རྒྱ་ནག་གིས་ ༢༠༠༡ ལོའི་ཁས་བླངས་དམ་བཅའ་དང་གཏན་བྲལ་བྱས་ཏེ། རྒྱལ་སྤྱིའི་རྩེད་འགྲན་གྱི་གོ་སྐབས་དང་བསྟུན། བཙོན་པ་སྟོང་ཕྲག་མང་པོ་བཙོན་འཇུག་མནར་གཅོད་དང༌། གསར་འགོད་ཐོབ་ཐང་ལ་རྩིས་མེད་རྡོག་རོལ་སོགས་ཀྱི་ད་ལྟའི་རྒྱ་ནག་ཏེ་རྒྱལ་སྤྱིའི་བཙོན་རྭ་ཆེ་ཤོས་དེ་ཆགས་ཡོད་ལ། ང་ཚོས་རྒྱ་ནག་གི་བྱེད་སྟངས་འདི་དག་ལ་མཐའ་གཅིག་ཏུ་ངོ་རྒོལ་བྱེད་བཞིན་ཡོད། ཨོ་ལིམ་པིག་མཇུག་མ་སྒྲིལ་བར་དུ་འགྱུར་བ་མ་བཏང་ཚེ་ང་ཚོས་ལས་འགུལ་ནམ་ཡང་མཚམས་འཇོག་བྱེད་ཀྱི་མིན་ཅེས་རྒྱལ་སྤྱིའི་རང་དབང་གསར་འགོད་ཚོགས་པའི་བརྗོད་ཡོད།
ཕྱི་ཚེས་ ༡༦ ཉིན། ཕེ་རི་སིར་རྟེན་གཞི་བྱས་པའི་རྒྱལ་མཚམས་མེད་པའི་གསར་འགོད་པས་དྲ་ལམ་ཁག་ཏུ་རྒྱ་ནག་ནང་འགྲོ་བ་མིའི་ཐོབ་ཐང་དང༌། སྨྲ་བརྗོད་རང་དབང༌མེད་པ། ཆབ་སྲིད་བཙོན་པ་རྣམས་གློད་གྲོལ་སོགས་ཀྱི་ཐད་དྲ་ལམ་ནས་ངོ་རྒོལ་གྱི་ལས་འགུལ་སྤེལ་ཡོད་པ་དང༌། ད་ལྟའི་ཆར་མི་ ༡༧༨༠༠ ལྷག་གིས་ཁོང་ཚོའི་ལས་འགུལ་ལ་རྒྱབ་སྐྱོར་བྱས་ཡོད་འདུག་ལ། རྒྱབ་སྐྱོར་བྱེད་མི་ཉིན་རེ་ནས་ཉིན་རེ་ཇེ་མང་དུ་འགྲོ་བཞིན་ཡོད་པ་རེད།
ཁོང་ཚོའི་སྒྲིག་འཛུགས་འདིའི་དམིགས་ཡུལ་གཙོ་བོ་ནི། རྒྱ་ནག་གིས་ད་ལྟའི་དུས་སྐབས་འདིར་འགྲོ་བ་མིའི་རང་དབང་དང་ཐོབ་ཐང་རྩིས་མེད་རྡོག་རོལ་ཏུ་གཏོང་བཞིན་པའི་གནས་སྟངས་དང༌། འགྲོ་བ་མིའི་སྨྲ་བརྗོད་རང་དབང་ལ་བཀག་འགོག་བྱས་པ། གསར་འགོད་རང་དབང་ལ་བཀག་འགོག ད་དུང་ཆབ་སྲིད་བཙོན་པ་ཡོངས་གློད་གྲོལ་གཏོང་དགོས་པའི་རེ་འདུན་དང་བཅས་ངོ་རྒོལ་ལས་འགུལ་སྤེལ་བཞིན་ཡོད་པ་དང༌། ཁོང་ཚོས་རྒྱ་ནག་གཞུང་ལ་འདིའི་སྐོར་འགྱུར་བ་གཏོང་རྒྱུའི་རེ་འདུན་འཡང་བཏོན་ཡོད། ཐེངས་འདིའི་ལས་འགུལ་སྐབས་ཁོང་ཚོས་འཛམ་གླིང་ཡོངས་ལ་སྒྲོག་གིན་པའི་འཕྲེད་དར་གྱི་བརྗོད་བྱ་གཙོ་བོ་ནི། ཨོ་ལིམ་པིག་སྐབས་ཆབ་སྲིད་བཙོན་པ་གློད་གྲོལ་དང༌། ཨོ་ལིམ་པིག་ལ་དགའ་ཞེན་ཡོད་པ་དང༌། བཙན་གནོན་བྱས་པར་དགག་པ་ཡོད་ཚུལ་གཙོ་བོར་བཀོད་དེ་དྲ་ལམ་ནས་རྒྱ་ནག་ལ་ལས་འགུལ་ཤུགས་ཆེར་སྤེལ་ཡོད།
སྒྲིག་འཛུགས་འདིའི་ཨ་རིའི་ཝ་ཤིན་ཌོན་གྱི་ཡན་ལག་ཚོགས་གཙོ་མོའོ་རོ་ཡིས། རྒྱལ་མཚམས་མེད་པའི་གསར་འགོད་མཐུན་ཚོགས་འདི་ནི་ ༡༩༧༩ ལོར་ཕེ་རི་སི་ནང་དབུ་འཛུགས་གནང་བ་ཡིན་ལ། སྒྲིག་འཛུགས་འདི་ནི་གསར་འགོད་པའི་ཆབ་སྲིད་ཀྱི་བཀག་རྒྱའི་ཐད་སྲུང་སྐྱོབ་བྱེད་རྒྱུ་དང༌། གསར་འགོད་རང་དབང་ལ་རྒྱབ་སྐྱོར་བྱེད་པའི་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན། ང་ཚོའི་ཚོགས་པ་འདིར་འཛམ་གླིང་གི་གཞུང་འབྲེལ་མ་ཡིན་པའི་ཚོགས་པ་ ༦༠ ལྷག་གིས་གྲུབ་ཅིང༌། རྒྱལ་སྤྱིའི་སྨྲ་བརྗོད་རང་དབང་འདུ་འཚོགས་ཀྱི་ཚོགས་པ་ཆེ་ཤོས་དེ་ཡིན། རྒྱལ་ཁབ་ ༡༦ ནང་དུ་ཡན་ལག་ལས་ཁུངས་ཡོད་པའི་རྒྱལ་སྤྱི་རང་བཞིན་གྱི་སྒྲིག་འཛུགས་ཤིག་ཡིན། ཅེས་བརྗོད་ཡོད།
ཁོང་གིས་བཤད་དོན། ཕྱི་ཚེ་ ༨ ནས་མགོ་འཛུགས་ཀྱིས་ལས་འགུལ་སྤེལ་མགོ་བརྩམས་པ་ཡིན་ལ། ད་ལྟའི་ཆར་ཉིན་དགུ་ལྷག་འགྲོ་གིན་ཡོད། ལས་འགུལ་སྤེལ་ཡུལ་རྒྱལ་སྤྱིའི་དྲ་ལམ་ཁག་ཏུ་རྒྱ་ནག་གི་ད་ལྟའི་ཡ་ང་བའི་གནས་སྟངས་ལ་ཁ་གཏད་བྱ་རྒྱུ་དེ་ཡིན། ད་ལྟའི་ཆར་རྒྱབ་སྐྱོར་བ་མི་གྲངས་ ༡༧༠༠ ལས་བརྒལ་ཡོད་ལ་མི་གྲངས་ད་དུང་འཕར་བཞིན་ཡོད་འདུག ང་ཚོའི་ངོས་ནས་ལས་འགུལ་འདི་ཕྱི་ཚེས་ ༢༤ བར་མུ་མཐུད་སྤེལ་རྒྱུའི་དམ་བཅའ་ཡོད། གལ་སྲིད་རྒྱ་ནག་གཞུང་ཕྱོགས་ནས་ང་ཚོས་བཏོན་པའི་དགོས་འདུན་ལ་ཡ་ལན་དང་འགྱུར་བ་མ་བཏང་ཚེ་ང་ཚོས་ལས་འགུལ་མུ་མཐུད་སྤེལ་རྒྱུ་ཡིན་ཅེས་དང༌། རྒྱ་ནག་གིས་ ༢༠༠༡ ལོའི་དམ་བཅའ་དང་གཏན་བྲལ་བྱས་ཏེ། འགྲོ་བ་མིའི་རང་དབང་ཐོབ་ཐང་དང༌། གསར་འགོད་རང་དབང༌། སྨྲ་བརྗོད་རང་དབང་བཅས་རྡོག་རོལ་གཏོང་བཞིན་པའི་གནས་སྟངས་ལ་ང་ཚོ་ཡིད་སྐྱོ་དགོས་པ་ཞིག་ཆགས་ཡོད། དེ་བས། ཨོ་ལིམ་པིག་མ་རྫོགས་གོང་ནི་ང་ཚོ་མཉམ་འབྲེལ་གྱིས་རྒྱ་ནག་གིས་དེ་སྔོན་བཤད་པའི་སྐད་ཆར་ཁས་ལེན་བྱེད་དུ་འཇུག་རྒྱུའི་དུས་ཚོད་ཡག་ཤོས་ཡིན། ཨོ་ལིམ་པིག་རྫོགས་པ་དག་མཉམ་དུ་རྒྱ་ནག་གི་འགྲོ་བ་མིའི་རང་དབང་ཐོབ་ཐང་བཙན་གནོན་དེ་མཚམས་འཇོག་བྱེད་པར་ཡིད་ཆེས་བྱེད་ཀྱིན་མེད། དེ་བས། ང་ཚོས་ལས་འགུལ་མཚམས་འཇོག་གི་མིན་ལ། རྒྱ་ནག་གིས་ཨོ་ལིམ་པིག་རྗེས་ནས་སྨྲ་བརྗོད་རང་དབང་དང༌། གསར་འགོད་རང་དབང༌། བཙོན་འཇུག་བཀག་ཉར་བྱ་རྒྱུ་མཚམས་འཇོག་བྱ་རྒྱུའི་རེ་འདུན་མུ་མཐུད་ནས་འདོན་གི་ཡིན ང་ཚོས་རྒྱལ་སྤྱིའི་གསར་འགོད་པ་ཁོ་ན་མ་ཡིན་པར་རྒྱ་ནག་ནང་ཁུལ་གྱི་གསར་འགོད་པ་དག་ལའང་གཅིག་མཚུངས་ཀྱི་ཐོབ་ཐང་འཚོལ་བཞིན་ཡོད། ང་ཚོས་རྒྱལ་སྤྱིའི་སྤྱི་ཚོགས་དང༌། རྒྱལ་ཁབ་སོ་སོའི་དབུ་ཁྲིད་ལ་འབོད་སྐུལ་ཞུས་ཏེ། རྒྱ་ནག་གི་འགྲོ་བ་མིའི་ཡ་ང་བའི་ཐོབ་ཐང་སྐོར་འགྲེལ་བརྗོད་བྱ་རྒྱུ་ཡིན་ཅེས་བརྗོད་ཡོད།
