ལས་སྐལ་མེད་པའི་སློབ་བུ།

ལོ་བདུན་ལ་བོད་ཡིག་སྦྱངས་ཀྱང་སུམ་རྟགས་མི་ཤེས་མཁན་ང་ཚོ་ཡིན།

ཝར་ཎའི་མི་ཞུན་སེར་པོ།

བོད་ཡིག་སྦྱོང་མཁན་ང་ཚོ་ཡིན་ལ། སྦྱངས་ནས་མ་ཤེས་མཁན་ཡང་ང་ཚོ་རེད། ལར་ནས་སྦྱངས་ན་མི་ཤེས་གང་ཡང་མེད་ཅེས་པ་བདེན་མོད། འོན་ཀྱང་ཁ་སང་དེ་རིང་བོད་ཡིག་སྦྱོང་སའི་སློབ་གྲྭ་ཁག་གི་སློབ་ཕྲུག་ཚོའི་ཁྲོད་དུ་བོད་ཡིག་མི་ཤེས་མཁན་ཇེ་མང་ནས་ཇེ་མང་དུ་འགྲོ་གི་འདུག དེ་རིང་གི་གླེང་སྟེགས་འདིའི་སྒང་ནས་ངས་བཤད་འདོད་པ་དང་འབྲི་འདོད་པ་ཡང་བཙན་བྱོལ་ནང་གི་སློབ་ཕྲུག་རྣམས་ཀྱི་ལས་དབང་གི་སྡུག་སྐད་ཙམ་ཡིན།

གུས་པ་ཡང་གསལ་བྱེད་སུམ་ཅུའི་ལྷུ་རྐང་སྒྲིག་ཤེས་ཙམ་གྱི་སློབ་ཕྲུག་ཅིག་ཡིན་རྐྱེན་བཤད་སྟངས་མ་ཤེས་པ་དང་འབྲི་སྟངས་མ་འགྲིག་པ་འདྲ་བྱུང་ན་ཀློག་པ་པོ་རྣམས་ཀྱི་སྤྱན་སྔ་ལ་དང་པོ་ནས་མཐོལ་ལོ་བཤགས་ཟེར་གྱི་ཡིན། བོད་ཡིག་གི་ཚགས་ཤོག་དང་དུས་དེབ་ཀློག་མཁན་ང་ལྟ་བུ་ཞིག་གི་ངོས་ནས་བཤད་ན་ད་ལྟའི་བར་དུ་བོད་ཀྱི་སྐད་ཡིག་གི་ཉམ་ཆག་ལ་སེམས་འཁུར་གཏིང་ནས་བྱེད་མཁན་དག་དང་སྐད་ཡིག་གི་འཕེལ་རྒྱས་ལ་བསྟུན་པ་ཧུར་གྱིས་བསྐྱེད་མཁན་གྱི་ཤེས་ཡོན་དང་ལྷག་བསམ་ཟུང་གིས་ཕྱུག་པའི་མི་སྣ་མང་པོ་ཞིག་གིས་གཅིག་རྗེས་གཉིས་མཐུད་དང་དངོས་ཤུགས་བརྒྱུད་གསུམ་ནས་རང་རེའི་སྐད་ཡིག་གི་གནས་སྟངས་ཀྱི་སྐོར་ལ་ཚགས་ཤོག་དང་དུས་དེབ་འདྲ་མིན་གྱི་ལམ་ཁའི་སྟེང་ནས་སྐད་ཆ་རེ་བཤད་དེ་ལས་ཀྱི་མགོ་འདྲེན་དག་གི་འགུལ་བསྐྱོད་ལ་ཤུགས་རྐྱེན་ཙམ་སྤྲད་ཨེ་ཐུབ་ལ་རེ་ཡི་ཡོད་ནའང༌། བཤད་ཡུལ་དེའི་རྣ་བ་རྨང་ནས་འོན་སོང་བ་ཡིན་ནམ། ཡང་ན་མིག་ཟུང་གཏན་ནས་ཞར་སོང་བ་རེད། མིན་ན་བཤད་མཁན་དེའི་སྐད་ཆ་ལ་དེ་ཙམ་གྱི་རིན་ཐང་མེད་སོང་བ་རེད། གང་ལྟར་ངས་ཆེན་པོ་ཞིག་ཤེས་མ་སོང་ན་ཡང༌། ད་དུང་ཡང་བཙན་བྱོལ་ནང་གི་བོད་ཡིག་གི་བླ་སྲོག་ཀུན་ཏུ་ཁྱབ་པའི་ནད་འབུ་ཕྲ་མོ་ཞིག་གིས་བསྡམས་ནས་བསྡད་ཡོད་པ་ངས་ཤེས་ཡོད། བོད་ཡིག་ལ་ཞེ་ནས་དགའ་མཁན་གྱི་གསར་འབྱོར་བ་ཚོ་དང་བོད་ཡིག་མ་གཏོགས་ཅི་ཡང་སློབ་ན་མི་འདོད་པའི་ལྟ་བ་མཁྲེགས་པོ་རྡོ་འདྲ་བ་ཁག་ཅིག་གིས་ལྷག་བསམ་དང་ལར་ཞེན་གྱི་རུས་པ་སྙིང་ལ་བཅིངས་ནས་རྒྱུན་དུ་འདི་དག་གི་སྐོར་ལ་གླེང་སློང་དང་ཐབས་ཤེས་འདྲ་མིན་གྱི་སྒོ་ནས་རང་དོན་བཞིན་གཅེས་སུ་འཛིན་གྱི་ཡོད་པའང་ངས་ཤེས་ཡོད། གླེང་སློང་གང་འདྲ་བྱས་རུང༌། སྡུག་སྐད་ཇི་འདྲ་འཆོར་ཡང༌། ད་དུང་གནས་སྟངས་ལ་ཤུགས་རྐྱེན་ཙམ་ཡང་སྤྲོད་མ་ཐུབ་པར་ཟུར་ལོགས་སུ་གད་སྙིགས་བཞིན་ལྷག་ནས་བསྡད་ཡོད་པའི་རྒྱུ་རྐྱེན་ཅི་ཞིག་གིས་ལན་པ་ཡིན་ནམ་ཞེས་ངས་རྒྱུན་དུ་ཉེ་འཁོར་གྱི་གྲོགས་པོ་ཚོ་ལ་སྡུག་སྐད་འདོན་བཞིན་ཡོད། འོན་ཀྱང་། འདི་དང་དེ་རེད་བསམ་པའི་འོས་འཚམ་ཀྱི་རྒྱུ་རྐྱེན་ཞིག་གཏན་ནས་རྙེད་མ་སོང་ལ་གཞན་གྱི་ཁ་ནས་ཀྱང་གོ་མ་སོང༌། རྐུབ་སྟེགས་མཐོན་པོའི་སྟེང་ན་མྱི་ཡིན་བསམས་ནས་འགྱིང་ངེར་བསྡད་ཡོད་པའི་གཞུང་ཞབས་པ་དེ་ཚོའི་ཕྲག་སྟེང་གི་ལས་འགན་རྒྱལ་ཁབ་འཕེལ་རྒྱས་དང་རིག་གཞུང་སྲུང་སྐྱོབ་མིན་ཟེར་མཁན་ནི་ཧ་ལམ་ཡོད་ཀྱི་མ་རེད། དེས་ན། རྒྱལ་ཁབ་འཕེལ་རྒྱས་དང་རིག་གཞུང་སྲུང་སྐྱོབ་ཀྱི་གཞི་རྐང་གི་མ་ལག་གཙོ་ཆེ་ཤོས་ཤིག་ནི་སློབ་གྲྭ་ཁག་གི་སློབ་ཕྲུག་དག་ལ་ཐད་ཀར་དུ་འབྲེལ་ནས་བསྡད་ཡོད་པའང་བསྙོན་དུ་མེད་པའི་སྐད་ཆ་ཡང་དག་ཅིག་རེད། རྒྱུ་མཚན་གཞི་ནས་ནར་སོན་བཞིན་པའི་སློབ་ཕྲུག་ཚོ་ནི་ཞིང་ཁའི་སྟེང་གི་མྱུ་གུ་ལྟ་བུ་ཡིན་རྐྱེན་མ་འོངས་པའི་བོད་རྒྱལ་ཁབ་ཀྱི་ངོ་བོ་ལ་འགྱུར་བ་ཅི་ཙམ་ཞིག་ཐེབས་ཐུབ་མིན་ཀྱང་ད་ལྟ་བའི་སློབ་གྲྭ་ཁག་གི་སློབ་ཕྲུག་ཚོ་ལ་རག་ལས་བསྡད་ཡོད་པ་རེད་ཅེས་བཤད་ནའང་ཐལ་མི་ཆེ་སྙམ། སྟོན་མཇུག་གི་ལོ་འབྲས་ལ་རེ་བ་ཆེ་ཙམ་རྒྱག་མཁན་གྱི་སོ་ནམ་པས་རང་གི་ཞིང་ཁ་ལ་དུས་ལྟར་རྫས་ལུད་རྒྱག་པ་དང་ཉི་དྲོད་དང་ཆར་ཆུ་སོགས་ཀྱི་མཐུན་རྐྱེན་གང་འཛོམས་ཀྱིས་གཅེས་ཉར་གང་ལེགས་བྱེད་ཀྱི་ཡོད་པ་བཞིན་དུ་ང་ཚོའི་གཞུང་གིས་ཀྱང་ས་ཞིང་ལྟ་བུའི་སློབ་གྲྭའི་ནང་གི་མྱུ་གུ་ལྟ་བུའི་སློབ་ཕྲུག་ཚོ་ལ་སོ་ནམ་པ་ལྟ་བུའི་དགེ་རྒན་སྤུས་ལེགས་ཀྱི་མཐུན་རྐྱེན་སྤྲོད་དགོས་པ་ནི་གཙོ་བོའི་ནང་གི་གཙོ་བོ་ཡིན་དགོས་ལ། ཉི་འོད་ལྟ་བུའི་ཀློག་དེབ་ཀྱི་འཆར་བཀོད་དང་ཆར་ཆུ་ལྟ་བུའི་སྒྲིག་གཞིའི་དོ་དམ་ཡང་གཙོ་གནད་ཡིན་ནི་རེད།

སློབ་ཕྲུག་ཅིག་འཚར་ལོངས་འབྱུང་བཞིན་པའི་བརྒྱུད་རིམ་ནང་དུ་དགེ་རྒན་ནི་རྒྱུན་ལྡན་ནས་མཉམ་དུ་འགྲོགས་པའི་སློབ་ཕྲུག་གི་གྲོགས་པོ་ལྟ་བུ་ཡིན་རྐྱེན་སློབ་ཕྲུག་ཚོའི་བསམ་བློའི་ཁ་ཕྱོགས་དང་ཤེས་ཡོན་གྱི་ཆུ་ཚད། སྤྱོད་ལམ་གྱི་ཡག་ཉེས་སོགས་ནི་ཕྱོགས་གང་དུ་བསྐོར་ནའང་དགེ་རྒན་གྱི་ལག་ཏུ་ཡོད་པས་ཁོང་གིས་ཅི་ཞིག་བྱེད་འདོད་ནའང་དེ་ལྟར་བྱེད་ཐུབ་པའི་ནུས་པ་ཞིག་ཉུང་མཐའ་ལའང་ཡོད་དགོས་ནི་རེད། ཅིའི་ཕྱིར་ཞེ་ན། དགེ་རྒན་ནི་ཕྱོགས་སྟོན་གྱི་འཁོར་ལོ་དང་དགེ་རྒན་ནི་རྐང་གཉིས་འགྲོ་བའི་བསམ་བློ་ལ་ཁ་ལོ་བསྒྱུར་མཁན་གྱི་བྱེད་པོ་དེ་ཡིན། འོན་ཀྱང་། ང་དང་ང་ལྟ་བུའི་སློབ་ཕྲུག་ཚད་ལས་བརྒལ་བ་ཞིག་དགེ་རྒན་གྱི་ངོ་གདོང་གི་འོག་ནས་བཙན་བྱོལ་ནང་དུ་ལོ་ངོ་དྲུག་བདུན་ཞིག་ལ་བརྒལ་ཟིན་པ་ཡིན་ནའང་། ད་དུང་སུམ་ཅུ་བའི་རྣམ་དབྱེ་དང་རྟགས་འཇུག་གི་དབྱེ་བ་ཙམ་ཡང་མི་ཤེས་པར་ལུས་ནས་བསྡད་ཡོད་པ་འདི་ཅི་ཞིག་གིས་ལན་པ་རེད་དམ། ངས་རྟག་ཏུ་འདིའི་སྐོར་ལ་བསམ་བློ་གཏོང་གིན་ཡོད། སློབ་ཕྲུག་ཚོའི་ཁྲོད་དུའང་དེ་འདྲའི་གླེན་ཞིང་རྨོངས་ལ་རྟུལ་ཞིང་གྱོང་བའི་མི་ནི་མི་འདུག དེ་ནི་དབྱིན་ཡིག་དང་ཨང་རྩིས་ཀྱི་ཤེས་ཚད་ལ་བལྟས་ན་ཁོང་ཚོ་དེ་འདྲ་ཞིག་མིན་པ་ར་སྤྲོད་བྱེད་ཐུབ་ཀྱི་ཡོད། ཡིན་ནའང་། དམིགས་སུ་བཀར་ནས་རང་གི་ཕ་སྐད་ཀྱི་ངོ་བོར་གྲུབ་པའི་སྐད་ཡིག་ལ་དེ་འདྲའི་སྐྱོ་བོ་ཞིག་ཡིན་དགོས་པའི་རྒྱུ་མཚན་ཅི་ཞིག་ཡིན་ནམ། འདི་སློབ་ཕྲུག་གི་ངོས་ནས་མ་འཇོན་པ་རེད་དམ་ཡང་ན་དགེ་རྒན་གྱི་ངོས་ནས་མ་འགྲིག་པ་རེད། ངས་བལྟས་ནས་ཡོང་ན་འདི་ཚང་མའི་སྐྱོན་ཡོད་ཚད་སྤུས་ཀ་ཞན་ཞིང་ཚད་ལྡན་མིན་པའི་བོད་ཡིག་དགེ་རྒན་དེ་ཚོའི་ངོས་ནས་མ་འགྲིགས་པ་རེད་བསམ་གྱི་འདུག དེ་ལས་ཀྱང་སྐད་ཆ་རྒྱ་ཆེ་རུ་བཏང་ན། གསེར་བུམ་སྟོང་པ་ལྟ་བུའི་དགེ་རྒན་དེ་ཚོ་སློབ་གྲྭ་ཁག་ལ་གཏོང་མཁན་གྱི་གཞུང་ཞབས་པ་ཞ་ར་དེ་ཚོའི་ངོས་ཐད་ནས་མ་འགྲིགས་པ་རེད་བསམ་ནས་བསྡད་ཡོད། ཁོང་ཚོས་ནང་གི་ཡོན་ཏན་ལ་མ་བལྟས་པར་ཕྱིའི་རྣམ་པ་དང་ལག་འཁྱེར་ཁོ་ན་ལ་བལྟས་ནས་བྱ་བ་སྤྲད་རྐྱེན། སློབ་དཔོན་ཆེན་མོའི་ལག་འཁྱེར་སྐེ་ལ་དཔྱངས་པའི་ཀླད་སྟོང་བ་དེ་ཚོས་སློབ་གྲྭ་ཁག་གི་སློབ་ཕྲུག་ཚོ་ལ་བསྐྱར་བཟློས་དང་ཡང་བཟློས་རྐྱང་རྐྱང་གི་སློབ་ཚན་ཁག་ཅིག་འཁྲིད་དེ་ཉི་མ་འཁྱོལ་ཐབས་བྱས་ནས་བསྡད་ཡོད་པ་རེད། ང་ལ་མཚོན་ན་གཞི་རིམ་སློབ་གྲྭའི་ལོ་རིམ་དང་པོ་ནས་བཟུང་བོད་ཡིག་དགེ་རྒན་གྱིས་འཁྲིད་མྱོང་བ་ནི་སུམ་ཅུ་བ་ཁ་གསལ་ལ་མ་གསལ་བ་ཞིག་ཡིན། དེ་ཡང་རྣམ་དབྱེ་བརྒྱད་པོ་ལ་དཔེ་བརྗོད་རེ་འཇོག་སྐབས་ཁོང་ཚོ་ཚང་མ་ལ་ཐུན་མོང་གིས་སྤྱི་གོམས་སུ་སོང་ཡོད་པ་ནི་ཤར་ཕྱོགས་སུ་སོང་དང་བོད་དུ་ལོག་ལྟ་བུ་ནི་རྒྱུན་དུ་རྣམ་དབྱེ་གཉིས་པའི་དཔེ་བརྗོད་ལ་ཡང་དང་བསྐྱར་དུ་འཇོག་གི་རེད། ཧ་ལམ་ཁོང་ཚོ་ལ་དེ་མ་གཏོགས་དཔེ་བརྗོད་གཞན་འཇོག་རྒྱུ་མེད་པ་འདྲ་བོ་ཞིག་འདུག རྒྱ་ཆུང་ཞིང་གུ་དོག་པའི་རྭ་བ་དེ་དག་ལས་བརྒལ་མ་ཐུབ་པའི་རྐྱེན་གྱིས་ཁོང་ཚོའི་འོག་ནས་ནར་སོན་པའི་སློབ་ཕྲུག་དག་ཀྱང་ད་ལྟ་དེ་ལྟ་བུ་ཞིག་ཆགས་ནས་བསྡད་ཡོད་པ་རེད། སྔོན་མ་ང་རང་གཞི་རིམ་སློབ་གྲྭའི་ལོ་རིམ་གཉིས་པ་ཡིན་པའི་སྐབས་སུ་ང་ཚོའི་བོད་ཡིག་དགེ་རྒན་ཞིག་གིས་ང་ཚོའི་འཛིན་གྲྭ་ལ་སྐད་ཆ་འདི་ལྟ་བུ་ཞིག་བཤད་མྱོང་ཡོད། ཁོས་བཤད་ན་ང་ཚོ་ལ་དངོས་གནས་ཁག་ཡོད་ནི་མ་རེད། བོད་ཡིག་ལ་མཁས་པ་ཚང་མ་བོད་ནང་དུ་ལྷག་ནས་བསྡད་ཡོད་རྐྱེན། ང་ཚོ་ལའང་བོད་ཡིག་མཁས་ཅན་གྱི་དགེ་རྒན་ཞིག་རེག་མ་མྱོང་བ་རེད། ཁྱེད་ཚོ་ནི་བོད་ནས་དགེ་རྒན་ཡག་པོའི་འོག་ནས་ཡོང་བས་ང་ཚོ་དང་བསྡུར་ཐབས་ཡོད་ནི་མ་རེད། ཅེས་བཤད་མྱོང༌། དྲང་མོར་བཤད་ན་དེའི་དུས་ངས་ཀྱང་སྐད་ཆ་དེ་ལ་བདེན་ཁ་སྤྲད་པ་ཡིན་མོད། འོན་ཀྱང་། ད་ལྟའི་གནས་སྐབས་སུ་ད་དུང་ཡང་དེ་ལྟར་བྱེད་དགོས་པ་མི་འདུག་སྙམ། རྒྱུ་མཚན་ངྷ་རམ་ས་ལར་ལས་མེད་དུ་འཁྱམས་ནས་བསྡད་ཡོད་པའི་མྱི་ལྡོམ་པོ་དེ་དག་གི་ཁྲོད་དུའང་ལག་འཁྱེར་མེད་པའི་བོད་ཡིག་མཁས་ཅན་གང་མང་མང་འདུག དེ་བས་མ་འོངས་པའི་བོད་ཀྱི་སྤྱི་ཚོགས་ཀྱི་བརྟན་བརླིང་གི་ཆེད་དང་སྐད་ཡིག་གི་འཕེལ་རྒྱས་ཀྱི་ཕྱིར་དུ་ལག་འཁྱེར་གྱི་ཤོག་བུའི་ངོ་སོ་ལ་མ་བལྟས་པར་ཡོན་ཏན་གྱི་རིན་ཐང་ཆེ་ཆུང་ལ་བལྟས་ཏེ་གསེར་ལྟ་བུའི་དགེ་རྒན་སྤུས་ལེགས་རི་འདྲ་བ་རྐྱང་རྐྱང་ཡིག་རྒྱུགས་དྲག་ཤོས་ཀྱི་ལམ་ནས་འདེམས་ཐོན་གྱིས་མ་འོངས་བོད་ཀྱི་གཙོ་བདག་འདི་དག་གི་ལས་སྐལ་དུ་ཐོབ་ཐུབ་ན་ཅི་མ་རུང་སྙམ་གྱི་ཡོད། མ་གཞི་ནས་ཨ་མའི་བུ་ལ་ཡོན་ཏན་ཡོད་ན། དགའ་ལྡན་ཁྲི་ལ་བདག་པོ་མེད་ཅེས་པ་བཞིན་དུ། སུ་ལ་ཡོན་ཏན་ཡོད་ན་དེ་ལ་དགེ་རྒན་གྱི་རྐུབ་སྟེགས་སྤྲད་ན་འོས་པ་མ་གཏོགས། ཡོན་ཏན་མེད་པའི་ཀླད་སྟོང་ཞིག་སློབ་ཐོན་གྱི་ལག་འཁྱེར་ཡོད་ནའང་དགེ་རྒན་གྱི་ལས་སྣེ་ནས་བསྡད་ན་སྡིག་པའི་རྒྱུ་རུ་འགྲོ་བ་མ་གཏོགས་ཡོང་རྒྱུ་ཅི་ཞིག་འདུག ད་ལྟའི་ང་ཚོའི་སྤྱི་ཚོགས་ཀྱི་སྟེང་ན་བོད་ཡིག་དགེ་རྒན་ལ་མཐོང་མེད་པ་དང་བརྩི་འཇོག་དང་བཀུར་བསྟི་མེད་པའང་གཙོ་བོའི་གནད་དམ་པ་བཤད་ན་གོང་གི་རྒྱུ་རྐྱེན་དེ་ལ་ཐུག་ནས་བསྡད་ཡོད་པ་རེད། དོན་དངོས་ནས་བཤད་ནའང་ཡོན་ཏན་མེད་པའི་དགེ་རྒན་ཞིག་ལ་སུ་ཞིག་གིས་བཀུར་བསྟི་དང་བརྩི་མཐོང་བྱེད་ན་འདོད་ཀྱི་རེད། སློབ་ཕྲུག་ཚོ་ནི་མ་འོངས་པའི་བོད་ཀྱི་སྤྱི་ཚོགས་ལ་ཁ་ལོ་བསྒྱུར་མཁན་ཡིན་རྐྱེན་སློབ་ཕྲུག་ཚོའི་བསམ་བློ་དང་ཤེས་ཚད་དེ་ད་ལྟ་ནས་དགེ་རྒན་བཟང་པོས་སྤུས་ལྡན་དུ་མ་བཟོས་ན་མི་རིགས་འདིའི་མ་འོངས་པ་ཅི་འདྲ་ཞིག་ཏུ་འགྱུར་མིན་སུས་ཤེས། སུམ་ཅུ་བའི་རྣམ་དབྱེ་ལ་དཔེ་བརྗོད་གཙང་མ་ཞིག་ཀྱང་འཇོག་མི་ཤེས་མཁན་གྱི་མཐོ་རིམ་སློབ་མ་ང་ཚོའི་བོད་ཡིག་གི་ཆུ་ཚད་ལ་བལྟས་ནས་བདེན་དྲང་གི་སྐད་ཆ་ཞིག་ཤོད་དང༌། ང་ཚོ་ལ་བོད་ཡིག་གི་དགེ་རྒན་ཚད་ལྡན་ཞིག་ཐོབ་ཡོད་ན་ད་ལྟའི་གནས་སྟངས་འདི་འདྲ་ཞིག་ཡིན་དགོས་པའི་རྒྱུ་མཚན་ཅི་ལ་ཡོད། འདིའི་སྐྱོན་དང་ཁག་ཚང་མ་དགེ་རྒན་དེ་ཚོ་དང་ལས་བགོས་བྱེད་མཁན་གྱི་གཞུང་ཞབས་པ་དེ་ཚོའི་མགོ་ལ་འགེལ་བ་ལས་ང་ཚོ་ལ་ནོར་བ་ཅི་ཡང་མེད་ཅེས་བཤད་ན་འདོད། ལྷག་པར་དུ་བོད་པའི་མཐོ་རིམ་སློབ་གྲྭ་ཁག་གི་འགྲོ་སྲོལ་ལྟར་ནའང་། སློབ་གྲྭ་ནས་ཐོན་པའི་སློབ་ཕྲུག་ཡག་ཤོས་དེ་ཕྱི་རྒྱལ་ལ་གཏོང་བ་དང་རང་ཁོངས་སུ་ཉར་བ། འབྲིང་ཤོས་དེ་གཞིས་ཆགས་ཁག་དང་སྤྱི་ཚོགས་སྟེང་དུ་ལས་ཀ་བྱེད་དུ་གཏོང་པ། ཐ་ཤོས་སམ་སྙིགས་མ་དེ་དག་གཞི་ནས་སློབ་གྲྭ་ཁག་གི་སློབ་ཕྲུག་ཚོ་ལ་དགེ་རྒན་དུ་གཏོང་གི་འདུག ངའི་མཐོང་སྣང་ལ་འདི་ནི་དང་པོ་ནས་ནོར་ཕྱོགས་སུ་སོང་བའི་སྐྱོན་ཆ་ཆེ་ཤོས་ཤིག་རེད་བསམ་གྱི་འདུག་པ་མ་ཟད། སློབ་གྲྭ་ཁག་གི་སློབ་ཕྲུག་ཚོ་ལ་བརྩི་འཇོག་མ་བྱས་པ་དང་བོད་ཡིག་གི་དགེ་རྒན་ཚོའི་རིན་ཐང་ལ་སྣང་ཆུང་བྱས་པ་མང་དྲགས་མེད་དམ་བསམ་གྱི་ཡོད། སློབ་ཕྲུག་ཚོ་ལ་ཁ་ཕྱོགས་སྟོན་མཁན་གྱི་དགེ་རྒན་ཡག་པོ་མེད་ན་སྤྱི་ཚོགས་སྟེང་དུ་ཡོང་རྒྱུ་གདའ་བའི་སློབ་ཕྲུག་འདི་དག་ཀྱང་ཡག་པོ་ཆགས་ཀྱི་མ་རེད། དེས་ན། མ་འོངས་པའི་བོད་ཀྱི་སྤྱི་ཚོགས་དེའང་ཕ་སྐད་སྤྱོད་མི་ཤེས་ཤིང་ཕ་ཡིག་འབྲི་མི་ཤེས་མཁན་གྱི་མྱི་བླུན་པོ་འབའ་ཞིག་གིས་ཁེངས་མི་སྲིད་པའི་དུས་ཤིག་མི་ཤར་བ་གཏན་ནས་མ་རེད་ཅེས་བཤད་ན་འདོད། འདི་ནི་ང་རང་བཙན་བྱོལ་བའི་སློབ་གྲྭའི་ནང་དུ་ལོ་ངོ་བདུན་ལ་བསྡད་མྱོང་བའི་ཉམས་མྱོང་གི་ཕྱོགས་བསྡོམས་ཙམ་ཡིན་རྐྱེན་དངོས་གནས་བསམ་ཚུལ་ནོར་འདུག་པ་དང་ལྟ་སྟངས་འཁྱོག་འདུག་པ་ཡིན་ན་བློ་ལྡན་སུ་ཞིག་གིས་སྐྱོན་བརྗོད་དང་དྲང་ལམ་སྟོན་པར་དགའ་བསུ་ཡོད། གང་ལྟར་ངའི་སེམས་ནང་དུ་ནམ་ཡང་དགེ་རྒན་ནི་ཉི་འོད་དང་དགེ་རྒན་ནི་སྐྱབས་མགོན་ཡིན། དགེ་རྒན་ཀྱིས་ང་ཚོ་བདེན་ལམ་དུ་འཁྲིད་ཐུབ་ལ་དགེ་རྒན་གྱིས་ང་ཚོ་མྱི་ཡང་དག་པ་ཞིག་ཏུ་བཟོ་ཐུབ། མི་མང་གི་བདེ་སྡུག་དང་རྒྱལ་ཁབ་ཀྱི་འཕེལ་རྒྱས་ཀྱང་དགེ་རྒན་གྱི་ལག་ན་ཡོད་པས་ང་ཚོས་ཅིས་ཀྱང་དགེ་རྒན་གྱི་གོ་ས་ལྷ་བཞིན་བཀུར་དགོས་ལ་སྐྱབས་བཞིན་བསྟེན་དགོས། འོན་ཀྱང་ཕྱི་རྫིག་ནང་སྟོང་གི་དགེ་རྒན་དེ་དག་ང་ཚོ་ལ་མི་དགོས་བས་རྨག་མེད་དུ་བཟོས་ན་འགྲིག།