ངྷ་སའི་དོགས་ཟོན།

པེ་ཅིན་གྱི་ཨོ་ལིམ་པིག་རྩེད་འགྲན་ཚུགས་རྒྱུར་བདུན་ཕྲག་གཉིས་ལས་མེད་པའི་སྐབས་འདིར། རྒྱ་ནག་གིས་པེ་ཅིན་ཙམ་མིན་པར་བོད་དང་ཞིན་ཅང་གི་ས་ཁུལ་བཅས་གང་སར་དམ་དྲག་བྱེད་ཀྱིན་ཡོད་ལ། བཞུགས་སྒར་ངྷ་སར་ཡང་བདེ་དོན་ལས་ཁུངས་ཀྱིས་མང་ཚོགས་ལ་བཀའ་ཁྱབ་བཏང་སྟེ། དགོང་མོ་ཆུ་ཚོད་ ༩ པའི་རྗེས་སུ་ཁྲོམ་ནས་མ་འཁྱམ་ཅེས་བཤད་ཡོད་པ་རེད།

གསང་བའི་ལས་ཁུངས་ནས། པེ་ཅིན་ཨོ་ལིམ་པིག་གི་སྔ་ཕྱི་འདིར་བོད་མི་གནས་སྡོད་བྱས་ཡོད་པའི་ས་གནས་གང་སར། བདེ་འཇགས་ཀྱི་ཐད་ལ་གཟབ་གཟབ་བྱེད་དགོས་པ་དང༌། ལྷག་པར་དུ་༧གོང་ས་མཆོག་གཞུགས་སའི་རྡ་རམ་ས་ལའི་བདེ་འཇགས་ལ་ཉེན་བརྡ་བཏང་ཡོད་འདུག

ཚེས་ ༢༡ ནས་བཟུང་བདེ་སྲུང་གིས་ཆུ་ཚོད་ ༢༤ རིང་རྡ་སའི་སྲང་བར་དུ་སྐོར་བསྐྱོད་བྱེད་རྒྱུ་མགོ་བརྩམས་ཡོད་ལ། ཟླ་༨ཚེས་༡ནས་བཟུང་བདེ་སྲུང་གིས་ཀྱང་རྡ་སར་མཚན་སྲུང་འཇོག་རྒྱུ་ཡིན་འདུག གནད་དོན་འདིའི་སྒང་ལ་བདེ་དོན་སྐུ་ངོ་ཚེ་རིང་ཕུན་ཚོགས་ལགས་ལ་བཀའ་འདྲི་ཞུས་སྐབས་ཁོང་གིས་གསུངས་དོན། དེ་ནི་གསང་བའི་ལས་ཁུངས་ནས་བདེ་སྲུང་བཀའ་བློན་ལགས་ལ། ཨོ་ལིམ་པིག་གི་སྔ་ཕྱི་འདིར་རྒྱ་ནག་གིས་འདི་སར་བཏང་ཡོད་པའི་ཉུལ་མ་དང༌། དོལ་རྒྱལ་ཤོག་ཁག་སོགས་ཀྱིས་༧གོང་ས་མཆོག་གི་མཛད་འཕྲིན་ལ་བར་ཆད་དང༌། བོད་དང་རྒྱ་གར་ཡུལ་མིའི་བར་དུ་རྙོག་དྲ་སློང་རྒྱུ་སོགས་ཀྱི་བྱེད་ལས་འདྲ་མིན་གྱི་གནས་ཚུལ་བྱུང་ངེས་པར་གཟབ་གཟབ་བྱེད་དགོས་པའི་བརྡ་འཕྲིན་འབྱོར་པ་གཞིར་བཟུང༌། ཚེས་ ༡༡ ཉིན་བདེ་སྲུང་བཀའ་བློན་གྱིས་གངས་རཱ་རྫོང་ཁོངས་དུ་ཡོད་པའི་བོད་མིའི་ཚོགས་སྡེ་ཁག་གི་འགན་འཛིན་ ༤༢ མཉམ་འཛོམས་ཀྱིས། གོང་གི་གནད་དོན་དེའི་སྐོར་ལ་གང་གཟབ་དགོས་པའི་བཀའ་གནང་ཡོད་པ་རེད། དེ་བཞིན་དུ་རྡ་སའི་གླ་གཏོང་རླངས་འཁོར་གྱི་ཚོགས་པར་ཡང་དོན་དེ་ལ་ཐུགས་སྣང་གནང་དགོས་པའི་འབོད་སྐུལ་ཞུས་ཡོད་པ་དང༌། འདི་གའི་ཉེན་རྟོག་པ་ཚོར་ཡང་གནད་དོན་དེ་སྙན་སེང་ཞུས་ཡོད་པ་རེད། ང་ཚོའི་བདེ་དོན་ནས་ཀྱང་རྡ་སར་མཚན་སྲུང་གི་འགན་ཁུར་ཐུབ་པའི་མི་བཞི་ཆེད་དུ་འདེམས་སྒྲིག་བྱེད་བཞིན་ཡོད་ལ། ཚེས་༡ནས་མགོ་རྩོམ་རྒྱུ་ཡིན། ཞེས་་གསུངས་བྱུང༌། ཡང་ཁོང་གིས་མུ་མཐུད་དུ་གསུངས་དོན། སྤྱིར་བཏང་སྔོན་མ་ནས་རྡ་སའི་མགྲོན་ཁང་སོགས་སུ་བོད་མི་སུ་ཞིག་གནས་སྡོད་བྱེད་ཚེ་གང་ནས་ཡོང་བ་དང༌། གང་དུ་འགྲོ་མིན་གྱི་འགེངས་ཤོག་ཞིག་དང། རང་བཙན་ལག་དེབ་ངོ་བཤུས་སོགས་བདག་དམ་བྱེད་དགོས་པའི་སྒྲིག་ལམ་ལྟ་བུ་ཞིག་ཡོད་ཀྱང༌། བོད་མི་ཚོས་དེ་ལ་ཞེ་དྲག་དོ་སྣང་བྱེད་ཀྱིན་ཡོད་པ་མ་རེད། ད་རེས་ཡང་བསྐྱར་ང་ཚོས་འགེངས་ཤོག་དེ་ཚོགས་སྡེ་སོ་སོའི་འགན་འཛིན་ཚོའི་ལག་ཏུ་བཞག་ཡོད་ལ་དེ་ནང་བཞིན་ལག་ལེན་བསྟར་བའི་རེ་བ་ཡོད། ཞེས་གསུངས་བྱུང༌།

ཁ་ཉིན་ཚེས་ ༡༢ ཉིན་བཀའ་བློན་ཟམ་གདོང་རིན་པོ་ཆེ་མཆོག་གིས། རང་གཞུང་གི་ལས་བྱེད་ཡོངས་ཀྱི་ཚོགས་འདུའི་ཐོག་གསུང་བཤད་གནང་ཡོད་ལ། ཚོགས་འདུ་དེ་ཡང་ཧ་ཅང་གསང་བའིངང་ཚོགས་ཏེ་གསར་འགོད་པ་སོགས་ཕྱི་མི་སུ་ལ་ཡང་གནས་ཚུལ་དེ་ཤེས་རྟོགས་བྱུང་དུ་བཅུག་མེད། དེ་བཞིན་ཐོག་མར་བོད་མིའི་བདེ་འཇགས་དང་འབྲེལ་བ་ཡོད་པའི་གནད་དོན་འདིའི་སྐོར་གཞུང་མང་ཛ་དྲག་ཚོགས་ཆུང་གིས་རེ་ཞིག་གསང་བ་བྱས་ཡོད་པའི་གནས་ཚུལ་གྱི་སྐོར་ལ་བཀའ་འདྲི་ཞུས་སྐབས་ཁོང་གིས་གསུངས་དོན། བཀའ་འཁྲི་མཆོག་གིས་ལས་བྱེད་ཚོར་ཚོགས་འདུའི་ཐོག་ནས་གསུངས་བཤད་གནང་སྐབས། ་གནད་དོན་གཙོ་བོ་གཉིས་ཀྱི་ཐོག་ཡིན་ལ། གཅིག་ནི་ལས་བྱེད་ཚོའི་ཟླ་ཕོགས་ཀྱི་སྐོར་དང༌། དེ་ནས་ད་ཐེངས་ཀྱི་གནད་དོན་འདིའི་སྐོར་རེད། ཁོང་གིས་ལས་བྱེད་ཚོས་ནམ་རྒྱུན་མིག་གཉིས་བེད་སྤྱོད་གཏོང་གིན་ཡོད་ཀྱང༌། ཕྱིན་ཆད་མདུན་རྒྱབ་གཉིས་ནས་མིག་བཞི་བེད་སྤྱོད་གཏོང་དགོས་པའི་འབོད་སྐུལ་ཞུས་སོང༌། དེ་བཞིན་ང་ཚོའི་གཞུང་མང་ཛ་དྲག་ཚོགས་ཆུང་གིས་ཀྱང༌། གནད་དོན་འདིའི་སྐོར་རེ་ཞིག་གསང་བའི་སྒོ་ནས་གནས་ཚུལ་མཁོ་སྤྲོད་བྱེད་ཐབས་ལྟ་བུ་ཞིག་བྱས་ཀྱང༌། གསང་བའི་སྒོ་ནས་ལས་འགུལ་ལམ་ཡང་ན་གནད་དོན་འདིར་ནུས་པ་ཆེན་པོ་འདོན་མི་ཐུབ་པར་དགོངས་ཏེ། སླར་ཡང་ཚེས་༢༣ཉིན་གཞུང་མང་ཛ་དྲག་ཚོགས་ཆུང་གི་ཚོགས་འདུ་ཞིག་སྐོངས་ཏེ་ཡོངས་ཁྱབ་གསལ་བསྒྲགས་ལྟ་བུ་བྱས་ཡོད་པ་རེད། ཅེས་གསུངས་བྱུང༌།

ངྷ་ས་བདེ་དོན་ལས་ཁུངས་ཀྱིས་མང་ཚོགས་ལ་བརྗོད་དོན། ད་སྐབས་ཨོ་ལིམ་པིག་ལ་སླེབས་ཉེར་ཡོད་སྐབས་འདིར་རྒྱ་ནག་གིས་བཞུགས་སྒར་ཁུལ་དུ་སོ་པ་དང་མྱུལ་མ་བཏང་ཡོད་ཚོད་འདུག་སྟབས། དགོང་མོ་འཕྱི་བོར་སྤྱི་ཚོགས་ནང་ཟིང་ཆ་སློང་གཞིའི་ལས་ཀ་རྩོམ་མི་སྲིད་པ་མིན་སྟབས། ལྷག་པར་དུ་ཕོ་གསར་ཚོ་དགོང་མོ་ཆུ་ཚོད་དགུ་བའི་རྗེས་ནས་ཁྲོམ་ལ་མ་འཁྱམ་ཅེས་གདམས་ཡོད་པ་རེད།

ཨ་རིའི་གྲོས་ཚོགས་ནང་དུ་པེ་ཅིན་གྱི་མགོ་ཁྲིད་ཚོས་ཨོ་ལིམ་པིག་རྩེད་འགྲན་གྱི་སྲོལ་རྒྱུན་རང་དབང་དང་གུ་ཡངས་ཀྱི་ཁོར་ཡུག་ཅིག་ནས་ཚུགས་དགོས་པའི་གླེང་སློང་བྱེད་ཀྱིན་ཡོད་ལ། ཕྱི་ཚེས་ ༢༣ ཉིན་པེ་ཅིན་གྱི་མགོ་ཁྲིད་ཚོས་པེ་ཅིན་གྱི་གླིང་ཀའི་ས་ཚིགས་གསུམ་ནས་མི་དམངས་ཀྱིས་ངོ་རྒོལ་བྱས་ཆོག་ཚུལ་བཤད་ཡོད། འདི་ནི་པེ་ཅིན་གྱིས་རྒྱལ་སྤྱིའི་སྟེང་ལ་ཨོ་ལིམ་པིག་འདི་རང་དབང་དང་གུ་ཡངས་ཀྱི་རྣམ་པའི་ཐོག་ཚུགས་ཀྱི་ཡོད་སྐོར་སྟོན་བྱེད་ཀྱི་འཁྲབ་སྟོན་ཞིག་ཡིན།

རྒྱལ་སྤྱིའི་བོད་དོན་ལྟ་ཞིབ་པ་ཁག་ཅིག་གིས་འདི་ནི་རྒྱ་ནག་གིས་མི་སྐོར་ཞིག་བསྡུས་ཏེ། ཏཱ་ལའི་བླ་མས་དབུ་ཁྲིད་པའི་བཙན་བྱོལ་བོད་མི་ཚོར་ངོ་རྒོལ་དང་། དེ་མིན་ན་ནུབ་ཕྱོགས་ཀྱི་གསར་འགོད་པ་ཚོར་ངོ་རྒོལ་བྱེད་རྩེས་ཀྱི་ཇུས་ཡིན་པར་མཐོང་གི་ཡོད་པ་རེད།