ཨལ་ཇེ་རི་ཡའི་དམག་མིའི་གནམ་གྲུ་ཞིག་ལ་གློ་བུར་དུ་བརྡབ་སྐྱོན་བྱུང་སྟེ་དམག་མི་ ༢༥༧ རྐྱེན་ལམ་དུ་ཤོར་བ་དང་ཁག་ཅིག་གར་ཡོད་ཅི་བྱུང་མེད་པར་གྱུར་ཡོད་འདུག

དེ་རིང་སྔ་དྲོར་བྱང་ཨ་ཧྥི་རི་ཁའི་རྒྱལ་ཁབ་ཨལ་ཇེ་རི་ཡའི་མཁའ་དམག་གནམ་གྲུ་(Ilyushin Il-76) ནུབ་ཕྱོགས་གྲོང་ཁྱེར་བྷེ་ཆར་ཕྱོགས་སུ་བསྐྱོད་སྐབས། རྒྱལ་ས་ཨལ་གྷེ་ཡེའི་(Algier)དམག་མིའི་གནམ་ཐང་གིི་ཉེ་འགྲམ་ནས་གློ་བུར་དུ་བརྡབ་སྐྱོན་ཤོར་ཏེ། ཉུང་མཐར་དམག་མི་ ༢༥༧ རྐྱེན་ལམ་དུ་ཤོར་བ་དང་། ཁག་ཅིག་ཛ་དྲག་མྱུར་སྐྱོབ་བྱེད་བཞིན་ཡོད་པ་དང་། ཁག་ཅིག་གར་ཡོད་ཅི་བྱུང་མེད་པར་གྱུར་ནས་འཚོལ་ཞིབ་བྱེད་བཞིན་པའི་སྒང་ཡིན་འདུག

དོན་རྐྱེན་བྱུང་རྗེས་རྒྱལ་ཁབ་བདེ་སྲུང་ལྷན་ཁང་གིས་གནམ་གྲུ་བརྡབ་སྐྱོན་གྱི་བརྒྱུད་རིམ་ལ་ཞིབ་འཇུག་ནན་པོ་བྱ་རྒྱུ་ཡིན་པའི་བཀོད་ཁྱབ་བསྒྲགས་ཡོད་པ་དང་། ས་གནས་ཀྱི་གནས་ཚུལ་ལྟར་ན། དོན་རྐྱེན་བྱུང་མ་ཐག་ཛ་དྲག་མྱུར་སྐྱོབ་རླངས་འཁོར་ ༡༤ ཡུལ་དངོས་སུ་འབྱོར་ཏེ་་རྨས་སྐྱོན་བྱུང་བའི་དམག་མི་རྣམས་སྨན་ཁང་དུ་བསྐྱལ་ཡོད་འདུག

བརྒྱུད་ལམ་ཁག་གི་གནས་ཚུལ་ནང་། ཐེངས་འདིའི་ཨལ་ཇེ་རི་ཡའི་མཁའ་དམག་གནམ་གྲུ་དེའི་ནང་ཁྱོན་དམག་མི་ག་ཚོད་ཅིག་ཡོད་པ་གསལ་པོོ་མེད་ཀྱང་། རྒྱལ་ཁབ་ཀྱི་གཞུང་འཛིན་སྲིད་དོན་ཚོགས་པས་རྐྱེན་འདས་སུ་ཕྱིན་པའི་ནང་མོ་རོ་ཁོའི་རྒྱལ་ཁབ་དང་ཨལ་ཇེ་རི་ཡ་གཉིས་བར་རྩོད་རྙོག་ཏུ་གྱུར་བའི་མཐའ་མཚམས་སྲུང་བའི་མདུན་སྐྱོད་དམག་མིི་ ༢༦ ཡོད་པ་གསལ་འདོན་བྱས་ཡོད་འདུག

ད་ལན་གྱི་གནམ་གྲུའི་དོན་རྐྱེན་དེ་ནི་ཨལ་ཇེ་རི་ཡའི་དམག་མིའི་གནམ་གྲུར་བརྡབ་སྐྱོན་ཤོར་བ་ཚབས་ཆེ་་ཤོས་དེ་ཆགས་ཡོད་པ་དང་།  ཕྱི་ལོ་ ༢༠༡༢ ལོར་ཨལ་ཇེ་རི་ཡའི་དམག་གི་གནམ་གྲུ་ཞིག་ལ་བརྡབ་སྐྱོན་བྱུང་སྟེ། མི་ ༧༧ བསད་ཡོད་པ་དང་། ཡང་ཟླ་གཅིག་གི་གོང་དུ་རྒྱལ་ཁབ་དེའི་ཅ་དངོས་བསྐྱལ་འདྲེན་བྱེད་པའི་གནམ་གྲུ་ཞིག་ལ་བརྡབ་སྐྱོན་་བྱུང་སྟེ་ནང་དུ་མི་ ༥ ཡོད་པ་ཚང་མ་རྐྱེན་ལམ་ཕྱིན་ཡོད་འདུག

གསར་འགོད་པ།  སྐལ་བཟང་སྦྱིན་པ།