གནད་འགག་ཆེ་བའི་གནས་ཚུལ་གཅིག་ཞུ་རྒྱུ་ཡོད། དེ་གང་ཡིན་ཞེ་ན། དོལ་རྒྱལ་བསྟེན་གསོལ་བྱེད་ཕྱོགས་སྐོར་རེད། ༧གོང་ས་སྐྱབས་མགོན་ཆེན་པོ་མཆོག་གིསདོལ་རྒྱལ་བསྟེན་གསོལ་བྱེད་ཕྱོགས་སྐོར་ལ་ལམ་སྟོན་གནང་ནས་ཧ་ལམ་ལོ་སུམ་ཅུ་སོ་གྲངས་འགྲོ་བཞིན་ཡོད་པ་རེད། དེ་འདྲ་ཞིག་གི་རྗེས་སུ་ད་དུང་གདན་ས་ཆེན་པོ་དཔལ་ལྡན་འབྲས་སྤུངས་དང༌། གདན་ས་ཆེན་པོ་དགའ་ལྡན་ཞུ་བ་དེ་ཚོའི་ནང༌། མི་ཐབ་ཆག་ངའི་ཟོལ་འདྲ་བོ་ཞིག་གིས་དོལ་རྒྱལ་བསྟེན་རྒྱུ་ཡོད་པ་མ་རེད་ཅེས་བསྐྱར་བཤད་རྒྱག་དགོས་བྱུང་བ་དེ་ཧ་ཅང་བློ་ཕམ་གྱི་རང་བཞིན་རེད། གང་ལམ་སྟོན་གནང་བ་དེ་བོད་རིགས་སྤྱི་བོ་གནམ་བསྟན་ཡོངས་སུ་རྫོགས་པས་༧རྒྱལ་བ་རིན་པོ་ཆེ་ལ་དད་པ་ཡོད། བླ་མ་ཡིན་ཞེས་ལབ་མཁན་ཡོངས་སུ་རྫོགས་པས་ཉི་མ་གཅིག་ལ་ལག་ལེན་བསྟར་མི་ཐུབ་པ་ཞིག་དང༌། བསྟར་མི་ཤེས་པ་གང་ཡང་ཡོད་པ་མ་རེད། ཡིན་ན་ཡང་དམ་ཚིགས་ཉམས་པའི་མཁྲེགས་འཛིན་ཅན་རེ་ཟུང་གིས་གནས་ཚུལ་འདི་མི་མཐུད་ནས་སྤྱི་ཚོགས་ཀྱི་ནང་ལ་རྙོག་འཛིང་བཟོ་རྒྱུ་ཞིག་དང༌། གདན་ས་ཁག་གི་ནང་ལ་ལྷིང་འཇགས་མི་ཡོད་བ་ཞིག་བཟོ་རྒྱུར་འབད་བརྩོན་མུ་མཐུད་བྱས་པ་དེ། ད་ནི་ང་ཚོས་ཐག་གཙང་མ་གཅོད་རྒྱུའི་དུས་ཚོད་ལ་སླེབས་ཡོད་པ་རེདབསམ་གྱིན་འདུག ངས་དེ་རིང་སེམས་འཚབ་དྲག་པོའི་ཐོག་ནས་འདིར་ཡོད་པའི་མཁན་པོ་བླ་སྤྲུལ་ཚོས་མཚོན་པའི་དགེ་འདུན་པ་ཡོངས་ལ་ཤུགས་ཆེན་པོས་ཐོག་ནས་རེ་མདུན་ཞུ་རྒྱུ་ལ། རྗེས་མ་ང་འདིར་ལོ་ཁ་ཤས་ཀྱི་རྗེས་ལ་བཅར་རྒྱུའི་གོ་སྐབས་བྱུང་བ་ཡིན་ན། ང་ཚོས་བགྲོ་གླེང་བྱེད་པའི་སྐབས་ལ་ཡང་བསྐྱར་དོལ་རྒྱལ་གྱི་མིང་འབོད་མི་དགོས་པའི་གཙང་མ་ཞིག་ཆགས་པའི་རེ་བ་ཡོད། དེ་ཆགས་དགོས་པ་རེད་ཅེས་བཙན་བྱོལ་བོད་གཞུང་གིས་བཀའ་གཏོང་གིན་ཡོད་པ་མ་རེད་ལ༌། ༧རྒྱལ་བ་རིན་པོ་ཆེས་ཀྱང་བཙན་བཀའ་གནང་གིན་ཡོད་པ་མ་རེད། ཁྱོད་རང་ཚོ་རང་གིས་སྔ་ཕྱི་བར་གསུམ་དུ་མཁན་པོ་བླ་སྤྲུལ་རྣམ་པ་ཚོས་གྲོས་ཆོད་ག་རེད་བཞག་ཡོད། སྒྲིག་གཞི་ག་རེ་བཟོས་ཡོད། བཀའ་སློབ་ག་ཚོད་གནང་ཡོད་པ་དེ་ཚོ་ངས་དྲན་གསོ་ཞུ་གིན་ཡོད། དེ་ཚོ་སུ་གང་གིས་བཙན་དབང་བྱས་ནས་བཞག་པ་ཞིག་མ་རེད། ཤ་ཁ་ཁ་གྲི་སོསོ་བཟོ་རྒྱུ་་ཟེར་ནད་གྲོས་ཆོད་བཞག་གནང་ཡོད་པ༌། ཁ་དང་ཁ་སྤུ་དབྱེ་བ་འབྱེད་རྒྱུ་ཡིན་ཟེར་ནས་གྲོས་ཆོད་བཞག་ཡོད། དགེ་ལུགས་སྤྱི་ལ་ཁྱབ་པའི་སྒྲིག་གཞིའི་ནང་ལ། གདན་ས་ཁག་ལ་འཛུལ་བའི་སྐབས་དོལ་རྒྱལ་དང་འབྲེལ་བ་མེད་པ་ཞིག་དགོས་པ་སྔོན་འགྲོའི་ཆ་རྐྱེན་ཡིན་ཟེར་ནས་བཀོད་ཡོད། དེ་བཀོད་མཁན་རང་ཚོས་བདག་པོ་མ་སྐྱོན་ན་གནས་ཚུལ་དེ་གང་ཞིག་ཆགས་སོང༌། དེ་འདྲ་བསམ་མཁན་ཡང་ཡོད་པ་རེད་ལ༌།དེ་འདྲ་ལབ་མཁན་ཡང་ཡོད་པ་རེད། དོལ་རྒྱལ་སྐོར་༧སྐྱབས་མགོན་རིན་པོ་ཆེས་མ་གསུང་ན་ཡག་པོ་ཡོས་ཟེར། དེ་དོན་དག་མེད་པའི་རྙོག་དྲ་རེད༌། དེ་འདྲའི་དགོངས་པ་བཞེས་མཁན་འདུག་ཅེས་ངས་ཚོད་དཔག་བྱས་ནས་ཞུས་པ་མིན། ང་ལ་ཡང་དེ་འདྲ་ཤ་ཚའི་འདུ་བྱེད་ཐོག་ནས་བཀའ་སློབ་གནང་མཁན་འདུག ད་དེའི་ཐོག་ནས་ཞེ་དྲག་ཞེ་དྲག་བཤད་རྒྱུ་ཡོད་པ་མ་རེད། ཉེན་ཁ་ཡོད་པ་རེད། སྐྱེ་པ་ཐེངས་གཅིག་ལ་ཤི་བ་ཐེངས་གཅིག་མ་གཏོགས་བསྐྱར་བརྡབ་ཡང་བརྡབ་བྱེས་ནས་ཤི་བ་མེད་ལ། དོལ་རྒྱལ་ཚོགས་པས་བསད་པ་ཡིན་ན་ཡང་ཤི་རྒྱུ་རེད། དོལ་རྒྱལ་ཚོགས་པས་མ་བསད་པར་ལྷག་པ་ཡིན་ནའང་ཤི་རྒྱུ་རེད། རྒྱལ་བ་ལྔ་བ་ཆེན་པོས་བོད་བསྟན་པ་ཆབ་སྲིད་དང༌། སྤྱིར་སངས་རྒྱས་ཀྱི་བསྟན་པ་ལ་དགོངས་པ་བཞེས་ནས་དོལ་རྒྱལ་བཀག་འགོག་གནང་བ། ཁྲི་ཆེན་ངག་དབང་མཆོག་ལྡན་གྱིས་མཚོན་པའི་ཚད་ལྡན་གྱི་སྐྱེས་བུ་དམ་པ་མང་བོས་བཀག་འགོག་གནང་བ་རེད། ༧གོང་ས་སྐུ་ཕྲེང་བཅུ་གསུམ་པ་ཆེན་པོས་བཀག་འགོག་གནང་བ་རེད། བཀག་འགོག་གནང་བ་དེ་བོད་བསྟན་པ་ཆབ་སྲིད་དང༌། སངས་རྒྱས་ཀྱི་བསྟན་པ་ལ་དགོངས་པ་བཞེས་ནས་བཀག་འགོག་གནང་བ་རེད་མ་གཏོགས། རྙོག་དྲ་བཟོ་རྒྱུའི་ཆེད་དུ་གསུངས་པ་ཞིག་རྩ་བ་ཉིད་ནས་མ་རེད། ང་ཚོ་ལ་མགོར་ཡར་སོང་སྟེ་མར་གཏང་སར་མཆོངས་གིན་ཡོད་པར་གོང་ས་སྐུ་ཕྲེང་ན་རིམ་གྱིས་ལམ་སྟོན་གནང་བ་དེ། སྙིང་རྗེས་ཀུན་ནས་བསླངས་པའི་ལམ་སྟོན་ཅིག་རེད་མ་གཏོགས་རྙོག་དྲ་སློང་རྒྱུའི་གནས་ཚུལ་ཞིག་ཆགས་ཀྱིན་ཡོད་པ་མ་རེད། དེ་འདྲར་བརྟེན་གདན་ས་ཁག་གི་ནང་ལ་༧གོང་ས་སྐྱབས་མགོན་ཆེན་པོ་རྗེས་མར་ཞབས་སོར་འགོད་པའི་སྐབས་ལ། ཐུགས་འཚེར་སྣང་མེད་པའི་ཐོག་ནས་གསུང་ཆོས་གནང་ཐུབ་པ་ཞིག་བཟོ་དགོས་པ་དེ་གདན་ས་སོ་སོའི་དགེ་འདུན་པ་དང་དབུ་གཞུགས་ཚོའི་ལསའགན་རེད། འདིར་ཆོས་འབྲེལ་བྱས་པ་ཡིན་ན་གང་འདྲ་ཞིག་ཡིན་ནམ་བསམ་པའི་ཐུགས་དོགས་ཟ་དགོས་པའི་གནས་ཚུལ་མེད་པ་བཟོ་མ་ཐུབ་པ་ཡིན༌། ང་ཚོས་ཆོས་འབྲེལ་གྱི་སྦྱིན་བདག་ཞུ་རྒྱུ་ཡིན། མཐུན་རྐྱེན་གཏོང་གི་ཡིན། གཅིག་གཅིག་གནང་རོགས་གནང་ཟེར་ནས་སྙན་སེང་ཞུས་བཞག་པ་ཡོད་ཀྱང༌། ངས་ཕན་ཐོགས་ཡོད་པ་མ་རེད་བསམ་གྱིན་ཡོད། སྣོད་སྨིན་པ་ཞིག་བཟོ་རྒྱུ་ཡིན་ན། གདུལ་བྱ་གཙང་མ་ཞིག་བཟོ་རྒྱུ་ཡིན་ན་ཚང་མས་དགོངས་པ་བཞེས་དགོས། ཉེ་ཆར་འཇང་འགུམན་ཆོས་ཚོགས་འཚོགས་པའི་སྐབས་ལ། བགྲོ་གླེང་བྱེད་མཁན་མ་བྱུང་བ་ཅེས་ནས་གོ་སོང༌། ངས་དེ་དུས་རང་ལབ་རྒྱུ་བྱུང༌། ཞེ་དྲག་ཡག་པོ་རེད། དེ་འདུལ་བ་དང་མཐུན་པ་རེད། ཆོས་དང་མཐུན་པ་རེད།
དེ་བཞིན་མཁན་རིན་པོ་ཆེ་རྣམ་པ་ཚོས་ཐག་གཅོད་ག་རེ་གནང་ཡོད་པ་རེད། གྲོས་ཆོད་ག་རེ་བཞག་ཡོད་པ་རེད། དེ་དག་ལ་དགེ་འདུན་པ་ཚོས་གུས་ཞབས་དང་ལྡན་པ་འི་ཐོག་ནས་དྲན་གསོ་ཞུ་རྒྱུ་དེ་འོས་ཤིང་འཚམ་པའི་བྱ་བ་ཞིག་རེད་བསམ་ཡོད། དོལ་རྒྱལ་གྱི་གནས་ཚུལ་འདི་སྔོན་མ་ཡིན་ན་འཇིག་རྟེན་པའི་དྲེགས་པ་ཞིག་བསྟེན་དང་མ་བསྟེན་གྱི་དྲི་བ་རྐྱང་པ་ཞིག་རེད། ཡིན་ན་ཡང་ད་ལྟའི་གནས་སྐབས་ལ་བོད་ཀྱི་རྩ་དོན་དང་འབྲེལ་བའི་ཆབ་སྲིད་ཀྱི་ལས་ཀ་ཞིག་ཆགས་ཚར་བ་རེད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བསམ་མེད་ཁ་ཤས་ཀྱིས་དོལ་རྒྱལ་རྗེས་འབྲངས་པ་དེ་ཚོ་༧རྒྱལ་བ་རིན་པོ་ཆེའི་ཁ་གཏད་ལ་བེད་སྤྱོད་གཏོང་རྒྱུ་ཡག་ཤོས་ཞིག་ཆགས་འདུག་བསམ་སྟེ། རྒྱུ་དང་དངུལ་དངོས་གང་གི་ཐོག་ནས་རོགས་རམ་བྱེད་ཀྱིན་ཡོད་པ་རེད། སྒྲིག་འཛུགས་བྱེད་ཀྱི་ཡོད་པ་རེད། དོལ་རྒྱལ་གྱི་ཆོས་སྦྱིན་གནང་མཁན་ཕྱི་ལོག་ནས་ཚུར་གདན་འདྲེན་ཞུ་དགོས་བྱུང་ན། རྒྱ་ནག་མི་དམངས་སྤྱི་མཐུན་རྒྱལ་ཁབཀྱིས་འགྲོ་སོན་བཏང་ནས་གདན་འདྲེན་བྱེད་རྒྱུ་ཡིན་ཟེར་གྱིན་ཡོད་པ་རེད། ལྐོག་ལྐོག་སུད་སུད་ཀྱི་སྐད་ཆ་གང་མ་རེད། མངོན་གསལ་དོད་པོའི་ཐོག་ནས། ཡོངས་གྲགས་ཀྱི་ཐོག་ནས། དོལ་རྒྱལ་རྗེས་འཇུག་པ་ཚོསཀྱང་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་འབྲེལ་བ་བྱེད་ཀྱིན་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཀྱང་དོལ་རྒྱལ་རྗེས་འཇུག་པ་ཚུར་བེད་སྤྱོད་གཏོངགིན་ཡོད་པ་རེད། གནད་དོན་དེ་འདྲ་ཞིག་གི་འོག་ལ། ང་ཚོ་བོད་ཀྱི་རྩ་དོན་སྒྲུབ་པའི་ལས་དོན་གྱི་ཐོག་ལ་འགན་ཡོད་པ་ཚང་མས་སྣང་མེད་ལ་བཞག་ན་འགྲིག་གི་འདུག་གམ། བར་ལམ་འཇིགས་སྐུལ་དང་དྲགས་སྤྱོད་ཀྱི་ལས་ཀ་གང་འདྲ་ཞིག་བྱས་པ་རེད། དེ་ལོ་རྒྱུས་དེབ་ཐེར་གྱི་ནང་ལ་འགོད་དགོས་པ་ཞིག་རེད་མ་གཏོགས། ང་ཚོ་དགའ་མིན་དགའ་མདོག་གིས་སྐད་ཆ་བཤད་པ་མ་རེད། བཙན་བྱོལ་བོད་གཞུང་གི་ངོས་ནས་༧གོང་ས་སྐྱབས་མགོན་ཆེན་པོའི་སྐུ་མདུན་ལ་ཆོས་ཀྱི་འབྲེལ་བ་བཞག་ན་འགྲིག་གི་མ་རེད་ཅེས་ལབ་ཡོད་པ་རེད་མ་གཏོགས། དེ་ལས་གཞན་པའི་ཤེས་ཡོན་དང༌། གཞིས་ཆགས་ཡིན་ནའང་འདྲ། ཐོབ་ཐང་གཞན་པ་གང་ལའང་ང་ཚོས་ག་དུས་ཡིན་ནའང་གཏོར་བཤིག་བཏང་མེད་པ། ང་ཚོ་ལ་ཉེན་ཁ་ཡོད་པ་རེད། ཁོ་རང་ཚོ་ལ་ཉེན་ཁ་འདུག་ཟེར་ནས་རྒྱ་གར་གཞུང་ལ་སྔ་ཕྱི་བར་གསུམ་ལ་ཞུ་རྒྱུ་དེ་ཚོ། ཧམ་པ་བཤད་ན། བདེན་པ་གཡག་ཙམ་ཞིག་ཐོབ་ཀྱི་རེད་བསམ་པའི་གནས་དུས་ཚོད་རྩིས་ཀྱི་ལས་ཀ་རེད། དེར་བརྟེན་རྒྱ་གར་གཞུང་སྐྱག་རྫུན་བཤད་ནས་མགོ་བསྐོར་ཐེབས་ཀྱི་ཡོད་པ་མ་རེད། རྒྱལ་སྤྱིའི་ཞིབ་འཇུག་ཚགས་ཚུད་བྱས་པའི་རྗེས་ལ་གྲུབ་དོན་ག་རེ་རྙེད་འདུག དེ་ཁྱེད་རང་ཚོ་ཚང་མས་མཁྱེན་གསལ་རེད། རྒྱུ་མཚན་དེར་བརྟེན་ནས་ཆོས་ཀྱི་ཐོག་ནས་དཀའ་ངལ་ཡོད་ལ། ཆབ་སྲིད་ཀྱི་ཐོག་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བེད་སྤྱོད་སྡུག་ཤོས་འོག་ལ་འགྲོ་བསྡད་པ་ཡིན་ན་དཀའ་ལས་ཁག་པོ་རེད་བསམ་གྱིན་འདུག མཁན་པོ་དང་དགེ་བསྐོས་རྣམ་པ་ཚོ། གཞན་ཡང་ལས་ཀྱི་སྣེ་མོར་གཏོགས་པ་ཁ་ཤས་ཀྱིས་རང་དོན་རྒྱབ་བསྐྱུར་བྱས་ཏེ་དཀའ་ལས་བརྒྱབས་པ་ང་ཚོས་ཤེས་ཀྱིན་ཡོད། ཁ་ཤས་ཀྱིས་བདེ་འཇགས་ལ་གནོད་རྒྱུ་རེད་དགོངས་ཏེ། འགྲོ་མཁས་འདུག་མཁས་བྱས་ནས་བཞུགས་ཀྱིན་ཡོད། དེ་འདྲ་བྱས་ནས་བཞུགས་མཁན་ཚོར་ཡང་དགག་བྱ་དང་དགོས་པ་ཡོད་རྒྱུ་རེད། དེར་ང་ཚོས་ཞུ་རྒྱུ་གང་ཡང་མེད། ཡིན་ནའང༌། ལྷག་བསམ་ཟོལ་མེད་ཀྱི་ཐོག་ནས་ཕྱག་ལས་གཙང་མ་དང༌། གསལ་བོ་གནང་མཁན་དེ་ཚོ་ལ་ག་དུས་ཡིན་ནའང་ང་ཚོས་རྗེས་སུ་ཡི་རང་ཡོད། བསྔགས་བརྗོད་ཡོད། དགོས་གལ་བྱུང་ན་གང་འདྲ་ཞིག་གི་རྒྱབ་སྐྱོར་དགོས་ནའང་བཙན་བྱོལ་བོད་གཞུང་གི་ངོས་ནས་ཞུ་རྒྱུ་ཡིན་ཞེས་ཞུ་འདོད་བྱུང་སོང༌།
བཀའ་ཁྲི་ཟམ་གདོང་རིན་པོ་ཆེསའབྲས་སྤུངས་སུ་དོལ་རྒྱལ་སྐོར་ལ་གསུངས་པའི་བཀའ་སློབ་ལས་ཟུར་འདོན་བྱས།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
