རིག་པ།(༡༧)

༄༅།། ང་རང་ཕྱི་ལོ་ ༡༩༩༡ ལོར་རྒྱ་གར་དུ་བཙན་བྱོལ་དུ་སླེབས་ཤིང་། དེ་ནས་ད་བར་ལོ་ངོ་ ༢༤ སོང་ཟིན་པ་དང་། དུས་ཡུན་དེའི་རིང་སྤྱི་འཐུས་སྐབས་བཅུ་གཅིག་པ་ནས་དེ་རིང་(༢༠༡༥།༡༠།༡༨)གི་སྐབས་བཅུ་དྲུག་པའི་སྤྱི་འཐུས་ཀྱི་སྔོན་འགྲོའི་འོས་བསྡུའི་བར་ཁྱོན་བསྡོམས་སྤྱི་འཐུས་ཀྱི་འོས་འདེམས་ཐེངས་ལྔ་དྲུག་བྱས་ཀྱང་། སྤྱི་འཐུས་ཀྱི་འོས་བསྡུའི་ནང་ངས་འོས་འཕངས་པ་དེ་རིང་ཐེངས་དང་པོ་ཡིན།

ང་རང་ཆོལ་ཁ་དང་ལུང་ཚན། ཆོས་རྒྱུད་ཀྱི་དབྱེ་བ་མེད་པའི་འོས་བསྡུའི་ལམ་ལུགས་ཤིག་ལ་རེ་སྨོན་བྱེད་མཁན་ཞིག་ཡིན། ད་ཡོད་བཙན་བྱོལ་བོད་མིའི་ཡོངས་ཁྱབ་འོས་བསྡུའི་ལས་དོན་ནང་། འོས་ཁོངས་ཀྱི་འགྲོ་ལུགས་མི་འདྲ་བ་གཉིས་ལག་བསྟར་བྱེད་བཞིན་ཡོད་པ་ལས། དང་པོ་ནི་སྲིད་སྐྱོང་དང་། རྒྱ་བལ་འབྲུག་གསུམ་ཕུད་པའི་ཕྱི་རྒྱལ་གྱི་སྤྱི་འཐུས་འོས་བསྡུ་དང་། གཉིས་པ་ནི་རྒྱ་བལ་འབྲུག་གསུམ་གྱི་སྤྱི་འཐུས་ཀྱི་འོས་བསྡུ་ཡིན། སྲིད་སྐྱོང་དང་ཕྱི་རྒྱལ་སྤྱི་འཐུས་ཀྱི་འོས་བསྡུའི་ནང་། ཆོལ་ཁ་དང་ཆོས་རྒྱུད་ཀྱི་དབྱེ་བ་མེད་པར་འོས་འཕངས་ཆོག་གི་ཡོད།

འོན་ཀྱང་རྒྱ་གར་དང་བལ་ཡུལ། འབྲུག་ཡུལ་བཅས་ལ་གནས་པའི་བོད་མི་མི་སྐྱ་ཚོས། སྤྱི་འཐུས་འདེམས་སྐབས་རང་ཉིད་གང་དུ་གཏོགས་པའི་ཆོལ་ཁའི་སྤྱི་འཐུས་འོས་འདེམས་བྱེད་དགོས་པ་དང་། སེར་མོ་བ་ཚོས་རང་ཉིད་གང་དུ་གཏོགས་པའི་ཆོལ་ཁ་དང་ཆོས་རྒྱུད་གཉིས་ཀའི་སྤྱི་འཐུས་འོས་འདེམས་བྱེད་དགོས་པ་ལས། ཆོལ་ཁ་གཞན་ཞིག་གི་ཁོངས་སུ་རང་གིས་འོས་འཕེན་འདོད་ཡོད་པའི་མི་ཞིག་ཡོད་ནའང་། དེ་ལ་འོས་འཕེན་སའི་ལམ་བུ་མེད།

ཆོལ་ཁ་ཆོས་རྒྱུད་གཞི་ལ་བཞག་པའི་འོས་བསྡུའི་ལམ་ལུགས་དེ་ལ་ལེགས་ཆ་ཡོད་པ་རེད། ཡིན་ན་ཡང་། དེ་ལ་སྐྱོན་ཆ་ཡང་ཡོད་པ་སྟེ། ལམ་ལུགས་དེ་རང་གིས་ཆོལ་ཁ་དང་ཆོས་རྒྱུད་ཀྱི་འཐེན་འཁྱེར་གྱི་རྐྱེན་རྩ་བཟོ་བཞིན་ཡོད།

མང་གཙོའི་སྤྱི་ཚོགས་ནང་། འོས་འཕེན་ཆོག་པའི་ཐོབ་ཐང་ཡོད་ལ། འོས་མི་འཕེན་པའི་ཐོབ་ཐང་ཡང་ཡོད་པ་རེད། དེར་བརྟེན་ང་རང་གི་ལྟ་ཚུལ་གཞི་བཟུང་ད་ཕན་ངས། ཆོལ་ཁ་དང་ཆོས་ལུགས་དབྱེ་མེད་ཀྱི་སྲིད་སྐྱོང་འོས་བསྡུའི་ནང་འོས་འཕངས་ཤིང་། ཆོལ་ཁའི་སྤྱི་འཐུས་ཀྱི་འོས་བསྡུའི་ནང་འོས་འཕེན་མྱོང་མེད། འོན་ཀྱང་འོས་བསྡུའི་ཆེད་དུ་དེབ་སྐྱེལ་སོགས་ཀྱི་ལས་དོན་རྣམས་སྒྲུབ་བཞིན་ཡོད། ད་ལོ་ཕྲན་རང་ཨོ་སི་ཊོ་ལི་ཡར་སླེབས་ཡོད་པས། ས་ཁུལ་འདི་ནས་ཆོལ་ཁ་དང་ཆོས་ལུགས་དབྱེ་མེད་ཀྱི་སྤྱི་འཐུས་འོས་མི་གཅིག་ལ་འོས་འཕེན་ཆོག་གི་ཡོད། འདི་ནི་ང་རང་གི་ལྟ་ཚུལ་དང་མཐུན་པ་ཞིག་ཡིན་པས། དགའ་ཚོར་ཆེན་པོས་ད་ནངས་ཞོགས་པ་ཆུ་ཚོད་བདུན་དང་ཕྱེད་ཀ་ནས་རླངས་འཁོར་ནང་འགྲུལ་བཞུད་ཀྱིས། འོས་བསྡུའི་སྤྱིལ་བུ་ཡོད་སར་བསྐྱོད་པ་དང་། དེར་ཤ་ཁྲག་གཅིག་པའི་བོད་རིགས་ཕོ་མོ་ཚོ་དང་ལྷན་དུ་སྲིད་སྐྱོང་དང་སྤྱི་འཐུས་ཀྱི་འོས་མིར་འོས་ཤོག་འཕངས་པ་ཡིན།

ང་རང་གི་འོས་ཤོག་འཕེན་སའི་འོས་མི་དེར་རྒྱལ་ཁ་ཐོབ་མིན་མི་ཤེས་ཀྱང་། ཆོལ་ཁ་ལུང་ཚན་དང་ཆོས་ལུགས་འཐེན་འཁྱེར་གྱི་ལྕགས་སྒྲོག་ལས་ཐར་ཏེ། རང་ངོས་ནས་འོས་མི་དྲག་ཤོས་དང་འོས་ཤོས་རེད་བསམས་སའི་མི་དེར་འོས་ཤོག་འཕེན་རྒྱུའི་གོ་སྐབས་ཐོབ་པས་སྤྲོ་བ་འཕེལ་ལ། ད་ཕན་རང་ངོས་ནས་མི་ཚེའི་རིང་། ཆོལ་ཁ་དང་ལུང་ཚན། ཆོས་ལུགས་བཅས་གཞི་ལ་བཞག་པའི་འོས་བསྡུའི་རྣམ་པ་གང་གི་ནང་དུའང་འཛུལ་ཞུགས་མ་བྱས་པ་དེ་གཟི་བརྗིད་ཡིན་སྙམ།། །།

བསྐྱར་བཅོས།: ༢༠༡༧/༠༦/༡༣

Leave a Reply

17 thoughts on “སྤྱི་འཐུས་ཀྱི་འོས་བསྡུའི་ནང་ཐེངས་དང་པོར་འོས་ཤོག་འཕངས་པ།

  1. མཁས་དབང་ལགས་ཀྱིས་གསུངས་པ་ཧ་ཅང་མད་གུས་པས་ཀྱང་ཆོལ་ཁ་ཆོས་རྒྱུད་རིས་མེད་ཀྱི་འོས་འདེམས་ལམ་ལུགས་ཤིག་བྱུང་ན་སྙམ་མྱོང་ལ་བཤད་ཀྱང་མྱོང་། འདས་པའི་ལོ་རྒྱས་ནང་ག་རེ་བྱུང་མྱོང་མིན་དང་འདི་ཚོའི་གནད་འགག་སྐོར་ནས་བློ་སྐྱེད་གསར་བའང་ཐོབ་བྱུང་བཀའ་དྲིན་ཆེ།

བརྙན།

No videos

སྒྲ

དྲ་འབྲེལ།

རིག་པ་གསར་ཤོས།

བསྟན་འཛིན་ཆོས་རྒྱལ།
ཚེ་སྒྲུབ་བསྟན་འཕེལ།
ཤག་སྒང་པ་སངས་ཚེ་རིང་།
ཆུང་ཚེ་རིང་

སྡོམ་གྲངས།

  • སྤྱིའི་སྤེལ་གྲངས། (༢)
  • སྤྱིའི་མཆན་གྲངས། (༢༣)
  • སྤྱིའི་ཀློག་གྲངས། (༣)