དྲི་བ། གསུམ་བཅུའི་དུས་དྲན་གྱི་གསུང་འཕྲིན་ནང་ཁྱེད་ཀྱིས་ཡང་བསྐྱར་བོད་དུ་ཕེབས་རྒྱུའི་ཐུགས་རེ་གནང་ཡོད་པ་དེ་མངོན་འགྱུར་ཐུབ་བམ།
ལན། ངས་སྔར་ནས་རྒྱ་ནག་ཏུ་གནས་གཟིགས་ལ་འགྲོ་རྒྱུ་ཡིན་བརྗོད་ཀྱི་ཡོད། ༡༩༥༤ དང་༡༩༥༥ ལོར་པེ་ཅིང་དུ་སྡོད་སྐབས་ཀྱང་རྒྱ་ནག་རི་བོ་རྩེ་ལྔ་རུ་གནས་མཇལ་ཏུ་འགྲོ་འདོད་ཡོད་སྐོར་བརྗོད་ཡོད་ལ། བོད་པ་ཚོའི་མིག་ནང་དུ་དེ་ནི་གནས་རྩ་ཆེན་ཞིག་ཡིན་པ་རེད། བོད་པ་ཚོས་བཤད་སྟངས་ནི་གལ་སྲིད་རི་བོ་རྩེ་ལྔ་ལ་འགྲོ་བ་ཡིན་ན་ཁྱེད་རང་སྤྱང་གྲུང་དང་ཤེས་རབ་ལྡན་པ་ཞིག་ཆགས་ངེས་བ་དང༌། ངའི་རེ་བ་ལ་ཡང་ང་རང་སྔར་ལས་ཤེས་རབ་ལྡན་པ་ཞིག་ཏུ་འགྱུར་རྒྱུ་དེ་ཡིན། པེ་ཅིང་དུ་ཡོད་སྐབས་གནས་མཇལ་དུ་འགྲོ་རྒྱུ་ལབ་བ་ཡིན་ལ་སྲིད་གཞུང་གིས་འགྲོ་ལམ་མི་བདེ་བར་བརྗོད་པ་དང་དེ་ཕལ་ཆེར་བདེན་པ་ཡིན་སྲིད། ༡༩༥༤ ལོ་ནས་ད་ལྟའི་བར་འབྲེལ་བ་བྱུང་མེད་པས་བརྗོད་ཐབས་མེད་པ་རེད། ད་ལྟ་ཕྱོགས་གཉིས་འབྲེལ་བ་བྱུང་བ་དང་ཐོག་མར་སྐུ་ཚབ་ཚོགས་པས་པེ་ཅིང་ལ་བརྗོད་པ་དང་དེ་ནས་ང་རང་གིས་ཡོངས་ཁྱབ་ཀྱིས་བཤད་པ་རེད།
དྲི་བ། ཁྱེད་རང་སྐུ་ཐོག་འདི་ལ་རྒྱ་ནག་རི་བོ་རྩེ་ལྔར་གནས་མཇལ་དུ་ཕེབས་ཐུབ་པའི་ཡིད་ཆེས་ཡོད་དམ།
ལན། ཡིད་ཆེས་ཆེན་པོ་ཡོད། རྒྱུ་མཚན་ནི་རྒྱ་ནག་ཡང་འགྱུར་བ་འགྲོ་བཞིན་པ་རེད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དེ་སྔར་ནས་འགྱུར་བ་འགྲོ་བཞིན་པ་དང༌། གུང་ཁྲན་ཏང་ཡང་འགྱུར་བ་འགྲོ་བཞིན་པ་རེད། ཡིན་ན་ཡང་དེ་རིང་གི་རྒྱ་ནག་གུང་ཁྲན་ཏང་ལ་མར་ཁེ་སི་ལེ་ཉིན་རིང་ལུགས་ཀྱི་བསམ་བློ་དེ་ཧ་ལམ་མེད་པ་རེད་ལ། ལོ་རབས་ལྔ་བཅུའི་སྟོད་དང་མི་འདྲ་བ་རེད། མའོ་ཙེ་ཏུང་དུས་སྐབས་སུ་གུང་ཁྲན་རིང་ལུགས་ལ་དངོས་གནས་དད་མོས་བྱེད་ཀྱི་ཡོད་ལ་ལག་ལེན་དུ་བསྟར་བར་འབད་བརྩོན་བྱེད་ཀྱི་ཡོད་པ་རེད། ད་ལྟ་དེ་ཡལ་སོང་བ་རེད། མའོ་ཙེ་ཏུང་གི་གནད་དོན་གཙོ་བོ་ནི་གཏུམ་དྲག་ཆེ་བ་དེ་རེད། ཁོང་གི་བསམ་བློའི་རང་བཞིན་ཤིན་ཏུ་དྲག་ལ་ཐབས་ལམ་བཙན་པོ་རེད། ཡིན་ན་ཡང་ཁོང་གི་ཀུན་སློང་དང་དམིགས་ཡུལ་ཡག་པོ་རེད། ང་རང་པེ་ཅིང་དུ་ཡོད་སྐབས་དམིགས་ཡུལ་ནི་གུང་ཁྲན་རིང་ལུགས་དང་ཐབས་ལམ་ནི་སྤྱི་ཚོགས་རིང་ལུགས་ཡིན་པས་ཐབས་ལམ་དང་དམིགས་ཡུལ་གཉིས་ཀ་ཡོད་པ་རེད། ད་ལྟ་སྒོར་མོ་ལ་ལྟ་བ་ལས་གཞན་དམིགས་ཡུལ་མེད་པ་རེད།
དྲི་བ། ཁྱེད་ཀྱི་དགོངས་ཚུལ་ལྟར་ན་འགལ་ཟླ་གཙོ་བོ་གང་ཡིན་པ་དང་དེ་སེལ་ཐབས་ཀྱི་ལམ་ཁ་གང་དུ་ཡོད་དམ།
ལན། ཕྱོགས་གཅིག་ནས་རྒྱ་ནག་གཞུང་གིས་བོད་ཀྱི་གནས་སྟངས་ངོ་མ་དེ་ཤེས་ཀྱི་མེད་པ་དང༌། ས་གནས་དཔོན་རིགས་ཀྱིས་གོང་ལ་ཕུལ་བའི་གནས་ཚུལ་ཚང་མ་ནི་དགའ་སྐྱིད་དང་བརྟན་ལྷིང༌། མཐུན་སྒྲིལ་ཡིན་ལ་འདི་ནི་ལོ་རབས་ལྔ་བཅུ་ནས་བཟུང་བརྗོད་བཞིན་པ་རེད། རྒྱ་ནག་རྒྱལ་ཡོངས་མི་དམངས་མཐུན་སྒྲིལ་དང་རིགས་སོ་སོའི་མི་དམངས་མཐུན་སྒྲིལ་བོད་སྐད་དུ་བརྗོད་ན་དེ་ནི་ཁ་སྟོང་ཙམ་ལས་སེམས་ནང་གི་སྐད་ཆ་མ་རེད། ང་རང་༡༩༥༤ ལོར་འཚོགས་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་ལ་ཞུགས་པ་དང༌། འཐུས་མི་ཚོས་རིགས་སོ་སོའི་མི་དམངས་མཐུན་སྒྲིལ་དང་ཁྲི་ལོ་བརྟན་པར་ཤོག་ཅེས་བརྗོད་སྐབས་ཚང་མས་ལག་པ་ཡར་འཀྱགས་པ་རེད། ཡིན་ན་ཡང་སེམས་ནང་ནས་དོན་ངོ་མའི་མཐུན་སྒྲིལ་ཡོད་པ་ཞིག་མཐོང་གི་མི་འདུག སུང་ཆིན་ལིན་དང་ང་གཉིས་རིམ་པ་གཅིག་ཡིན་པ་དང་ངེད་གཉིས་ཀྱི་རྐུབ་སྟེགས་མཉམ་གཅིག་ཏུ་ཡོད་པ་རེད། སུང་ཆིན་ལིན་གྱིས་ཀྱང་མཐུན་སྒྲིལ་ཆེན་མོ་ཁྲི་ལོ་བརྟན་པར་ཤོག་ཅེས་འབོད་ཀྱི་ཡོད་མོད་ཡིན་ན་ཡང་ཁོ་མོ་ཐང་ཆད་ཡོད་པ་མཐོང་ཐུབ། བོད་ཀྱི་ལས་བྱེད་ཚང་མས་མཐུན་སྒྲིལ་བརྗོད་ཀྱི་ཡོད་པ་རེད། ཡིན་ན་ཡང་ལས་བྱེད་ཚོ་རྡ་རམ་ས་ལར་འབྱོར་རྗེས་མི་འདོད་པའི་ཚོར་བ་ཤུགས་ཆེ་མངོན་གྱི་ཡོད་པ་རེད། ང་རང་རྒྱ་གར་ཏུ་བསྡད་ནས་ལོ་ངོ་༤༨ ཕྱིན་སོང་བ་དང༌། ང་ལ་ཐུག་འཕྲད་དུ་ཡོང་མཁན་ཞིང་པ་དང༌། འབྲོག་པ། གྲྭ་བ། ཏང་གི་ལས་བྱེད་ཡང་ཡོད་ལ། རིམ་པ་མི་འདྲ་བ་ཚང་མ་ཡོད་པ་དང་ཁ་ཤས་ཤིག་གི་གོ་གནས་ཧ་ཅང་མཐོ་པོ་རེད། ཁོ་ཚོ་ཚང་མའི་འདོད་པ་ཁེངས་ཀྱི་མེད་པ་དང་བློ་ཕམ་བྱུང་ཡོད་པ་རེད། དེ་བོད་ལ་མི་ཕན་པ་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ལ་ཡང་ཁེ་ཕན་མེད་པ་ཞིག་རེད། དེས་མཐུན་སྒྲིལ་དང་བརྟན་ལྷིང་ལ་གནོད་པ་དང༌། འཆམ་མཐུན་ལ་ཡང་ཤུགས་རྐྱེན་ཐེབས་རྒྱུ་རེད། ང་ཚོའི་བསམ་པར་བོད་མི་དམངས་ཀྱི་འདོད་བློ་ཁེངས་ཚེ་འགྲིག་སོང་བ་རེད། གལ་སྲིད་བོད་མི་དམངས་ཀྱི་འདོད་བློ་ཚིམས་ཚེ་མཐུན་སྒྲིལ་ཡང་མངོན་དུ་གྱུར་བ་དང་ཀྲུང་དབྱང་གིས་ཀྱང་དོགས་ཟོན་དང་ཞེད་སྣང་སྐྱེས་དགོས་དོན་མེད་པ་རེད།
དྲི་བ། གལ་སྲིད་བོད་རྒྱའི་གནད་དོན་མགྱོགས་པོ་སེལ་མ་ཐུབ་ཚེ་ཧོལ་རྒྱུགས་བྱེད་མཁན་རྣམས་སྔར་ལས་དྲག་ཏུ་འགྲོ་རྒྱུ་ཡིན་ནམ།
ལན། དེ་ལྟར་རྒྱུགས་ན་བོད་མི་ཚོར་དཀའ་ངལ་འཕྲད་ངེས་པ་དང༌། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཡང་ཡིད་ཆེས་མེད་པའི་གནས་སྟངས་ཤིག་འབྱུང་གི་རེད། ཞང་ཀང་ཡང་བརྟན་ལྷིང་མེད་པ་དང༌། ད་དུང་ཐེ་ཝན་དང་གྲངས་ཉུང་མི་རིགས་གཞན་དག་ཀྱང་བརྟན་ལྷིང་མེད་པ་རེད། གལ་སྲིད་བོད་ལ་དངོས་ཡོད་ཀྱི་མཐུན་སྒྲིལ་དང་འཆམ་མཐུན་མངོན་གྱུར་བྱུང་ཚེ་དེས་གྲངས་ཉུང་མི་རིགས་གཞན་དག་ལ་ཡང་ཤུགས་རྐྱེན་ཐེབས་པ་དང༌། ཞང་ཀང་ཡང་བདེ་འཇགས་དང་ཐེ་ཝན་གཅིག་གྱུར་ལ་ཡང་ཏན་ཏན་ཕན་ཐོགས་ཡོད་པ་མ་ཟད། རྒྱ་ནག་གི་རྒྱལ་སྤྱིའི་ཁྲོད་ཀྱི་སྣང་བརྙན་ཡང་ཇེ་མཐོར་འགྲོ་ངེས་རེད།
དྲི་བ། ཧོལ་རྒྱུགས་མཁན་ཁ་ཤས་ཀྱིས་ཐ་ན་ཏཱ་ལའི་བླ་མ་སྐུ་བཞུགས་ཚེ། ང་ཚོས་ཁོང་གི་དབུ་མའི་ལམ་ལ་བརྩི་བཀུར་མི་བྱེད་རང་བྱེད་རེད། གལ་སྲིད་ཁོང་མ་བཞུགས་ཚེ་ང་ཚོར་རང་དབང་ཡོད་པ་རེད་ཅེས་སྒྲོག་ཀྱི་ཡོད། ངའི་བསམ་པར་བསམ་བློ་གཏོང་སྟངས་དེ་ནི་ནོར་འཁྲུལ་རེད། ཚང་མས་གནས་ཚུལ་དེ་ལྟ་བུ་ཞིག་མི་འབྱུང་བའི་རེ་བ་བྱེད་ཀྱི་ཡོད། དེའི་རྐྱེན་གྱིས་ཁྱེད་རང་སྔ་མོ་ནས་རི་བོ་རྩེ་ལྔ་རུ་ཕེབས་རྒྱུ་དང༌། རབ་བྱུང་ན་པེ་ཅིང་གི་འགོ་ཁྲིད་ཚོ་ཡང་ཕེབས་ཚེ། ཚང་མ་སྔར་ལས་རྣམ་དཔྱོད་ལྡན་པ་དང་ཐག་གཅོད་ཀྱི་ཐབས་ལམ་ལེགས་པོ་ཞིག་བསམ་བློ་གཏོང་ཐུབ་ཀྱི་རེད།
ལན། ཐབས་ཤེས་འདི་ཤིན་ཏུ་ལེགས། སྤྱིར་བཏང་གུང་ཁྲན་ཏང་སྤྱང་པོ་མིན་པ་མ་རེད། ཤིན་ཏུ་སྤྱང་དྲགས་པ་རེད། བྱ་བ་ཅི་ཞིག་ཡིན་ན་ཡང་དོགས་པ་སྐྱེས་བཞིན་པ་རེད། དེའི་ཕྱིར་ཁོང་ཚོ་རི་བོ་རྩེ་ལྔ་ལ་ཅུང་བླུན་ལྐུག་ལྟར་སོང་ན་ལེགས། སྤྱང་ཡ་མང་དྲགས་ན་ནོར་འཁྲུལ་བཟོ་ངེས་རེད།
དྲི་བ། རྒྱ་ནག་སྲིད་གཞུང་ལ་རེ་བ་ཅི་འདྲ་ཞིག་བཟུང་ཡོད་དམ།
ལན། ཧུའུ་ཅིན་ཐོ་ཡིས་སྤྱི་ཚོགས་འཆམ་མཐུན་བརྗོད་ཀྱི་ཡོད་ལ་དེ་ནི་ཤིན་ཏུ་རླབས་ཆེན་པོ་དང༌། དུས་རབས་ཀྱི་འཕེལ་རྒྱས་དང་འཚམ་པོ་རེད། ཡིན་ན་ཡང་འཆམ་མཐུན་ཡོང་བར་ཡིད་ཆེས་དགོས་པ་དང༌། སྤྱི་ཚོགས་དེ་ལྟ་བུ་ཞིག་སྐྲུན་པར་ཕྱི་གསལ་ནང་གསལ་དང་སྨྲ་བརྗོད་ཀྱི་རང་དབང་དགོས་པ་རེད། ང་ཚོ་དང་པེ་ཅིང་སྲིད་གཞུང་བར་ཐད་ཀར་འབྲེལ་མཐུད་ཀྱི་ལམ་ཁ་ཡོད་པ་རེད། གལ་སྲིད་རྒྱ་ནག་གི་འགོ་ཁྲིད་དང་ཐད་ཀར་བཀའ་མོལ་གནང་དགོས་ཚེ་ངས་ཡི་གེ་འབྲི་ངེས་པ་དང༌། སྔོན་མ་ཏིན་ཞོ་ཕིན་ལ་ཡི་གི་བྲིས་མྱོང་ལ། ཅང་ཙེ་མིན་ལ་ཡང་ཡི་གེ་བྲིས་མྱོང༌། ཡིན་ན་ཡང་ཧུའུ་ཅིན་ཐོ་ལ་ད་དུང་ཡི་གེ་བྲིས་མེད། དགོས་མཁོ་བྱུང་ཚེ་ངས་ཡི་གེ་འབྲི་ཆོག
ས་དཀར་བཀྲ་ཤིས་ཀྱིས་བསྒྱུར།
ཏཱ་ལའི་བླ་མ་ནི་རྒྱལ་བ་ཐམས་ཅད་མཁྱེན་པ་རང་རེད།