ཉེན་རྟོག་པའི་རྒྱབ་ཁབ་དང་དེའི་ངོ་ཚ།

པེ་ཅིན་ཨོ་ལིམ་པིག་མཛད་སྒོ་འཚོགས་སའི་བྱེའུ་ཚང་ཞེས་པའི་ལུས་རྩལ་ར་བ་བཟོ་འགོད་བྱེད་མཁན་གྱིས་རྒྱ་ང་གཞུང་ནི་ཉེན་རྟོག་པའི་སྲིད་གཞུང་ཞིག་ཏུ་གྱུར་འདུག་ལ། ཁོང་ཚོས་དབང་ཤུགས་ལ་བརྟེན་ནས་འགྲོ་བ་མིའི་ཐོབ་ཐང་རྡོག་རོལ་དང་། རྒྱལ་སྤྱིའི་སྤྱི་ཚོགས་ཀྱི་མཉམ་རོགས་འཕྲོ་བརླག་གཏོང་གི་འདུག་ཟེར།

ཨོ་ལིམ་པིག་རྩེད་འགྲན་ར་བ་བྱེའུ་ཚང་ཞེས་པ་དེ་བཟོ་འགོད་བྱེད་མཁན་ཨི་ཝེ་ཝེ་ཞུ་བས་གྷར་ཌན་གསར་ཁང་ལ་འགྲེལ་བརྗོད་བྱས་དོན། རྒྱ་ནག་གཞུང་གིས་ཨོ་ལིམ་པིག་བདེ་འཇགས་ལས་དོན་ལ་ཁ་གཡར་ཏེ་རྒྱལ་སྤྱིའི་མཉམ་རོགས་འཕྲོ་བརླག་ལ་གཏོང་གི་འདུག་ལ། བདེ་འཇགས་ཀྱི་ལས་དོན་དེས་རྒྱལ་ཁབ་འདི་ཉེན་རྟོག་པའི་སྲིད་གཞུང་ལྟ་བུ་ཞིག་ལ་མཐོང་གི་འདུག་ཟེར།

ཨི་ཝེ་ཝེ་ཡིས་བཤད་དོན། རྒྱ་ནག་འཇིགས་སྐུལ་རིང་ལུགས་པའི་ཉེན་ཁ་ལ་ཁ་གུར་ཏེ་ཁོང་ཚོའི་དབང་ཤུགས་ཇེ་བཙན་ལ་གཏོང་གི་འདུག་ཟེར་ལ། དེང་རབས་ཀྱི་འཕྲུལ་ཆས་བེད་སྤྱོད་བཏང་སྟབས། ཁོང་ཚོའི་སྟངས་འཛིན་ནི་ད་བར་བྱུང་མྱོང་མེད་པའི་ཚད་ལ་སླེབས་འདུག འདི་ནི་སྲིད་གཞུང་གི་དབང་ཆ་བེད་སྤྱོད་གཏོང་ཕྱོགས་ཤིག་རེད། མི་རྣམས་ཀྱི་གཞི་རྩའི་ཐོབ་ཐང་རྣམས་ཡོངས་སུ་བརྡལ་བཤིག་གཏོང་གི་འདུག འདི་ནི་ཨོ་ལིམ་པིག་རྩེད་འགྲན་རེད་དམ་ཡང་ན། དམག་འཁྲུག་ཅིག་རེད། ཅེས་དྲིས་ཡོད་པ་རེད།

ཁོང་ལྟར་ན་རྒྱ་ནག་གིས་བདེ་འཇགས་སྲུང་སྐྱོབ་ཅེས་པ་ཤུགས་ཅེར་གླེང་སྟེ། ཨོ་ལིམ་པིག་ལུས་རྩལ་གྱི་ཁོར་ཡུག་དེར་གཏོར་སྐྱོན་གཏོང་གི་ཡོད་འདུག རྒྱ་ནག་ནང་ཁུལ་གྱི་གསར་འགྱུར་བརྒྱུད་ལམ་ཞིག་ལྟར་ན། རྒྱ་ནག་གཞུང་གིས་པེ་ཅིན་གྱི་ཨོ་ལིམ་པིག་རྩེད་འགྲན་སྐབས་ཉེན་རྟོག་པ་ ༡༠༠༠༠༠ དང་། པར་ཆས་ ༣༠༠༠༠༠ བཙུགས་ཡོད་ལ། བྱེའུ་ཚང་ར་བའི་གཤམ་དུ་བར་སྣང་འཕུར་མདེལ་འགོག་བྱེད་བཙུགས་ཡོད་འདུག གྲོང་ཁྱེར་ནང་དུ་འགྲོ་སར་ཞིབ་བཤེར་ས་ཚིགས་གསུམ་ཡོད་ལ། ངོ་རྟགས་ལག་འཁྱེར་ཞིབ་བཤེར་གྱི་ལས་དོན་མུ་མཐུད་ནས་བཟོ་བཞིན་ཡོད་ཚུལ་འདུག

ཨི་ཝེ་ཝེས་བརྗོད་དོན། ངས་བལྟས་ན་འདི་ནི་ངོ་ཚ་ཞིག་རེད། འདི་ནི་མཐོང་ཤོར་བ་ཞིག་རེད། ཐོག་མའི་བསམ་ཚུལ་ནི་རྒྱལ་སྤྱིའི་སྤྱི་ཚོགས་མགྲོན་འབོད་བྱས་ཏེ། འགྲོ་བ་མིའི་གུས་བརྩི་དང་རིན་ཐང་མཉམ་སྤྱོད་བྱེད་པ། ཞི་བདེ་དང་འཆམ་མཐུན་གླེང་གི་ཡོད་པ་རེད། ཡིན་ནའང་དེ་རིང་། ཁྱེད་ཀྱིས་ཉེན་རྟོག་པ་ག་ས་གང་ནས་མཐོང་གི་རེད། གྲོང་པ་ཁྱིམ་མཚེས་གང་དུ་ཕྱིན་ནའང་དེ་རུ་བདེ་འཇགས་ཀྱི་ལད་དོན་ཤུས་ཆེར་སྤེལ་གྱི་ཡོད་པ་རེད། འདི་པེ་ཅིན་གཅིག་པུ་མ་རེད། རྒྱ་ནག་གི་ཡུལ་ལུང་གང་སར་ཁྱབ་ཡོད་པ་རེད། མི་རྣམས་ནི་དངོས་གནས་ཉེན་རྟོག་པའི་སྲིད་གཞུང་ཞིག་གི་འོག་ན་བསྡད་ཡོད་པ་རེད་ཅེས་བརྗོད་ཡོད་པ་རེད།