མི་ལོ་ ༡༤ ལྷག་རིང་རྒྱ་ནག་གི་བཙོན་འོག་ཏུ་མནར་གཅོད་མྱངས་བའི་ཨོ་སི་ཊོ་ལི་ཡར་གནས་སྡོད་བོད་ཀྱི་ཆབ་སྲིད་བཙོན་ཟུར་བེན་ཚང་ཚེ་རིང་བློ་གསལ་ལགས་ནད་རྙིང་བསྐྱར་ལོག་བྱུང་སྟེ་འདས་གྲོངས་སུ་ཕྱིན་ཡོད་འདུག
ཁ་སང་ཕྱི་ཚེས་ ༩  ཉིན་གྱི་ཉིན་རྒྱབ་ཆུ་ཚོད་ ༢།༡༢ སྟེང་ཨོ་སི་ཊོ་ལི་ཡའི་མལ་བྷོན་གྲོང་ཁྱེར་གྱི་སྨན་ཁང་ཞིག་ཏུ། མི་ལོ་ ༡༤ ལྷག་རིང་རྒྱའི་བཙོན་ཁང་དུ་མནར་གཅོད་མྱངས་བའི་བོད་ཀྱི་ཆབ་སྲིད་བཙོན་ཟུར་བེན་ཚང་ཚེ་རིང་བློ་གསལ་ལགས་ནད་རྙིང་བསྐྱར་ལོག་བྱུང་སྟེ་འདས་གྲོངས་སུ་ཕྱིན་ཡོད་པ་དང་། ཁ་སང་ནས་བཟུང་ས་གནས་བོད་རིགས་མཐུན་ཚོགས་ཀྱི་གོ་སྒྲིག་འོག་བོད་མི་ཚོས་ཁོང་ལ་བསྔོ་སྨོན་མཆོད་འབུལ་གནང་བཞིན་ཡོད་པ་དང་།  སང་ཉིན་སྐུ་ཕུང་ཞུགས་འབུལ་གནང་རྒྱུ་ཡིན་འདུག

འདི་གའི་གསར་འགོད་པར་དམ་པ་ཁོང་གི་སྤུན་མཆེད་ཀརྨ་ལགས་ཀྱིས། ནད་རྙིང་བསྐྱར་ལོག་བྱུང་སྟེ་བདུན་ཕྲག་གཅིག་ཙམ་རིང་སྨན་བཅོས་བྱས་ཡོད་ཀྱང་ཕན་འབྲས་བྱུང་མེད་པ་དང་། ཁ་སང་དང་དེ་རིང་གཉིས་ལ་ས་གནས་བོད་རིགས་མཐུན་ཚོགས་ཀྱི་རྒྱུན་ལས་དང་བོད་རིགས་སོགས་མི་མང་པོ་འཛོམས་ཏེ། བསྔོ་སྨོན་དང་རོགས་རམ་སོགས་ཧ་ཅང་ཡག་པོ་གནང་བྱུང་བས། ང་ལ་ཁོང་གི་ནང་མི་ཚོས་ཐུགས་རྗེ་ཆེ་ཞུ་རོགས་ལབ་པ་ལྟར་རོགས་རམ་བྱེད་མཁན་ཚང་མར་ཐུགས་རྗེ་ཆེ་ཞུ་ཡི་ཡོད་ལ། སང་ཉིན་ཁོང་གི་སྐུ་ཕུང་ཞུགས་འབུལ་བྱ་རྒྱུ་ཡིན་པ་དང་། བདུན་ཕྲག་རྗེས་མའི་གཟའ་ཉི་མ་ཉིན་བོད་རིགས་མཐུན་ཚོགས་ཀྱིས་མཆོད་འབུལ་སྨོན་ལམ་རྒྱ་ཆེན་པོ་ཞིག་གནང་འཆར་འདུག ཅེས་བརྗོད་བྱུང་།

ཆབ་སྲིད་བཙོན་ཟུར་དམ་པ་བེན་ཚང་ཚེ་རིང་བློ་གསལ་ལགས་ནི། ཕྱི་ལོ་ ༡༩༣༧ ཟླ་ ༡༡ ཚེས་ ༢༧ ཉིན་ཁམས་ཁྱུང་པོ་རྨེ་རུ་ཞེས་པར་ཕ་རྡོ་རྒྱལ་དང་མ་བཀྲ་ཤིས་ཆོས་འཚོ་གཉིས་ཀྱི་བུར་སྐྱེས་ཤིང་། ཁོང་གི་ཁྱིམ་ཚང་གི་མིང་ལ་ཉི་རི་བེན་ཚང་ཞེས་འབོད་ཀྱི་ཡོད་པ་དང་། དམ་པ་ཚེ་རིང་བློ་གསལ་ལགས་ལ་སྤུན་མཆེད་བུ་དྲུག་ཡོད་པའི་ནང་ནས་ཁོང་ཆེ་ཤོས་གཉིས་པ་དེ་ཡིན་ལ།  ད་ལྟ་ཁོང་བཟའ་ཟླ་གཉིས་ལ་བུ་མོ་གསུམ་ཡོད་པ་ལས་ཆེ་བ་གཉིས་ཨ་རིར་ཡོད་འདུག

དམ་པ་ཚེ་རིང་བློ་གསལ་ལགས་ཀྱིས་ང་ལ་གུང་ཁྲན་ཏང་མགོ་རྟིང་སློག་རྒྱུའི་ནུས་པ་མེད་པ་མ་གཏོགས་བསམ་བློ་ཡོད་ཅེས་རྒྱ་ནག་གཞུང་གི་བཙན་གནོན་ལ་མཐའ་གཅིག་ཏུ་ངོ་རྒོལ་གནང་བར་བརྟེན། མི་ལོ་ ༡༤ ལྷག་རིང་རྒྱ་ནག་གཞུང་གི་བཙོན་འོག་ཏུ་སྡུག་སྦྱོང་མནར་གཅོད་མྱངས་ཡོད་པ་དང་། ཕྱི་ལོ་ ༡༩༧༩ ཟླ་ ༡༠ ནང་བཙོན་གྲོལ་ཐོབ་རྗེས། བཙོན་རོགས་འགའ་དང་ལྷན་དུ་བོད་ཀྱི་རྒྱལ་ས་ལྷ་སར་བོད་ཀྱི་སྟག་འབྲུག་ཚོགས་པ་ཞེས་པ་བཙུགས་ཤིང་། ཕྱིས་སུ་ཆབ་སྲིད་ཀྱི་རྒྱུ་རྐྱེན་སྣ་ཚོགས་འོག་སླར་ཡང་བཙོན་འཇུག་བྱེད་སྲིད་པའི་ཉེན་ཁར་འཕྲད་སྟབས། ཕྱི་ལོ་ ༡༩༩༣ ཟླ་ ༡༠ པའི་ནང་བཙན་བྱོལ་དུ་བསླེབས། ཕྱིས་སུ་བོད་རྒྱལ་ཡོངས་ཆབ་སྲིད་བཙོན་གྲོལ་བདེ་དོན་ཚོགས་པ་ནས་ཁོང་གིས་བཙོན་འོག་ཏུ་དཀའ་སྡུག་མནར་གཅོད་ཚད་མེད་མྱངས་བའི་ལོ་རྒྱུས་དངོས་བྲིས་༼ཁྲག་དྲོན་གྱི་འཁྱུག་བྲིས་༽ཞེས་པ་སོགས་སྔ་གཞུག་ཏུ་དེབ་གཉིས་བཏོན་ཡོད་འདུག

གསར་འགོད་པ། སྐལ་བཟང་སྦྱིན་པ།