ཟས་བཅད་ངོ་རྒོལ་བ་རྣམས་བཙན་འཕྲོག

ལྡི་ལི། དུས་བབ། ༠༦།༠༨།༢༠༠༨།

བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་རྒྱ་གར་རྒྱལ་ས་ལྡི་ལིར་ཟླ་སྔོན་མའི་ཕྱི་ཚེས་ ༢༨ ཉིན་ནས་བོད་མི་དྲུག་གིས་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་སྟེ། ད་ལྟའི་བར་ཉིན་དགུ་འགྲོ་བཞིན་ཡོད་ནའང༌། ཟླ་འདིའི་ཚེས་ ༥ ཉིན་གྱི་དགོང་མོ་ཆུ་ཚོད་ ༡༠ དང་སྐར་མ་ ༡༥ ཐོག་རྒྱ་གར་ཉེན་རྟོག་པ་ ༥༠༠ ལྷག་ཡོང་སྟེ། བོད་མི་ཟས་བཅད་ངོ་རྒོལ་བ་དེ་དག་བཙན་འཕྲོག་གིས་རྒྱ་གར་སྨན་ཁང་དུ་ཁྲིད་ཡོད་པ་དང༌། དེ་དང་མཉམ་དུ་གཞན་བོད་མི་ ༨༦ ཙམ་ཡང་འཛིན་བཟུང་བཙོན་འཇུག་བྱས་ཡོད་འདུག འོན་ཀྱང༌། ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༡༡ ཐོག་གཞོན་ནུའི་གོ་སྒྲིག་འོག་བསྐྱར་དུ་བོད་མི་ ༤ དང༌། རྒྱ་གར་ལྷོ་ཕྱོགས་མ་ཌུ་ར་སུ་ནས་ཕེབས་པའོ་བོད་དོན་རྒྱབ་སྐྱོར་བ་ལྕམ་ཨན་ཌི་ཨ་ཤ་ཡ་བཅས་མི་ ༥ ཡིས་ས་ཚུགས་དེ་གར་དུས་ཚོད་ངེས་མེད་ཀྱི་ཟས་བཅད་ངོ་རྒོལ་མགོ་འཛུགས་ཞུས་ཡོད་ལ། ཉིན་དེའི་སྔ་དྲོ་བོད་ཀྱི་གཞོན་ནུ་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་ཡོད་པ་དང༌། སྐབས་དེར་དབུས་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་བརྗོད་རྒྱུར། ཟླ་སྔོན་མའི་ཚེས་ ༢༨ ཉིན་ནས་མགོ་འཛུགས་ཀྱིས་བོད་མི་རྒྱལ་གཅེས་པ་དྲུག་གིས་བོད་བསྟན་པ་ཆབ་སྲིད་ཀྱི་ཆེད་དུ་ཟས་བཅད་ཆུ་བཅད་ཀྱི་ངོ་རྒོལ་གནང་སྟེ་ཉིན་དགུ་འགྲོ་བཞིན་ཡོད་པའི་མཚམས་འདིར། ཁོང་ཚོའི་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་སྟབས། ཁ་སང་དགུང་མོ་ཆུ་ཚོད་ ༡༠ དང་ཕྱེད་ཀའི་ཐོག་རྒྱ་གར་ཉེན་རྟོག་པ་ ༥༠༠ ཙམ་ཡོང་སྟེ་སྨན་ཁང་ལ་བཙན་གྱིས་ཁྲིད་སོང༌། སྔོན་མ་ཐེངས་ཁ་ཤས་ལ་ཉེན་རྟོག་པ་ཡོང་སྟེ་ཁོང་ཚོ་འཁྲིད་རྩིས་བྱས་ཀྱང༌། བོད་པ་དང་བོད་པར་རྒྱབ་སྐྱོར་བྱེད་མཁན་མང་པོས་འཁྲིད་དུ་བཅུག་ཡོད་པ་མ་རེད། ཁ་སང་དགོང་མོ་མི་ཉུང་བའི་གོ་སྐབས་དང་བསྟུན་ཏེ། ཟས་བཅད་ངོ་རྒོལ་བ་རྣམས་བཙན་ཁྲིད་བྱས་སོང་ལ། དེ་དང་མཉམ་དུ་བོད་མི་གཞན་ ༨༦ ཙམ་ཡང་འཛིན་བཟུང་བཙོན་འཇུག་བྱས་སོང༌། འོན་ཀྱང་འདི་དག་ང་ཚོས་རླབས་ཆེན་དང་གཟི་བརྗིད་ཆེན་པོར་ངོས་འཛིན་ཞུ་དགོས། རྒྱལ་ཁབ་ཅིག་དང་མི་རིགས་ཤིག་གི་ཆེད་དུ་འཐབ་རྩོད་བྱེད་པར་ངེས་པར་དུ་བློས་གཏོང་ཆེན་པོ་བྱེད་དགོས། བོད་རང་བཙན་དེ་གནམ་ནས་ཟགས་རྒྱུ་དང༌། ས་ནས་སྐྱེ་རྒྱུ་ནམ་ཡང་ཡོད་པ་མ་རེད། དུས་ཚོད་ཡོད་མཁན་ཚོས་དུས་ཚོད་བཏང༌། དཔལ་འབྱོར་བོད་མཁན་ཚོས་དཔལ་འབྱོར་བཏང༌། ཤེས་ཡོན་ཡོད་མཁན་ཚོས་ཤེས་ཡོན་བཏང༌། ཐ་ན་སྲོག་ཀྱང་གཏོང་རྐྱང་བྱ་དགོས། བོད་རང་བཙན་ལ་རིན་ཐང་ཞིག་མ་སྤྲད་པར་འགྲུབ་རྒྱུ་གང་ཡང་ཡོད་པ་མ་རེད། བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ལས་འགུལ་འདི་མགོ་འཛུགས་ཞུ་དུས་ནས་དཀའ་ངལ་འདི་ལྟར་ཡོང་རྒྱུར་ཚོད་དཔག་ཡོད། དེ་རིང་སླར་ཡང་ང་ཚོའི་མི་ ༥ ཡིས་ཟས་བཅད་ངོ་རྒོལ་མགོ་འཛུགས་ཞུ་རྒྱུ་ཡིན་ལ། ཉིན་འདི་འགར་ཕྱོགས་མཐའ་ཁག་ནས་མི་མང་པོ་རྒྱལ་ས་ལྡི་ལིར་འདུ་འཛོམས་གནང་བཞིན་ཡོད། སང་ཉིན་ནས་མགོ་འཛུགས་ཀྱིས་རྒྱ་ནག་ཨོ་ལིམ་པིག་ལ་ངོ་རྒོལ་གྱི་ལས་འགུལ་སྣ་ཚོགས་ཤིག་སྤེལ་རྒྱུ་ཡིན། ད་ལྟ་ང་ཚོ་རང་དབང་ལུང་པར་ཡོད་པ་ཚོས་རང་སྲོག་བློས་གཏོང་བྱེད་པའི་དུས་ཚོད་ལ་སླེབས་ཡོད། རྒྱ་ནག་ནང་འཚོགས་ལ་ཉེ་བའི་རྒྱལ་སྤྱིའི་རྩེད་འགྲན་དེ་རྒྱ་ནག་གིས་ཁོ་ཚོར་ཞི་བདེ་དང་འགྲོ་བ་མིའི་ཐོབ་ཐང་ཡོད་པ། དཔལ་འབྱོར་ཡར་རྒྱས་ཡོད་ཚུལ་སོགས་རྒྱལ་སྤྱིར་ཁྱབ་བསྒྲགས་ཀྱི་གོ་སྐབས་ཡག་ཤོས་ཤིག་ལ་རྩི་བཞིན་ཡོད་པ་བཞིན། ང་ཚོས་ཀྱང་གོ་སྐབས་འདི་མ་ཤོར་བ་བྱ་རྒྱུ་གལ་ཆེན་པོ་ཡིན། འདས་པའི་ལོ་ངོ་ལྔ་བཅུའི་རིང་ང་ཚོར་འདི་ལྟ་བུའི་གོ་སྒབས་རག་མེད་ལ། མ་འོངས་པར་ཡང་རག་རྒྱུ་ཁག་པོ་རེད་ཅེས་བརྗོད་སོང༌།

སྐབས་དེར་འདི་གའི་གསར་འགོད་པས་ཚོགས་གཙོ་ཚེ་དབང་རིག་འཛིན་ལགས་སུ་ཐེངས་འདིའི་ལས་འགུལ་ལ་མི་ག་ཚོད་ཅིག་འདུ་འཛོམས་ཡོང་རྒྱུར་ཚོད་དཔག་བྱེད་ཀྱིན་ཡོད་པ་དང༌། སྔོན་མ་དག་དང་མི་འདྲ་བར་ལས་འགུལ་ལམ་ལྷོང་ཡོང་རྒྱུར་གྲ་སྒྲིག་གང་འདྲ་ཡོད་མེད། དེ་བཞིན་ཐེངས་འདིར་མི་དམངས་ཀྱི་འགྲོ་གྲོན་ཐད་གོ་སྒྲིག་གང་འདྲ་ཡོད་མེད་ཐད་བཅར་འདྲི་ཞུས་པར་ཁོང་གིས། ཐེངས་འདིར་ཉུང་མཐར་མི་ལྔ་སྟོང་ཙམ་འདུ་འཛོམས་ཡོང་གི་རེད་བསམ་ཡོད། གང་ཡིན་ཟེར་ན། ཐེངས་འདིར་སྔོན་མ་དག་གི་དུས་ཚོད་དང་གཏན་ནས་མི་འདྲ། རྒྱལ་སྤྱིའི་མིག་རྒྱ་ནག་ཨོ་ལིམ་པིག་ལ་གཏད་ཡོད། ང་ཚོའི་ངོས་ནས་གང་ཡོང་གིས་རྒྱ་གར་གཞུང་ལ་ཆོག་མཆན་ཞུ་བ་སོགས་ཞུས་ཡོད་ལ། ཕྱོགས་མཐའ་ཁག་ནས་ཕེབས་པ་ཚོ་སོ་སོའི་ས་གནས་སྣེ་ཁྲིད་པ་ཚོའི་སྟངས་འཛིན་འོག་འགྲོ་དགོས་པའི་ལས་བགོ་བྱས་ཡོད། ལས་འགུལ་བའི་འགྲོ་གྲོན་ཐད། སྔོན་མ་ནས་ཞུས་ཟིན་པ་ལྟར་སོ་སོའི་ངོས་ནས་གཏོང་ཐུབ་མཁན་ཚོ་ཡག་པོ་རེད། དེ་མི་ཡོང་མཁན་ཚོར་ང་ཚོས་ཟ་འཐུང་དང་སྡོད་གནས་ཆ་ཚང་གྲ་སྒྲིག་ཞུས་ཡོད་ཅེས་བརྗོད་བྱུང༌།

ཉིན་གུང་རྗེས་འདི་གའི་གསར་འགོད་པ་ཆེད་དུ་རྒྱ་གར་སྨན་ཁང་དུ་ཟས་བཅད་ངོ་རྒོལ་བ་དག་གི་གནས་སྟངས་ལ་རྒྱུས་ལོན་བྱེད་དུ་སོང་བ་ཡིན། བོད་པ་ཟས་བཅད་ངོ་རྒོལ་བ་རྣམས། རམ་མན་ནེ་ཡ་ཞེས་པའི་རྒྱ་གར་སྨན་ཁང་གི་ཛ་དྲག་ཉེན་སྐྱོབ་ཚན་ཁག་ནང་བཞག་འདུག་ལ། ཉེན་རྟོག་པ་བཅུ་གྲངས་ཤིག་གིས་སྲུང་སྐྱོབ་དམ་པོ་བྱས་འདུག སྐབས་དེར་ངས་ཁོང་ཚོའི་གཉེན་ཉེ་ཞིག་ཡིན་ཚུལ་བཤད་དེ་ནང་དུ་འཛུལ་ཐབས་བྱས་ཟིན་ཀྱང༌། ཁོང་ཚོར་སྐད་ཆ་འདྲི་རྒྱུ་དེ་ཙམ་སྟབས་བདེ་མ་བྱུང་ལ། པར་རྒྱག་རྒྱུའི་སྟབས་ཡང་མ་འགྲིག ཟས་བཅད་ངོ་རྒོལ་བ་ཚོར་གནམ་ཁབ་བརྒྱབས་འདུག་ལ། ཁ་ཡང་གྲགས་ཐུབ་གི་མི་འདུག་མོད། ཁོང་ཚོའི་ཁྲོད་ཀྱི་མི་གཅིག་ལ་སྐྱོན་དེ་ཙམ་མེད་སྟབས་ང་ཁོང་གི་གམ་དུ་སོང་སྟེ། གཟུགས་པོའི་གནས་སྟངས་གང་འདྲ་ཡིན་མིན་དང༌། ཉེན་རྟོག་པས་བཙན་གྱིས་སྨན་ཁང་དུ་ཁྲིད་པའི་ཐད་བསམ་ཚུལ་ཅི་ཡོད་སོགས་དྲིས་པར་ཁོང་གིས། ང་ལ་སྐྱོན་ཆེན་པོ་མི་འདུག རོགས་པ་གཞན་རྣམས་ཀྱི་གནས་སྟངས་ཧ་ཅང་སྐྱོ་བོ་རེད། ཐེངས་འདིར་ང་ཚོས་རང་སྲོག་གཏོང་རྒྱུར་བློ་ཐག་རྦད་ཆོད་ཡིན། འོན་ཀྱང༌། ང་ཚོ་ཤི་ས་སྨན་ཁང་ནང་མིན་ཞེས་ཧ་ཅང་བློ་ཕམ་ངང་བརྗོད་སོང༌།

འདི་གའི་གསར་འགོད་པས་ལྡི་ལི་ནས་སྤེལ།