བོད་ཡིག་ཟབ་སྦྱོང་སྤྲོད་མཁན་དགོན་པ་དག་ལ་ཐག་གཅོད་ནན་མོ་བྱོས་ཟེར།

བོད་ཡིག་ཟབ་སྦྱོང་སྤྲོད་མཁན་གྱི་དགོན་པ་དག་གནད་དོན་ཆེ་བའི་དགོན་པའི་གྲས་སུ་བཞག་སྟེ་དགོན་པའི་ཡིག་ཐོ་ལས་ཕུད་ཅིང་། ཆོས་ལུགས་མི་སྣའི་དཔང་ཡིག་བསྡུ་རྒྱུ་ཡིན་འདུག

རྒྱ་ནག་གཞུང་གིས་སློབ་གྲྭ་ཁག་གི་དགུན་ཁའི་གུང་སེང་དང་སྟབས བསྟུན། བོད་ཁུལ་གྱི་དགོན་པ་དང་གྲོང་ཚོ། དེ་བཞིན་མི་སྒེར་བཅས་ནས་བོད་ཡིག་ཟབ་སྦྱོང་འཛིན་གྲྭ་འཛུགས་མི་ཆོག་པའི་བཀའ་རྒྱ་བསྒྲགས་ཏེ་ལག་བསྟར་བྱེད་བཞིན་ཡོད་པ་ལྟར། འདས་ལོའི་ཕྱི་ཟླ་ ༡༢ ཚེས་ ༢༥ ཉིན། ནང་ཆེན་རྫོང་འཐབ་ཕྱོགས་གཅིག་གྱུར་ཁང་དང་། ནང་ཆེན་རྫོང་མི་རིགས་ཆོས་ལུགས་ཁང་ཟེར་བས་གྲོང་རྡལ་སོ་སོའི་ཏང་ཨུ་དང་སྲིད་གཞུང་། དགོན་པ་དོ་དམ་ཁང་སོ་སོར་བཀའ་རྒྱ་ཞིག་བཀྲམས་ཏེ། དགུན་ཁའི་གུང་སེང་སྐབས་དགོན་པས་བོད་ཡིག་ཟབ་སྦྱོང་འཛིན་གྲྭ་སྒྲུབ་པར་དོགས་ཟོན་དང་། དགོན་པས་སློབ་གྲྭ་འཚོགས་པའི་སྣང་ཚུལ་གཏན་འགོག་བྱེད་དགོས་སྐོར་བརྗོད་འདུག

བཀའ་རྒྱ་དེའི་ནང་སློབ་ཆུང་འབྲིང་གི་སློབ་མ་ཚོར་དགུན་གནང་གི་སྐབས་དང་བསྟུན། བོད་ཡིག་ཟབ་སྦྱོང་སྤྲོད་མཁན་གྱི་དགོན་པ་དག་ནི་གནད་དོན་ཆེ་བའི་དགོན་པའི་གྲས་སུ་འཇོག་རྒྱུ་དང་། ཟབ་སྦྱོང་རྩ་འཛུགས་དང་འཆར་འགོད་བྱེད་མཁན་གྱི་མི་སྒེར་ལ་ཁྲིམས་ལྟར་དགོན་པའི་ཡིག་ཐོ་ལས་ཕུད་ཅིང་། ཆོས་ལུགས་མི་སྣའི་དཔང་ཡིག་བསྡུ་དགོས་པར་མ་ཟད། སྤྱི་བསྒྲགས་བྱས་ཏེ་ཉེན་ཟོན་དགོས་པར་དྲན་སྐུལ་བྱེད་དགོས་པ། དེ་བཞིན་སློབ་མ་དང་ཁྱིམ་བདག་གི་བསམ་བློའི་སློབ་གསོའི་ལས་དོན་ལེགས་པོར་བསྒྲུབས་ཏེ། སྤྱི་ཚོགས་ནས་བྱུང་བའི་ལྡོག་ཕྱོགས་ཀྱི་ཤན་ཤུགས་ཉུང་དུ་གཏོང་དགོས་པ་མ་ཟད། གྲོང་རྡལ་སོ་སོར་དགོན་པས་སྤྱི་ཚོགས་སློབ་གྲྭ་འཚོགས་པའི་གནོད་སྐྱོན་རང་བཞིན་གསལ་པོར་ཧ་གོ་བར་བྱས་ཏེ། གཞོན་ནུ་དང་ལོ་ཆུང་ཚོའི་བསམ་བློའི་སློབ་གསོའི་བཙན་ས་བརྟན་པོར་བཟུང་ཞིང་། ཏང་དང་སྲིད་གཞུང་གི་སློབ་གསོའི་ལས་དོན་ཚད་མཐོ་རུ་གཏོང་དགོས་སྐོར་བཀོད་འདུག

ཡང་བཀའ་རྒྱ་དེའི་ནང་། སློབ་གྲྭ་ཆུང་འབྲིང་གི་དགུན་གནང་ལ་ཉེ་བ་དང་བསྟུན་ཏེ། ས་ཆ་སོ་སོའི་དགོན་པ་སོ་སོས་ཁྲིམས་འགལ་གྱི་སྒོ་ནས་བོད་ཡིག་གསབ་སྦྱོང་འཛིན་གྲྭ་སྤེལ་བའི་གནས་ཚུལ་མགོ་འབུར་གྱིན་ཡོད་ལ། གནོད་སྐྱོན་འདི་རིགས་ལ་དོགས་ཟོན་ཆེད་དུ། ཞང་གྲོང་རྡལ་སོ་སོས་ངེས་པར་དུ་མཐོང་ཆེན་སྒོ་ནས་སེམས་ཁུར་གྱི་འདུ་ཤེས་ཟབ་མོས་དགོན་སྡེ་དཔུང་ཚོགས་ལེགས་བཅོས་དང་། ཡོངས་ལ་གནོད་པ་སྐྱེལ་མཁན་མི་དག་སྒྲིག་བཅོས་བྱ་རྒྱུ་གཙོ་བོ་རུ་བཟུང་ཞིང་། འགོ་འཁྲིད་གཙོ་བོས་དངོས་སུ་དམ་འཛིན་དང་། དགོན་སྡེ་དོ་དམ་ལས་བྱེད་མི་སྣས་ཞིབ་ཚགས་འཛིན་ཏེ། དགོན་པ་དང་གྲོང་ཚོའི་ནང་དུ་ཟབ་འཇུག་བྱས་ཏེ། ཞིབ་ཕྲའི་གནས་ཚུལ་རྒྱུས་ལོན་པར་བྱེད་དགོས་ལ། འགལ་བ་གནོད་སྐྱོན་སྔ་ས་དང་ཆུང་ས་ནས་འཛིན་ཏེ་གནད་དོན་དག་དགོན་པ་ནས་ཐག་གཅོད་དང་། གཞི་རིམ་ནས་ཞི་བར་བཟོ་ཞིང་། རང་རྫོང་གི་ཆོས་ལུགས་ཁྱབ་ཁོངས་ཀྱི་འཆམ་མཐུན་བརྟན་འཇགས་ལ་བརྟན་སྲུང་ལེགས་པར་ཡོང་བར་བྱ་དགོས། ཅེས་བཀོད་འདུག

ཡང་བཀའ་རྒྱའི་ནང་ལྷག་པར་དུ་སློབ་གྲྭའི་དགུན་གནང་གི་དུས་སྐབས་སུ། ཞང་གྲོང་རྡལ་སོ་སོའི་ཉེ་ཆར་དགོན་པ་དོ་དམ་ཁང་དང་། མངགས་གཏོང་ཁང་སོགས་རྩ་འཛུགས་བྱས་ཏེ། དགོན་པས་སློབ་གྲྭར་སྤེལ་བའི་གནས་ཚུལ་ལ་ཕྱོགས་ཡོངས་དང་ཆ་ཚང་བའི་སྒོ་ནས་ཞིབ་བཤེར་ཐོ་འགོད་ལས་དོན་ཐེངས་ཤིག་དགོས། དགོན་སྡེས་ཟབ་སྦྱོང་འཛིན་གྲྭ་དང་བོད་ཡིག་འཛིན་གྲྭའི་མིང་ཐོག་ནས་སློབ་གྲྭ་ཆུང་འབྲིང་གི་སློབ་མ་བསྡུས་ཏེ། སློབ་གྲྭ་འཚོགས་པའི་བྱ་སྤྱོད་ལ་ཞིབ་བཤེར་ཐག་གཅོད་ནན་མོ་དགོས་ཤིང་།  ཕན་ཁེའི་འབྲེལ་བ་ཞིབ་ཅིང་གསལ་བར་བཤད་དགོས། རང་འདོད་ཁེར་སྒྲུབ་དང་ཁ་ཏ་སློབ་སྟོན་ལ་མི་ཉན་པའི་སློབ་གྲྭ་འཚོགས་པའི་དགོན་པ་དང་གྲྭ་བཙུན་གྱི་འགན་འཁྲི་ནན་མོ་རྩད་གཅོད་དགོས་ལ།  གཅིག་གསལ་རྟོགས་བྱུང་ན་གཅིག་བཀག་སྡོམ་དགོས། ཅེས་བཀོད་འདུག

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༠༡/༢༨

Leave a Reply

One thought on “བོད་ཡིག་ཟབ་སྦྱོང་སྤྲོད་མཁན་དགོན་པ་དག་ལ་ཐག་གཅོད་ནན་མོ་བྱོས་ཟེར།