༧གོང་ས་མཆོག་གི་སྐུ་ཚབ་སྐལ་བཟང་རྒྱལ་མཚན་ལགས་ཀྱི་སྐད་ཆར་ལན་འདེབས་ལྟ་བུར། རྒྱ་ནག་གིས་ཏང་ཀྲུང་དབྱང་གིས་ཏཱ་ལའི་བླ་མའི་ཕྱོགས་ཀྱི་མི་དང་འབྲེལ་བ་བཟུང་སྟེ་སྐད་ཆ་བཤད་པ་དག་ཁ་ཞེ་གཉིས་མེད་ཡིན་ཞེས་རྒྱ་ནག་ཕྱི་སྲིད་ལས་ཁུངས་ཀྱིས་བཤད་ཡོད་པ་རེད།
༧གོང་ས་མཆོག་གི་སྐུ་ཚབ་སྐལ་བཟང་རྒྱལ་མཚན་ལགས་ཀྱིས་ཕྱི་ཚེས་ ༡༤ ཉིན་ཡུ་རོབ་གྲོས་ཚོགས་ནང་དུ་བོད་མིའི་ཕྱོགས་ནས་པེ་ཅིན་དང་མཉམ་དུ་འབྲེལ་མོལ་འདི་མུ་མཐུད་ནས་འགྲོ་བར་དོན་སྙིང་ཅི་ཡང་མཐོང་གི་མེད་ཚུལ་གསུངས་དོན། བོད་ཀྱི་གནད་དོན་འདི་ཐག་གཅོད་ཡོང་བར་པེ་ཅིན་གྱི་དབུ་ཁྲིད་ཚོར་ཆབ་སྲིད་ཀྱི་འདོད་མོས་མེད་པ་གསལ་བོ་ཡིན་སྟབས། ང་ཚོའི་ཕྱོགས་ནས་ཀྱང་འབྲེལ་མོལ་འདི་མུ་མཐུད་ནས་འགྲོ་བར་དགེ་ཕན་ཅི་ཡང་མཐོང་གི་མེད། ཡིན་ནའང་རྒྱ་ནག་གི་ཕྱོགས་ནས་ ༢༠༠༢ ལོར་མགོ་བཙུགས་པའི་འབྲེལ་མོལ་འདི་མུ་མཐུད་ནས་ཕྱིན་ན་ཕན་ཚུན་གོ་རྟོགས་ཐུབ་པར་དགེ་མཚན་ཆེ་བར་བཤད་ཀྱི་འདུག་ཅེས་གསུངས་ཡོད་པ་རེད།
ཕྱི་ཚེས་ ༡༧ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་སྐུ་ཚབ་སྐལ་བཟང་རྒྱལ་མཚན་ལགས་ཀྱི་བསྟན་དོན་དེར་ངོས་ལེན་མེད་སྐོར་བརྗོད་དོན། ཏང་ཀྲུང་དབྱང་གི་ཕྱོགས་ནས་ཏཱ་ལའི་ཕྱོགས་ཀྱི་མི་ལ་འབྲེལ་གཏུགས་བྱེད་པ་དེ་ཁ་ཞེ་གཉིས་མེད་ཡིན། ཕྱོགས་གཉིས་ཀའི་ངོས་ནས་འབྲེལ་བ་འདི་མུ་མཐུད་ནས་འགྲོ་བར་འདོད་མོས་ཡོད་སྐོར་བརྗོད་ཡོད་པ་རེད་ཅེས་བཤད་ཡོད་པ་རེད།
