དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་གནང་གྲུབ་རྗེས་མ་ན་ལི་ཧི་མ་ལ་ཡའི་སྔ་འགྱུར་རྙིང་དགོན་པདྨ་འོད་གླིང་དུ་ཆིབས་བསྒྱུར་བཀའ་དྲིན་བསྐྱངས་ཏེ་གནས་གཟིགས་མཛད་ཡོད་འདུག
དེ་རིང་སྔ་དྲོའི་ཆུ་ཚོད་ ༨།༣༠ ཐོག མ་ན་ལིའི་རྒྱ་གར་གཞུང་གི་སྨན་ཁང་ཉེ་འཁྲིས་ཀྱི་མདུན་ཐང་དུ། འོན་མངའ་རིས་གྲྭ་ཚང་གི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ནས་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་གནང་ཡོད་པ་དང་། སྐབས་དེར་༧གོང་ས་མཆོག་ནས་གཙོ་བོ་དོན་གཉེར་དང་དད་པ་གཡོ་བ་མེད་པ་ཞིག་ཡོང་ན་ས་ཕྱོགས་ཉེ་རིང་གི་ཁྱད་པར་ཁྱོན་ནས་མེད་སྐོར་གསུངས་སོང་།
མཛད་རིམ་རྣམས་ཐད་གཏོང་ཞུ་ཡི་ཡོད་པས་བཀའ་དབང་གི་ཐོག་མར་༧གོང་ས་མཆོག་གིས། དེ་རིང་གི་དབང་དེ་ཡུལ་གྲུ་གཞན་དུ་ཡོད་པའི་དོན་གཉེར་ཅན་ཚོར་དབང་ཐོབ་ཀྱི་ཡོད་མེད་དྲིས་བྱུང་པར་ཐོབ་ཀྱི་རེད་ཅེས་བརྗོད་པ་ཡིན། གང་ཡིན་ཟེར་ན། སྔགས་འཆང་སོ་ཐར་ཟེར་པའི་སོ་ཐར་ཀྱི་ཕྱག་ལེན་དེ་ཏོག་ཙམ་དམ་པ་ལྟ་བུ་ཡོད་པ་རེད་དེ། བཅོན་ལྡན་འདས་ཀྱི་མངོན་རྫོགས་ཀྱི་ཆོ་གའི་ནང་ཁྲིད་ཀྱི་སྒོ་ནས་མངོན་པར་རྫོགས་ཟེར་པ་དེར་མངོན་རྫོགས་སྒྲུབ་མཁན་གྱི་མཁན་སློབ་ཚོ་ས་ཆ་གཅིག་ལ་བཞུགས་པ་དང་། ས་ཆ་དེར་དངོས་སུ་ཡོང་མ་ཐུབ་མཁན་གྱི་དོན་གཉེར་ཅན་ཚོ་ཕྱོགས་གཞན་ཞིག་ཏུ་བསྡད་དེ་ཁྲིད་ཀྱི་སྒོ་ནས་མི་གཅིག་གིས་ལན་ཕར་བསྐྱལ་ནས་མངོན་པར་རྫོགས་ཡ་ཡོད་པ་རེད། དེ་བས་ཕྱོགས་གཅིག་ནས་གསང་སྔགས་ཀྱི་ཆོས་འཁོར་དང་། དེའི་ནང་ནས་སྔགས་བླ་མའི་ཆོས་འཁོར་ཆགས་ཡོད་དུས་དྲ་ཐོག་ཏུ་ཉན་ཡོད་མཁན་ཚོར་ས་ཆ་ཐག་ཉེ་རིང་གི་ཁྱད་པར་ཡོད་པ་མ་རེད། གཙོ་པོ་དོན་གཉེར་དང་དད་པ་གཡོ་བ་མེད་པ་ཞིག་ཡོད་ན་ས་ཕྱོགས་ཉེ་རིང་གི་ཁྱད་པར་ཁྱོན་ནས་ཡོད་པ་མ་རེད། དེར་བརྟེན་ཁྱེད་རང་ཚོ་ས་ཆ་གང་དུ་ཡོད་ནའང་། རྒྱ་གར་གྱི་གནས་ཀུ་ལུ་མ་ན་ལིར་ཏཱ་ལའི་བླ་མས་དབང་བྱེད་ཀྱི་ཡོད་པ་རེད་བསམ་དེ། ངོས་ཀྱི་པར་ལ་ཁྱེད་རང་ཚོ་ཚང་མར་རྒྱུས་ཡོད་པ་རེད་ཨཱ། ངོས་ཀྱི་རྣམ་པ་བློ་ལ་ཤར་བ་བྱས་ཏེ་དབང་ཞུ་པའི་ངོ་སྤྲོད་སྐབས་སུ་དམིགས་པ་དེ་ཡག་པོ་བྱོས། ངོས་ཀྱིས་སྒྲིབ་བཤགས་བྱེད་རིང་འདིར་མ་ཎི་བགྲང་གི་ཡོད་པས་ཁྱེད་རང་ཚོ་ཕྱོགས་དང་མཚམས་སུ་ཡོད་མཁན་ཚོས་ཀྱང་མ་ཎི་བགྲང་ནས་སྡོད་ཨཱ། ཞེས་གསུངས་སོང་།
ཡང་༧གོང་ས་མཆོག་གིས། དེ་སྔ་བོད་ལ་གང་ཟག་དགོས་བཙན་གྱི་དབང་དུ་བྱས་པའི་རྒྱུད་སྡེའི་ཆོ་ག་ལ་དང་འདོད་ཞེ་པོ་གནང་ནས་དཀྱིལ་འཁོར་སྒྲུབ་མཆོད་ཚོགས་པ་སོགས་ཡོང་གི་ཡོད་པ་རེད། བསྟན་པ་སྤྱི་མཚན་གྱི་ཟབ་ལ་རྒྱ་ཆེ་བ་དེ་ལ་སློབ་སྦྱོང་བྱེད་པ་དེ་མ་འདང་པ་ལྟ་བུ་ཞིག་མཐོང་གི་ཡོད། རྒྱ་གར་ལ་བསླེབས་པའི་མགོ་སྟོད་ནས་རྒྱུད་གྲྭ་གཉིས་ཀྱི་མཚོན་པའི་སྔགས་ཀྱི་ཆོ་ག་རྐྱང་ལ་ལྟ་མཁན་ཚོར་གཞུང་ཆེན་ལ་ལྟ་དགོས་པའི་འབོད་སྐུལ་བྱས་པ་ཡིན། བསྟན་པ་སྤྱི་མཚན་གྱི་བསྟན་པ་སྤྱིའི་འགྲོ་སྟངས་དེ་ཚོ་ཡག་པོ་ཞིག་མ་ཤེས་ན་གང་ཟག་དགོས་བཙན་ལ་གསུངས་ཡོད་པ་དེའི་ཟབ་གནད་ཆ་ཚང་ཤེས་ཐུབ་ཀྱི་མ་རེད། དེ་རིང་ཆོས་འཁོར་དེ་གང་ཟག་དགོས་བཙན་ཟེར་བའི་སྔགས་ཀྱི་སྐོར་དེ་རེད། ཅེས་སོགས་གསུངས་སོང་།
དེ་རིང་ཉིན་གུང་༧གོང་ས་རྒྱལ་བ་རིན་པོ་ཆེ་མཆོག་ནས་མ་ན་ལི་ཧི་མ་ལ་ཡའི་སྔ་འགྱུར་རྙིང་དགོན་པདྨ་འོད་གླིང་དུ་ཆིབས་བསྒྱུར་བཀའ་དྲིན་བསྐྱངས་ཏེ་གནས་གཟིགས་མཛད་པ་དང་། ཉིན་གུང་གི་ལྗགས་སྨིན་མཛད་ཡོད་འདུག
མཛད་འཆར་ལྟར་ན། སང་ཉིན་སྔ་དྲོར་མུ་མཐུད་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མ་དང་། རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་བཅས་ཀྱི་བཀའ་ཆོས་བསྩལ་རྒྱུ་ཡིན་འདུག
གསར་འགོད་པ། ཀླུ་མགོན་ཐར།
༡༽ བསྟན་པ་སྤྱི་བཙན་དང་གང་ཟག་སྒེར་བཙན་ཞེས་པ་ལས། སྤྱི་མཚན་དང་སྒེར་མཚན་རེད་མི་འདུག ༢) སྔགས་བྱང་སེམས་སོ་ཐར་ཞེས་སོ་ཐར་དེ་ཞེས་པ་ལས། སྔགས་འཆང་སོ་ཐར་ཞེས་པ་ནོར། ༣) འཕྲིན་གྱི་སྒོ་ནས་བསྙེན་པར་རྫོགས་པ་ཞེས་པ་ལས། ཁྲིད་ཀྱི་མངོན་རྫོགས་སོགས་ནོར། དེ་འདྲ་ཁ་ཤས་ཤིག་འདུག་པས་ནོར་བཅོས་ཡོང་བ་ཞུ།