རྗོན་ཨོ་ལེ་ཝིར་ལ་རྒྱ་ནག་གིས་དྲ་ཐོག་ཕར་རྒོལ་བྱས།

རྒྱ་ནག་གི་སྲིད་འཛིན་ཞི་ཅིན་ཕིན་ལ་ཟུར་ཟུའི་དཔྱད་གཏམ་སྤེལ་མཁན་བརྙན་འཕྲིན་མདོ་འཛིན་པ་གྲགགས་ཅན་རྗོན་ཨོ་ལེ་ཝིར་གྱི་གནས་ཚུལ་ཡོངས་རྫོགས་རྒྱ་ནག་གི་དྲ་ལམ་ཁག་ནས་ནག་གསུབ་བཏང་ཡོད་འདུགཟླ་འདིའི་ཕྱི་ཚེས་༢༢ ཉིན་རྒྱལ་སྤྱིའི་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། དབྱིན་ཇིའི་ཟུར་ཟའི་བརྙན་འཕྲིན་མདོ་འཛིན་པ་གྲགས་ཅན་སྐུ་ཞབས་རྗོན་ཨོ་ལེ་ཝིར(John Oliver) ལགས་ཀྱིས། བདུན་སྔོན་མའི་དོ་ནུབ་(Last Week Tonight) ཞེས་པའི་བརྙན་འཕྲིན་ལེ་ཚན་ནང་ཟླ་འདིའི་ཕྱི་ཚེས་ ༡༢ ཉིན་གྱི་དགོང་མོར་སྐར་མ་ ༢༠ རིང་རྒྱ་ནག་གི་སྲིད་འཛིན་ཞི་ཅིན་ཕིན་གྱི་སྲིད་དབང་གཅིག་སྡུད་དང་དབང་ཆ་རྒྱ་བསྐྱེད། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ཡུ་གུར་བ་མང་པོ་སློབ་གསོ་བསྒྱུར་བཀོད་ཁང་ཞེས་པའི་ནང་བཙན་བཀག་གིས་མནར་གཅོད་གཏོང་བཞིན་པ་དང་། དེ་བཞིན་རྒྱ་ནག་གི་སྤྱི་ཚོགས་དྲ་ལམ་ཁག་གི་གཙོའི་བརྒྱུད་ལམ་ཁག་ཏུ་དམ་དྲག་བྱེད་བཞིན་པ་སོགས་ཀྱི་སྐོར་ལ་དགོད་གཏམ་གྱི་ལམ་ནས་ཟུར་ཟ་བྱས་པར་བརྟེན། ཁོང་རྒྱ་ནག་གི་སྤྱི་ཚོགས་དྲ་ལམ་ཆེ་ཤོས་ཝེ་པོ་དྲ་ཁུངས་ནས་ཕྱིར་འཕུད་དང་། ཁོང་གི་སྐོར་འཁོད་པའི་གནས་ཚུལ་ཚང་མ་རྒྱ་ནག་གི་བརྒྱུད་ལམ་ཁག་ནས་ནག་གསུབ་བཏང་ཡོད་འདུག

བྷི་བྷི་སི་གསར་ཁང་གིས་བཀོད་པའི་གནས་ཚུལ་ནང་ཁོང་གིས་གསར་འགྱུར་ལེ་ཚན་དེ་རྒྱང་སྲིང་བྱས་པའི་ཉིན་མོ་དེར་རྒྱ་ནག་གི་སྤྱི་ཚོགས་དྲ་ལམ་དང་བརྙན་ལམ་ཁག་ནས་ལྟ་ཉན་ཐུབ་ཀྱི་ཡོད་ན་ཡང་། ཕྱི་ཉིན་དེར་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་ཁོང་གི་ཟུར་ཟའི་བརྙན་ཐུང་དེ་མེད་པ་བཟོས་ཡོད་པ་མ་ཟད། ཁོང་གི་མིང་ཐོག་ནས་གསར་འགྱུར་དང་གནས་ཚུལ་འཚོལ་བཤེར་བྱེད་སྐབས། རྒྱ་ནག་གི་དྲ་རྒྱའི་ཁྲིམས་སྒྲིག་དང་འགལ་གྱི་ཡོད་པའི་བརྡ་ལན་འབྱོར་གྱི་ཡོད་པ་དང་། རྒྱ་ཡིག་ནང་ཁོང་གི་མིང་བྲིས་ནས་འཚོལ་བཤེར་བྱེད་སྐབས་གནས་ཚུལ་རེ་གཉིས་རྙེད་ཀྱི་ཡོད་ན་ཡང་མང་པོ་ཞིག་གི་དྲ་གནས་སྟོང་པ་བཟོས་ཡོད་འདུག གཞན་ཁོང་གི་མིང་ཐོག་ནས་གསར་འགྱུར་འགོད་ཐབས་བྱེད་སྐབས་དྲ་གནས་གང་གིས་ཀྱང་ལས་ཀ་བྱེད་མི་ཐུབ་པ་བཟོས་ཡོད་སྐོར་འཁོད་འདུག

ཁོང་གི་ཟུར་ཟའི་བརྙན་ཐུང་དེའི་ནང་རྒྱ་ནག་གི་སྤྱི་ཚོགས་དྲ་རྒྱ་ཁག་ལ་དམ་དྲགས་ཤུགས་ཆེར་བྱེད་ཀྱི་ཡོད་པ་དང་། རྒྱ་ནག་གི་ཝེ་པོ་དྲ་ལམ་ནས་ཞི་ཅིན་ཕིན་གྱི་གཟུགས་དབྱིབས་དང་འདྲ་བའི་འགུལ་རིས་དོམ་སེར་ནག་གསུབ་བཏང་ཡོད་པ་མ་ཟད། གནད་འགག་ཅན་གྱི་མི་སྣ་ཚོའི་མིང་ཡང་བཀག་ནས་ཡོད་པ་རེད། དེ་ནི་གཞན་གང་གིས་ཀྱང་བྱེད་མི་སྲིད་པའི་ལས་དོན་ཞིག་ཡིན་སྐོར་དང་། གཞན་རྒྱ་ནག་གཞུང་གིས་དྲུག་བཞིའི་སློབ་མའི་ལས་འགུལ་ནས་བཟུང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་སྟེ་ད་ལྟ་བར་དེ་ལྟར་བྱས་ནས་ཡོང་ཡོད་པ་རེད། རྒྱ་ནག་གི་ནོ་བྷེལ་ཞི་བདེའི་གཟེངས་རྟགས་བཞེས་མཁན་སྐུ་ཞབས་ལོའུ་ཞོ་པའོ་བཙོན་འཇུག་ནད་མནར་གྱིས་གྲོངས་ཡོད་པ་དང་ཁོང་གི་བཟའ་ཟླ་ལོའུ་ཞཱ་ད་དུང་བཟང་བཙོན་འོག་ཡོད་པ། ཞི་ཅིན་ཕིན་གྱིས་སྲིད་དབང་རྒྱ་བསྐྱེད་དང་གཅིག་སྡུད་ལམ་ལུགས་ཀྱི་སྲིད་བྱུས་འོག་ཡུ་གུར་གཙོའི་གྲངས་ཉུང་མི་རིགས་ཁག་གི་ནང་ཁ་བྲལ་བ་དང་དྲག་སྤྱོད་པ་ཡིན་སྐོར་བརྗོད་ནས་དམ་དྲག་ཆེ་རུ་གཏོང་བཞིན་ཡོད་སྐོར་སོགས་བརྗོད་ཡོད་འདུག

སྔར་ལོ་སྐུ་ཞབས་རྗོན་ཨོ་ལེ་ཝིར་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་བཅར་འདྲི་དང་མཉམ་དུ་རྒྱ་ནག་གིས་བོད་ཐོག་འཛིན་བཞིན་པའི་སྲིད་བྱུས་དང་༧པཎ་ཆེན་ཆུང་སྲིད་རིན་པོ་ཆེའི་སྐོར་སོགས་དགོད་གཏམ་གྱི་ལམ་ནས་ཟུར་ཟ་བྱས་ཡོད་པ་དེར་འཛམ་གླིང་གི་མི་གྲངས་ས་ཡ་མང་པོས་ལྟ་ཉན་བྱས་རྐྱེན། རྒྱ་ནག་ཕྱི་སྲིད་བློན་ཆེན་ཀུན་ཧྲང་(Geng Shuang)ཟེར་བས་ཏཱ་ལའི་བླ་མ་དང་རྗོན་ཨོ་ལེ་ཝིར་གཉིས་ཀྱིས་གཏམ་གླེང་ལེ་ཚན་དང་། རྗོན་ཨོ་ལེ་ཝིར་གྱི་གཞི་རྩ་གང་ཡང་མེད་པའི་འཁྲབ་སྟོན་གྱི་སྐད་ཆ་དག་ལ་ངོ་རྒོལ་ཡོད་ཅེས་བརྗོད་ཡོད་པ་མ་ཟད། སྐབས་དེའི་བཅར་འདྲིའི་ནང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་ནག་གི་མཐོ་རིམ་མགོ་འཁྲིད་ཁག་ཅིག་གི་ཀླད་པའི་ལས་ཀ་ཏག་ཏག་བྱེད་ཀྱི་མེད་སྐོར་གསུངས་པར་བརྟེན། ཏཱ་ལའི་བླ་མའི་སྐད་ཆ་དེ་དག་ནི་ཧ་ཅང་དགོད་བྲོ་བ་དང་བདེན་པ་རྩ་ནས་མེད་པ་ཞིག་རེད། ང་ཚོས་ནམ་རྒྱུན་ཏཱ་ལའི་སྐུ་ཕྲེང་བཅུ་བཞི་པ་དེ་ཆོས་ལུགས་ཀྱི་པགས་པ་གྱོན་ནས་རྒྱ་ནག་ཁ་བྲལ་གཏོང་མཁན་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། ཐེངས་འདིར་ཁོའི་བཅར་འདྲིའི་སྐད་ཆར་ཉན་པ་ཡིན་ན་ཁོ་ནི་འཁྲབ་སྟོན་པ་ཆེན་པོ་ཞིག་ཡིན་པ་གསལ་ཡོང་གི་འདུག་ཅེས་སོགས་ཀྱི་སྐྱོན་བརྗོད་བྱས་ཡོད་པ་རེད།

སྐུ་ཞབས་རྗོན་ཨོ་ལེ་ཝིར་ལགས་ནི་ཕྱི་ལོ་ ༡༩༧༧ ལོའི་ཟླ་༤ ཚེས་༢༣ ཉིན་དབྱིན་ཡུལ་ནུབ་བརྒྱུད་ཀྱི་(Erdington, West Midlands) ཞེས་པར་སྐྱེས་ཤིང་། ཁོང་གི་པ་ལགས་ནི་སློབ་གྲྭའི་དགེ་རྒན་དང་སྤྱི་ཚོགས་ཞབས་ཞུ་བ་ཞིག་ཡིན་པ་དང་། ཨ་མ་ལགས་ནི་རོལ་དབྱངས་དགེ་རྒན་ཞིག་ཡིན་འདུག ཁོང་ཆུང་དུས་ནས་སློབ་གྲྭ་རིམ་པར་འགྲིམས་ཏེ་རྗེས་སུ་དབྱིན་ཇིའི་ཁམ་ཟམ་གཙུག་ལག་སློབ་གཉེར་ཁང་གི་ཁིར་ཤིན་མཐོ་སློབ་(Christ’s College) ནང་དབྱིན་ཇིའི་སྐད་ཡིག་ཐོག་སློབ་མཐར་ཕྱིན་ཡོད་པ་དང་། ཕྱི་ལོ་༢༠༠༡ ལོ་ནས་ཁོང་སྔ་གཞུག་ཏུ་གར་སྟེགས་འདྲ་མིན་སྟེང་ནས་འཁྲབ་སྟོན་བྱས་ཏེ་སྐད་གྲགས་ཆགས་ཡོད་འདུག ད་ལྟའི་ཆར་ཁོས་ཨ་རི་དང་དབྱིན་ཡུལ་གཉིས་ཀྱི་གསར་འགྱུར་ལེ་ཚན་དང་དགོད་བྲོ་གཏམ་གླེང་། གློག་བརྙན་འཁྲབ་གཞུང་རྩོམ་པ་པོ་སོགས་ཀྱི་ལས་རིགས་འདྲ་མིན་གཉེར་གྱི་ཡོད་འདུག ཁོང་གི་གྲགས་ཆེ་བའི་ལེ་ཚན་དེ་བདུན་སྔོན་མའི་དོ་ནུབ་ཞེས་པའི་སྐར་མ་ ༢༠ རིང་གི་ལེ་ཚན་དེ་ཡིན་པ་དང་། ལེ་ཚན་དེའི་ནང་གཙོ་བོ་ཨ་རི་དང་དབྱིན་ཡུལ་གཙོའི་རྒྱལ་སྤྱིའི་ཆབ་སྲིད་གནད་དོན་དང་རིག་གཞུང་གི་སྐོར་སོགས་དགོད་བྲོའི་གཏམ་གླེང་དང་ཟུར་ཟའི་དཔྱད་གཏམ་སྤེལ་གྱི་ཡོད་འདུག

 

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༦/༢༣

Leave a Reply

One thought on “རྗོན་ཨོ་ལེ་ཝིར་ལ་རྒྱ་ནག་གིས་དྲ་ཐོག་ཕར་རྒོལ་བྱས།