ལོ་འདིའི་གསུམ་བཅུའི་དུས་དྲན་ནས་བཟུང་བོད་ཀྱི་གནད་དོན་འདི་རིམ་པ་གསར་པ་ཞིག་ལ་འཕེལ་ཡོད། ཡིན་ནའང་བཙན་བྱོལ་བོད་གཞུང་གི་ལངས་ཕྱོགས་དང་འཐབ་བྱུས། ནང་ཁུལ་གྱི་གྲོས་རིམ་སོགས་མུ་མཐུད་རང་འཇགས་ཡིན། དུས་སྐབས་འདི་འདྲ་ཞིག་ཤར་སྐབས་བཀའ་ཤག་གིས་ཆེད་ལས་མཁས་པའི་བགྲོ་གླེང་ངམ། ཡང་ན་རྒྱལ་ཁབ་རིམ་པའི་ཚོགས་འདུ་ཞིག་ཀྱང་སྐོང་དགོས་པར་འདོད་ཀྱང་དེའང་བྱུང་མེད། བོད་མི་མང་སྤྱི་འཐུས་གྲོས་ཚོགས་ཀྱི་ངོས་ནས་ཚོགས་དུས་འཕར་མ་ཞིག་སྐོང་འོས་རུང་དེའང་མེད་པར་ས་གནས་སོ་སོ་ན་མར་མེ་ཁྲོམ་སྐོར་འདྲ་གོ་སྒྲིག་བྱས་ནས་བསྡད་ཡོད། འདི་ལྟར་ཛ་དྲག་གི་དུས་སྐབས་སུའང་འཛིན་སྐྱོང་གི་ངོས་ན་སྒྱིད་ལུག་དང་འཐུས་ཤོར་གྱི་རྣམ་པ་རེ་མངོན་ཡོད།
ད་ཆ་དམིགས་བསལ་སྐུ་ཚབ་རྣམ་གཉིས་རྒྱ་ནག་ནས་ཕྱིར་ཕེབས་ཤིང་། རེ་བ་ཡོད་མེད་གང་ལྟར་ཡང་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཡིས་ཀྱང་བོད་རྒྱའི་འབྲེལ་མོལ་ལ་གྲུབ་འབྲས་ཡག་པོ་ཞིག་ཡོང་རྒྱུའི་རེ་བ་ཡོད་སྐོར་བརྗོད་ཡོད། བོད་རྒྱའི་སྐུ་ཚབ་ཕྱོགས་གཉིས་ཀའི་ངོས་ནས་བོད་རྒྱའི་འབྲེལ་མོལ་ཐེངས་བདུན་པ་དེ་ཐུག་རྒྱུར་མོས་མཐུན་བྱུང་ཡོད་སྟབས། ལྷག་པར་དུ་གོ་བསྡུར་དང་གང་ཅིའི་ཐལ་གྲ་སྒྲིག་རེ་བྱེད་དགོས་པར་འདོད། དཔེར་ན། ང་ཚོའི་སྤྱི་ཡོངས་ཀྱི་འཐབ་བྱུས་འདིང་ཕྱོགས་དང་། བོད་ཕྱི་ནང་གཉིས་ཀར་སྤེལ་བཞིན་པའི་ལས་འགུལ་ལ་བསྐྱར་ཞིབ་གནང་དགོས་མིན། ༧གོང་ས་མཆོག་གིས་རྒྱ་རིགས་མི་དམངས་ལ་བསྩལ་བའི་གསུང་འཕྲིན། དེ་བཞིན་ད་སྐབས་ང་ཚོའི་ལས་འགུལ་ནི་ཁྱབ་བསྒྲགས་ཀྱི་ངོ་བོ་ནས་གསལ་བཤད་ཀྱི་ངོ་བོར་ཕྱིན་ཡོད་སྟབས། རྒྱལ་སྤྱི་རིམ་པ་དང་རྒྱ་མི་རིགས་ཀྱི་སྤྱི་ཚོགས་བོད་དོན་གསལ་བཤད་བྱེད་མཁན་གྱི་མི་སྣ་གོ་སྒྲིག་བྱེད་སྟངས་སོགས་ནི་གནད་འགག་ཆེ་བར་འདོད། གཞན་ཡང་། ལོ་འདིར་བོད་ནང་ནས་དཔའ་བོ་དཔའ་མོ་ ༢༠༠ ལྷག་གི་ཚེ་སྲོག་ཤོར་ཡོད་ལ། མི་དེ་དག་གི་བེམ་པོ་དག་པར་རིས་སུ་བཤམས་པ་ལས། བཙན་བྱོལ་བོད་གཞུང་དམངས་གཉིས་ཀྱིས་ཁོང་ཚོའི་ཆེད་དུ་དྲན་གསོའི་རྡོ་རིང་ཞིག་བཞེངས་ཤིང་། རྡོ་རིང་དེའང་མཆོད་རྟེན་གྱི་རྣམ་པ་མིན་པར་གནའ་བོའི་ལོ་རྒྱུས་ཀྱི་རྒྱབ་ལྗོངས་ལྟར་བཞེངས་ཏེ་༧གོང་ས་མཆོག་གིས་རྡོ་རིང་གི་སྟེང་དུ་མཚན་རྟགས་འགོད་པའམ་ཡང་ན་རྨང་རྡོ་འདིང་ཐུབ་ཚེ་དགེ་མཚན་ཤིན་ཏུ་ཆེ་བར་འདོད། འདི་ནི་སྲིད་ཕྱོགས་ཀྱི་ལས་འགུལ་ཡིན་ལ། ཆོས་ཕྱོགས་ནས་ཀྱང་དཔའ་བོ་དཔའ་མོ་འདི་དག་གི་དོན་དུ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མར་མེ་ཚེ་འབར་ཞིག་སྒྲོན་ཏེ། མར་མེ་དེ་ནི་ནམ་རྒྱུན་མང་ཚོགས་ཀྱིས་གསོ་ཐུབ་པ་ཞིག་གནང་ཚེ་དཔའ་བོ་དཔའ་མོ་འདི་དག་དང་ཁོང་ཚོའི་ཤུལ་ལུས་ནང་མི་ཚོར་བོད་མི་རིགས་ཀྱི་ངོས་ནས་གུས་བརྩི་དང་སེམས་གསོ་བྱས་པ་མཚོན་པར་འདོད། རེ་བ་རྫོགས་ཤིང་ཐབས་ལམ་ཟད་པ་ནི་མི་རིགས་རླབས་ཆེན་ཞིག་གི་ལམ་མིན་སྟབས། ཅིས་ཀྱང་འཆོལ་མི་རུང་།
གུང་ཁྲན་ཏང་གིས་གཞིས་ལུས་བོད་རིགས་མི་དམངས་རྒྱ་ནག་གི་ཁྲིམས་ལ་སྦྱོར་སྐབས། ཤུགས་ལྡན་ཚོགས་པས་བོད་མིའི་དབུ་ཁྲིད་༧གོང་ས་མཆོག་རྒྱ་གར་གྱི་ཁྲིིམས་ཁང་ལ་འབོད་ཀྱིན་འདུག ཁོང་ཚོས་བཤད་ཀྱིན་པའི་ནག་ཅན་ངོ་མ་དེ་ནི་བོད་མི་རིགས་ཀྱི་སྲོག་རེད། སྙིང་རེད། ངོ་རྟགས་རེད། དེའི་རྐྱེན་གྱིས་གནད་དོན་འདིའི་རིགས་ཀྱང་ཐག་གཅོད་མ་ནོར་བ་རེ་གནང་རྒྱུ་ནི་ཁ་ཚ་དགོས་གཏུགས་ལྟ་བུར་གྱུར་འདུག་སྙམ་མོ།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།