ཕྱི་ཚེས་ ༣༠ ཉིན་སི་ཁྲོན་ལ་ཡང་བསྐྱར་ཤུགས་ཚད་ ༦་༡ ཅན་གྱི་ས་ཡོམ་ཞིག་བརྒྱབས་ཏེ་མི་ ༣༢ བསད་ཡོད་པ་དང་། ཁྱིམ་ཚང་ ༢༥༨༠༠༠ གཏོར་སྐྱོན་ཐེབས་ཡོད་འདུག
རྒྱ་ནག་གི་ཞིན་ཧྭ་གསར་འགྱུར་ཁང་གིས་སྤེལ་བ་ལྟར་ན། ས་ཡོམ་དེ་སི་ཁྲོན་ནས་མགོ་བཙུགས་ཏེ། གཞུང་ལམ་དང་ཟམ་པ། ཆུ་མཛོད། སློབ་གྲྭ་བརྒྱ་ཕྲག་ལྷག་ལ་གཏོར་སྐྱོན་བཏང་ཡོད་འདུག མི་གྲངས་ ༤༠༠༠༠ སི་ཁྲོན་དང་ཡུན་ནན་ཞིང་ཆེན་ནས་ས་ཁུལ་གཞན་དུ་ཉེན་གཡོལ་ལ་ཕྱིན་ཡོད་འདུག མི་གྲངས་ ༢༣༠ ལ་རྨས་སྐྱོན་ཕོག་ཡོད་ཚུལ་བརྗོད་ཡོད་པ་རེད།
ཕྱི་ཚེས་ ༣༠ ཉིན་གྱི་ཕྱི་དྲོ་ཆུ་ཚོད་ ༤།༣༠ ཐོག་ས་ཡོམ་བརྒྱབས་ཡོད་པ་དང་། དེའི་རྗེས་ནས་ཆ་ཡོམ་ཆུང་ཆུང་ཐེངས་བརྒྱ་ཕྲག་ལ་སླེབས་ཡོད་ཚུལ་འདུག གཟའ་སྤེན་པའི་ས་ཡོམ་གྱི་རྗེས་ནས་ཡོང་བའི་ས་ཡོམ་ཤུགས་ཆེ་ཤོས་ནི་གཟའ་ཉི་མའི་ཉིན་རྒྱབ་ཀྱི་ས་ཡོམ་ཡིན་པ་དང་། དེའི་ཤུགས་ཚད་ནི་ ༥་༡ ཡིན་པ་རེད། ཡིན་ནའང་འདིའི་སྐབས་མི་བསད་རྨས་བྱུང་ཡོད་མེད་དང་། གཏོར་སྐྱོན་ཅི་བྱུང་ཡོད་མེད་གསལ་བོ་ཤེས་མེད་ཚུལ་ཞིན་ཧྭ་གསར་འགྱུར་ཁང་གིས་སྤེལ་ཡོད་པ་རེད།
གཞན་ཡང་། སི་ཁྲོན་ལྷོ་བརྒྱུད་དུ་འབྲེལ་མཐུད་ཀྱི་ཆ་རྐྱེན་ཞན་པའི་དབང་གིས་གཟ་མཇུག་དེའི་ས་ཡོམ་གྱི་སྐབས་གཏོར་སྐྱོན་ཅི་ཙམ་བཏང་ཡོད་པ་དང་མི་ཅི་ཙམ་བསད་ཡོད་མེད་གསར་འགོད་པ་དང་གཞུང་ངོས་ནས་ཤེས་ཐབས་བྲལ་སོང་ཟེར།
སི་ཁྲོན་ནི་རྒྱ་ནག་གི་ཞིང་ཆེན་ཆེ་ཤོས་ཤིག་ཡིན་ལ། སི་ཁྲོན་དམ་ཡུན་ནན་གཉིས་ནི་གྲངས་ཉུང་མི་རིགས་ས་ཡ་མང་པོ་ཞིག་གི་ཕ་ཡུལ་ཡིན་པ་རེད།
རྒྱ་གཞུང་གིས་བཤད་པ་ལྟར་ན། གཟའ་སྤེན་པའི་ས་ཡོམ་སྐབས་པན་ཀྲི་ཧྭ་ས་ཁུལ་གཅིག་པུ་ནས་མི་གྲངས་ ༧༠༠༠༠ ལ་ཤུགས་རྐྱེན་སླེབས་ཡོད་པ་དང་། སི་ཁྲོན་གྱི་ས་ཁུལ་གཅིག་ཏུ་སློབ་གྲྭའི་ཁང་བརྩེགས་ ༦༦༠ འགྱེལ་ཡོད་ཚུལ་འདུག
ས་ཡོམ་དེ་བྱང་ཕྱོགས་སུ་སི་ཁྲོན་གྱི་རྒྱལ་ས་ཁྲིན་ཏུའུ་བར་དང་། ལྷོ་ཕྱོགས་སུ་ཡུན་ནན་གྱི་རྒྱལ་ས་ཁུན་མིན་བར་དུ་བརྒྱབས་ཡོད་པ་རེད།
འདས་པའི་བདུན་ཕྲག་ནང་བོད་ས་ཁུལ་དུའང་ས་ཡོམ་བརྒྱབས་ཡོད་པ་དང་། བོད་རང་སྐྱོང་ལྗོངས་ཁོངས་ཀྱི་གྲོང་པ་རྫོང་དུ་རིམ་པ་ ༨ ཅན་གྱི་ས་ཡོམ་བརྒྱབས་ཏེ་ཁང་ཁྱིམ་ ༦༢༢ གཏོར་ཡོད་པ་དང་། སློབ་གྲྭ་ ༥༤ གཏོར་ཡོད་འདུག མི་གྲངས་ ༧༦༠༠ ལ་ཤུགས་རྐྱེན་སླེབས་ཡོད་པ་རེད། ས་གནས་གཞུང་གིས་ས་ཡོམ་གྱི་ཤུགས་རྐྱེན་སླེབས་མཁན་ཚོར་རྒྱ་སྒོར་ས་ཡ་ ༣ སྟེ། ཨ་སྒོར་ ༤༤༠༠༠༠ ཟས་གོས་ཀྱི་ཆེད་དུ་སྤྲད་ཡོད་པ་དང་། མི་དེ་དག་གི་ཆེད་དུ་གུར་ ༤༠༠ དང་ཉལ་ཆས་ ༣༥༠༠ རག་ཡོད་ཚུལ་འདུག
མི་ ༢༠༠༠ ལྷག་ཉེན་གཡོལ་དུ་འགྲོ་དགོས་བྱུང་ཡོད་འདུག
སྙིང་རྗེ། མ་རྒན་འདིའི་སྡུག་བསྔལ་ངས་ཚོར་ཐུབ་གི་འདུག ངོ་མ་སེམས་སྐྱོ་བ་ཞིག་རེད།