བོད་ཀྱི་དུས་བབ་སྤྱིའི་འདོན་ཐེངས་ ༤༡༩ པའི་སྟེང་གི་རྩོམ་སྒྲིག་པའི་གཏམ།
བོད་རྒྱའི་འབྲེལ་མོལ་གྱི་མཐའ་ཟད་ཀྱིན་འདུག འདིའང་སྲོལ་རྒྱུན་ལྟར་ཕན་ཚུན་ལ་ལེ་བདའ་དང་ཁག་དཀྲུ། ད་དུང་ཐུན་མོང་གི་འབབ་ས་ཞིག་བཙལ་རྗེས་སླར་ཡང་ངོ་ལོག་པའི་ཚུལ་གྱིས་སྐྱོན་སྣེ་ཞིག་ལ་འཇུས་ནས་ཆད་དགོས་པ་ལྟར། སྲོལ་རྒྱུན་གྱི་ཆད་སྟངས་ཆད་འགྲོ་གི་ཡོད།
ཁ་སང་དེ་རིང་པེ་ཅིན་དང་ངྷ་སའི་བར་ན་གསལ་བཤད་ཁག་ཅིག་འགྲོ་བཞིན་པ་འདིས། ང་ཚོ་སླར་ཡང་སྔོན་མའི་མགོ་འཛུགས་ས་དེར་འགྲོ་གི་ཡོད་པ་མཚོན་ལ། སྐུ་ཚབ་རྣམ་པ་དང་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་མགོ་ཁྲིད་ཚོས་འདས་པའི་ལོ་དྲུག་གི་རིང་ཕན་ཚུན་ལ་ཞལ་གསལ་བོ་དང་ལྷུག་པོའི་སྒོ་ནས་གྲོས་མོལ་བྱས་པ་དག་ནག་གསུབ་གཏོང་བའི་རིམ་པ་དེ་ཡིན། སྔོན་མ་སྐུའི་གཅེན་པོ་རྒྱལ་ལོ་དོན་གྲུབ་དང་ཏིན་ཞའོ་ཕིན་གཉིས་ཀྱི་སྐབས་སུ་བོད་རང་བཙན་གྱི་ཕན་ནས་སྐད་ཆ་ཅི་ཡང་བཤད་ཆོག་ཅེས་བོད་ཀྱི་གནད་དོན་སེལ་ཕྱོགས་ལ་ངག་ཐོག་ནས་ཕན་ཚུན་ལ་ཆ་རྐྱེན་བཏོན་པ་བཞིན། ཁས་ལེན་བྱས་པ་ལྟར། ད་ལྟའི་འབྲེལ་མོལ་གྱི་རིམ་པ་འདིའང་གཅིག་མཚུངས་ཡིན་ཏེ། ཏཱ་ལའི་བླ་མས་རང་བཙན་རྩོད་ཀྱི་མེད་པ་དང་ཁོང་གི་དགོངས་གཞི་ཅི་ཡིན་རྒྱ་ནག་ལ་ངོ་འཕྲོད་ཡོད་པའི་གནས་སྟངས་ཁག་ནི་སྐབས་ཐོག་གི་སྐད་ཆ་བཤད་མཁན་དག་ལ་མ་གཏོགས་ལོ་རྒྱུས་རང་བཞིན་གྱི་གཞི་འཛིན་ས་དང་ཆབ་སྲིད་ཀྱི་ཡིག་ཆ་ཅི་ཡང་མེད་སྟབས། རྒྱ་ནག་གིས་སླར་ཡང་༧གོང་ས་མཆོག་ལ་ཁ་བྲལ་རིང་ལུགས་པ་དང་། ཡང་ན། བོད་ཀྱི་གནད་དོན་ནི་ཏཱ་ལའི་བླ་མ་དང་ཁོའི་མཐའ་འཁོར་གྱི་མི་རེ་ཟུང་གི་གནད་དོན་ཡིན་ཚུལ་སོགས་སྐད་ཆ་གང་དུའང་འཁྱེར་ཆོག་ཆོག་ཡིན།
ཏག་ཏག་ཨོ་ལིམ་པིག་ཚུགས་ཁ་འདིར་བོད་རྒྱའི་འབྲེལ་བ་ཆད་མགོ་བརྩམས་པ་འདིས་གནད་དོན་རེ་ཟུང་ཞིག་གསལ་བཤད་བྱེད་ཀྱིན་པ་ནི། ཨོ་ལིམ་པིག་གི་སྔ་ཕྱི་གང་དུའང་རྒྱ་ནག་གིས་བོད་ལ་བཟུང་བའི་སྲིད་བྱུས་ནི་ཐོག་མཐའ་བར་གསུམ་དུ་འགྱུར་བ་མེད་པ་མཚོན་ཆེད་དང་། མ་གཞི་ནས་རྒྱ་ནག་ལ་ཨོ་ལིམ་པིག་རྩེད་འགྲན་གྱི་མགྲོན་བདག་བྱེད་པའི་ཁྲིམས་མཐུན་འོས་བབ་ཡོད་སྟབས། སྐྲག་ས་དང་འཛེམས་དགོས་ས་ཅི་ཡང་མེད་པའི་གདེང་ཚོད་དེ་རྒྱལ་སྤྱིའི་སྟེང་གསལ་བཤད་བྱས་པའང་ཡིན། དེ་ལྟར་ཡང་རྒྱ་ནག་གིས་ཨོ་ལིམ་པིག་རྩེད་འགྲན་ཐོག་མགྲོན་པོ་རེ་ཟུང་གི་འགྲུལ་ལམ་མི་འགག་པའི་ཆེད་དུ་ཐེངས་བརྒྱད་པའི་འབྲེལ་མོལ་ཞེས་པའི་དུས་མཚམས་ཤིག་བགོས་ཡོད། འདི་ནི་འཁྲབ་སྟོན་གྱི་མཇུག་སྒྲིལ་ས་དེ་ཡིན། རྒྱ་ནག་ལ་དངོས་གནས་བོད་དོན་སེལ་འདོད་ཡོད་ཚེ་ཡག་ཐོག་རྒྱན་བརྩེགས་ཀྱི་དཔེ་ལྟར། ཨོ་ལིམ་པིག་མ་ཚུགས་སྔོན་ལ་འབབ་ས་ཡོད་ཚད་ལ་འབབ་ངེས་པ་ནི་རང་བཞིན་གྱི་གནས་ཚུལ་ཡིན་མོད། དེ་མེད་སྟབས་འབྲེལ་མོལ་ཐེངས་བརྒྱད་པ་ཞིག་ཡོད་མདོག་གིས་འབྲེལ་མོལ་གྱི་རིམ་པ་དོན་དངོས་ཐོག་མཇུག་སྒྲིལ་དགོས་པར་གྱུར་བ་ཡིན།
སྐབས་འདིར་བོད་མིའིི་ཕྱོགས་ལ་གལ་སྲིད་རྒྱལ་ཁ་ཞིག་ཐོབ་ཡོད་ཚེ། དེ་ནི་མི་ལོ་ ༥༠ རིང་འདིར་ང་ཚོས་གང་ལྟར་ཡང་༧གོང་ས་མཆོག་གི་དགོངས་གཞི་གང་ཡིན་པ་དེ་རྒྱ་ནག་གི་མགོ་ཁྲིད་ཚོར་གསལ་ཐག་ཆོད་འཕྲོད་ཡོད་ལ། འདི་ནི་ནམ་རྒྱུན་བཀའ་ཁྲི་མཆོག་གིས་ང་ཚོའི་ཕྱོགས་ནས་མ་བྱུང་མ་འདང་བ་ཞིག་མེད་པ་བྱེད་རྒྱུ་ཡིན་ཞེས་གསུངས་པའི་ཁ་མཚམས་དེར་སླེབས་པ་ཡིན། འདི་ནི་བོད་མི་ཚོའི་མཐའ་མའི་འབབ་སའང་ཡིན་དགོས།
འདི་ལྟར་བོད་རྒྱ་ཞི་མོལ་ནི་ཆར་རྗེས་ཀྱི་འཇའ་རིས་ལྟར་ཐག་རིང་ནས་ཡལ་གྲབས་འདུག འདིའི་ཞོར་དུ་བོད་དོན་སྐད་འབོད་ཀྱི་ལྡིར་སྒྲའང་རིམ་བཞིན་འཇགས་མགོ་བརྩམས། འོན་ཀྱང་། དབྱར་དུས་ཀྱི་པེ་ཅིན་ཨོ་ལིམ་པིག་དེ་ཉིན་ཤས་ཀྱི་མཚམས་ན་ཡོང་གི་ཡོད། སྐབས་མཚམས་འདིར་སླེབས་དུས་ངས་ཨོ་ལིམ་པིག་འདི་ལ་རྟག་པར་པེ་ཅིན་དུ་འཆོགས་ཀྱི་ཡོད་ན་ཅི་མ་རུང་སྙམ། ལྷག་པར་དུ་སྲིད་དོན་པ་ཚོས་ཕན་ཚུན་ལ་འཕེན་པའི་ཚིག་མཚོན་རྣོན་པོ་དག་གི་བར་ནས་ཚུགས་ཀྱི་ཡོད་ན་བསམ། འདི་ནི་གཙོ་བོ་བོད་མི་རིགས་ཀྱི་འཕག་འཚག་དེ་རྒྱུན་དུ་མཐོང་བ་དང་དེར་ཕྱིར་དྲན་བྱེད་འདོད་པའི་དབང་གིས་ཡིན།
ཨོ་ལིམ་ཕིས་ཁུ་རྩེད་མོ་རེད།
བོད་དོན་འདི་ཡང་རྩེད་མོ་རེད།
བོད་རྒྱ་གཉིས་ཀྱི་རྩེད་མོ་འདིས།
བྱིས་པར་རྩེད་མོ་རྩེད་སྟངས་སློབ།