རྒྱ་གར་གྱི་རྒྱལ་ས་ལྡི་ལི་གསར་བ་ནས་གནམ་གྲུར་བསྡད་དེ་ཆུ་ཚོད་གཅིག་དང་ཕྱེད་ཀའི་རྗེས་བྱང་ཕྱོགས་ཀྱི་གྲོང་ཁྱེར་ཇ་མོན་དུ་སླེབས་པ་དང༌། དེ་ནས་རླངས་འཁོར་ལ་བསྡད་དེ་ཆུ་ཚོད་གསུམ་འགོར་རྗེས་ལམ་ངོས་བདེ་མོ་ཞིག་གི་སྟེང་རི་བསྐོར་ནས་ཡར་བགྲོད་པ་དང༌། ཀྱག་ཀྱོག་གི་རི་ལམ་བརྒྱུད་དེ་རྒྱང་བལྟ་བྱས་དུས། ཕྱོགས་གཅིག་ནི་གཡང་གཟར་འདབས་ཀྱི་བྱང་གི་བདེ་ཐང་ཡིན་ལ། ཕྱོགས་གཅིག་ནི་དུས་བཞིར་རྩེ་མོ་གངས་ཀྱིས་གཡོགས་པའི་རི་བརྒྱུད་རེད། རི་ཚོགས་ཀྱིས་བསྐོར་བའི་དབུས་སུ་རི་གྲོང་ཞིག་མིག་ལམ་དུ་མངོན་པ་ནི་ངྷ་རམ་ས་ལ་ཡིན་པ་དང༌། བོད་ཀྱི་བསམ་བློའི་དབུ་ཁྲིད་ཏཱ་ལའི་བླ་མ་དང་ཁོང་གི་རྗེས་འབྲངས་བོད་མི་ཚོ་ཕྱི་ལོ་ ༡༩༥༩ ལོར་བོད་ནས་བྲོས་རྗེས་རྒྱ་གར་བྱང་ཕྱོགས་ཀྱི་རི་ཁུལ་འདིར་ཡོང་སྟེ་གཞིས་ཁྱིམ་གསར་བ་ཞིག་བཟུང་བ་དང༌། འདི་ནས་ལོ་ངོ་ལྔ་བཅུ་ལྷག་ལ་འཚོ་གནས་བྱས་ཡོད། ཏཱ་ལའི་བླ་མས་ཁོང་ཉིད་ཕྱེད་མར་ཁེ་སི་རིང་ལུགས་པ་ཡིན་པར་གསུངས་པ་དང༌། ཁོང་གི་ཐུགས་རེ་ནི་བོད་དེ་མིང་དོན་མཚུངས་པའི་མི་རིགས་རང་སྐྱོང་ས་ཁུལ་ངོ་མ་ཞིག་ཏུ་གྱུར་རྒྱུ་དེ་རེད།
འདི་ནི་དུས་རབས་སྔོན་མའི་ལོ་རབས་ལྔ་བཅུ་པ་སྟེ། ༼བོད་ཞི་བའི་བཅིངས་འགྲོལ༽བཏང་བ་ནས་བཟུང་མུ་མཐུད་ཞིབ་འཇུག་བྱེད་བཞིན་པའི་བརྗོད་གཞི་ཞིག་ཡིན་ལ། པེ་ཅིན་དབུས་སྲིད་གཞུང་དང་ཏཱ་ལའི་བླ་མ་ཕྱོགས་སོ་སོས་༼བོད་རང་སྐྱོང་༽ལག་ལེན་དུ་བསྟར་བཞིན་པ་དང༌། དམིགས་ཡུལ་གཅིག་པ་ཡིན་ན་ཡང་ལག་ལེན་དུ་བསྟར་བའི་ཐབས་ལམ་མི་གཅིག་པ་དང༌། ཐབས་ལམ་མི་གཅིག་རུང་མཐའ་མ་གཅིག་ཏུ་འབབ་ཐུབ་མིན་ལ་འཛམ་གླིང་གིས་དོ་སྣང་བྱེད་ཀྱི་ཡོད་པ་རེད།
ཕྱི་ལོ་༢༠༠༢ ལོ་ནས་བཟུང་ཏཱ་ལའི་བླ་མའི་སྐུ་ཚབ་དང་པེ་ཅིང་དབུས་སྲིད་གཞུང་དབར་གྲོས་མོལ་ཐེངས་ལྔ་གནང་བ་རེད། ཡིན་ན་ཡང་གྲོས་མོལ་གྱི་གྲུབ་འབྲས་ཐད་འགྲེལ་བརྗོད་བྱས་པ་ཕྱོགས་གཉིས་མི་གཅིག་པ་དང༌། བོད་ཀྱི་རང་སྲིད་རང་སྐྱོང་གི་གནད་དོན་དང་ཏཱ་བླའི་བླ་མ་ཕྱིར་རྒྱལ་ནང་དུ་ཕེབས་ཆོག་མིན་སོགས་ཀྱི་གནད་དོན་ཐད་ད་དུང་འགལ་ཟླ་ཅུང་ཆེན་པོ་གནས་ཡོད་པ་རེད། ཏཱ་ལའི་བླ་མས་༼བོད་རང་སྲིད་རང་སྐྱོང༽གི་དགོས་འདུན་འདོན་གྱི་ཡོད་ལ། པེ་ཅིང་དབུས་སྲིད་གཞུང་གིས་བོད་དེ་རང་སྲིད་རང་སྐྱོང་བྱས་ཡོད་པའི་ངོས་འཛིན་བྱེད་ཀྱི་ཡོད། ༡༩༧༩ ལོ་ནས་མགོ་བཙུགས་ཏེ་ཏཱ་ལའི་བླ་མས་བོད་རང་བཙན་དོར་བའི་དགོངས་ཚུལ་ཁྱབ་བསྒྲགས་བྱས་པ་དང༌། ད་དུང་ཚོགས་རྭ་མང་པོ་ཞིག་གི་ནང་དུ་གསུངས་ཡོད་པ་རེད། ཡིན་ན་ཡང་པེ་ཅིང་གིས་ཏཱ་ལའི་བླ་མས་ཁས་བླངས་བ་དེ་ལག་ལེན་དུ་བསྟར་བཞིན་ཡོད་པའི་ངོས་འཛིན་མི་བྱེད་པ་དང༌། ཏཱ་ལའི་བླ་མས་ཕྱོགས་གཉིས་ཀྱི་གྲོས་མོལ་ལ་ཡར་རྒྱས་བྱུང་ཡོད་པའི་ངོས་འཛིན་གནང་གི་ཡོད་མོད། ཡིན་ན་ཡང་པེ་ཅིང་ཕྱོགས་ནས་གྲོས་མོལ་ལ་དངོས་ཡོད་ཀྱི་ཡར་རྒྱས་ཅི་ཡང་བྱུང་མེད་པའི་ངོས་འཛིན་བྱེད་ཀྱི་ཡོད། ཏཱ་ལའི་བླ་མས་རྒྱལ་ནང་གི་ཧྲན་ཞིས་ཞིང་ཆེན་གྱི་རི་བོ་རྩེ་ལྔར་གནས་གཟིགས་སུ་ཕེབས་རྒྱུའི་རེ་བ་བཏོན་ཡོད་པ་དེར་པེ་ཅིང་གིས་ཡ་ལན་ཅི་ཡང་སྤྲོད་ཀྱི་མེད།
དཔྱད་བརྗོད་ཞིག་སྤེལ་ཡོད་པའི་ནང་གྲོས་མོལ་འདི་ལྟ་བུ་ནི་པེ་ཅིང་གི་རྩེད་མོའི་རིགས་ཤིག་ཡིན་པར་འདོད་ཀྱི་ཡོད། ཡིན་ན་ཡང་ཏཱ་ལའི་བླ་མས་ཨེ་ཤ་ཡའི་བདུན་རེ་གསར་དེབ་གྱི་བཅར་འདྲི་དང་ལེན་སྐབས་གསུངས་དོན། རྩེད་མོ་ཞིག་ཡིན་མིན་ད་དུང་སྐད་ཆ་བཤད་རྒྱུ་སྔ་དྲགས་པ་དང་དུས་ཚོད་ཀྱིས་ཐག་གཅོད་བྱེད་ངེས་རེད་ཅེས་གསུངས། ཁོང་གིས་སྔ་མོ་ནས་བཟུང་ངས་བོད་རྒྱའི་གནད་དོན་སེལ་བར་དབུ་མའི་ལམ་གྱི་ལྟ་བ་འཛིན་གྱི་ཡོད་པ་དང༌། སྐབས་དེར་ངས་གནས་སྟངས་ལ་བལྟས་ནས་ཐག་བཅད་པ་དང་ད་ལྟ་མུ་མཐུད་དུ་ཐག་གཅོད་འདི་རྒྱུན་འཁྱོངས་བྱེད་ཀྱི་ཡིན་ཅེས་གསུངས། ཁོང་གིས་རྒྱ་ནག་ཏུ་ཕེབས་རྒྱུ་ནི་རི་བོ་རྩེ་ལྔར་གནས་མཇལ་བྱེད་རྒྱུའི་ཐུགས་རེ་འགྲུབ་ཆེད་ཡིན་པར་བརྗོད་ལ། རི་བོ་རྩེ་ལྔ་རུ་འཕགས་མཆོག་འཇམ་པའི་དབྱངས་བཞུགས་ཡོད་ལ་བོད་བརྒྱུད་ནང་བསྟན་གྱི་གནས་མཆོག་ཁྱད་པར་ཅན་ཞིག་ཡིན་པའི་རྐྱེན་གྱིས་རེད།
ཏཱ་ལའི་བླ་མས་བོད་རང་བཙན་བརྩོད་ལེན་མི་བྱེད་པ་དང་རྒྱ་ནག་དམར་ཤོག་ལ་ངོ་རྒོལ་མི་བྱེད་རྒྱུ་ནི་ཁོང་གི་མཐའ་གཅིག་གི་ལངས་ཕྱོགས་ཡིན་པར་ནན་བརྗོད་བྱེད་ཀྱི་ཡོད་པ་དང༌། ཁོ་རང་ཐེངས་དང་པོར་ཐེ་ཝན་དུ་བསྐྱོད་སྐབས་གོ་མིན་ཏང་གི་སྲིད་འཛིན་ལེན་ཀྲན་ལ་ངས་རྒྱ་དམར་ལ་ངོ་རྒོལ་བྱེད་ཀྱི་མེད་ཅེས་གསུངས་པ་དང༌། ལེན་ཀྲན་གྱིས་ངས་རྒྱ་དམར་ལ་ངོ་རྒོལ་བྱེད་ཀྱི་ཡོད་ཅེས་བརྗོད། ཏཱ་ལའི་བླ་མས་གསར་འགོད་པར་བརྗོད་དོན་ད་ལྟ་ལེན་ཀྲན་ཡང་རྒྱ་ནག་ཏུ་བསྐྱོད་པ་རེད། ཡིན་ན་ཡང་རྒྱ་ནག་ལ་ངོ་རྒོལ་མི་བྱེད་མཁན་འགྲོ་ཐུབ་ཀྱི་མེད་པ་རེད་ཅེས་གསུངས། ཉིན་ཞིག་ཨ་རིའི་ནང་གསུང་བཤད་གནང་སྐབས་ཏཱ་ལའི་བླ་མས་ཁོ་རང་ཕྱེད་མར་ཁེ་སི་རིང་ལུགས་པ་ཞིག་དང་ཕྱེད་ནང་པ་སངས་རྒྱས་བ་ཞིག་ཡིན་པར་བརྗོད་པ་དང༌། བར་གསེང་སྐབས་ར་ཤི་ཡའི་རྒན་མོ་ཞིག་གིས་ཁོང་ལ་ཁྱེད་ཀྱིས་རང་ཉིད་མར་ཁེ་སི་རིང་ལུགས་པ་ཞིག་ཡིན་པར་བརྗོད་ཀྱི་ཡོད་དམ། དམར་ཤོག་ཚོགས་པ་དེ་གདུག་རྩུབ་ཆེན་པོ་ཡོད་པ་རེད་ཅེས་བརྗོད། ཡིན་ན་ཡང་ཏཱ་ལའི་བླ་མས་མུ་མཐུད་རང་ཉིད་ཀྱི་ལྟ་བ་རྒྱུན་འཛིན་བྱེད་པ་དང་ད་དུང་ཕྱིར་རྒྱལ་ནང་དུ་བསྐྱོད་པའི་ཐོབ་ཐང་བརྩོན་ལེན་བྱེད་ཀྱི་ཡོད་པ་རེད།
ཕྱི་ཟླ་༥ ཚེས་༢༢ ཉིན་གྱི་ཕྱི་དྲོ་ཆུ་ཚོད་དང་པོ་ཡས་མས་སུ་ཨེ་ཤ་ཡའི་བདུན་རེ་གསར་ཤོག་གི་གསར་འགོད་པ་རྒྱ་གར་བྱང་ཕྱོགས་ཀྱི་རི་ཁུལ་རྡ་རམ་ས་ལར་ཡོད་པའི་ཏཱ་ལའི་བླ་མའི་ཕོ་བྲང་དུ་འབྱོར་བ་དང་ཞིབ་བཤེར་ནན་མོ་བརྒྱུད་གཞི་ནས་ནང་དུ་འཛུལ། ས་ཕྱོགས་གང་ས་ནས་ཡོང་བའི་མགྲོན་པོ་རིམ་གྱིས་ཇེ་མང་དུ་འགྲོ་བ་དང་ཏཱ་ལའི་བླ་མས་མགྲོན་པོ་རེ་རེར་སྣེ་ལེན་གྱི་དུས་ཚོད་གང་ཐུབ་ཀྱིས་ཇེ་ཐུང་དུ་གཏོང་བ་དང་མཚམས་རེར་ད་དུང་ཞོགས་པའི་ཆུ་ཚོད་བེད་སྤྱད་དེ་འཚམས་འདྲིར་ཡོང་མཁན་ལ་སྣེ་ལེན་བྱེད་ཀྱི་ཡོད་པ་རེད། གསར་འགོད་པའི་བཅར་འདྲི་སྐབས་ཏཱ་ལའི་བླ་མས་སྐུ་ཁམས་དྭངས་ཤིང་གཏན་འཁེལ་བྱས་ཡོད་པའི་ཆུ་ཚོད་གཅིག་གི་བཅར་འདྲི་དེ་ཡང་ཆུ་ཚོད་གཉིས་དང་ཕྱེད་ཀ་རུ་ཕར་འགྱངས་བྱས། སྐབས་དེར་ཏཱ་ལའི་བླ་མས་སྔ་མོ་ནས་གཏན་འཁེལ་གནང་ཡོད་པའི་འཚམས་འདྲི་བཞི་ཕྱིར་འཐེན་བྱས། བཅར་འདྲིའི་སྐབས་ཏཱ་ལའི་བླ་མས་བོད་སྐད་ཀྱིས་ལན་བསྐྱོན་པ་དང་མཚམས་རེར་དབྱིན་སྐད་རེ་བསྐྱོན། ད་དུང་རྒྱ་སྐད་ཁ་ཤས་ཡང་བསྐྱོན། བཅར་འདྲི་མགོ་འཛུགས་སྐབས་ཏཱ་ལའི་བླ་མས་༼རྒྱ་ནག་གི་ཧན་རིགས་སྤུན་ཟླ་མང་པོ་ཞིག་གི་གནས་ཚུལ་འབྱུང་ཁུངས་ཕྱོགས་གཅིག་ཡིན་ལ་དངོས་དོན་ཐད་རྒྱུས་ལོན་བྱེད་རྒྱུ་མི་འདང་པས་ངེད་རང་ཐུགས་ཁྲལ་གནང་གི་ཡོད། དེར་བརྟེན་ཨེ་ཤ་ཡའི་བདུན་རེ་གསར་ཤོག་གིས་བཅར་འདྲི་གནང་བར་དགའ་བོ་བྱུང་༽ཅེས་གསུངས། ལོ་ངོ་མང་པོའི་རིང་བོད་ཀྱི་བསམ་བློའི་དབུ་ཁྲིད་ཡིན་པའི་ཆ་ནས་ཏཱ་ལའི་བླ་མས་འཇིག་རྟེན་ལྟ་ཚུལ་དང་འགྲོ་བ་མིའི་རིན་ཐང་གི་ལྟ་ཚུལ་དེ་རྒྱལ་སྤྱིའི་གར་སྟེགས་སྟེང་སྒྲོག་བཞིན་ཡོད་ལ། ཏཱ་ལའི་བླ་མས་རང་ཉིད་ཀྱི་ཕྲག་སྟེང་དུ་ལས་འགན་གསུམ་ཡོད་པར་བརྗོད་པ་དང༌། མིའི་རིགས་ཀྱི་ཆ་ཤས་ཤིག་ཡིན་པས་མིའི་རིགས་ལ་བདེ་སྐྱིད་བསྐྲུན་དགོས་བ་ནི་མི་རེ་རེའི་ལས་འགན་ཡིན་ལ། ཁོང་གི་ལས་འགན་དང་པོ་ནི་མིའི་རིགས་ཀྱི་སྤྱི་ཚོགས་ནང་བྱམས་སྙིང་རྗེ་ཡར་རྒྱས་གཏོང་རྒྱུ་དང༌། ད་དུང་གལ་སྲིད་མ་འོངས་པར་རྒྱ་ནག་ཏུ་ཕེབས་ཐུབ་ཚེ་འདིའི་ཕྱོགས་ལ་བྱས་རྗེས་རེ་འབུལ་ཐུབ་པའི་ཡིད་ཆེས་གནང་གི་ཡོད་པ་རེད། ལས་འགན་གཉིས་པ་ནི་འཛམ་གླིང་གི་ཆོས་ལུགས་གཙོ་བོ་ཁག་གི་བར་འཆམ་མཐུན་དང་ཕན་ཚུན་རྒྱུས་ལོན་ཡོང་བར་སྐུལ་འདེད་གནང་རྒྱུ་དེ་ཡིན། ལས་འགན་གསུམ་པ་དེ་ནི་ད་བཟོད་བོད་ཀྱི་གནད་དོན་ཡིན་ལ། བོད་མི་དམངས་ཀྱི་བདེན་དོན་འཐབ་རྩོད་ཀྱི་མགྲིན་ཚབ་པ་གནང་རྒྱུ་དེ་རེད། ལས་འགན་དང་པོ་དང་གཉིས་པ་ནི་སྐུ་ཚེ་གཅིག་གི་ལས་འགན་ཏུ་འགྱུར་བས་འཛམ་གླིང་ཡོངས་སུ་ཆོས་གསུངས་བཞིན་པ་རེད།
མར་ཁེ་སི་ནི་བཤུ་གཞོག་ལ་ངོ་རྒོལ་དང་དབུལ་ཕོངས་ལ་ཐུགས་ཁུར་གནང་བའི་འབྱོར་མེད་གྲལ་རིམ་པ་ཞིག་ཡིན་པས་དེ་ཡང་ཏཱ་ལའི་བླ་མས་འཚོལ་སྙེགས་བྱེད་ཡུལ་ཏུ་གྱུར། ཁོང་གིས་༼མར་ཁེ་སི་ཡིས་དཔལ་འབྱོར་སྟེང་ཁེ་ཕན་འཚོལ་བཞིན་པ་གཅིག་པུ་མིན་པར་ཁེ་ཕན་དེ་ཆ་སྙོམས་ཀྱིས་མི་ཡོངས་ལ་བགོ་བཤའ་བརྒྱབ་སྟེ་ཚང་མས་ཁེ་ཕན་ལོངས་སུ་སྤྱོད་པའི་ཐད་ལ་ཡང་ཐུགས་སེམས་གནང་གི་ཡོད་པ་རེད། ལག་ལེན་ཁྲོད་མཚན་ཉིད་ཀྱི་ཕྱོགས་དང་འཇིག་རྟེན་ལྟ་ཚུལ་གྱི་ཕྱོགས་ནས་མར་ཁེ་སི་ཡིས་འཇིག་རྟེན་སྐྱོབ་མཁན་གཙོ་བདག་ཞིག་མེད་པར་བརྗོད་བཞིན་པ་དེ་ནི་ནང་ཆོས་ཀྱི་ལྟ་ཚུལ་དང་གཅིག་མཚུངས་རེད་༽ཅེས་གསུངས། ཡང་ཁོང་གིས་༼མར་ཁེ་སི་གཞུང་ལུགས་ལ་འཇིག་རྟེན་ཀུན་ཁྱབ་ཀྱི་རིན་ཐང་ལྡན་ལ། ཁོང་ལ་དད་མཁན་གུང་ཁྲན་རིང་ལུགས་པ་ཚང་མ་བློ་དཀར་གཞུང་དྲང་ཅན་རེད། གལ་སྲིད་མ་རྩ་རིང་ལུགས་དང་སྤྱི་ཚོགས་རིང་ལུགས་གཉིས་བསྡུར་ཚེ་ངས་སྤྱི་ཚོགས་རིང་ལུགས་ལ་རྒྱབ་སྐྱོར་བྱེད་ངེས་ཡིན་༽ཅེས་གསུངས།
ཡོ་རོབ་ཁུལ་དུ་སྔོན་ཆད་མར་ཁེ་སིའི་ཤུགས་རྐྱེན་ཐེབས་པའི་སྤྱི་ཚོགས་དང་ཚོགས་མི་ཚོས་ཏཱ་ལའི་བླ་མའི་གསུང་བཤད་ལ་ཉན་རྗེས་ཁོང་ལ་ཕྱག་འཇུ་བྱས་པ་དང་ཏཱ་ལའི་བླ་མ་ལ་བློ་མཐུན་ཅེས་འབོད། ཏཱ་ལའི་བླ་མས་༼མར་ཁེ་སི་རིང་ལུགས་ལ་འདྲ་མཉམ་གྱི་ལྟ་བ་ཡོད་མོད། ལེ་ཉིན་རྗེས་སུ་ཆབ་སྲིད་ལ་ཁ་ཕྱོགས་པ་དང་དབང་ཤུགས་ལ་དོ་སྣང་བྱས་པས་མི་རིགས་རིང་ལུགས་ཀྱི་འདུ་ཤེས་འབྱུང་མགོ་བཙུགས་པ་རེད། ཕྱི་ལོ་༡༩༡༨ ནང་ར་ཤི་ཡ་རུ་ནང་ཁུལ་ཟིང་འཁྲུག་དང་རྙོག་དྲ་མང་པོ་ཡོད་པ་དང༌། ཟིང་འཁྲུག་ལ་ཁ་གཏད་གཅོག་ཆེད་དམ་དྲག་བྱེད་རྒྱུ་མངོན་དུ་གྱུར། དེ་ནས་དབང་ཤུགས་དྲག་པོ་སླེབས་པའི་སྒེར་སྡོམ་གྱི་མགོ་འབུས་བ་དང་རྗེས་སུ་ལམ་ལུགས་སུ་གྱུར། དམ་དྲག་འོག་མི་ཚང་མ་ལ་ཡང་དོགས་ཟོན་ཆེན་པོ་བྱེད་པ་དེ་ནི་སི་ཌ་ལིན་གྱི་དུས་རབས་རེད། འདུ་ཤེས་དེ་ལྟ་བུ་རྒྱ་ནག་གི་མའོ་ཙེ་ཏུང་དུས་རབས་སུ་ཁྱབ་པ་དང༌། མའོ་ཙེ་ཏུང་གིས་འཇིག་རྟེན་ལྟ་ཚུལ་གཙིགས་ཆེར་འཛིན། ཡིན་ན་ཡང་ཏུང་ཞོ་ཕིན་གྱི་དུས་རབས་སུ་སླེབས་རྗེས་དཔལ་འབྱོར་ལྟེ་བ་བྱས་པའི་ཡར་རྒྱས་ཤིན་ཏུ་ཕྱིན་པ་དང་ལྷན་ཏུ་སྐྱོན་ཆ་ཡང་མང་པོ་ཞིག་བྱུང༌། དཔེར་ན་དབུལ་ཕྱུག་གི་བར་ཁྱད་ལྟ་བུ་དང༌། བྱི་མི་དཀར་ནག་གང་ཡིན་རུང་ཙི་གུ་འཛིན་ཐུབ་མཁན་ནི་བྱི་མི་ཡག་པོ་རེད། ད་ལྟ་བྱི་མི་ནག་པོ་དང་ངན་པ་ཇེ་མང་རེད། གལ་སྲིད་ང་ལ་གདམས་ཀ་བྱེད་དུ་འཇུག་ཚེ་ངས་མའོ་ཙེ་ཏུང་གིས་བསམ་བློའི་ཚད་གཞི་གཙིགས་ཆེར་འཛིན་པའི་གཞུང་ལུགས་གདམས་ངེས་རེད་༽ཅེས་གསུངས།
དོན་དངོས་སུ་ཏཱ་ལའི་བླ་མས་ཡང་དུས་རབས་ཀྱི་འགྱུར་འགྲོས་ལ་ཁ་ཕྱོགས་དགོས་པའི་བཅོས་བསྒྱུར་གྱི་བསམ་བློ་གཏོང་དགོས་བ་རེད། ཁོང་གི་སྐུལ་འདེད་འོག་བཙན་བྱོལ་བོད་གཞུང་གིས་ཐད་ཀར་དམངས་གཙོའི་འོས་འདེམས་མངོན་དུ་གྱུར་བ་དང་གྲོས་ཚོགས་ཀྱི་ལམ་ལུགས་བཙུགས། ད་དུང་མུ་མཐུད་དུ་དམངས་གཙོའི་ལམ་སྲོལ་ཇེ་ལེགས་སུ་གཏོང་བཞིན་པ་རེད། སྔོན་མ་༡༩༦༩ ལོའི་གསུམ་བཅུའི་དུས་དྲན་གྱི་གསུང་བཤད་དུ་ཏཱ་ལའི་བླ་མས་ལམ་ལུགས་འདི་ངེས་པར་དུ་གནས་དགོས་མིན་ནི་བོད་མི་དམངས་ཀྱིས་ཐག་གཅོད་དགོས་ལ། གལ་སྲིད་མི་དམངས་ཀྱིས་ཏཱ་ལའི་བླ་མའི་ལམ་ལུགས་འདི་མུ་མཐུད་དུ་གནས་དགོས་པར་བདམས་ཚེ། མི་དམངས་ཀྱིས་ལམ་ལུགས་འདི་འབྱུང་སྟངས་ལ་བསམ་བློ་གཏོང་དགོས་ལ། གཅིག་བྱས་ན་ཡེ་ཤུ་བླ་ཆེན་འདེམས་བསྐོ་ལྟར་བླ་ཆེན་འདས་རྗེས་ཆོས་བདག་གཞན་པ་ཚོའི་ཁྲོད་ནས་གཅིག་འདེམས་སྲོལ་ཡོད་པ་རེད་ཅེས་གསུངས་ཡོད་པ་དང་བླ་ཆེན་གཞན་ཞིག་གིས་ཏཱ་ལའི་བླ་མས་འགན་དེ་ཁུར་ཏུ་ལེན་ཐུབ་རྒྱུ་ཡང་མངོན་འགྱུར་འབྱུང་མི་སྲིད་པ་མིན་པར་བརྗོད།
ད་ལྟ་བལྟས་ཡོང་ན་ཕ་ཡུལ་དུ་བགྲོད་པའི་ལམ་དེ་ཚུར་ཡོང་བའི་ལམ་ལས་ཀྱང་བགྲོད་དཀའ་བ་ཆགས་ཡོད་པ་རེད། ཏཱ་ལའི་བླ་མས་བྲོས་བྱོལ་དུ་ཡོང་སྐབས་ཆོག་མཆན་ཅི་ཡང་མི་དགོས་ལ་ཕྱིར་ཕེབས་ཚེ་ཆོག་མཆན་ཐོབ་དགོས་བ་རེད་ཅེས་གསུངས། ཡིན་ན་ཡང་ཁོང་གིས་ཉེ་ཆར་གྱི་གྲོས་མོལ་ཐེངས་ལྔ་བརྒྱུད་པེ་ཅིང་དང་ཐད་ཀར་འབྲེལ་བ་བྱུང་བའི་འབྲས་བུ་བཟང་ཞིང༌། ཕྱོགས་གཉིས་ཀྱིས་ཕན་ཚུན་གྱི་བསམ་བློ་གཏོང་སྟངས་རྒྱུས་ལོན་བྱུང་བ་དེས་གོམ་གང་མདུན་སྤོས་ཀྱིས་ཕྱོགས་གཉིས་ཀྱི་ལངས་ཕྱོགས་གསལ་རྟོགས་ཐུབ་པ་བྱུང་ཡོད་ཅེས་བརྗོད། ཏཱ་ལའི་བླ་མས་ཁོང་གི་སྐུ་ཚབ་ལ་པེ་ཅིང་གིས་སྣེ་ལེན་ཡག་པོ་གནང་འདུག་ལ་གྲོས་མོལ་གྱི་ཁོར་ཡུག་ཡང་ཤིན་ཏུ་ལེགས༌། ཡིན་ན་ཡང་རྒྱ་ནག་ཕྱི་སྲིད་ལས་ཁུངས་ཀྱིས་ཕྱི་ལ་སྤེལ་བའི་གཏམ་དང་ཁྱད་པར་ཆེན་པོ་ཡོད་པའི་གང་བདེན་པ་ཡིན་མིན་ཤེས་དཀའ་བ་ཞིག་རེད་ཅེས་གསུངས།
གསར་འགོད་པས་ཏུང་ཞོ་ཕིན་གྱིས་ཞང་ཀང་གི་གནད་དོན་ལྟར་བོད་རང་བཙན་མ་རྩོད་ན་ལོ་ངོ་ལྔ་བཅུ་འགྱུར་བ་མེད་པ་དང༌། ལོ་ངོ་ལྔ་བཅུ་ལ་གུང་ཁྲན་ཏང་ལ་ངོ་རྒོལ་མི་བྱེད་པ། ལོ་ངོ་ལྔ་བཅུའི་རྗེས་སུ་ཡང་འགྱུར་བ་མི་གཏོང་བ་བྱེད་ན་དོགས་པ་སེལ་ཐུབ་རྒྱུ་ཡིན་ནམ་ཅེས་དྲིས་བར། ཏཱ་ལའི་བླ་མས་གལ་སྲིད་དེ་བེད་སྤྱོད་ཡོད་ཚེ་བསམ་བློ་གཏོང་ཆོག་གི་རེད། ཡིན་ན་ཡང་ཐོག་མར་བེད་སྤྱོད་ཡོད་མེད་ཐག་གཅོད་པར་བཀའ་བློན་ཁྲི་བའི་དགོངས་ཚུལ་གསན་དགོས་བ་རེད་ཅེས་གསུངས།
ཝན་ཅ་པའོ་ཡིས་ཏཱ་ལའེ་བླ་མར་ཐུག་རྒྱུར་དཀའ་ངལ་མི་འདུག་ཟེར།