བོད་ཀྱི་དུས་བབ་སྤྱིའི་འདོན་ཐེངས་ ༤༢༡ པའི་སྟེང་གི་རྩོམ་སྒྲིག་པའི་གཏམ།
ཁ་རྡུང་དང་ཁས་ལེན་མང་བོ་ཞིག་བརྒྱུད་དེ་པེ་ཅིན་གྱི་ཨོ་ལིམ་པིག་མཛད་སྒོ་གཟའ་པ་སངས་དགོང་མོར་ཚུགས་སོང་ལ། སྐུ་མགྲོན་དང་ལྟད་མོ་བ་ ༩༡༠༠༠ རྒྱལ་ཡོངས་ལུས་རྩལ་ར་བའི་ནང་འཛོམས་ཤིང་། འཛམ་གླིང་གི་མི་གྲངས་ཐེར་འབུམ་ ༤ ཡིས་བརྙན་འཕྲིན་བརྒྱུད་ལྟད་མོར་བལྟས་ཡོད། ད་ནི་ངོ་རྒོལ་གྱི་རིམ་པ་རྫོགས་ཏེ། ཨོ་ལིམ་པིག་རྩེད་འགྲན་གྱི་སྙིང་སྟོབས་འདིར་དོན་དངོས་ཐོག་ནུས་པ་གང་འདྲ་ཞིག་ཡོད་མེད་དང་། ལྷག་པར་དུ་འཛམ་གླིང་གི་ཆབ་སྲིད་ཚོགས་པ་ཆེ་ཤོས་རྒྱ་ནག་དམར་ཤོག་གཞུང་གི་ཐོག་ལ་ནུས་པ་གང་འདྲ་ཞིག་ཐེབས་མིན་གླེང་བའི་དུས་ཡིན།
རྒྱ་ནག་ཨོ་ལིམ་པིག་རྩེད་འགྲན་གྱི་མགྲོན་བདག་བྱེད་ཆོག་མིན་ཐད་ཕྱོགས་ཁག་གཉིས་སུ་གྱེས་ཡོད་ལ། ཕྱོགས་ཁག་འདི་གཉིས་ནི་བསམ་ཚུལ་རིགས་གཉིས་སུ་གྱུར་ཞིང་། མདོ་དོན་རྩེད་འགྲན་འདིའི་རྗེས་ཀྱི་རྒྱ་ནག་ལ་རྩོད་གླེང་བྱས་པ་རེད། ༧གོང་ས་མཆོག་ནི་འདིའི་ཐད་ནས་རྒྱ་ནག་ལ་རྒྱབ་སྐྱོར་གནང་མཁན་གྱི་གྲས་ཡིན་ལ། ཁོང་གིས་རྩེད་འགྲན་འདིའི་རྗེས་ནས་རྒྱ་ནག་འདི་འཛམ་གླིང་གི་ཁྱིམ་ཚང་ནང་དངོས་སུ་འཛུལ་ཞིང་། འགྲོ་བ་མིའི་རིགས་སྤྱི་མཐུན་ལ་ཡོད་པའི་རིན་ཐང་དང་མཛའ་བརྩེ། རང་དབང་། འགན་ཁུར་བཅས་གཅིག་གྱུར་དུ་འཁྱེར་རྒྱུའི་ཐུགས་རེ་གནང་ཡོད། དོན་དངོས་སུའང་ཕྱི་ཚེས་ ༨ ཀྱི་ཉིན་ནས་བཟུང་འཛམ་གླིང་མི་དམངས་ཀྱིས་རྒྱ་ནག་ལ་བལྟས་ཡོད་ལ། འདི་ནི་ལོ་རྒྱུས་ཐོག་ཐེངས་དང་པོར་འཛམ་གླིང་མི་དམངས་ཀྱིས་རྒྱ་ནག་ལ་དོ་སྣང་སྤྲད་པ་ཤུགས་ཆེ་ཤོས་དེ་ཡིན་པ་དང་། རྒྱ་ནག་གིས་ཀྱང་འཛམ་གླིང་གཅིག རྨི་ལམ་གཅིག་ཅེས་འགྲོ་བ་མིའིི་རིགས་སྤྱི་མཐུན་གྱི་ཞེ་འདོད་དང་འགན་ཁུར་གྱི་འབོད་ཚིག་འོག་ནས་རྩེད་འགྲན་གྱི་སྒོ་ཕྱེ་པ་རེད།
གནའ་བོའི་རྒྱལ་ཁབ་རྙིང་བ་འདིས་རང་ཉིད་དུས་རབས་དང་མཐུན་ཞིང་དེང་རབས་ཀྱི་རྒྱལ་ཁབ་ཅིག་ཏུ་ཆགས་རྒྱུའི་དམ་བཅའ་བརྟན་པོར་བཅིངས་ཡོད་ལ། ཕྱིའི་གནོན་ཤུགས་དང་ནང་གི་གནོང་འགྱོད་ཡོད་ཚད་ཁུར་ནས་ལམ་ཁ་འདིར་སྙེག་ཅིང་། འདས་པའི་ལོ་ ༣༠ ལྷག་གི་རིང་རྒྱ་ནག་གི་ནུས་ཤུགས་ཡོད་ཚད་འདིའི་ཐད་བཏང་བ་རེད། ལོ་འདིར་ཨོ་ལིམ་པིག་པེ་ཅིན་ནས་སྐོང་འཚོགས་བྱས་པ་ནི་རྒྱ་ནག་གི་རྨི་ལམ་དེ་མངོན་འགྱུར་བྱུང་བ་དང་། འཛམ་གླིང་མི་དམངས་ཀྱིས་རྒྱ་ནག་ལ་ངོས་ལེན་བྱས་པའི་དུས་སྟོན་དེ་ཡིན་པར་བསྟན་ཡོད། འདི་ནི་རྒྱ་ནག་གི་ལོ་རྒྱུས་ཀྱི་དུས་ཚིགས་གལ་ཆེན་དེ་ཡིན།
ད་ནི་འཛམ་གླིང་མི་དམངས་ཀྱིས་ཕར་ངོས་ལེན་གྱི་རྣམ་འགྱུར་བསྟན་པ་བཞིན་རྒྱ་ནག་གིས་ཀྱང་རང་ཉིད་འཛམ་གླིང་མི་དམངས་དང་མཉམ་དུ་འགྲོ་བར་ཚུལ་མཐུན་གྱི་རྣམ་འགྱུར་ཞིག་སྟོན་དགོས། འགྲོ་བ་མིའི་སྤྱི་མཐུན་གྱི་རིན་ཐང་དང་རང་དབང་། མཛའ་བརྩེ། འགན་ཁུར་བཅས་མཉམ་དུ་འཁྱེར་དགོས། འདི་ནི་ད་གཟོད་དུས་རབས་དང་མཐུན་ཞིང་དེང་རབས་ཀྱི་ལམ་ཁ་ཡིན། དེ་རིང་འཛམ་གླིང་མི་དམངས་ཀྱིས་རྒྱ་ནག་ལམ་ཁ་འདིར་གོམ་པ་སྤོས་པར་ཕེབས་བསུ་བྱེད་ཀྱིན་ཡོད། ༧གོང་ས་མཆོག་གིས་རྩེད་འགྲན་འདི་ལམ་ལྷོང་ཡོང་བར་གསོལ་བ་སྨོན་ལམ་བཏབས་པ་བཞིན། བོད་མི་རིགས་ཀྱིས་ཀྱང་དགའ་བསུ་བྱེད་འོས་པ་ཞིག་ཡིན།
རྒྱ་ནག་ནི་རིག་གནས་དར་ཆེ་བའི་གནའ་བོའི་རྒྱལ་ཁབ་ཅིག་ཡིན་ཡང་། ལོ་རྒྱུས་ཀྱི་ལམ་སྐེད་ནས་ནོར་འཁྲུལ་ཤོར་ཞིང་། འཛམ་གླིང་མི་དམངས་ཀྱིས་སྐྱོན་བརྗོད་དང་དམའ་འབེབ་བྱས་པ་རེད། རྒྱ་མི་རིགས་ཀྱིས་ད་བར་དུ་ན་ཟུག་དང་གནོང་འགྱོད་འདི་ཁུར་ནས་སླེབས་པ་རེད། ༧གོང་ས་མཆོག་གིས་རྒྱ་ནག་ཁེར་རྐྱང་དུ་མ་འཇོག་རོགས་ཞེས་འཛམ་གླིང་མི་དམངས་ལ་གསུངས་པ་བཞིན། མཐའ་མ་འདིར་རྒྱ་ནག་གིས་རང་ཉིད་ལ་བསྒྱུར་བཅོས་བཏང་བ་བཞིན། འཛམ་གླིང་མི་དམངས་ཀྱིས་ཀྱང་རྒྱ་ནག་ལ་ལག་པ་བཏང་ཞིང་། རྒྱ་ནག་མི་དམངས་མཉམ་དུ་མཛའ་བརྩེ་དང་རང་དབང་གི་རྒྱས་སྟོན་འདི་བཤམས་པ་རེད། འདི་ནི་ད་གཟོད་འཛམ་གླིང་གཅིག རྨི་ལམ་གཅིག ཅེས་པའི་མཐར་ཐུག་གི་གོ་དོན་ཡིན། ཁ་གཡང་ཡིན། རྨི་ལམ་འདིའི་རྒྱབ་ཀྱི་མངོན་སུམ་དེ་ཡིན།
