ཁོང་གི་ཆིབས་སྒྱུར།

བོད་མིའི་ཆོས་སྲིད་གཉིས་ཀྱི་དབུ་ཁྲིད་༧གོང་ས་མཆོག་གིས་ཕྱི་ཚེས་ ༡༦ ཉིན་ཨ་རིའི་ཧྥེ་ལ་ཌེ་ཧྥི་ཡ་གྲོང་ཁྱེར་ནང་ཉིན་གཅིག་རིང་གི་ཆིབས་བསྒྱུར་བསྐྱངས་ཡོད་པ་དང་། ཞོར་དུ་གྲོང་ཁྱེར་དེའི་ནང་ཡོད་པའི་ཁལ་མིག་ནང་པའི་གཙུག་ལག་ཁང་ཞིག་ཏུའང་ཕེབས་ཡོད་འདུག

ཁོང་གྲོང་ཁྱེར་དེར་ཕེབས་མ་ཐག་མི་གྲངས་ ༣༠༠ ལྷག་གིས་ཕེབས་བསུ་གནང་ཡོད་པ་རེད། ཁོང་གིས་མང་ཚོགས་ལ་འཚམས་འདྲིའི་ཕྱག་བརྡ་གནང་ཞིང་སྲོལ་རྒྱུན་གྱི་ལེགས་སྐྱེས་ཁག་ཅིག་བཞེས་ཡོད་འདུག དེ་རྗེས་ཁོང་ཉིད་དགེ་འདུན་པ་ ༢༥ ཡིས་སྤོས་སྣེས་དྲངས་ཏེ་མཆོད་ཁང་དུ་ཕེབས་ཤིང་གསོལ་འདེབས་གནང་། གསོལ་འདེབས་སོགས་གྲུབ་རྗེས་༧གོང་ས་མཆོག་མཆོད་ཁང་མདུན་གྱི་བཞུགས་སྟེགས་ཤིག་གི་སྟེང་བཞུགས་ཏེ་སྐར་མ་བཅུ་ཙམ་གྱི་རིང་དགེ་འདུན་པ་ཚོར་སྐུ་རྩེད་སོགས་གནང་ནས་བཞུགས།

ཉིན་དེར་༧གོང་ས་མཆོག་གིས་ར་ཤི་ཡའི་ཁལ་མིག་གི་ནང་བའི་གཙུག་ལག་ཁང་ཞིག་ཏུ་ཆིབས་བསྒྱུར་གནང་བ་དང་། སོག་པོ་ནས་ཆད་ཡོང་བའི་མི་དམངས་བཅས་མི་གྲངས་བརྒྱ་སྐོར་ཞིག་ལ་དབྱིན་སྐད་ཀྱི་ནང་དུ་བཀའ་སློབ་གནང་། ཁོང་གིས་བོད་དང་སོག་པོ་གཉིས་ལ་ཐུན་མོང་གི་ཆ་ཅི་འདྲའི་མང་བོ་ཡོད་པ་དང་། ཁ་འདོན་དགེ་སྦྱོར་ཙམ་གྱིས་མི་འགྲིག་པར་ནང་བའི་ལྟ་གྲུབ་ལ་སློབ་གཉེར་གནང་རྒྱུ་གཙོ་བོ་ཡིན་སྐོར་གསུངས་ཡོད། གཙུག་ལག་ཁང་དེའི་ཕྱི་རོལ་ནས་ཁོང་གིས་གདུགས་སེར་པོ་ཞིག་གི་འོག་ནས་སླར་ཡང་མང་ཚོགས་ལ་གསུང་བཤད་གནང་ཡོད་པ་རེད།

༧གོང་ས་མཆོག་གིས་གྲོང་ཁྱེར་འདིར་ཐོག་མར་ ༡༩༩༠ ལོར་ཆིབས་བསྒྱུར་བསྐྱངས་ཡོད་ལ། དེའི་རྗེས་ནས་ད་བར་ཁྱོན་ཐེངས་ ༥ ལ་ཆིབས་བསྒྱུར་བསྐྱངས་ཡོད་པ་རེད། ཉིན་རྒྱབ་དུ་ཁོང་གིས་ཀིམ་མེལ་བསྟི་གནས་ཞེས་པར་ནང་ཆོས་ཀྱི་རྩ་བའི་ཉམས་ལེན་གྱི་སྐོར་ལ་གསུང་བཤད་གནང་ཡོད་ཅིང་། ཁོང་གི་གསུང་བཤད་གནང་སའི་ཚོགས་ཁང་གི་འཛིན་བྱང་ཡོངས་རྫོགས་བཙོང་ཚར་འདུག ཁོང་འདིར་མ་ཕེབས་སྔོན་དུ་ བྷེ་ཐུ་ལེམ་གྲོང་ཁྱེར་གྱི་ ལེ་ཧ་ཡེ་གཙུག་ལག་སློབ་གཉེར་ཁང་དུ་ཉིན་ལྔའི་རིང་གསུང་བཤད་གནང་ཡོད་པ་རེད། ཕྱི་ཚེས་ ༡༧ ཉིན་༧གོང་ས་མཆོག་ནེའུ་ཡོག་ཏུ་ཆིབས་བསྒྱུར་དང་། དེ་ནས་ཁོ་ལོ་ར་ཌོ་རུ་ཆིབས་བསྒྱུར་གནང་གཏན་འཕེལ་ཡོད་པ་ཅིང་། དེར་ཁོང་ལ་བརྟན་བཞུགས་ཀྱང་འབུལ་གྱི་ཡོད་པ་རེད། ཕྱི་ཚེས་ ༡༩ ནས་ ༢༤ དཅ་དུ་༧གོང་ས་མཆོག་ཝི་སི་ཁོན་སིན་མངའ་སྡེར་ཆིབས་བསྒྱུར་གནང་རྒྱུ་རེད།