དཔའ་ཞིང་རྟུལ་ཕོད་ལ་དེས་ཤིང་དཀྱེལ་ཆེ་བའི་ཡར་ཀླུང་གི་དཔའ་རྒོད་ཚོའི་སྙིང་སྟོབས་ཀྱི་སྒུལ་ཤུགས་མ་བཟོད་པའི་རྒྱ་ནག་གི་གོང་མ་ཆེན་མོས་གསེར་གྱི་ཁྲི་འཕང་རྡོ་བཞིན་གཡུགས་ནས། ཤར་ཕྱོགས་སུ་ཝ་བཞིན་བྲོས་པའི་ལོ་རྒྱུས་བྱུང་མྱོང་ལ། ཆུ་བོ་གངྷའི་ཉེ་འགྲམ་གྱི་བྱེ་མའི་ཁུང་བུར་ལྕགས་ཀྱི་ཀ་བ་གནམ་ལ་བསླངས་ནས་བོད་རྒྱལ་ཁབ་ཆེན་མོའི་མངའ་ཐང་ནམ་མཁའི་མཐའ་ལ་གཏུགས་པར་བྱས། འདི་ལྟར་བོད་བཙན་པོའི་སྙིང་སྟོབས་དགུང་དུ་བསྟད་པའི་དཔའ་མཛངས་རྟུལ་ཕོད་ཀྱི་སྙན་གྲགས་ས་ཁྱབ་རྡོ་ཁྱབ་ཏུ་བགྱིས་མྱོང༌། འདི་ལྟར་བསམ་ན། སྙན་གྲགས་འཛམ་བུའི་སྒང་ལ་བཞག་མྱོང་བའི་སྒང་བ་བོད་ཀྱི་བཙན་པོ་ཚོ་འོད་ཀྱི་རྨུ་ཐག་ལ་འཐམས་ཏེ་དཔའ་ཉམས་དང༌། ང་རྒྱལ་གྱི་ཁྲོད་ནས་མི་མངོན་པའི་དབྱིངས་སུ་གཤེགས་ཤུལ་ན། ལས་ངན་པའི་ཁོང་ཚོའི་བུ་རབས་ཚ་རྒྱུད་ཚོའི་མགོ་ལ་ཡ་ང་བའི་ཆག་འཇིག་བསྟུན་མར་བྱུང་མྱོང༌། ཧོར་སེ་ཆེན་རྒྱལ་བོས་དམག་རྟ་ཁྲི་ཕྲག་གིས་ལམ་ཁ་ཁྲིད་ནས་བོད་རྒྱལ་ཁབ་ཆེན་མོའི་རི་ཀླུང་ཐང་གསུམ་ཁྲག་གིས་གཤིན་སར་བྱས་མྱོང་ལ། ཆོས་ཀྱི་རྒྱལ་བོ་རུ་བསྙད་པའི་སོག་པོའི་དམག་དཔོན་ཞིག་གིས་རྟ་དམག་བྱེ་བའི་དབུང་ཡང་ཁྲིད་ནས་གཙང་བ་རྒྱལ་བློན་ཚོ་སྤྱང་ཁྱུས་ར་ཁྱུ་འདེད་འདེད་དང༌། གླག་མོས་ལུ་གུ་འཛིན་འཛིན་བྱས་མྱོང༌། འདི་ནས་བརྩིས་པའི་མི་ལོ་ལྔ་བཅུའི་ཡར་སྔོན་དུ། གོང་མ་འཇམ་དབྱངས་ཆེན་མོའི་རྒྱལ་རྒྱུད་དུ་བསྙད་པའི་གདོང་སྨེ་ཅན་གྱི་ཆབ་སྲིད་པ་དེས། སྒང་བ་བོད་ཀྱི་ས་ཁམས་ཧྲིལ་བོ་རྡུལ་འཚུབ་སེ་བཏང་ནས། རྨ་འབྲིའི་རླབས་རྒྱུན་གྱིས་ཀྱང་མི་ཁོགས་པའི་ཡ་ང་བའི་དམག་དཔུང་གིས་བོད་ཆེན་པོའི་ས་ཁྱོན་ཡོངས་རྫོགས་ཡོས་འཐག་བགྱིས་ཤིང༌། བུ་བསད་ཨ་མ་ཡི་ངུ་འབོད་དང༌། ཟློག་དཀའ་བའི་ལོ་རྒྱུས་ཀྱི་གོད་ཆག་རབས་དང་རིམ་པར་བྱུང༌། བཟོད་དཀའ་བའི་བཙན་གནོན་གྱི་སྐྱོ་གར་གཅིག་ཐོག་གཅིག་ལ་བརྩེགས། དམར་གསོད་བཙན་གནོན་གྱི་ལོ་ཟླ་འདི་ལྟར་ཟོ་ཆུན་གྱི་འཁོར་ལོ་ལྟར་འཁོར་ནས་དེ་རིང་གི་དུས་ལ་ཐུག་སོང་ན་ཡང༌། འགྲོ་བ་མིའི་རིགས་ཀྱི་དམར་གསོད་ཀྱི་སྐྱོ་གར་ད་དུང་མཚམས་མ་ཆད་པར་མུ་མཐུད་ནས་འབྱུང་བཞིན་འདུག སྤྱིར་ན་དེ་རིང་ནི་འཆམ་མཐུན་གྱི་ཉི་མ་ཞིག་རེད། དེ་རིང་ནི་ཞི་བདེ་ཡི་དུས་ཚིགས་ཤིག་རེད་ཅེས་མི་ཤེས་ཚང་མས་གླེང་གི་ཡོད་པ་རེད། དེ་བས་ཕྱིན་ཟིན་པའི་ཁྲག་དྲི་བྲོ་བའི་ལོ་ཟླ་དག་བརྗེད་པར་བགྱིས་ན་ཆོག མ་གླེང་ནའང་ཆོག་མོད། ད་ནི་ང་ཚོས་མ་གླེང་ས་མི་འགྲོ་བའི་ཚད་ལ་གཏུགས་སོང༌། ལག་ན་ཕྲེང་བ་དང་ཁ་ན་མ་ཎི་ལས་མེད་པའི་བོད་པ་ཚོ་བསྡད་ན་འདུག་ས་དང༌། བྲོས་ན་འབྲོ་ས་མེད་པའི་ཚད་ལ་གཏུགས་སོང༌། སུམ་ཉིས་ས་ལ་དཔའ་རྟགས་བླ་ན་མེད་པ་འཇོག་མྱོང་བའི་བོད་བཙན་པོའི་ཕྱི་རབས་ཚོའི་མགོ་ལ་ཆག་འཇིག་རྦབ་རྡོ་བཞིན་གཅིག་རྗེས་གཉིས་མཐུད་ཀྱིས་བབ་ཡོང་དུས། མེས་པོ་སྙིང་སྟོབས་ཅན་དག་གི་ཁྲག་རྒྱུན་ལ་ཡང་བསྐྱར་བླ་ན་མེད་པའི་གསོན་ཤུགས་རྒྱས་མགོ་བརྩམས་པ་རེད། གསུམ་གཅིག་བཞིའི་དོན་རྐྱེན་ཀྱིས་བོད་བཙན་པོའི་བྲང་ཁོག་གི་སྙིང་ཁྲག་ཁོལ་མ་ཡང་བསྐྱར་འཕྱུར་བའི་འགོ་བརྩམས་པ་རེད། མེས་པོ་དཔའ་ཉམས་ཅན་དེ་དག་ར་བྲག་ལ་གཤར་ལ་བཞིན་གཅིག་རྗེས་གཉིས་མཐུད་ཀྱིས་མི་མངོན་པའི་ཁམས་ལ་འཕྲེང་ཞེན་དང་བཅས་གཤེགས་སོང་ནའང༌། ཁོང་ཚོའི་བདེན་པའི་མི་གཞི་དང་བླ་མེད་ཀྱི་སྙིང་སྟོབས་དག་ཁ་བ་རི་བོའི་ཁོང་གསེང་རེ་རེ་ན་མི་འགྱུར་ཐེར་ཟུག་གིས་གནས་འདུག་པའི་བརྡ་རྟགས་གསལ་བོར་བསྟན་སོང༌། གསུམ་གཅིག་བཞིའི་སྔ་ཕྱི་ཡི་ཉིན་མཚན་དེ་དག་ནི་བདག་གི་བཙན་པོ་ཚོའི་བླ་ན་མ་མཆིས་པའི་སྙིང་སྟོབས་ལ་ཡང་བསྐྱར་གསོན་ཤུགས་བརྟས་པའི་ལོ་རྒྱུས་ཀྱི་དཀྱོགས་མཚམས་ཆེན་པོ་ཞིག་རེད། དུས་འདི་ནས་བཟུང་སྟེ་བདག་གི་བོད་པ་ཚོས་སེམས་པ་སེམས་པར་བསྙེས་ཤིང༌། ལག་པ་ལག་པར་ཁེན་ནས་དམངས་གཙོ་དང༌། ཞི་བདེ་ལ་མི་དགའ་བའི་སྲིད་གཞུང་དམར་བོ་ལ་ཁྲག་དམར་བོས་རྒོལ་ལན་སློག་ཅིང་རང་དབང་དང་ཞི་བདེ་ནི་གཅེས་པར་འོས་པའི་ཚེ་སྲོག་ལས་ཀྱང་རྩིས་ཆེ་བའི་བདེན་ལུགས་གསལ་བོར་བསྒྲགས། མནན་ན་མ་ནོན་པའི་ཁྲག་རྩའི་སྦུབས་ཀྱི་ཞེ་སྡང་དང༌། བཀག་ན་མི་ཁོག་པའི་སྙིང་སྟོབས་ཀྱི་འགུལ་སྐྱོད་དེས་ལག་དམར་བ་ཚོའི་སྲིད་གཞུང་དམར་བོ་དེའང་ཡོམ་ཡོམ་གཡོ་བར་བྱས་པས། ཁོ་བ་ཚོའི་ཁྲག་དམར་ཙར་ཙར་གྱི་ལག་པ་དེ་དག་གིས། ཁོ་བ་ཚོའི་སྒྲ་སྐད་འུར་འུར་གྱི་མཚོན་ཆ་དེ་དག་གིས་ཡང་བསྐྱར་བོད་ཞི་བའི་ཞིང་ཁམས་ཆེན་མོ་ཁྲག་དམར་ཆིལ་ལེ་བཏང་ནའང༌། ལག་དམར་བ་ཚོར་མགོ་འབུལ་ལུས་འབུལ་མི་བྱེད་པའི་བོད་བཙན་པོའི་བདེན་པའི་མི་གཞི་དང༌། སྙིང་སྟོབས་ནི་ཇི་སྲིད་འཚོ་བའི་བར་དུ་གནས་པའི་དཔའ་ཞིང་རྟུལ་ཕོད་ཀྱི་ཁྲག་རྒྱུན་ལྷོག་ལྷོག་འཕྱུར་གྱིན་འདུག འདི་ནི་བཙན་པོའི་སྙིང་སྟོབས་ཀྱིས་བསྒུལ་བའི་སྒང་བ་བོད་པ་ཚང་རེད། འདི་ནི་རང་དབང་དང་ཞི་བདེ་ལ་དགའ་བའི་ཆོས་ལྡན་བོད་པ་ཚང་རེད། འདི་ནི་སུམ་ཉིས་ས་ཆེན་བདག་གིར་བགྱིས་མྱོང་བའི་གདོང་དམར་བོད་པ་ཚང་རེད།།
