ཨོ་ལིམ་པིག་སྔ་ནུབ་ཀྱི་རྒྱ་ནག

༢༠༠༨ ལོའི་ཕྱི་ཟླ་བརྒྱད་པའི་ཚེས་བརྒྱད་ལ་སྒུག་པའི་རྒྱང་བསྐྱོད་རིང་མོ་དེ་ཕལ་ཆེར་རྫོགས་ལ་ཉེ། ཨོ་ལིམ་པིག་རྩེད་འགྲན་གྱི་མཛད་སྒོ་ཚུགས་རྒྱུར་ཟླ་བ་ཧྲིལ་བོ་གཅིག་ཀྱང་མེད། ད་ནི་ཁོང་ཚོའི་རླབས་ཆེ་བའི་ངོམ་སྟོན་གྱི་སྔ་ནུབ་དེར་ང་ཚོས་རྒྱ་ནག་འདི་གང་ཞིག་ཏུ་ལངས་ཡོད་མེད་དང་། རྒྱ་ནག་གི་འཛམ་གླིང་འབྲེལ་བར་ཤུགས་རྐྱེན་ཆེ་ཞིང་ཟིང་ཆེ་བའི་ལོ་འདིའི་དོན་རྐྱེན་སྣ་ཚོགས་ཀྱི་ཁྲོད་ནས་རྒྱས་སྟོན་ཆེན་མོ་འདིས་ཆ་ཤས་ཇི་ལྟ་བུ་ཞིག་ལེན་མིན་ལ་ལྟ་བའི་དུས་ཚོད་ཡག་ཤོས་དེ་རེད།

༢༠༠༨ ལོར་རྒྱ་ནག་གིས་གློ་བུར་ཐོལ་རྒྱག་དང་། ཆག་སྒོ། བསམ་ཡུལ་ལས་འདས་པ་བཅས་རྒྱུན་ལྡན་མིན་པའི་དོན་རྐྱེན་ཁག་ཅིག་བརྒྱུད་ཚར་བ་རེད། མི་སུ་ཞིག་གིས་ཀྱང་ཕྱི་ཟླ་ ༣ དང་ ༤ པའི་ནང་ལྷ་ས་དང་མདོ་ཁམས་ས་ཁུལ་ཁག་གི་བོད་མི་རྣམས་ཀྱི་ཞེ་སྡང་གི་རྣག་ཁྲག་ཕྱིར་བརྡོལ་གི་རེད་བསམ་མེད་ལ། མ་མཐར་ཡང་རྒྱ་ནག་དབུས་གཞུང་གིས་དེ་འདྲ་ཞིག་བསམ་མེད་ཚོད་ཡིན། མི་སུ་ཞིག་གིས་ཀྱང་ཕྱི་ཟླ་  ༥ པའི་ཚེས་ ༡༢ ཉིན་རྒྱ་ནག་ལྷོ་ནུབ་ཁུལ་དུ་མི་ ༦༠༠༠༠ ལྷག་གི་ཚེ་སྲོག་ཤོར་བའི་ས་ཡོམ་འདི་འདྲ་ཞིག་ཡོང་བར་སྔོན་དཔག་བྱས་མེད།
དོན་རྐྱེན་འདི་གཉིས་ཀྱིས་གཏན་ནས་མི་འདྲ་སའི་ལམ་ཁ་གཉིས་ནས་འཐོར་སླ་བའི་དེང་རབས་ཀྱི་རྒྱ་ནག་དེ་བསྟན་ཡོད། རྒྱ་ནག་ཕྱི་ལོགས་ཀྱི་མི་མང་པོ་ཞིག་ལ་འཇིགས་སྐྲག་དང་སེམས་ཁྲལ་སྟེར་གྱིན་པའི་རྒྱ་ནག་གི་དཔལ་འབྱོར་ཡར་རྒྱས་ཀྱི་ནུས་ཤུགས་འདིའི་གཏིང་དུ་ཉམ་ཞན་དང་དཀའ་རྙོག་གིས་ཁེངས་འདུག་ཅིང་། བོད་ནང་གི་ངོ་རྒོལ་དེས་ད་ལྟའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ས་ཁྱོན་ནང་ཡོད་པའི་མི་རིགས་མི་འདྲ་བ་འདི་དག་ལ་ལོ་རྒྱུས་དང་ཆབ་སྲིད་ཀྱི་གནས་རིམ་མི་འདྲ་བ་ནས་སྐད་འབོད་ཀྱི་རྣམ་འགྱུར་སྟོན་ཆོག་ཆོག་ལྟ་བུའི་ཆིངས་དོན་ཁག་པོ་དག་གི་འོག་ཡོད་པ་བསྟན་ཡོད།

ལོ་རྒྱུས་ཀྱི་འཁོར་ལོ།

༡༩༤༩ ལོར་གྲུབ་པའི་དེང་རབས་ཀྱི་རྒྱ་ནག་འདི་ནི་སྔོན་མའི་རྒྱ་ནག་གི་མིང་འཛིན་མཁན་དག་གི་གྲིབ་ནག་ཅིག་གིས་གཡོགས་ཡོད་ལ། དེ་དག་སྡོམ་ནས་ད་ལྟའི་འདི་དང་བསྡུར་ན་ཆེ་ཆུང་དང་མི་རིགས་མཉམ་འདྲེས། བརྟན་ལྷིང་བཅས་ཕྱོགས་ཀུན་ནས་རྦད་དེ་ཐ་དད་ཡིན། རྒྱ་ནག་དེ་དག་གིས་གཏིང་ཟབ་པའི་ཕྱིར་དྲན་གྱི་ཤུལ་རྗེས་རེ་བཞག་ཡོད་ཅིང་། བོད་ནི་དེ་དག་གི་ནང་ནས་ཆེས་གཏན་འཇགས་རང་བཞིན་དེ་ཡིན། ཞིན་ཅང་དང་ནང་སོག ཐ་ན་ཡུན་ནན་དང་ད་དུང་མངའ་སྡེ་གཞན་པ་མང་པོ་ཞིག་ནི་མངོན་གསལ་དོད་པོའི་གྲས་ཡིན་པ་མ་ཟད། ལོ་རྒྱུས་མི་གཅིག་པ་དང་སྣ་འདུས་རང་བཞིན་གྱི་གྲགས་མགོ་ཆེ་བའི་རིགས་ཡིན། བོད་མི་འདུས་སྡོད་ཀྱི་ས་ཁུལ་ཁག་ནས་ངོ་རྒོལ་དོན་རྐྱེན་བྱུང་བ་ནི་རྒྱ་ནག་གི་ཕྱི་ནང་གཉིས་ཀར་ཡོད་པའི་མི་རྣམས་ལ་དེང་རབས་རྒྱལ་ཁབ་འདིའི་གཅིག་གྱུར་ལ་གོ་བ་ཡངས་མོ་རེ་ལེན་པ་ནི་རང་རང་གི་ཉེན་ཁ་ཡིན་པའི་དྲན་སྐུལ་རྣོན་པོ་ཞིག་ཡིན། འདས་པའི་སྟོང་ལོ་གཉིས་རིང་གི་རྒྱ་ནག་གི་གོང་མའི་རྒྱལ་བརྒྱུད་དག་གི་ལོ་རྒྱུས་ནི་འཐོར་ཞིག་དང་གྱེས་བྲལ་གྱི་བརྒྱུད་རིམ་ཞིག་ཡིན་ལ། མཐའ་མ་དེར་གཅིག་སྡུད་དང་བཙན་དབང་གི་རིམ་པར་སླེབས་པ་རེད། ལོ་རྒྱུས་འདི་ཁུ་སིམ་པོའི་ངང་ནས་ཡོང་སྲིད། འོན་ཀྱང་འདི་ཐག་རིང་ལ་ནམ་ཡང་འགྲོ་མི་སྲིད། པེ་ཅིན་གྱི་མི་རབས་མཐའ་མའི་མགོ་ཁྲིད་དག་གིས་བོད་ནང་གི་དཀའ་རྙོག་ལ་རྣམ་འགྱུར་སྟོན་སྟངས་དེས། རྒྱ་ནག་གིས་རྒྱལ་ཁབ་གཅིག་གྱུར་གྱི་གནད་དོན་ཐག་གཅོད་པའི་དོན་དུ་ཞི་འགྲིག་བྱེད་པ་ནི་ཁོང་ཚོའི་ལས་སྐལ་དུ་གྱུར་མེད་པ་དེ་ཡིན།
ས་ཡོམ་དེས་རྙོག་འཛིང་གི་གནད་དོན་དེ་བས་མང་བ་དག་བསླངས། རྒྱ་ནག་ལ་མཚོན་ན་རང་བྱུང་གནོད་འཚེའི་གོད་ཆག་གི་ལོ་རྒྱུས་ནི་རྒྱུན་རིང་པོ་དང་ཡ་ང་བ་ཞིག་ཡིན། མིན་རྒྱལ་རབས་ ༼༡༣༦༨ ནས་ ༡༦༤༤༽ སྐབས་ཀྱི་ས་ཡོམ་གྱིས་གྲོང་ཁྱེར་དང་མངའ་ཁུལ་ཚང་མ་གཏོར་ཞིང་། མི་ཁྲི་སྐོར་མང་པོ་བསད་མྱོང་། ཆུ་ལོགས་ཀྱིས་བསྣུབས་པའི་གོད་ཆག་ནི་དེ་ལས་སྡུག རྨ་ཆུ་ཡིས་དུས་རབས་མང་པོར་ཁོང་ཚོའི་ཡུལ་སྡེ་མང་པོ་ཁུར་ཞིང་བསྣུབས་པར་བརྟེན་ཐ་ན་རྒྱ་ནག་གི་སྡུག་བསྔལ་ཞེས་མིང་བཏགས་ཡོད། ཞི་བདེ་རྒྱ་མཚོའི་ནུབ་ཕྱོགས་དང་ཧིན་རྡུ་རྒྱ་མཚོ་ནས་ཡོང་བའི་ཆར་རླུང་སྟེ། རྒྱ་ནག་གིས་ཐའེ་ཧྥིན་ཞེས་འབོད་པ་དེ་དང་། ཐན་པ། མཚོ་རླབས་སོགས་ནི་ཁོང་ཚོའི་གཤེད་མ་དག་ཡིན། དོན་རྐྱེན་འདི་དག་གི་སྐབས་ཀྱི་ཆབ་སྲིད་ཀྱི་འགྲོ་སྟངས་ནི་མཚམས་རེར་འཁྲབ་གཞུང་ལྟ་བུར་འགྱུར་ལ། རྒྱལ་ཁང་དང་སྲིད་གཞུང་དེ་དག་མིའི་ཕར་རྒོལ་གྱིས་བསྣུབས་པ་མིན་པར། རང་བྱུང་གནོད་འཚེ་ལ་བརྟེན་ནས་མཇུག་སྒྲིལ་གི་ཡོད།

ལྷ་མེད་སྨྲ་མཁན་རྒྱ་ནག་དབུས་གཞུང་ནི་མི་སྒེར་བ་ཞིག་ཡིན་པའི་དབང་དུ་བཏང་ན་རྗེས་དཔག་རིང་ལུགས་ཀྱི་ཚན་རིག་པ་ཞིག་ཡིན་ལ། འདིས་རྨོངས་དད་དང་གྲུབ་མཐའ་འཛིན་མཁན་དག་ལ་ནུས་པ་ཡོད་པའི་ངོ་རྒོལ་གྱི་ལས་འགུལ་སྤེལ་བའི་རྒྱབ་སྐྱོར་བྱེད་ཀྱིན་ཡོད། ཡིན་ནའང་དྲི་བ་ཞིག་ཡོད་པ་ནི། ཁོང་ཚོའི་ལས་འགུལ་དེ་གང་བར་དུ་སླེབས་གི་རེད། ཡང་ན། དེ་རིང་གི་རྒྱ་ནག་གི་མི་འབོར་འདིའི་སེམས་ཁམས་ལ་སྙོབས་གི་རེད་དམ་མ་རེད། མི་དང་རང་བྱུང་གང་གིས་རྐྱེན་བྱས་རུང་ཉེ་ལམ་གྱི་གོད་ཆག་དེ་དག་ནི་མི་མང་པོ་ཞིག་གིས་རྟགས་དང་ལྟས་ངན་པ་ཞིག་ལ་ཚོར་ཡོད། ཆབ་སྲིད་རྒྱུན་ལས་ཀྱི་ཚོགས་མི་ཚོས་གོ་སྐབས་འདིར་བརྟེན་ནས་རང་གི་ནུས་ཤུགས་ཕྱི་ལ་སྟོན་པའི་ལས་འཆར་རེ་རྩོམ་སྲིད་པ་རེད། འོན་ཀྱང་། ལམ་ཁ་མང་པོ་ཞིག་ཏུ་ཁོང་ཚོས་ཆབ་སྲིད་ཀྱི་ཉི་མ་རེ་རེ་དེ་རང་གི་མཐའ་མཇུག་གི་ཉི་མ་རེ་རེ་ཡིན་པ་ལྟར་སྐྱེལ་དགོས་པ་རེད། དེ་མིན་ན་སྲིད་བློན་ཝན་ཅ་པོ་ཡིས་ཁོ་རང་འཛམ་གླིང་སྟེང་སེམས་ཁྲལ་ཆེ་ཤོས་ཀྱི་སྲིད་བློན་དེ་ཡིན་ཅེས་ཁ་ཁོག་དྲང་པོའི་སྒོ་ནས་ག་ལ་བཤད་གི་རེད། ཁོང་ལ་སེམས་ཁྲལ་ཡོད་ཅེས་པ་བདེན་པ་རེད། ཁོང་ལ་སེམས་ཁྲལ་བྱེད་ས་མང་པོ་ཡོད་པ་རེད།

གོ་ལ་རང་བཞིན་གྱི་འཇིགས་སྐུལ།

རྗོན་ཁེ་ཡིས་རྒྱ་ནག་སྐོར་གྱི་ལོ་རྒྱུས་ཤིག་བྲིས་པའི་ནང་བསྟན་པ་ལྟར། དུས་རབས་བཅུ་གཅིག་པ་སྟེ། སུང་རྒྱལ་རབས་ཀྱི་མཇུག་ཏུ་སྲིད་དབང་སྒེར་གཅོད་རིང་ལུགས་གཏོར་ཏེ་སྲིད་དོན་གྱི་ཚོགས་པ་རྩ་འཛུགས་དང་བཅོས་བསྒྱུར་སྒོ་འབྱེད་ཀྱི་བསམ་བློ་ཞིག་ཁྱེར་ཡོང་ཡོད་ལ། སྐབས་དེའི་ཤེས་ཡོན་པ་མིང་ལ་ཆུའུ་ཡེན་ཞུག་ཅེས་པ་དེས་གོང་མ་ལ་སྲིད་དོན་ཚོགས་པ་དང་སྐྱིད་སྡུག་གི་རྩ་འཛུགས་ཡོང་ཆོག་པའི་དགོངས་སྐོར་ཞུས་ནའང་། ཁོའི་བསམ་ཚུལ་དེ་དང་ལེན་བྱས་མེད་པ་རེད། རྒྱ་ནག་གི་རྒྱལ་རབས་ལོ་རྒྱུས་ལ་མཁས་པའི་དེང་རབས་ཀྱི་ཤེས་ཡོན་པ་ཞིག་གིས་བཤད་དོན། རྒྱ་ནག་གིས་ད་དུང་ཡང་དུས་རབས་བཅུ་གཅིག་པའི་སྐབས་ཀྱི་སྲིད་དོན་གྱི་ནོར་འཛོལ་དེ་རྒྱུན་འཛིན་བྱས་ཡོད་པ་རེད་ཟེར།
འདིས་བསྟན་པ་ནི། རྒྱ་ནག་གི་ཐག་མ་ཆོད་ཅིང་གཏིང་ཟབ་པའི་དཀའ་རྙོག་གི་སྣང་ཚུལ་དེ་དག་ ༢༠༠༨ ལོ་ལའང་རྙེད་རྒྱུ་ཡོད་ལ། འདི་ཤེས་པར་བརྟེན་ནས་དོན་རྐྱེན་གང་ཡིན་རུང་དེ་དཔྱད་ཞིབ་ཀྱི་ཡུལ་དུ་འཇོག་པ་དང་། དོ་མཉམ་པའི་ཚད་གཞི་ཞིག་གི་སྟེང་ནས་དེ་དག་ལ་འགྲེལ་བཤད་རྒྱག་ཐུབ་རྒྱུ་དེ་རེད།

ཆུའུ་ཡེན་ཞུག་གིས་བཏོན་པའི་བསམ་ཚུལ་དེ་ངོས་ལེན་མ་བྱས་པའི་གནོང་འགྱོད་དེ་རྗེས་ནས་ཚོར་ཡོད་ཚོད་ལྟར། རྒྱ་ནག་གི་མི་སེར་དང་པོད་ཁུག་འབྲི་མཁན་དག་གིས་གཞུང་དང་ལས་ཁུངས་ཁག་གི་ལྐོག་ཟ་རུལ་སུངས་སོགས་ལ་འཁང་ར་དང་ཁོང་ཁྲོའི་རྣམ་འགྱུར་སྟོན་བཞིན་པ་ནི། འཛམ་གླིང་ཡུལ་གྲུ་གཞན་དག་གི་གནས་སྟངས་དང་གཅིག་མཚུངས་ཆགས་ཡོད་པ་རེད། ཨ་རི་དང་རྒྱ་གར། ཡུ་རོབ། དབུས་ཤར། རྒྱ་ནག་བཅས་ཀྱི་མང་ཚོགས་ཚང་མར་ང་ཚོའི་སྲིད་དོན་པ་དག་གིས་སུན་སྣང་དང་ཁོང་ཁྲོ་བསླངས་ཡོད་པ་རེད། ལྷག་པར་དུ་འདི་ལྟའི་དཔལ་འབྱོར་མར་འགྲིབ་ཀྱི་ཁ་ཐུག་ལ་ང་ཚོས་ཁོང་ཚོར་བཟོད་སྒོམ་བྱེད་མི་ཐུབ་པ་དང་། དོན་དག་སླ་ཤོས་ཀྱི་རིགས་ཀྱང་སེལ་མི་ཐུབ་པའི་གནས་སྟངས་འདིར་ཁོང་ཁྲོ་ལངས་ཀྱིན་ཡོད། གལ་སྲིད་རྒྱ་ནག་གི་འདས་པ་དང་ད་ལྟ་གཉིས་བརྒྱུད་ལམ་སྣ་མང་ཞིག་ནས་མཐུད་ཐུབ་ཀྱི་ཡོད་ན། གོ་བ་གཅིག་མཚུངས་ལྟར་ད་ལྟའི་རྒྱ་ནག་གི་གནས་སྟངས་འདི་འཛམ་གླིང་ཡོངས་ལ་མཐུད་ཐུབ་ཀྱི་ཡོད།

འདི་ལ་གོ་ལ་རང་བཞིན་གྱི་མཐོང་ཚུལ་ཞེས་བཏགས་ཆོག་པར་འདོད་ལ། འདིའང་ཨོ་ལིམ་པིག་སྔ་ནུབ་ཀྱི་དངོས་ཡོད་གནས་ཚུལ་དག་གི་ཆ་ཤས་ཤིག་ཏུ་གྱུར་ཡོད། གལ་སྲིད་མི་རྣམས་ཀྱིས་ཉམས་མྱོང་འདིས་ང་ཚོ་ཁ་བཀར་བ་ལས་ཀྱང་ཅི་ཙམ་ཞིག་མཉམ་དུ་བསྡམས་ཡོད་པ་གོ་རྟོགས་ཐུབ་ཚེ། ཨོ་ལིམ་པིག་རྩེད་འགྲན་གྱི་འབོད་ཚིག འཛམ་གླིང་གཅིག རྨི་ལམ་གཅིག ཅེས་པ་འདིས་ཁོའི་རང་སྟེང་གི་དངོས་ཡོད་དེ་མངོན་འགྱུར་ཡོང་བར་རྩོམ་གི་རེད། ད་ནི་ང་ཚོའི་མིག་ཐོག་ལ་ཤར་ལ་ཉེ་ཞིང་། རྒྱ་ནག་གི་ལོ་འདི་དེ་བས་ཀྱང་ཤེས་འདོད་ཆེན་པོ་དང་སྔར་བས་ཀྱང་གོ་ལ་རང་བཞིན། ལྷག་པར་དུ་ཡ་མཚན་ཞིག་ཏུ་འགྱུར་མགོ་རྩོམ་གི་ཡོད།

ཁེ་རེ་ བྷུ་རོན། ཧིམ་བུས་བསྒྱུར།