དུས་བབ་གསར་ཁང་གི་རྩོམ་སྒྲིག་པ་དང་ལས་བྱེད་ལྷན་རྒྱས་ཀྱི་དྲུང་དུ།
ཆེད་འབུལ། བོད་ཀྱི་དུས་བབ་གསར་ཤོག་འདོན་སྤེལ་གྱིས་རླབས་ཆེའི་ལས་དོན་དབུ་འཛུགས་ཞུས་ནས་དེ་རིང་གི་ཉིན་མོའི་བར་ལོ་བཅུ་འཁོར་བར་བསྔགས་བརྗོད་དང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང༌། ཀྱག་ཀྱོག་གི་མི་ལོ་བཅུའི་དུས་ཡུན་རིང་སྙིང་སྟོབས་ཞུམ་མེད་ཀྱིས་བདེན་དོན་གསར་འགོད་གྱི་ལམ་དུ་ཆས་ཏེ་ལོ་རྒྱུས་ཀྱི་གཟི་བརྗིད་ལྡན་པའི་བོད་ཀྱི་གསར་ཤོག་ཅིག་ཆགས་ཐུབ་ཡོད་ལ། དམངས་གཙོ་དང་རང་དབང་བརྗོད་ནས་ཁོད་ཡངས་པའི་སྨྲ་བརྗོད་ཀྱི་གླེང་སྟེགས་ཆེན་པོ་ཞིག་ཀྱང་བསྐྲུན་ཡོད། བོད་ཀྱི་དུས་བབ་གསར་ཤོག་གིས་བརྒྱུད་མྱོང་བའི་དཀའ་སྡུག་གི་ལོ་རྒྱུས་ལ་ཕྱིར་མིག་ཅིག་བལྟས་དུས་གཟི་འོད་འབར་བའི་ཉིན་མོ་འདི་ལྟ་བུ་ཞིག་བསུ་ཐུབ་པའི་ཡིད་ཆེས་སུ་ལ་སྐྱེ། གསར་ཤོག་འདིས་མཐོ་རིམ་མི་སྣར་སྦྲེལ་ལད་དང་ལུང་ཚན་གྱི་དབྱེ་བ་མེད་པར་དུས་རབས་དང་མི་རིགས་ཤིག་གི་སྐབས་བབ་ཀྱི་བདེན་ཁ་དཔའ་སྤོབས་ཀྱིས་བརྡར་ཏེ་སྤྱི་ཚོགས་ཀྱི་གནད་དོན་ཇི་སྙེད་ཅིག་དམིགས་ཕུག་གིས་ཐེར་འདོན་དང་སྔོག་གཤེར་གྱིས་རང་དབང་གསར་ཤོག་ཅིག་གི་རིན་ཐང་དང་གཟི་བརྗིད་མངོན་ཐུབ་ཡོད་པས་མི་ཚད། བོད་ཡིག་ཀློག་པ་པོ་ཉུང་སའི་ཁོར་ཡུག་འདིར་བོད་ཡིག་གསར་ཤོག་ལ་དགའ་བའི་ཤུགས་རྐྱེན་ཆེན་པོ་ཞིག་ཐེབས་སུ་བཅུག་ཡོད་ཅིང༌། གསར་ཤོག་བཞིན་རྒྱལ་མཚམས་མེད་པར་ཆེས་བྲིན་ཆེ་བ་ཞིག་ཏུ་གྱུར་ཡོད། ལྷག་པར་བོད་ཡིག་བརྗེད་ལ་ཉེ་བའི་བོད་མི་མང་པོ་ཞིག་ལ་དངོས་ཤུགས་བརྒྱུད་གསུམ་ནས་བོད་ཡིག་གཙིགས་ཆེར་འཛིན་པའི་བླ་འབོད་གསར་བ་ཞིག་བྱས་ཤིང་མ་འོངས་པའི་གོམ་ཁ་ལེན་ཕྱོགས་ལ་རེ་བ་གསར་བ་ཞིག་ཀྱང་བསྟན་ཡོད།
མཐར་དོན་བོད་ཀྱི་དུས་བབ་གསར་ཁང་ནས་དུས་ཀྱི་དགོས་མཁོའི་གསར་འགོད་ཀྱི་ལས་དོན་རླབས་ཆེན་ཞིག་ལ་ལོ་རྒྱུས་ཀྱི་རང་བཞིན་དུ་འཇོག་འོས་བསྒྲུབས་ཐུབ་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུད་ང༌། དུས་བབ་གསར་ཁང་གི་མཛད་འཕྲིན་སྔར་བས་ཀྱང་དར་རྒྱས་ཡོང་བའི་ཤིས་སྨོན་དང་བཅས། མདོ་སྨད་དབུས་སྤྱི་ཁྱབ་རྒྱུན་ལས་ཁང་ནས་ཕྱི་ལོ་༢༠༠༧ཟླ༡་ཚེས༡༥ཉིན་ཕུལ།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
ཡིན་ནའང་། དུས་བབས་ཚང་གིས་རྩོམ་ཡིག་རིགས་གང་འདྲ་ཞིག་ཡིན་ནའང་རིས་སུ་མ་སོང་བར་འགོད་རྐྱང་གནང་རོགས་ཞུ། གོང་སྨོས་དག་ལྟར་གསར་འགྱུར་ཁང་འདི་ལ་གོང་བཀུར་དང་བཀའ་དྲིན་ཆེ་ཡང་ཞུའོ།།