རང་དབང་རིན་པོ་ཆེ །

ཁོ་སོ་ཝོ་ཆུང་ཆུང་ ། ཁོ་སོ་ཝོ་གསར་པ །
ཕྱི་ཚེས་༡༧ཉིན་ཁོ་སོ་ཝོ་ཡི་རང་བཙན་བསྒྲགས་གཏམ་སྤེལ་བ་དེས་ཡུལ་དེའི་མི་འབོར་ས་ཡ་གཉིས་ལ་རང་དབང་ཐོབ་པར་གྱུར ། ད་ནས་བཟུང་ཁོ་སོ་ཝོ་ཆུང་ཆུང་འདི ། སའི་གོ་ལའི་སྟེང་གི་རང་བཙན་རྒྱལ་ཁབ་གསར་ཤོས་སུ་གྱུར ། སྐབས་འདིར་བཙན་འཛུལ་དང་གཉའ་གནོན་འོག་གི་མི་འབོར་བྱེ་བ་མང་པོས་འདིའི་རྗེས་ཀྱི་རང་དབང་ལུང་པ་གང་ཡིན་ལ་རེ་སྨོན་བྱས་ཤིང་ ། ངས་རང་གི་ཕ་ཡུལ་གངས་ལྗོངས་ལྷག་པར་དུ་དྲན ། ངས་རང་གི་ཕུ་ནུ་སྤུན་གྲོགས་ཚོའི་ངོ་གདོང་ལ་རང་དབང་གི་ཉི་ཐིག་དྲོན་པོ་ཞིག་ཤར་ན་བསམ །
རང་དབང་ཞེས་པའི་ཚིག་འབྲུ་འདི་གཉིས་ནི་དོན་དམ་གྱིས་རིན་པོ་ཆེ་ཡིན་ལ ། འདིའི་རིན་ཐང་ནི་ཚེ་སྲོག་བྱེ་བ་མང་པོ་ཡིན་སྟེ ། རང་དབང་འདིའི་དོན་དུ་སའི་གོ་ལའི་སྟེང་གི་མི་གྲངས་བྱེ་བ་མང་པོའི་ཚེ་སྲོག་ཤོར་ཞིང་ །  ད་དུང་མི་གྲངས་བྱེ་བ་མང་པོས་རིན་པོ་ཆེ་འདི་འཚོལ་བཞིན ། རང་དབང་གི་ལུང་པ་ཞིག་ལ་རེ་སྒུག་བྱས་ཡོད ། འདིའི་ཁྲོད་དུ་བོད་མི་ས་ཡ་དྲུག་ཀྱང་ཚུད་ཡོད ། སྤྱིར་བཏང་མཁས་པའི་བཤད་སྲོལ་ལ ། རང་དབང་Freedom མེད་ན་མིའི་རིགས་ཀྱི་འཆར་སྣང་ Imagination མེད་ལ །   འཆར་སྣང་མེད་ན ་གསར་ གཏོད་  Creativity  ཀྱང་མེད་སྟབས །   རང་དབངརིན་པོ་ཆེ་ནི་མིའི་རིགས་ཀྱི་དཔལ་ཡོན་དར་སྤེལ་དང་བདེ་སྐྱིད་ཀྱི་རྩ་བར་ གྱུར་ཡོད །  བོད་མི་རིགས་འདི་ལའང་དཔལ་ཡོན་དར་ཞིང་བདེ་སྐྱིད་ལྡན་པ་ཞིག་ཡོད་དགོས་ན །  ངེས་པར་དུ་རང་དབང་གིས་འཚོ་དགོས་ལ །  རང་དབང་གི་ཆེད་དུ་བཤད་ཕོད་ཅིང་ལངས་ཐུབ་པ་ཞིག་ཡིན་དགོས །  འདི་ནི་ང་ཚོའི་གཞི་རྩའི་འཐབ་རྩོད་ཀྱང་ཡིན །
རང་དབང་ནི་ལྷན་སྐྱེས་ཀྱི་ཐོབ་ཐང་ཡིན་ལ །  ང་ཚོའི་མཐའ་འཁོར་གྱི་མཁའ་ དབུགས་ལྟར་སྐྱེས་མ་ཐག་ནས་རང་བཞིན་གྱིས་གྲུབ་ཡོད །   སུ་ཞིག་གིས་གཞན་གྱི་རང་དབང་འཕྲོག་ཚེ་ཐད་ཀར་དབུགས་ཀྱི་རྒྱུ་བ་བཀག་པ་ལྟ་བུའི་ཉེས་པ་ཡོད་སྟབས །  ང་ཚོས་རང་དབང་ལ་དགའ་བའི་འཛམ་གླིང་གི་སྐྱེས་འགྲོ་ཡོངས་ལ །  རྒྱ་ནག་གཞུང་གིས་བོད་མི་རིགས་ཀྱི་རང་དབང་བཙན་འཕྲོག་བྱས་པ་འདི་ནི་ད་ལྟ་སའི་གོ་ལའི་སྟེང་གི་ནག་ཉེས་དང་གོད་ཆག་ཚབས་ཆེ་ཤོས་དེ་ཡིན་པ་ར་སྤྲོད་བྱེད་དགོས་ལ །  ང་ཚོས་རང་གི་མི་རིགས་འདི་ལའང་རང་དབང་གི་རིན་ཐང་དང་ །  རང་རང་གི་ལྷན་སྐྱེས་ཀྱི་ཐོབ་ཐང་འདི་དག་ངོ་འཕྲོད་པ་བྱེད་དགོས་ཤིང་ །   ཁོ་སོ་ཝོའི་རྗེས་ཀྱི་རང་བཙན་རྒྱལ་ཁབ་ནི་བོད་གངས་ ཅན་གྱི་ལྗོངས་ཡིན་དགོས་ཏེ །  ང་ཚོའི་དྲང་བདེན་དང་ །  འཚེ་མེད་ཞི་བའི་འཐབ་རྩོད་ཀྱི་ངོ་བོ་འདི་ནི་ང་ཚོའི་རྒྱལ་ཁའི་རྩ་བ་ཡིན  །   དེ་རིང་འཛམ་གླིང་གི་སྐྱེ་འགྲོ་མང་བོས་རང་དབང་ལ་རེ་སྨོན་དང་ །  རང་དབང་གི་ཆེད་དུ་ཚེ་སྲོག་གི་འགྲོ་གྲོན་ཡང་གཏོང་བཞིན་ཡོད་སྟབས །  ང་ཚོས་བདེན་པ་དང་ཞི་བའི་འཐབ་རྩོད་ཀྱི་ཐོག་ནས་ཁོ་སོ་ཝོའི་རྗེས་ནས་ཁ་བ་ཅན་གྱི་ཡུལ་འདི་རང་དབང་གི་ལུང་པར་བསྒྱུར་ཐབས་ལ་འབད་དགོས་པར་རིགས།།