེའི་ལས་འགུལ་སྤེལ་ནས་དུས་ཡུན་ཐུང་ཐུང་ཞིག་གཏན་ནས་མ་ཡིན་པར། ལོ་ངོ་སྟོང་ཕྲག་དུ་མའི་རིང་ལ་འཚེ་མེད་ཞི་བདེ་ཡི་ལམ་ནས་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པ། ལམ་དབུ་མ་ཡི་སྒང་ནས་འཛམ་གླིང་ཞི་བདེ་ལ་རྩོད་ལེན་བྱས་ཡོད། དཔེར་ན། ང་ཚོའི་དུས་རྟག་ཏུ་༧རྒྱལ་བ་བསྟན་འཛིན་རྒྱ་མཚོའི་དགོངས་པ་བཞིན། དེས་མི་ཚད་དཔའ་བོ་ཐུབ་བསྟན་དངོས་གྲུབ་ལགས་སོགས་དཔའ་བོ་དང་དཔའ་མོ་བརྒྱ་སྟོང་མང་པོས་འཛམ་གླིང་ཞི་བདེའི་དོན་དུ་སྐུ་ལུས་མེར་བཏང་ཡོད་པ་རེད། ངས་ཀྱང་མི་ལོ་༢༠ རིང་ལ་འཛམ་གླིང་ཞི་བདེའི་ཆེད་དུ་འབད་བརྩོན་བྱས་ཡོད་ལ། ལྷག་པར་དུ་ལོ་ངོ་ ༡༡ རིང་ལ་འཛམ་གླིང་ཞི་བདེ་དྲིལ་བསྒྲགས་དང་འཛམ་གླིང་ཞི་བདེ་ཡི་ཕྱོགས་སུ་ལུས་ངག་ཡིད་གསུམ་གྱིས་འབད་བརྩོན་བྱས་ཡོད། བཙོན་ཁང་དུ་ལོ་བདུན་བསྟུན་མར་དྲིལ་བསྒྲགས་བྱས་པ་ཡིན་ལ། བཙོན་ཁང་ནས་ཐོན་རྗེས་ལོ་བཞིའི་རིང་མཐོ་དམན་དྲག་ཞན་ཕོ་མོ་རྒན་གཞོན་སུ་དང་ཕྱོགས་ལྷུངསོགས་ཀྱི་འབྲེལ་བ་མེད་པར་དྲིལ་བསྒྲགས་བྱས་ཡོད། དེ་རིང་ ༢༠༡༨ ལོའི་ཕྱི་ཟླ་༡ པོའི་ཚེས་༢༨ ཉིན་དངོས་སུ་འཛམ་གླིང་ཞི་བདེའི་ལས་འགུལ་མགོ་འཛུགས་རྒྱུ་ཡིན། བཀྲ་ཤིས་བདེ་ལེགས། ཞེས་གསངུས་འདུག

བློ་གྲོས་རྒྱ་མཚོའམ་སོག་མཁར་བློ་གྲོས་ལགས་ནི་ནག་ཆུ་ས་ཁུལ་སོག་རྫོང་ཚ་དབྲོག་ཡུལ་ཚོའི་སོག་མཁར་གྲོང་སྡེ་ནས་ཡིན་ཞིང་། ད་ལྟ་དགུང་ལོ་ ༥༧ ཙམ་ཡིན་པ་དང་། ཁོང་ལ་སྲིང་མོ་ ༥ དང་གཅུང་པོ་གཅིག་ཡོད་འདུག བློ་གྲོས་རྒྱ་མཚོ་ལགས་ཆུང་དུས་པ་ལགས་ཀྱི་མདུན་ནས་གཏམ་ཡིག་རྩིས་སྦྱང་བའི་ཐོག གཟུགས་པོ་བདེ་པོ་ཡོད་པས་སོག་རྫོང་ཟློས་གར་ཚོགས་པའི་འཁྲབ་སྟོན་པའི་ནང་ཞུགས་ཡོད་པ་དང་། དེ་སྔོན་ནག་ཆུ་ས་ཁུལ་གྱི་ཤེད་རྡོ་འགྱོག་པའི་འགྲན་སྡུར་ནང་ཁོང་གིས་ཨང་དང་པོའི་བྱ་དགའ་ཐེངས་གཉིས་ལ་བླངས་ཡོད་འདུག

གསར་འགོད་པ། སངས་རྒྱས་དཀོན་མཆོག