བཙན་བྱོལ་བའི་ལོ་རྒྱུས་ཀྱི་དེབ་ཐེར་དུ་གཟི་བརྗིད་ལྡན་པ་ཞིག་ཆགས་ཡོད།

བོད་ཀྱི་དུས་བབ་གསར་ཁང་གི་འབྲེལ་ཡོད་དབུ་ལས་ལྷན་རྒྱས་མཆོག་ལ།
                           ཆེད་གསོལ།  བོད་ཀྱི་དུས་བབ་གསར་སྤེལ་བགྲང་བྱ་བཅུ་འཁོར་བར་འདི་ག་ཡིག་ཚང་ནས་བཀའ་ཟུར་༧སྐྱབས་བརྗེ་ཀིརྟི་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་གིས་དབུ་ཁྲིད་པའི་འཕགས་ཡུལ་ཀིརྟིའི་བྱེས་པ་གྲྭ་ཚང་གི་ཚབ་བྱས་ཏེ་ལྷག་བསམ་ཟོལ་མེད་ཀྱིས་རྟེན་འབྲེལ་ཞུ་རྒྱུ་དང༌།  འདས་པའི་ལོ་བཅུའི་རིང་བོད་ཀྱི་དུས་བབ་ཀྱིས་རང་ཚུགས་དང་སྙིང་སྟོབས་ལྡན་པའི་སྒོ་ནས་ལོ་རྒྱུས་དང་མི་རིགས་ལ་འགན་ཁུར་ཏེ་གྲུབ་འབྲས་མི་དམན་པ་བརྩོན་ལེན་གནང་བ་ནི་བོད་པ་བཙན་བྱོལ་བའི་ལོ་རྒྱུས་ཀྱི་དེབ་ཐེར་དུ་གཟི་བརྗིད་ལྡན་པ་ཞིག་ཆགས་ཡོད་ལ།  དེ་ཡང་གཙོ་བོ་ཁྱེད་ཅག་རྩོམ་སྒྲིག་དང་འཛིན་སྐྱོང་གནང་མཁན།   དེ་བཞིན་དཔལ་འབྱོར་གྱི་མཐུན་རྐྱེན་སྦྱོར་མཁན་དག་གི་ལྷག་བསམ་དང་རྣམ་དཔྱོད་ལས་བྱུང་བ་ཞིག་ཡིན་པས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན།  དེང་སྐབས་རང་མི་རིགས་ཕྱོགས་གང་ཅིའི་ཐད་ཧ་ཅང་ཛ་དྲག་ཆགས་ཡོད་པར་བརྟེན།  མ་འོངས་པའི་ཆར་ཡང་བོད་ཀྱི་དུས་བབ་ཀྱིས་༧གོང་ས་སྐྱབས་མགོན་ཆེན་པོའི་བཀའ་དགོངས་གཞིར་བཟུང་གྲུབ་འབྲས་དང་རྩ་ཆེའི་ཉམས་མྱོང་རྒྱུན་མཛིན་བྱས་ཏེ་རྩ་དོན་འཐབ་རྩོད་དང༌།  སྤྱི་ཚོགས་ཞབས་ཞུ། སྐད་ཡིག་སྲུང་སྐྱོབ་སོགས་ཀྱི་ཐད་སྔར་ལས་ལྷག་པའི་མདུན་བསྐྱོད་བྱས་ཏེ་གྲུབ་འབྲས་གཟེངས་སུ་ཐོན་པ་བྱེད་རྒྱུའི་རེ་བ་ཤིན་ཏུ་ཆེ།  མཇུག་ཏུ་ལྷན་རྒྱས་ཀྱི་སྐུ་གཟུགས་གསལ་ཐང་དང་ཕྱག་ལས་ལམ་ལྷོང་ཡོང་བའི་སྨོན་འདུན་བཅས།   འཕགས་ཡུལ་ཀིརྟིའི་བྱེས་པ་གྲྭ་ཚང་གི་ཡིག་ཚང་ནས་ཕྱི་ལོ་༢༠༠༧ཟླ ༡ཚེས་༡༥ཉིན།