ཨོ་ཝེན།
ཏཱ་ལའི་བླ་མའི་གསུང་འཕྲིན་རེ་རེའི་ཤུགས་རྐྱེན་གྱིས་ཆོས་ལུགས་མི་འདྲ་བ་དང༌། གོམས་གཤིས་མི་འདྲ་མཁན་གང་མང་ཞིག་ཁོང་གིས་མཚོན་པའི་བོད་དང༌། བོད་མི། བོད་ཀྱི་རིག་གཞུང་བཅས་སུ་དགའ་ཚོར་འདྲེན་གྱི་ཡོད། དེའི་རྐྱེན་གྱིས་དེ་སྔ་བོད་རིགས་དང་འབྲེལ་མེད་ཡིན་པའི་རྒྱལ་ཁབ་དང་མི་རིགས་གང་མང་བོད་པའི་སྤྱི་ཚོགས་ལ་ངང་གིས་ཕྱོགས་ཀྱི་ཡོད། དེར་བརྟེན་ང་རང་ཡང་བོད་རིགས་མང་ཚོགས་ཁྲོད་སྤྲོ་འཁྱམས་ཀྱི་ཚུལ་དུ་ཐེངས་འགར་སོང་བ་ཡིན། དེས་ན་དེ་སྐབས་དམིགས་བསལ་ཅན་གྱི་ཚོར་སྣང་བྱུང་བ་ཞིག་འདིར་རོབ་ཙམ་ཤོད་འདོད་སྐྱེས། དེ་ནི་དགག་པ་དང་སྐྱོན་བརྗོད་བྱས་པ་མིན་པར་བོད་རིགས་སྤྱི་ཚོགས་ནང་འཁྱམས་ཉུལ་བྱེད་སྐབས་སྤྲོ་བོ་བྱུང་བའི་རིན་བབ་ཙམ་དུ་སེམས་བཟང་གིས་ཕུལ་བ་ཡིན། ཀུན་གྱིས་ཤེས་གསལ་བཞིན་རང་དབང་དང་མང་གཙོ་ནི་འཛམ་གླིང་གི་འཕེལ་ཕྱོགས་གསར་པའི་མཚོན་རྟགས་གཙོ་བོར་གྱུར་ཡོད་ནའང༌། བོད་རིགས་སྤྱི་ཚོགས་སྲོལ་རྒྱུན་གྱི་བཀག་རྒྱ་སྣ་ཚོགས་དབང་གིས་ད་དུང་དོན་དམ་པའི་རང་དབང་དང་མང་གཙོའི་མཁའ་དབུགས་དང་རྒྱང་ཐག་ཧ་ཅང་རིང༌། རང་དབང་དང་མང་གཙོའི་དོན་སྙིང་གཙོ་བོ་གང་ཟག་སྒེར་བའི་ཐོབ་ཐང་དང་ཁྱད་ཆོས་ལ་རྩིས་མཐོང་བྱེད་པ་དེ་ཡིན། གང་དུ་རང་དབང་དང་མང་གཙོའི་མཁའ་དབུགས་ཡག་པོ་ཡོད་ན་དེར་གང་ཟག་སྒེར་བའི་ཐོབ་ཐང་དང་ཁྱད་ཆོས་མཐོང་རྒྱུ་ཡོད་ལ། གང་ཟག་སྒེར་བའི་འདོད་འདུན་དང་ཁྱད་ཆོས་ལ་བརྩི་མེད་རྡོག་རྫིས་བྱེད་ས་དེར་སྐད་ཆ་ཇི་འདྲ་ཞིག་བཤད་ནའང༌། དོན་ལ་མི་སེམས་ཀྱིས་བཟོད་དཀའ་བའི་གདུག་རྩུབ་དང་མུན་ནག་ཅིག་ཡོད་ཁོ་ཐག་ཡིན། ངས་འདི་ལྟར་ཤོད་སྐབས་བོད་པ་ཚོའི་སེམས་ལ་རྒྱ་གཞུང་གི་སྤྱོད་སྟངས་ངང་གིས་དྲན་ཡོང་སྲིད། འོན་ཀྱང་ངས་འདིར་ཤོད་འདོད་པ་ནི་རྒྱ་དམར་གཞུང་གི་གདུག་རྩུབ་དབང་སྒྱུར་སྐོར་མིན་པར་དེ་དང་ཆ་འདྲ་བའི་བོད་ཀྱི་སྤྲུལ་སྐུ་ཚོའི་བསམ་སྤྱོད་ཀྱི་ཟུར་ཞིག་ཡིན།
ང་རང་ལ་མཚོན་ན་ཕྱི་མི་ཞིག་ཡིན་སྟབས་བོད་ལ་རྒྱུས་ལོན་དེ་ཙམ་མེད་ན་ཡང༌། ངའི་གྲོགས་པོ་ཞིག་བོད་ཀྱི་སྤྲུལ་སྐུའི་མིང་ཡོད་མཁན་ཞིག་ཡིན་ཁར། ད་དུང་དེ་སྔོན་ཨ་རིའི་གློག་བརྙན་འཁྲབ་མཁན་ཞིག་བོད་ཀྱི་བླ་མ་ཆེན་པོ་ཞིག་གིས་སྤྲུལ་སྐུར་ངོས་འཛིན་བྱས་སྟབས་ཕྱི་ཕྱོགས་སུ་བོད་ཀྱི་སྤྲུལ་སྐུའི་ཐད་ལྟ་ཚུལ་ཁྱད་མཚར་ཞིག་ཡོད། བོད་ཀྱི་སྤྲུལ་སྐུ་ཕལ་མོ་ཆེ་རང་ཉིད་ཆེས་སྔ་མོའི་སྐྱེས་བུ་དམ་པ་དེ་འདྲའི་རྣམ་སྤྲུལ་ཡིན་ཞེས་གོ་སྐབས་ཡོད་ཚད་ནས་འགྲེལ་རྒྱག་རྒྱུར་དགའ་བོ་ཡོད་པ་ནི་བོད་ཀྱི་སྤྲུལ་སྐུ་སློབ་སྦྱོང་མེད་མཁན་ཐུན་མོང་གི་ཁྱད་ཆོས་ཤིག་རེད། ཡང་བོད་ཀྱི་སྤྲུལ་སྐུ་དེ་ཚོས་ཡུལ་ལུང་གཞན་པའི་ཆབ་སྲིད་ཀྱི་ཚོགས་པ་དེ་འདྲ་བཞིན་སྤྲུལ་སྐུའི་ལམ་ལུགས་སྲ་བརྟན་དང་ཡུན་གནས་ཡོང་ཆེད་སྤྲུལ་སྐུ་གསར་པ་གང་མང་ཐོན་སྐྱེད་བྱེད་པ་དང༌། དེ་ཡང་རང་ཉིད་ཀྱི་གཉེན་ཚན་ནམ། ཡང་ན་ཕྱུག་པོ་ཞིག་གི་བུ་རྒྱུད། མ་མཐར་ཡང་ཁ་ཡག་ངོ་ཡག་ཅིག་ལ་དམིགས་འཛུགས་བྱེད་ཀྱི་ཡོད། དེའི་དམིགས་ཡུལ་ནི་ཆབ་སྲིད་ཀྱི་ལྟ་སྟངས་བྱས་ན་ཁོ་ཚོའི་ཁོར་ཡུག་རྒྱ་བསྐྱེད་ཀྱི་ཐབས་ལམ་ཞིག་རེད། ང་རང་གིས་དངོས་སུ་ཐོས་པའི་གཏམ་རྒྱུད་དགོད་བྲོ་བ་ཞིག་ནི། བོད་པའི་བུ་མོ་ཚོའི་སེམས་ཁྲལ་ཆེ་ཤོས་ཤིག ཕོ་སྒོ་ཡག་པོ་ཡོད་པའི་ན་གཞོན་གང་མང་ཞིག་སྤྲུལ་སྐུར་ཆགས་འགྲོ་བ་དང༌། དེའི་རྗེས་རྣམས་གྲྭ་པ་ཆགས་རྗེས་བུ་མོ་ཚོར་ཕོ་སར་སྐྱེ་སྒོ་ཡག་པོ་ཡོད་མཁན་དེ་ཙམ་མི་ལྷག་ཚུལ་ཞིག་ཀྱང་འདུག གང་ལྟར་བོད་པ་ཚོའི་འཁྲུལ་སྣང་མག་མོག་གི་སེམས་ཁོང་ན་སྐྱབས་མགོན་དང་རིན་པོ་ཆེར་སྒོམ་བཞིན་གློ་སྙིང་བྲང་གསུམ་གཏོད་སའི་སྤྲུལ་སྐུ་མང་ཆེ་བར་སངས་རྒྱས་ཆོས་ལུགས་ཀྱི་ཉམས་རྟོགས་ཕར་ཞོག སྤྱིར་བཏང་གི་རྒྱུན་ཤེས་ཙམ་ཡང་སྐྱོ་ཐག་ཆོད་རེད།
ལྷག་པར་དུ་བོད་མི་རྣམ་དཔྱོད་ཅན་རྣམས་སྙིང་ན་དགོས་པ་ཞིག་ནི། བོད་ཀྱི་སྤྲུལ་སྐུ་ཚོས་རང་ཉིད་ཀྱིས་ཅི་ཡང་མི་ཤེས་པའི་ནང་ཁྲོལ་ལུག་རྒྱུར་སྐྲག་ནས་ཤེས་ཡོན་ཅན་དང༌། ཡར་ཐོན་གྱི་བསམ་བློ་ཡོད་མཁན་ཚོ་དགྲར་བཟུང་ནས་ཞྭ་མོ་ཆེ་ཆུང་འདྲ་མིན་གཡོགས་ཏེ་མགོ་གཅོག་ཐབས་དང༌། རྐང་པ་ནས་འདྲུད་ཐབས་བྱེད་པ་དེ་ཡིན། བོད་རིགས་ཚོས་ད་དུང་ཅི་ཡང་མི་ཤེས་པའི་སྤྲུལ་སྐུ་དེ་ཚོར་རྨོངས་དད་བྱས་ནས་ཤེས་ཡོན་དང་ཤེས་ཡོན་པའི་རིན་ཐང་ལ་ངོས་འཛིན་ཡག་པོ་མ་ཐོབ་ཚེ་འདི་ནི་བོད་པ་རང་ཉིད་དུས་རབས་ཀྱི་འགྲོས་ལས་ལྡོག་ཏེ་འཆི་ལམ་སྙེགས་པ་ཞིག་རེད་སྙམ།
མང་ཚོགས་ཀྱི་རྨོངས་དད་ཇེ་ཉོག་ཏུ་གཏོང་པ་དང༌། དེ་བེད་སྤྱད་ནས་རང་དང་ལྟོས་འབྲེལ་གྱི་ལྟོ་གོས་གཏམ་གསུམ་ཧུར་ཐག་གིས་འབད་སྒྲུབ་བྱེད་པ་ནི་བོད་ཀྱི་སྤྲུལ་སྐུ་ཚོ་བསྟན་དོན་དུ་བྱོན་པ་ཡིན་ཟེར་པའི་ཆེད་ལས་གཙོ་བོ་ཆགས་འདུག དེ་ནི་དེང་སང་དྲ་རྒྱའི་ནང་གཞང་ཚོང་མ་ཚོས་པར་འདྲ་མིན་གྱིས་མི་རྣམས་བསླུས་ཏེ་རང་དོན་སྒྲུབ་ཐབས་བྱེད་པ་དང་རྣམ་པ་ཙམ་ལས་ཀུན་སློང་གཅིག་མཚུངས་རེད་བསམ་གྱི་འདུག རྨོངས་དད་ཀྱིས་བསླུས་ནས་རང་དོན་སྒྲུབ་པ་དང་འདོད་ཆགས་ཀྱིས་བསླུས་ནས་རང་དོན་སྒྲུབ་པ་གཉིས་དཔྱད་བསྡུར་ཙམ་བྱས་ན་དོན་ལ་ཁྱད་པར་ཅི་ཡང་མེད་པ་ལྟ་བུ་ཞིག་རེད།
བོད་མི་གང་མང་ཞིག་གིས་ངོས་འཛིན་ཐོབ་དཀའ་ལ། ངོས་ཟིན་དུས་འཕྱི་དྲགས་པ་ཞིག་ནི་སྤྲུལ་སྐུ་ཚོས་སློབ་སྦྱོང་གི་ཁོར་ཡུག་འགའ་གཉེར་འཛིན་བྱེད་བཞིན་པའི་སྡིག་ཉེས་དེ་ཡིན། མི་ལ་སློབ་སྦྱོང་གི་གོ་སྐབས་སྤྲོད་པ་ནི་རྣམ་པ་ཙམ་གྱི་ཆ་ནས་བཤད་ན་ཡག་པོ་མ་རེད་ཟེར་མཁན་སུ་ཡང་མེད། འོན་ཀྱང་ངེས་པར་དུ་ཤེས་དགོས་པ་ཞིག་ནི། ཡང་སྙིང་སློབ་སྦྱོང་དེ་སུའི་ཆེད་དུ་སྤྲོད་ཀྱི་ཡོད་མེད་དེ་ཡིན། ཆེས་ཕུལ་བྱུང་གི་རྣམ་དཔྱོད་ཅན་བོད་ཀྱི་དབུ་ཁྲིད་ཏཱ་ལའི་བླ་མས་དབུ་ཁྲིད་པའི་སློབ་གྲྭ་ཁག་ནི་སློབ་མ་དང་མང་ཚོགས་ཀྱི་ཆེད་ཡིན་པ་ཆེས་ཁ་གསལ་གཏིང་གསལ་ཡིན་ཡང༌། བོད་ཀྱི་སྤྲུལ་སྐུ་གཞན་འགའ་ཞིག་གིས་གཉེར་འཛིན་བྱེད་པའི་སློབ་སྦྱོང་གི་ཁོར་ཡུག་དག་ནི་སྒེར་སྡོམ་ཡིན་པ་ཨ་ཅང་ཅང༌། བསྟན་སྲིད་མི་རིགས་སོགས་ཀྱི་ཐུམ་ག་འདྲ་ཞིག་བརྒྱབ་ནའང༌། དམིགས་ཡུལ་ངོ་མ་ནི། ཁོང་ཚོས་བོད་རིགས་མང་པོར་སློབ་སྦྱོང་སྤྲད་ནས། བོད་རིགས་དེ་ཚོ་སྤྲུལ་སྐུ་དེ་དག་གི་ཚེ་གཡོག་ཏུ་འགྱུར་ཐབས་བྱེད་ཀྱི་ཡོད་པ་དེ་རེད། ལྷག་པར་དུ་གྲྭ་རིགས་ན་གཞོན་ཚོ་དེ་འདྲའི་ལག་ཆར་བཀོལ་སྤྱོད་བྱེད་རྒྱུར་སྟབས་བདེར་ལྟ་གི་འདུག གྷོཊི་སིལ་ཊེན་གྱིས་བྲིས་པའི་བོད་པའི་ལོ་རྒྱུས་ནང༌། བོད་ཀྱི་སྤྱི་ཚོགས་རྙིང་བའི་ནང་གི་དཔོན་ངན་ཚོའི་ཚེ་གཡོག་ཚོར་ཡང་སློབ་གསོ་འགའ་ཞིག་ཐོབ་ཀྱི་ཡོད་ཚུལ་འདུག་སྟབས། དེ་འདྲའི་ལམ་ལུགས་དང་ད་ལྟའི་བོད་ཀྱི་སྤྲུལ་སྐུ་ཕལ་མོ་ཆེས་བྱེད་ཐབས་འདི་གཉིས་པར་དུས་ཚོད་གསར་རྙིང་ནང་གི་རྣམ་པ་མ་འདྲ་པའི་གཡོག་སྒྱུར་སློབ་གསོ་རིགས་གཉིས་ཡིན་པ་ལས་གཞན་པའི་ཁྱད་པར་དེ་ཙམ་མ་མཐོང༌།
དེས་ན་ངས་འདིར་བོད་ཀྱི་སྤྲུལ་སྐུ་ཚོས་བོད་རིགས་མང་ཚོགས་ནང་གཡོག་སྒྱུར་སློབ་གསོ་སྤྲོད་ཀྱི་འདུག་ཅེས་པར་སྒྲུབ་བྱེད་མེད་པ་མིན་ཏེ། དཔེ་མཚོན་ཆུང་ཆུང་ཞིག་བཤད་ན། བོད་ཀྱི་སྤྲུལ་སྐུ་ཚོར་ནམ་རྒྱུན་སྐྱོར་རྒྱུའི་ཚིག་ཅིག་ཡོད་པ་དེ་ནི། དད་པ་དམ་ཚིག་ཟེར་བ་དེ་ཡིན་ལ། དེའི་ནང་དོན་དངོས་ནི། ཁོ་རང་ཚོར་དགའ་ཞེན་དང་སྦྱིན་བདག་བྱེད་རྒྱུ་སོགས་ཡིན་འདུག དེ་འདྲ་ བྱས་ནས་སྤྲུལ་སྐུ་དེ་དགའ་བོ་ཡོང་བ་བྱེད་ཐུབ་ཚེ་དེ་ནི་དད་པ་དམ་ཚིག་ཡག་པོ་ཡོད་ཚུལ་དང༌། གལ་ཏེ་ཁོ་ཚོའི་བློར་འབབ་མིན་བྱུང་ཚེ་དད་པ་དམ་ཚིག་གཙང་མ་མིན་ཚུལ་བཤད་ནས་མི་སྒེར་དེ་ཚོར་གནོན་ཤུགས་སྤྲོད་ཀྱི་འདུག དེར་བརྟེན་དད་པ་དམ་ཚིག་ཟེར་པའི་འཆིང་ཐག་དེ་ཤེས་རྨོངས་མང་ཚོགས་དང་གྲྭ་གཞོན་ཚོའི་སྐེར་བསྐོན་ནས་ལས་ཀ་ཡོད་ཚད་སྤྲུལ་སྐུ་ཁོ་ཚོའི་མིང་མཐོང་དང་ཁེ་ཕན་ཆེད་བྱེད་དུ་བཅུག་དང་འཇུག་བཞིན་པ་འདི་ཁོ་ནས་ཀྱང་གསལ་བཤད་ག་འདྲ་ཞིག་བྱས་ཡོད་དམ།
དེས་ན་ངའི་བསམ་པར་བོད་པ་ཚོས་དུས་རབས་ཀྱི་རྗེས་ཟིན་པ་དང༌། དོན་དམ་པའི་རང་དབང་དང་མང་གཙོའི་མཁའ་དབུགས་སྟུག་པོ་ཞིག་ནང་འདྲེན་བྱ་འདོད་ཚེ། ངེས་པར་དུ་རྨོངས་དད་རིགས་གཏོགས་ཀྱི་བསམ་བློའི་འཆིང་རྒྱ་འདི་རིགས་ལས་གྲོལ་དགོས་ལ། ངེས་པར་དུ་སྤྲུལ་སྐུ་ཚོའི་ཧམ་སེམས་ལ་ངོ་རྒོལ་དང༌། ངེས་པར་དུ་སྤྲུལ་སྐུ་ཚོའི་བྱ་སྤྱོད་གཏམ་གསུམ་ལ་མགོ་བོ་སྒུར་མི་རུང་བ་དེ་རེད། ངས་མཐོང་སྣང་གཞན་ནི་བོད་ཀྱི་སྤྲུལ་སྐུ་ཚོ་ཆེས་ན་གཞོན་ཡིན་པའི་དུས་སྐབས་ནས་བཟུང༌། ཤ་རྒྱགས་པ་ཤ་སྟག་ཡིན་པ་དེའང་དོན་ལ་ཚད་མཐོའི་ཤེས་ཚད་ཕར་ཞོག ཆུང་ས་ནས་འཕྲོད་རྟེན་གྱི་ཤེས་བྱ་ཙག་ཙིག་རིགས་ཀྱང་མེད་པར་འདོད་ཟ་འདོད་འཐུང་བྱས་པས་རང་ཉིད་རྒྱགས་པ་ཞེ་གཅིག་ཆགས་འདུག དེ་ནི་སློབ་སྦྱོང་མ་བྱས་པར་མང་ཚོགས་ཀྱི་རྒྱུ་ནོར་ལ་ལོང་སྤྱོད་བྱེད་ཤུགས་ཆེ་དྲགས་པས་ཡིན་པ་ཙམ་མ་ཟད། དེང་རབས་གསོ་རིག་གི་ལྟ་ཚུལ་བྱས་ན་ཤ་རྒྱགས་པ་ཕལ་མོ་ཆེར་སྙིང་ནད་ཡོད་རབས་གསལ་བས་དེ་ནི་བོད་ཀྱི་སྤྲུལ་སྐུ་རྒྱགས་པ་ཚོས་འགྲོ་དོན་མི་འཕེལ་བའི་འགལ་རྐྱེན་ཞིག་ཡིན་ཚོད།
གྲོགས་པོ་ལགས། ཕྱོགས་རེ་ཙམ་མཐོང་ནས་རང་གི་ལྟ་ཚུལ་བརྗོད་པ་ནི་རྩོམ་པ་པོ་ཞིག་འགན་ཁྲི་དང་དུ་མ་བླང་པར་མངོན་པ་མ་ཟད། སྤྱི་ཚོགས་ལ་ཕན་པའི་བསམ་བློ་ཞིག་ཀྱང་གཏང་མ་ཐུབ་པའི་རང་རྟགས་ཡིན་ངེས་པས། གལ་ཏེ་ཁྱེད་རང་གིས་མི་རིགས་ཤིག་དང་འཁོར་ཡུག་ཅིག་བདེ་དོན་གླེང་འདོད་ཚེ་མཐར་ཕྱིན་པའི་ཞིབ་འཇུག་ཅིག་སྔོན་དུ་བཏང་ཏེ་ལས་ལ་འཇུག་པར་བྱ་དགོས།
སྐུ་ཞབས་ཨོ་ཝེན་གྱིས་བཤད་པ་ཚང་མ་ང་ཚོས་མཐོང་བཞིན་པའི་བཙན་བྱོལ་སྤྱི་ཚོགས་ཁྲོད་ཀྱི་བླ་མ་སྟོན་འཁོར་འགའི་སྤྱོད་པ་ཡིན་པ་བདེན་པ་རེད། འོན་ཀྱང་འདི་
ཙམ་གྱིས་བོད་ཀྱི་སྤྲུལ་སྐུ་ལ་སྡོམ་ཚིག་འཇོག་མི་ཐུབ། ང་ཚོ་བོད་མིས་སྤྲུལ་སྐུ་ལ་དད་པ་དང་ཡིད་ཆེས་བྱེད་པ་ནི་ང་ཚོའི་ཕ་མེས་ཡང་མེས་ནས་ཕུ་ནུ་བུ་ཚའི་བར་དུ་
བརྒྱུད་ཡོང་བའི་ཚེ་འདི་ཕྱི་གཉིས་ཕན་གྱི་རིགས་གཞུང་དང་བསམ་བློ་འཁྱེར་ཕྱོགས་གཞན་དང་མི་འདྲ་བ་འདི་ཁོང་ཚོར་བསྟེན་ནས་བྱུང་བའི་དབང་གིས་རེད་ལ་བོད་མི་
རྣམས་སྔར་བཞིན་བསམ་བློ་འཁྱེར་ཕྱོགས་འདིས་མགུ་ཁེངས་ནས་ཡོད། སྤྲུལ་སྐུར་གྲུབ་རྟགས་ཡོད་མེད་དང་མངོན་ཤེས་ཡོད་མེད་ལྟ་བ་ནི་རྒྱ་འོག་ནས་འཚར་བའི་བོད་
ཕྲུག་འགའ་དང་ཕྱི་རྒྱལ་བ་ཚོས་རིགས་ལམ་དང་ཤོས་སུ་བརྩི་བ་ལས་བོད་མིའི་སྤྲུལ་སྐུར་ཚད་འཇལ་བྱེད་ཀྱི་རྒྱ་མ་མཐར་ཐུག་དེ་མིན། སྐུ་ཞབས་ལགས་འདུན་པ་དྲག་པོ་
དང་བཅས་སྤྲུལ་སྐུའི་སྤྱི་ཚོགས་སུ་ཕེབས་ཞིང་ཞེན་ལོག་ཡིད་ཕམ་དང་བཅས་སྟོང་ལོག་བྱེད་དགོས་བྱུང་བར་གདོང་སེམས་མཉམ་སྐྱེད་ཡོད། འོན་ཀྱང་ཁྱེད་སྐྱེ་བ་ཕྱི་མར་
སྤྲུལ་སྐུ་རྒྱགས་པ་འདི་ཚོའི་འབངས་མི་ཞིག་ཏུ་སྐྱེ་བ་ལེན་ཐུབ་ན་མ་མཐའ་ཡང་ཁྱེད་ཀྱི་ད་ལྟའི་མི་ཚེ་ལས་དོན་སྙིང་ཡོད་པར་ངས་ཁག་ཐེག་བྱེད་ཐུབ། ལར་ནས་བོད་མིའི་མངོན་འདོད་གཙོ་བོ་ནི་རྒྱའི་དབང་བསྒྱུར་འོག་ནས་མཐར་འདོད་པ་ཙམ་མ་གཏོགས་རང་དབང་དང་དམངས་གཙོར་གྲགས་པའི་ཕྱི་རྒྱལ་གྱི་སྒྲིག་འཛུགས་ལྟ་བུ་ཞིག་གི་འོག་ཏུ་ཚུད་འདོད་དེ་ཙམ་མེད། བོད་མི་རབས་ཕྱི་མ་དེ་འདྲར་མི་འགྱུར་བར་མི་རབས་འདིས་སྨོན་ལམ་ཡང་འདེབས་ཀྱིན་ཡོད།
དྲ་གྲོགས་ཚོ་སྐུ་ཁམས་བཟང་། གོང་གསལ་གནད་དོན་ལ་པསམ་བཞེས་ཀྱིས་བསམ་ཚུལ་སྤེལ་རོགས།
རེད་ངོ་མ་ཕྱི་གླིང་བས་བཤད་བདེན། ང་ཚོས་ངོ་མ་སྦས་བསྐུམས་པྱས་ཏེ་ཕན་རེ་མེད། ངས་ཤོད་འདོད་པ་ནི་དེང་སང་སྤྲུལ་སྐུའི་མཚན་ཉིད། དེ་ཡང་སྐྱབས་ཞུ་བསྔོ་རྟེན་ལ་དགའ་ཞིང་བརྟན་བཤིག་གི་རིགས་སུ་གནས་པ་དེང་སང་སྤྲུལ་སྐུའི་མཚན་ཉིད། ངོ་མ་ངས་སྤྲུལ་སྐུར་ཁྱད་གསོད་མིན། །
གོང་གི་ཐེ་བོ་ཤེས་རབ་ཀྱིས་བསམ་ཚུལ་འདི་ལྟར་བཀོད་འདུག ཁྱོད་ཀྱིས་ནང་པའི་ཆོས་ཀྱི་འགྲོ་སྟངས་ཤེས་པ་དང་ཕྱི་གླིང་པས་ནང་པའི་ཆོོས་ཀྱི་འགྲོ་སྟངས་མི་ཤེས་པ་གཉིས་ལས་ཕྱི་གླིང་པས་ནང་པའི་ཆོས་ཀྱི་འགྲོ་སྟངས་མ་ཤེས་ནས་བཤད་པའི་གཏམ་ལ་རྒྱུ་མཚན་འདུགདེར་བརྟེན་སྐུ་ཞབས་གང་ཉིད་ནས་ཨུ་ཚུགས་མ་སྐྱོན་རོགས།ང་ཚོས་བསམ་བློ་ཞིབ་མོ་བཏང་ན་བོད་ཁུལ་གྱི་དོ་ཞག་གི་སྤྲུལ་སྐུ་འགའི་ངོ་གདོང་གསལ་པོར་མཐོང་གི་འདུགསྔོན་གྱི་སྐྱེས་ཆེན་ཞིག་གིས་སྐུ་སྐྱེས་བསྟན་དོན་དུ་བྱོན་པའི་དགོས་པར་བཤད་སྒྲུབ་ལག་རྗེས་རེ་འཇོག་དགོས་ཞེས་གསུངས་ཡོད་པའི་སྡོམ་ཚིག་དེ་ཁྱེད་ཀྱིས་བརྗེད་མེད་པ་ང་ལ་ཡིད་ཆེད་ཡོད། ༼གྲོགས་པོ་ཤེས་རབ་ལགས།མཆན་བུར་འགོད་རྒྱུར་དཀའ་ངལ་འདུག་ཚེ་ཕྲན་གྱི་གློག་འཕྲིན་དྲྭ་བའི་སྟེང་བསྐུར་དང་ངས་འགོད་ཆོག༽
ཨོ་ཧོ་ཧོ། ད་ཡིན་ན་མ་བཟང་ཐག་ཆོད་རེད། གསང་བ་ཚང་མ་ཤེས་ཚར་འདུག་གཱ།
I’m sure this compose. our society become like this, so our must change this customs. this mean is very deep.
སྙིང་རྗེ། ཕྱི་གླིང་བ་འདི་ནི་ནང་པའི་ཆོས་ཀྱི་འགྲོ་སྟངས་ཅི་ཡང་མི་ཤེས་པའི་བོད་དགའ་ཞིག་རེད། ནང་པའི་གཞུང་ལུགས་གང་དུ་ཡང་མི་ཞིག་ལ་རྒྱུ་མཚན་ཡང་དག་ཅི་ཡང་མེད་པར་དད་པ་མགོ་སྒུར་བྱེད་དགོས་ལུགས་ཤིག་གསུངས་མེད། གལ་སྲིད་རང་གཞན་གཉིས་ཕན་གྱི་བསམ་བློའི་རྒྱབ་རྟེན་ཡང་དག་པ་ཞིག་ཡོད་ན། སྤྲུལ་སྐུ་རྒྱགས་པ་ཙམ་མ་ཟད་སྲང་བར་གྱི་ཁྱི་ཞིག་ལ་ཕྱག་འཚལ་ན་ཡང་ནང་བའི་ཆོས་ཀྱི་དགོངས་དོན་དང་འགལ་ཡོད་རྒྱུ་མ་རེད། ཡིན་ན་ཡང་། རྒྱུ་མཚན་ཤེས་པའི་དད་པ་དང་རྨོངས་དད་གཉིས་བསྲེས་ནས་བོད་མི་ཡོངས་རྫོགས་རྨོངས་དད་པ་ཡིན་པར་བསྒྲུབས་པ་ནི་དོན་ལ་རང་ཉིད་བོད་ཀྱི་ཆོས་དང་རིག་གཞུང་གཉིས་ཀའི་ཕྱོགས་སུ་ཆ་རྒྱུས་ཅི་ཡང་མེད་པའི་ནང་གི་དེ་ཉིད་ཕྱིར་འདོན་བྱས་པ་ཙམ་མོ། །
oh that’s really true
hahhahaaaaaaaa