ཨ་རིའི་རླུང་འཕྲིན་ཁང༌།
ཕྱི་ཟླ་༡༠ པའི་ཚེས་༡༦ སྟེ་གཟའ་མིག་དམར་ཉིན་༧གོང་ས་མཆོག་གིས་ཨ་རིའི་ཕོ་བྲང་དཀར་པོའི་ནང་སྲིད་འཛིན་བྷུ་ཤུ་དང་མཇལ་འཕྲད་གནང་རྗེས་ཨ་རིའི་རླུང་འཕྲིན་ཁང་གི་བཅར་འདྲི་དང་ལེན་གནང་བ་རེད།
དྲི་བ། ཁྱེད་རང་ཝ་་ཧྲིན་ཊོན་ལ་ཕེབས་པར་དགའ་བསུ་ཞུ་བ་དང༌། ང་ཚོས་ཁྱེད་རང་ལ་བཅར་འདྲིའི་གོ་སྐབས་ཐོབ་པར་དགའ་བོ་བྱུང༌། ཁྱེད་རང་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཐོབ་པར་རྟེན་འབྲེལ་ཞུ། ཁྱེད་རང་སྲིད་འཛིན་བྷུ་ཤུ་ལ་ད་ལྟ་རང་ཐུག་འཕྲད་གནང་བ་དང་བོད་རྒྱའི་འབྲེལ་བའི་གནད་དོན་ཐད་སྲིད་འཛིན་དང་ཁྱེད་གཉིས་ཀྱིས་གླེང་མོལ་ག་རེ་གནང་ཡོད་དམ།
ལན། ང་དང་བྷུ་ཤུ་སྲིད་འཛིན་གཉིས་ངོ་ཤེས་ཆགས་ཏེ་ལོ་མང་པོ་ཡིན་པ་དང་ནང་མི་ལྟ་བུ་ཡིན་པ་རེད། ཐེངས་འདིར་ནང་མི་ལྷན་འཛོམས་ལྟར་སྲིད་འཛིན་བྷུ་ཤུ་ལ་ཐུག་པར་དགའ་བོ་བྱུང༌། ཁོང་གིས་བོད་ཀྱི་གནད་དོན་ལ་སྔོན་མ་ནས་དོ་སྣང་ཆེན་པོ་གནང་གི་ཡོད་པ་རེད། དེར་བརྟེན་ཁོང་གིས་ང་ལ་བོད་ནང་གི་ད་ལྟའི་གནས་སྟངས་ཅི་འདྲ་ཡིན་པར་སྐད་ཆ་དྲིས་བྱུང་ལ༌། ངས་ཁོང་ལ་འགྲེལ་བརྗོད་བྱས་ཡོད། སྲིད་འཛིན་གྱི་སྐུ་ཟླས་འབར་མའི་གནད་དོན་ལ་དོ་སྣང་ཆེན་པོ་བྱེད་ཀྱི་ཡོད་པ་དང༌། ངས་འབར་མ་ནི་ནང་བའི་རྒྱལ་ཁབ་ཞིག་ཡིན་པས་སྲིད་འཛིན་གྱི་སྐུ་ཟླའི་འབར་མའི་གནས་སྟངས་ལ་དོ་སྣང་བྱས་པར་ཐུགས་རྗེ་ཆེ་ཞུས་པ་ཡིན།
དྲི་བ། ཁྱེད་ཀྱིས་འབར་མའི་གནད་དོན་སྐོར་གླེང་བ་དང༌། ང་ཚོས་ཤེས་གསལ་ལྟར་འབར་མ་ནི་ནང་པ་ཤིན་ཏུ་མང་པའི་རྒྱལ་ཁབ་ཞིག་ཡིན་ལ་ད་ལྟ་འབར་མའི་གནས་སྟངས་ཐད་རྒྱལ་སྤྱིའི་སྤྱི་ཚོགས་ཀྱིས་དོ་སྣང་ཆེན་པོ་བྱེད་ཀྱི་ཡོད་པ་རེད། ཁྱེད་རང་ནང་པའི་ཁྲོད་ཀྱི་མི་སྣ་གལ་ཆེན་ཞིག་དང༌། གུས་བརྩི་་ཆེན་པོ་བྱེད་བཞིན་པའི་འགོ་ཁྲིད་ཞིག་ཡིན་པས་རྒྱལ་སྤྱིའི་སྤྱི་ཚོགས་ཀྱིས་འབར་མའི་གནད་དོན་ཐད་ལ་གདོང་ལེན་ཇི་ལྟར་བྱེད་དགོས་སམ། འབར་མའི་དམག་དཔུང་གི་སྲིད་གཞུང་ལ་གནོན་ཤུགས་མང་ཙམ་སྤྲོད་དགོས་སམ།
ལན། གནད་དོན་འདི་ལ་ལན་འདེབས་རྒྱུ་ཤིན་ཏུ་ཁག་པོ་ཞིག་རེད། ང་རང་ཉིད་ལ་མཚོན་ན་འབར་མའི་སྲིད་གཞུང་གིས་ནང་པའི་དགེ་འདུན་པ་རྣམས་ལ་དྲག་གནོན་བྱས་པར་ཕྱོགས་གཉིས་་ཡོད་པ་རེད། ཕྱོགས་གཅིག་ནི་ནང་པའི་དགེ་འདུན་པ་རྣམས་་ཀྱིས་མང་གཙོ་རྩོད་ལེན་ཆེད་ཡིན་པ་དང༌། ཁོ་ཚོ་ལ་མཚོན་ན་མང་གཙོའི་འཚོ་བ་ནི་གལ་ཆེན་པོ་ཡིན་ལ། མི་མང་ལ་མང་གཙོའི་དགོས་འདུན་ཡོད་པ་རེད། ང་རང་གིས་སྔོན་མ་ནས་མི་མང་གི་མང་གཙོའི་དགོས་འདུན་གྱི་རེ་བ་ལ་རྒྱབ་སྐྱོར་བྱེད་ཀྱི་ཡོད། དེར་བརྟེན་ངས་འབར་མའི་མང་གཙོ་ལས་འགུལ་ལ་རྒྱབ་སྐྱོར་བྱེད་ཀྱི་ཡོད། ཕྱོགས་གཞན་གཅིག་ནས་ང་རང་ནང་པའི་དགེ་སློང་ཞིག་ཡིན་པ་དང༌། ཚང་མ་སྟོན་པ་ཤཱཀྱ་ཐུབ་པའི་རྗེས་འཇུག་པ་ཡིན་པས་ང་རང་དགེ་འདུན་པ་འདི་ཚོ་ལ་དམིགས་བསལ་བརྩེ་བ་ཡོད་པ་དང༌། ཁོ་ཚོ་ལ་གདུང་སེམས་མཉམ་བསྐྱེད་དང་ཁོ་ཚོའི་ལས་འགུལ་ལ་བསྔགས་བརྗོད་བྱེད་ཀྱི་ཡོད།
འབར་མའི་སྲིད་གཞུང་གི་འགོ་ཁྲིད་ཚོའང་ནང་པ་ཡིན་ངེས་རེད། དེར་བརྟེན་ཁོང་ཚོས་ནང་ཆོས་ཀྱི་བསླབ་བྱ་བྱམས་དང་སྙིང་རྗེ་གཞི་ལ་བཞག་ནས་གནད་དོན་ཐག་གཅོད་གནང་བར་ངས་འབོད་སྐུལ་བྱེད་ཀྱི་ཡོད། རྒྱལ་སྤྱིའི་སྤྱི་ཚོགས་ཕྱོགས་ནས་འབར་མའི་གནས་སྟངས་ལ་ཐུགས་ཁུར་ཆེན་པོ་བྱེད་ཀྱི་ཡོད་པས་ང་རང་གིས་དམིགས་བསལ་ཁ་གསབ་བྱ་རྒྱུ་མི་འདུག
དྲི་བ། པེ་ཅིང་དང་ལྷན་གྲོས་མོལ་གྱི་སྐོར་ལ། ད་ལྟ་བོད་རྒྱ་གཉིས་དབར་གྲོས་མོལ་ཐེངས་དྲུག་ལ་གནང་ཡོད་ན་ཡང་ཡར་རྒྱས་ཅི་ཡང་ཕྱིན་མེད་པ་དང༌། མི་མང་པོའི་ལྟ་ཚུལ་ལྟར་ན་པེ་ཅིང་ལ་གྲོས་མོལ་གྱི་འདོད་མོས་མེད་པར་བརྗོད། ཁྱེད་རང་ལྟར་ན་པེ་ཅིང་གིས་གྲོས་མོལ་བྱ་འདོད་མེད་པས་ལྟ་ཚུལ་དེ་ལ་དགོངས་ཚུལ་ཇི་འདྲ་ཡོད་དམ།
ལན། བོད་རྒྱའི་གྲོས་མོལ་གྱི་རྣམ་པའི་སྟེང་ནས་བལྟས་ན་ཁ་གསལ་བོའི་ཕྱོགས་སུ་འགྲོ་བཞིན་ཡོད་པའི་དེ་ནི་ཡར་རྒྱས་རེད། ལྷག་པར་དུ་གྲོས་མོལ་ཐེངས་གསུམ་པའི་སྐབས་རྒྱ་ཕྱོགས་ནས་དོགས་དྲི་མང་པོ་ཞིག་་བཏོན་པ་རེད། དེར་བརྟེན་གྲོས་མོལ་ཐེངས་བཞི་པའི་སྐབས་ཁོ་ཚོས་དོགས་འདྲི་རེ་རེ་ལ་ང་ཚོས་འགྲེལ་བརྗོད་ཞིབ་ཚགས་བྱས་ཡོད། ང་ཚོས་འདི་ནི་འགྲེལ་བརྗོད་ཀྱི་གོ་སྐབས་ཡག་ཤོས་ཤིག་ལ་ངོས་འཛིན་བྱེད་པ་ཡིན། ཐེངས་ལྔ་བའི་གྲོས་མོལ་སྐབས་ཁོ་ཚོས་ཏཱ་ལའི་བླ་མའི་བོད་རང་བཙན་རྩོད་ལེན་བྱེད་ཀྱི་མེད་པ་དེ་གསལ་བོ་ཆགས་སོང་ཅེས་བརྗོད། རྒྱ་ནག་ཕྱོགས་ནས་དེ་ངོས་ལེན་བྱེད་པ་རེད། ང་ཚོས་སྐུ་ཚབ་ཚོགས་པ་ཕྱིར་སླེབས་རྗེས་ང་ལ་གནས་ཚུལ་དེ་བརྗོད་པ་དང་ངས་བསམ་པར་མཐར་ང་ཚོ་ཕྱོགས་གཉིས་ཀྱི་ལངས་ཕྱོགས་གསལ་བོ་ཆགས་པའི་འབྲེལ་མོལ་ཞིག་བྱུང་བ་དང༌། དེ་ནི་ཡར་རྒྱས་ཡིན་པས་ང་རང་ཤིན་ཏུ་སྤྲོ་བྱུང༌། ཡིན་ནའང༌། དེའི་རྗེས་སུ་རྒྱ་ནག་ཕྱོགས་ནས་བོད་ཀྱི་སྲིད་ཇུས་ལ་དམ་དྲག་བྱེད་འགོ་བཙུགས་པ་དང༌། ཏཱ་ལའི་བླ་མ་ནི་ཁ་བྲལ་རིང་ལུགས་པ་ཞིག་ཡིན་པ་རེད་ཅེས་སྐྱོན་བརྗོད་ཀྱི་ཁྱབ་བསྒྲགས་ཤུགས་ཆེན་བྱས། གྲོས་མོལ་ཐེངས་དྲུག་པའི་སྐབས་སུ་རྒྱ་ནག་ཕྱོགས་ཀྱི་ལངས་ཕྱོགས་སྔོན་མ་ལས་ཇེ་མཁྲེགས་སུ་སོང་ཡོད་པ་རེད། དེར་བརྟེན་ང་རང་གིས་རྒྱ་ནག་ཕྱོགས་ནས་ཅི་ཕྱིར་འདི་འདྲའི་འགྱུར་བ་བྱུང་བར་ཧ་ཅང་ཤེས་རྟོགས་དཀའ་བ་རེད།
ངས་བོད་རང་བཙན་རྩོད་ཀྱི་མེད་པ་ནི་ཕལ་ཆེར་འཛམ་གླིང་གིས་ཤེས་བའི་དོན་དག་ཞིག་རེད། དེ་མ་ཟད་བོད་པའི་ཁྲོད་དུའང་ངས་བོད་ལ་བདག་ངེས་པའི་ཐོབ་ཐང་རྩོད་ལེན་བྱེད་ཀྱི་མེད་པར་སྐྱོན་བརྗོད་བྱེད་མཁན་སྔོན་མ་ནས་ཡོད་པ་དང་ད་ལྟ་སྔོན་ཆད་ལས་མང་པ་རེད། མང་པོ་ཞིག་གིས་ངས་དབུ་མའི་ལམ་གྱི་སྲིད་ཇུས་ཀྱིས་འབྲས་བུ་ཅི་འདྲ་ཞིག་ཡོང་བར་དོགས་པ་སྐྱེས་ཀྱི་ཡོད་པ་རེད།
་དེར་བརྟེན་ངས་བསམ་པར་གལ་སྲིད་ང་ཚོས་དྲང་མོའི་སྒོ་ནས་ངའི་ལངས་ཕྱོགས་བཏོན་མེད་ཚེ་བོད་མི་ནང་ཁུལ་དུ་སྐྱོན་བརྗོད་དེ་འདྲ་བྱེད་མཁན་མི་ཡོང་བ་རེད། ངས་ལངས་ཕྱོགས་ནི་རྒྱ་རིགས་ཀྱི་མདུན་ནས་དེ་ལྟར་ཡིན་པ་དང༌། ཕྱི་རྒྱལ་མི་དང་གླེང་སྐབས་ཀྱང་དེ་ལྟར་ཡིན་ལ། བོད་མི་ལ་བརྗོད་སྐབས་ཀྱང་དེ་ལྟར་ཡིན། ང་རང་བོད་ཀྱི་གཞོན་ནུ་ཚོགས་པའི་མི་དང་ཐུག་སྐབས་ངས་རང་བཙན་རྩོད་ཀྱི་མེད། ཁྱེད་ཚོས་རང་བཙན་རྩོད་ཀྱི་ཡོད་པ་རེད། ང་དང་ཁྱེད་ཚོས་ལངས་ཕྱོགས་མི་གཅིག་པ་རེད་ཅེས་བརྗོད་པ་ཡིན། དེ་འདྲའི་གནས་སྟངས་འོག་བོད་མི་མང་པོ་ཞིག་བློ་ཕམ་སྐྱེས་ཀྱི་ཡོད་པ་དང༌། འདི་ལས་ཀྱང་ང་རང་བློ་གཅིག་སེམས་གཅིག་ཡིན་པ་མཚོན་ཐུབ།
དྲི་བ། ཕྱི་ཟླ་བདུན་པའི་ནང་རྒྱ་ནག་སྲིད་གཞུང་གིས་བོད་ཀྱི་སྤྲུལ་སྐུའི་ཡང་སྲིད་ངོས་འཛིན་དོ་དམ་བྱེད་ཐབས་ཞེས་བ་ཁྱབ་བསྒྲགས་བྱས་པ་དང༌། སྤྲུལ་སྐུའི་ཡང་སྲིད་ཐད་ངེས་བར་ཏུ་ས་གནས་དང་ཀྲུང་དབྱང་སྲིད་གཞུང་གིས་ཆོག་མཆན་ཐོབ་དགོས་ཅེས་གསལ་བོར་གཏན་འཁེལ་བྱས་ཡོད་པ་རེད། དེ་ནི་རྗེས་སུ་ཏཱ་ལའི་བླ་མའི་ཡང་སྲིད་བོད་དུ་མི་བྱོན་པའི་ཆེད་དུ་ཡིན་ནམ།
ལན། ངས་རྒྱ་ནག་སྲིད་གཞུང་གིས་ཏཱ་ལའི་བླ་མ་མགྱོགས་པོ་སྐུ་གྲོངས་ལ་ཉེ་བ་རེད་ཅེས་བརྗོད་ཀྱི་ཡོད་ཚུལ་གོ་ཐོས་བྱུང་བ་དང༌། ཏཱ་ལའི་སྐུ་ཕྲེང་བཅོ་ལྔ་བའི་ཡང་སྲིད་ཀྱི་གནད་དོན་ཆེད་ཁོ་ཚོས་ཆེད་དུ་ཚོགས་འདུ་ཞིག་ཀྱང་འཚོགས་ཡོད་ཚོད་རེད། སྤྱིར་བཏང་གནད་དོན་འདི་ངས་ལོ་མང་པོའི་གོང་དུ་གསལ་བོར་བརྗོད་ཡོད། ༡༩༦༩ ལོར་ངས་ཚོགས་ར་ཞིག་གི་སྟེང་ཡོངས་ཁྱབ་ཀྱིས་ད་ལྟའི་ཏཱ་ལའི་བླ་མའི་ལམ་ལུགས་འདི་མུ་མཐུད་དུ་དགོས་ཀྱི་ཡོད་མིན་ནི་བོད་རྒྱ་ཆེ་མི་མང་གིས་ཐག་གཅོད་བྱེད་དགོས་བ་རེད་ཅེས་བརྗོད་ཡོད། ཏཱ་ལའི་བླ་མ་ནི་ལོ་རྒྱུས་ཀྱི་ཐོན་དངོས་ཤིག་ཡིན་པ་དང༌། ལོ་རྒྱུས་ཀྱི་ཆ་རྐྱེན་ངེས་ཅན་ཞིག་གི་འོག་ཏུ་གྲུབ་པ་དང༌། ལོ་རྒྱུས་ཀྱི་ཆ་རྐྱེན་ངེས་ཅན་ཞིག་གི་འོག་ཡལ་ཀྱང་སྲིད་པས། རྩ་བ་ནས་མི་འགྱུར་བ་ཞིག་མ་རེད། གལ་སྲིད་བོད་མི་མང་ཆེ་བའི་ཏཱ་ལའི་བླ་མའི་ལམ་ལུགས་འདི་མུ་མཐུད་གནས་དགོས་བ་གཟིགས་ཚེ་ཏཱ་ལའི་བླ་མ་ཅི་ལྟར་འབྱུང་བའི་ཐད་ཐབས་ལམ་མི་འདྲ་བ་ཁ་ཤས་ཡོད་པ་རེད། གཅིག་བྱས་ན་ཧཕན་དེ་ཀང་གི་བླ་ཆེན་འདེམས་པའི་འགྲོ་སྟངས་ལ་དཔེ་བལྟས་ནས་་བོད་ཀྱི་ཆོས་ལུགས་ཀྱི་དབུ་ཁྲིད་ཚོའི་ཁྲོད་ནས་གཅིག་བདམས་པ་དང༌། དེ་ནི་འབྱུང་མི་སྲིད་པ་མ་རེད། ཐམས་ལམ་གཞན་ཞིག་ནི་སྐུ་མ་གྲོངས་སྔོན་གཅིག་བདམས་ཆོག་པ་དང༌། བླ་མ་སྐུ་གྲོངས་སྐབས་མི་ཞིག་གཏན་འཁེལ་བྱས་ཏེ་དེ་ནི་ངས་ཡང་སྲིད་ཡིན་ཅེས་བརྗོད་པ་རེད། གལ་སྲིད་བོད་མི་མང་གིས་ཐག་གཅོད་བྱས་ཏེ་སྲོལ་རྒྱུན་གྱི་འགྲོ་སྟངས་ལྟར་ཡང་སྲིད་ངོས་འཛིན་དང་ཐུགས་ཐག་གཅོད་ཚེ་ཡང་སྲིད་འདེམས་དགོས་བའི་དམིགས་ཡུལ་ལ་བསམ་བློ་གཏོང་དགོས་བ་རེད། ཡང་སྲིད་འདེམས་དགོས་བའི་རྒྱུ་རྐྱེན་ནི་སྐུ་ཕྲེང་འདིས་སྒྲུབ་མ་ཚར་བའི་ལས་དོན་གྱི་མཇུག་མ་འོངས་པར་མུ་མཐུད་སྐྱོང་བའི་ཆེད་དུ་ཡིན་པ་རེད། གལ་སྲིད་སྐུ་ཕྲེང་འདིས་སྒྲུབ་མ་ཚར་བའི་ལས་དོན་ལ་བདམས་ཟིན་པའི་ཡང་སྲིད་ཀྱིས་གཏོར་བརླག་གཏོང་ཚེ་དེ་ནི་ཡང་སྲིད་ངོ་མ་ཞིག་གཏན་ནས་མིན་པ་རེད། གལ་སྲིད་ང་རང་བཙན་བྱོལ་ཁྲོད་སྐུ་འདས་ཚེ་ང་རང་གི་ཡང་སྲིད་དེ་ཡང་བོད་ཀྱི་ཕྱི་ལོགས་ནས་འབྱོན་ངེས་རེད། གནད་དོན་འདི་ངས་སྔོན་མ་ནས་གསལ་བོར་བརྗོད་ཡོད། ཡང་སྲིད་ལམ་ལུགས་འདི་ཆབ་སྲིད་རང་བཞིན་གྱི་གནད་དོན་ཞིག་མ་རེད། རྒྱ་ནག་སྲིད་གཞུང་གིས་ཡོད་ཚད་ཆབ་སྲིད་ཕྱོགས་ནས་བསམ་བློ་གཏོང་བ་ལས་ཆོས་ལུགས་ཕྱོགས་ཀྱི་རྒྱུ་རྐྱེན་ལ་བསམ་བློ་མི་གཏོང་བ་རེད།
དྲི་བ། དེ་ན་ཁྱེད་ཀྱིས་དགོངས་ཚུལ་ལྟར་ན་རྗེས་སུ་ཏཱ་ལའི་བླ་མ་གཉིས་བྱོན་རྒྱུ་ཡིན་ནམ། དཔེར་ན་ད་ལྟའི་པཎ་ཆེན་བླ་མ་གཉིས་ཡོད་པ་ལྟར།
ལན། དེ་ནི་གཏན་ཁེལ་རེད། མི་མང་པོ་ཞིག་གིས་རྒྱ་ནག་ནང་གི་པཎ་ཆེན་དེ་རྫུན་མ་རེདཅེས་་བརྗོད་ཀྱི་ཡོད་པ་དང༌། མ་འོངས་པར་ཏཱ་ལའི་བླ་མ་དེ་ཡང་ཏཱ་ལའི་བླ་མ་རྫུན་མ་རུ་འགྱུར་འགྲོ་བ་རེད།་ རྫོགས་སོ།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།