རྒྱ་ནག་གཞུང་གིས་ཕྱི་ལོ་ ༢༠༢༥ ལོ་མཇུག་བར་རྒྱལ་ཁབ་བཅུ་གཉིས་ཀྱི་མི་སེར་ལ་རིན་མེད་ཐོངས་མཆན་སྤྲད་ནས་ཉིན་གྲངས ༡༥ རིང་རྒྱ་ནག་ཏུ་སྐོར་གཡེང་བྱ་ཆོག་གི་ཡོད་འདུག
རྒྱ་ནག་ནང་ཏོག་དབྱིབས་རིམས་ནད་མཆེད་རྗེས་དང་། ལྷག་པར་རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་ཟེར་བ་ཞིག་གི་འོག རྒྱལ་ཁབ་དེའི་ཚོང་གི་ལྟེ་གནས་ཆེ་ཤོས་ཀྱི་གྲོང་ཁྱེར་བཅུ་ཚུད་པའི་ས་གནས་མང་དག་ཅིག་སྒོ་རྒྱ་བསྡམས་ཏེ། རྒྱ་ནག་གི་ཚོང་དོན་དང་དཔལ་འབྱོར་ལ་གྱོང་གུད་ཚབས་ཆེན་ཐེབས་ཡོད་པ་ལྟར། ཁ་སང་ཕྱི་ཚེས་ ༧ ཉིན་རྒྱ་ནག་དང་ཕྱིའི་རྒྱལ་ཁབ་བར་གྱི་འབྲེལ་ལམ་ཡར་སྐྱེད་བརྗེ་ལེན་ཟེར་བའི་སྲིད་ཇུས་འོག རྒྱ་ནག་གིས་སླར་ཡང་ཨེ་ཤ་ཡ་དང་། ཡུ་རོབ་རྒྱལ་ཁབ་གཅུ་གཉིས་ཀྱི་མི་སེར་རྣམས་ཐོངས་མཆན་རིན་མེད་ཐོག་རྒྱ་ནག་ཏུ་ཉིན་གྲངས ༡༥ རིང་བསྐྱོད་ཆོག་ཅིང་། སྲིད་ཇུས་དེ་ཕྱི་ལོ་ ༢༠༢༥ ཕྱི་ཟླ་ ༡༢ ཚེས་ ༣༡ བར་ལག་བསྟར་བྱ་རྒྱུ་ཡིན་ལུགས་བསྒྲགས་འདུག
གནད་དོན་དེའི་ཐད་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་ལིན་ཇན་(Lin Jian) ཟེར་བས། རྒྱལ་ཁབ་གཉིས་ཀྱི་མི་སེར་ཚོར་ཕན་ཚུན་བསྐྱོད་རེས་ཀྱི་སྲིད་ཇུས་གོང་མཐོར་གཏོང་སླད། རྒྱ་ནག་གཞུང་གིས་ཧྥ་རན་སི་དང་། སི་པན། མ་ལེ་ཤི་ཡ། སྦེལ་ཇམ། འཇར་མི་ནི་སོགས་རྒྱལ་ཁབ་བཅུ་གཉིས་ཀྱི་མི་སེར་རྣམས་དུས་ཐུང་རིང་རྒྱ་ནག་ཏུ་བསྐྱོད་རྒྱུའི་སྲིད་ཇུས་དེ་ཕྱི་ལོ་ ༢༠༢༥ ཟླ་ ༡༢ ཚེས་ ༣༡ བར་དུས་འགྱངས་བྱས་ཡོད། ཅེས་དང་། རྒྱལ་ཁབ་བཅུ་གཉིས་དེ་དག་གི་མི་སེར་ཚོས་ཚོང་དོན་དང་། ཡུལ་སྐོར་སོགས་ཀྱི་ངོ་བོའི་ཐོག་ནས་རྒྱ་ནག་ཏུ་སྐོར་གཡེང་བྱ་ཆོག་གི་ཡོད་ལུགས་སོགས་བརྗོད་འདུག
དེ་བཞིན་རྒྱ་ནག་ཡུལ་སྐོར་སློབ་གླིང་(China Tourism Academy) གི་འགན་འཛིན་ཌ་ཡེ་པིན་( Dai Bin) ཟེར་བས། རྒྱ་ནག་གིས་སླར་ཡང་ཡུལ་སྐོར་བའི་དུས་ཐུང་སྐོར་སྐྱོད་ཀྱི་སྲིད་ཇུས་དེ་ཕྱིར་འགྱངས་བྱས་པ་དེས། རྒྱལ་ཁབ་གཞན་གྱི་མི་སེར་དེ་དག་རྒྱ་ནག་ཏུ་བསྐྱོད་རྒྱུར་གདེང་སྤོབས་དང་སྤྲོ་སྣང་གསར་པ་ཞིག་བསྐྲུན་ཡོད་པའི་ཁར། རྒྱ་ནག་གི་ཡུལ་སྐོར་དང་ཚོང་དོན་ལ་འཕེལ་རྒྱས་བྱུང་སྲིད་ལུགས་སོགས་བརྗོད་འདུག
ཕྱི་ལོ ༢༠༢༣ ལོར་རྒྱ་ནག་གི་དཔལ་འབྱོར་འཕེལ་རྒྱས་འགྲོ་ཚད་ཀྱི་བརྒྱ་ཆ ༥།༤ ལ་བསླེབས་ཏེ། ཐོན་སྐྱེད་ཞན་པ་དང་མི་འབོར་རྒས་བཞིན་པའི་གནས་སྟངས་འོག་་ཕྱི་ལོ ༢༠༢༨ ལོར་བརྒྱ་ཆ་ ༣།༥ ལ་བསླེབ་རྒྱུ་ཡིན་པའི་ཚོད་དཔག་བྱས་ཡོད་ལ། ལྷག་པར་ཕྱོགས་ཡོངས་ནས་རྒྱ་ནག་གི་དཔལ་འབྱོར་ལ་ཉམས་ཉེས་ཆེན་པོ་ཕྱིན་རྐྱེན། འདས་ལོའི་ལོ་མཇུག་ཙམ་ནས་རྒྱ་ནག་གིས་ཡུ་རོབ་དང་ཨེ་ཤ་ཡ་ཁུལ་གྱི་རྒྱལ་ཁབ་དག་ཐོངས་མཆན་རིན་མེད་ཐོག་རྒྱ་ནག་ཏུ་ཤར་གཏོང་བྱེད་མགོ་བཙུགས་ཡོད་པ་རེད། དེ་བཞིན་རྒྱ་ནག་གོ་ལའི་དུས་བབ་ཀྱི་གནས་ཚུལ་ནང་། རྒྱ་ནག་གིས་ཕྱི་མི་རིན་མེད་ཤར་གཏོང་གྱི་སྲིད་ཇུས་ལག་བསྟར་བྱས་པའི་འདས་པའི་ཟླ་བ་གསུམ་ཙམ་གྱི་ནང་། ཕྱི་མི་ས་ཡ་ ༡༩༨ ཙམ་གྱིས་རིན་མེད་ཐོངས་མཆན་ཞུ་མགོ་བཙུགས་ཡོད་པས། འདས་ལོ་དང་བསྡུར་ན་རྒྱ་ནག་ཏུ་ཡོང་མཁན་ཡུལ་སྐོར་བའི་བརྒྱ་ཆ་ ༢༦༦།༡ འཕར་ཡོད་འདུག་ལ། དེའི་ཁྲོད་ཀྱི་བརྒྱ་ཆ་ ༤༠ ཙམ་ཧྥ་རན་སི་ནས་ཡིན་པ་རེད།
རྒྱ་ནག་གཞུང་གིས་འདས་ལོའི་ལོ་མཇུག་ཙམ་ནས་ཐོག་མར་ཧྥ་རན་སི་དང་། འཇར་མི་ནི། ཨི་ཊི་ལི། ནེ་ཐ་ལེན་ཌི། སི་པེན། མེ་ལེ་ཤི་ཡ་སོགས་རྒྱལ་ཁབ་དྲུག་གི་མི་སེར་རྣམས་ཐོངས་མཆན་རིན་མེད་དུ་སྤྲད་ནས་རྒྱ་ནག་ཏུ་ཡོང་ཆོག་པའི་གསལ་བསྒྲགས་བྱས་འདུག་སྟེ། ཏོག་དབྱིབས་རིམས་ནད་རྗེས་རྒྱ་ནག་ལ་ཡུལ་སྐོར་དུ་སྐྱོད་མཁན་ཇེ་ཉུང་དུ་ཕྱིན་ཡོད་ཀྱང་། རྒྱ་ནག་གི་ཐོངས་མཆན་རིན་མེད་ཀྱི་ཐོག་ནས་སྐྱོད་ཆོག་པའི་སྲིད་ཇུས་བཟུང་རྗེས། ཡུ་རོབ་རྒྱལ་ཁབ་ཁག་གི་ན་གཞོན་མང་པོ་ཞིག་རྒྱ་ནག་གི་གྲོང་ཁྱེར་ཆེ་ཁག་ཏུ་ཡུལ་སྐོར་སྐྱོད་ཀྱིན་ཡོད་པའི་གནས་ཚུལ་ཐོན་འདུག དེ་བཞིན་འདི་ལོའི་རྒྱ་ནག་གི་ཡུལ་སྐོར་བ་ཆེས་མང་བའི་ས་ཚིགས་ལྔ་ནི་རྒྱ་ནག་གི་ལྕགས་རི་རིང་མོ་དང་། པེ་ཅིན། ཞི་ཨན། ཁྲིན་འདུ། བོད་བཅས་ཡིན་འདུག་ལ། འདི་ལོའི་རྒྱ་ནག་གི་ལོ་སར་རྗེས་ནས་ད་བར་ཡུལ་སྐོར་ལྟེ་གནས་ཁང་སོགས་སུ་རྒྱ་སྒོར་ཐེར་འབུམ ༦༣༣ ལྷག་བྱུང་ནས་འདས་ལོ་དང་བསྡུར་ན་རྒྱ་སྒོར་ ༥༡༧ ལྷག་གིས་མང་བ་ཡོད་འདུག
གསར་འགོད་པ། དཔལ་ལྡན།
