གོ་སྐབས་ཤིག་ཤོར་ཡང་བོད་དོན་བརླག་མེད།

རྒྱ་ནག་གི་ཨོ་ལིམ་པིག་རྩེད་འགྲན་མཇུག་བསྡུས་སོང་ལ། བོད་དོན་འཐབ་རྩོད་ཀྱི་གོ་སྐབས་ཡག་ཤོས་ཤིག་ཀྱང་མཇུག་བསྡུས་སོང༌། ཡིན་ནའང༌། བོད་རྒྱའི་དཀའ་རྙོག་ད་དུང་མཇུག་བསྡུས་མེད་ལ། རྒྱ་ནག་གིས་བོད་ནང་གི་དྲག་གནོན་དང་ཆབ་སྲིད་སྲིད་ཇུས་ལ་འགྱུར་བ་གང་ཡང་བཏང་མེད། དེའི་སྟབས་ཀྱིས་བོད་དོན་འཐབ་རྩོད་ཀྱི་གོ་སྐབས་ཡག་ཤོས་ཤིག་མཇུག་བསྡུས་ནའང༌། བོད་རང་བཙན་མ་ཐོབ་བར་བོད་དོན་འཐབ་རྩོད་མཇུག་བསྡུ་གི་མ་རེད་ཅེས་གཞོན་ནུའི་དྲུང་ཆེ་དོན་འགྲུབ་ལྷ་དར་ལགས་ཀྱིས་གསུངས་ཡོད།

ཕྱི་ཚེས་ ༢༦ ཉིན་འདི་གའི་གསར་འགོད་པས་ཐེངས་གཉིས་པའི་མི་དམངས་མདུན་སྐྱོད་ཆེན་མོའི་ལས་འགུལ་སྐོར་དང་ཕྱི་ཚེས་ ༢༥ གཞོན་ནུ་ཚོགས་པའི་ཚོགས་མི་ཁག་ཅིག་ལྡི་ལིའི་རྒྱ་ནག་གཞུང་ཚབ་ཁང་དུ་རྒྱུག་ནས་ངོ་རྒོལ་བྱས་པའི་སྐོར་གཞོན་ནུའི་དྲུང་ཆེ་དོན་འགྲུབ་ལྷ་དར་ལགས་སུ་བཅར་འདྲི་ཞུས་པར་ཁོང་གིས་གསུངས་དོན། གཞོན་ནུ་ལྷན་ཚོགས་ཀྱི་སྒྲིག་འཛུགས་ངོས་ནས་ཟས་བཅད་ཆུ་བཅད་ཀྱི་ངོ་རྒོལ་བྱེད་རྒྱུར་ཐག་གཅོད་བྱུང་བ་བཞིན། ཐེངས་འདིར་མི་དམངས་མདུན་སྐྱོད་ཆེན་མོའི་ལས་འགུལ་ཐེངས་གཉིས་པའི་ནང་རྒྱལ་གཅེས་དཔའ་བོ་མི་དྲུག་རེས་ཟས་བཅད་ཆུ་བཅད་ཀྱི་ངོ་རྒོལ་ཐེངས་གསུམ་ལ་བྱེད་ཐུབ་པ་བྱུང་བ་ནི། བཙན་བྱོལ་ནང་རང་བཙན་འཐབ་རྩོད་ཆེད་ཟས་བཅད་ངོ་རྒོལ་མང་བོ་བྱས་ཡོད་ནའང༌། ང་ཚོའི་ངོས་ནས་ཟས་བཅད་ངོ་རྒོལ་ཚད་མཐོ་ཤོས་ཤིག་ལ་ངོས་འཛིན་བྱེད་དགོས་པ་ཞིག་ཡིན། ཐེངས་འདི་ནི་བོད་མི་རིགས་ཀྱི་ཛ་དྲག་གནས་བབ་དང༌། ཨོ་ལིམ་པིག་རྩེད་འགྲན་སྐབས་བོད་དོན་ཁྱབ་བསྒྲགས་བྱེད་པར་གོ་སྐབས་ཡག་ཤོས་ཤིག་རེད་ཅེས་དང༌། ཡང་ཁོང་ལ་ཟས་བཅད་ངོ་རྒོལ་བ་རྣམས་ཀྱིས་ཉིན་དགུའི་རིང་ཟས་བཅད་ཆུ་བཅད་ཀྱི་ངོ་རྒོལ་གནང་སྐབས་གཟུགས་པོའི་གནས་སྟངས་དང་ཚེ་སྲོག་འཚོ་གནས་ཐུབ་མིན་ལ་ཉེན་ཁ་འཕྲད་མིན་སྐོར་དྲིས་པར། ཁོང་གིས། ཟས་བཅད་ངོ་རྒོལ་བ་རྣམས་ཀྱི་གཟུགས་པོའི་གནས་སྟངས་དེ་ཉིན་གསུམ་པ་ནས་བཟུང་ཧ་ཅང་སྐྱོ་བོ་ཆགས་སོང༌། ཕལ་ཆེར་ཉིན་ལྔ་བ་དང་དྲུག་པ་བར་འཁྱོལ་ས་མ་རེད་དྲན་སོང་མོད། ཉིན་བཞི་བ་ནས་བཟུང་གཟུགས་པོའི་གནས་སྟངས་ལྷོད་ལ་བབས་པ་ལྟ་བུ་བྱུང་སོང༌། ཉིན་དགུ་བར་སླེབས་སྐབས་རྒྱ་གར་གཞུང་གི་སྨན་པའི་ངོས་ནས་མུ་མཐུད་འཚོ་ཐུབ་མིན་གྱི་ཉེན་ཁ་འདུག་གསུངས་སོང་ལ། ང་ཚོར་ཡང་བློ་འཚབ་ཆེན་པོ་བྱུང༌། ཡིན་ནའང༌། ཟས་བཅད་ངོ་རྒོལ་བ་རྣམས་དང་གཞོན་ནུའི་ངོས་ནས་མུ་མཐུད་རྒྱུན་འཁྱོངས་བྱས་ནའང༌། རྒྱ་གར་ཉེན་རྟོག་པ་བརྒྱ་ཕྲག་འགས་ཟས་བཅད་ངོ་རྒོལ་བ་རྣམས་ཁྲིད་ཕྱིན་སོང་ཟེར།

ཟས་བཅད་ངོ་རྒོལ་བ་རྣམས་ཀྱིས་ཁོང་ཚོའི་དགོས་འདུན་མ་འགྲུབ་བར་དུ་གནས་སྟངས་གང་འདྲ་ཞིག་བྱུང་ཡང་མུ་མཐུད་ཟས་བཅད་ཆུ་བཅད་ཀྱི་ངོ་རྒོལ་བྱེད་རྒྱུར་མཚམས་འཇོག་བྱ་རྒྱུ་མིན་ཞེས་ཨུ་ཚུགས་བརྒྱབས་པ་རེད་ལ། གཞོན་ནུའི་ངོས་ནས་ཀྱང་ཁོང་ཚོར་ཉིན་དགུའི་རིང་ཟས་བཅད་ངོ་རྒོལ་རྒྱུན་འཁྱོངས་བྱེད་དུ་བཅུག་པ་རེད། གལ་སྲིད་ཁོང་ཚོའི་གཅིག་གི་ཚེ་སྲོག་ལ་ཉེན་ཁ་འཕྲད་ཚེ་དེར་འགན་ལེན་བྱེད་ཕྱོགས་གང་འདྲ་ཞིག་ཡིན་ནམ་ཞེས་དྲིས་པར། ཁོང་གིས། ང་ཚོར་མིའི་ཚེ་སྲོག་ལ་ཕངས་སེམས་གང་ཡང་མེད་པའི་གནས་སྟངས་དེ་འདྲ་མ་རེད། བོད་ནང་དུ་ཧ་ཅང་ཛ་དྲག་གི་གནས་སྟངས་ཡིན་པ་དང༌། ལྷག་པར་དུ་ད་ལོ་གཞིས་ལུས་བོད་མིའི་སྙིང་སྟོབས་དེ་ཚད་མཐོན་པོར་སླེབས་ཡོད་པ་རེད། དེ་བཞིན་བོད་དོན་འཐབ་རྩོད་ཀྱི་ལོ་རྒྱུས་ནང་དམའ་མཐར་ཡང་བོད་ཀྱི་ལོ་རྒྱུས་ཀྱི་བདེན་པ་དེ་བོད་རང་བཙན་ཡིན་པ་དང༌། གཞིས་ལུས་བོད་མིའི་མངོན་འདོད་བོད་རང་བཙན་ཡིན་སྟབས། ང་ཚོ་ལ་གདམ་ཀ་དེ་འདྲ་ཞིག་མི་བྱེད་ཀ་མེད་ཆགས་ཡོད་པ་རེད། གལ་སྲིད་ངོ་རྒོལ་བ་གཅིག་གྲོངས་པ་ཡིན་ན་གཞོན་ནུ་ལྷན་ཚོགས་ཀྱི་ངོས་ནས་འགན་འཁྱེར་དགོས་པའི་ཆ་གཅིག་ཡོད་པ་རེད། འགན་གལ་ཆེ་ཤོས་དེ་རྒྱ་ནག་སྲིད་གཞུང་གིས་འཁྱེར་དགོས་པའི་གནས་སྟངས་ཤིག་ཆགས་ཀྱི་ཡོད་པ་རེད། གང་ཡིན་ཟེར་ན། རྒྱ་ནག་གིས་མི་ལོ་དྲུག་ཅུའི་རིང་བོད་དབང་བསྒྱུར་བྱས་མེད་པ་དང༌། ད་ལྟའི་དྲག་གནོན་གྱི་གནས་སྟངས་དེ་ལྟ་བུ་ཞིག་མེད་ན། ང་ཚོས་རྒྱ་ནག་སྲིད་གཞུང་ལ་ངོ་རྒོལ་བྱེད་དགོས་པ་དང་ཛ་དྲག་གི་གདམ་ཀ་དེ་ལྟ་བུ་ཞིག་བྱེད་དགོས་དོན་ཡོད་པ་མ་རེད། འགན་གཙོ་བོ་འཁྱེར་དགོས་མཁན་རྒྱ་ནག་སྲིད་གཞུང་དང་མཉམ་འབྲེལ་རྒྱལ་ཚོགས། ཨོ་ལིམ་པིག་རྩེད་འགྲན་ཚོགས་ཆུང་རེད་ཅེས་གསུངས་སོང༌།

དེ་བཞིན་ཨོ་ལིམ་པིག་རྩེད་འགྲན་མཇུག་སྒྲིལ་བ་དང་བོད་དོན་འཐབ་རྩོད་ཀྱི་སྡིངས་ཆ་ཞིག་མཇུག་སྒྲིལ་བ་ལྟ་བུ་རེད། ཡིན་ནའང༌། བོད་དོན་འཐབ་རྩོད་མཇུག་སྒྲིལ་ཡོད་པ་མ་རེད། དེར་བརྟེན། གཞོན་ནུའི་ངོས་ནས་མུ་མཐུད་ལས་འགུལ་ག་རེ་སྤེལ་རྩིས་ཡོད་མེད་སྐོར་དྲིས་པར་ཁོང་གིས་གསུངས་དོན། དྲི་བ་དེ་གནད་འགག་རེད། བོད་ཀྱི་རང་བཙན་འཐབ་རྩོད་ཀྱི་ལོ་ངོ་ལྔ་བཅུ་དང་དྲུག་ཅུའི་བརྒྱུད་རིམ་ནང་སྔར་བྱུང་མྱོང་མེད་པའི་གོ་སྐབས་ཤིག་ཤོར་བ་རེད། གོ་སྐབས་བྱུང་བ་ནང་བཞིན་བོད་ཕྱི་ནང་གཉིས་དང༌། ལྷག་པར་བོད་ནང་དུ་གོ་སྐབས་དེ་དམ་འཛིན་བྱེད་ཐུབ་པ་ཞིག་ལ་ངོས་འཛིན་བྱེད་ཀྱིན་ཡོད། གཙོ་བོ་གཞིས་ལུས་བོད་མི་ཚོའི་ཞུམ་པ་མེད་པའི་སྙིང་སྟོབས་དང༌། ཚེ་སྲོག་གི་རིན་ཐང་ལ་བརྟེན་ནས་ངོ་རྒོལ་བྱས་པ་རེད།

རྒྱ་ནག་གིས་ཨོ་ལིམ་པིག་རྩེད་འགྲན་འགྲོ་བསྡད་པའི་སྐབས་བོད་ནང་དམ་དྲག་ཤུགས་ཆེན་པོ་བྱས་པ་རེད། ལྷག་པར་ཨོ་ལིམ་པིག་རྩེད་འགྲན་ཚར་རྗེས་བོད་ནང་ཆབ་སྲིད་བཙོན་མ་སྟོང་ཕྲག་ཁ་ཤས་ཡོད་པ་དེ་ཚོ་ད་དུང་བཙོན་འཇུག་བྱས་བསྡད་ཡོད་པ་རེད། ཁོང་ཚོར་ཁྲིམས་ཐག་གཅོད་རྒྱུར་ལྷག་བསྡད་ཡོད་སྟབས། སྔར་བས་དམ་དྲག་བྱེད་ཤུགས་ཆེ་རུ་འགྲོ་གི་རེད་བསམ་ནས་སེམས་ཁྲལ་འདུག ཁོང་ཚོའི་བདེ་འཇགས་དང་ཚེ་སྲོག་ལ་ཉེན་ཁ་འབྱུང་རྒྱུར་གཞོན་ནུ་ལྷན་ཚོགས་ངོས་ནས་བློ་འཚབ་བྱེད་ཀྱིན་ཡོད། ཕྱི་ཚེས་ ༢༥ ཉིན་ཡང་གཞོན་ནུའི་ཚོགས་མི་ཁག་ཅིག་རྒྱ་ནག་གཞུང་ཚབ་ཁང་དུ་བརྒྱུགས་ནས་ངོ་རྒོལ་བྱས་ཡོད། དེ་ལྟར་བྱེད་དོན་ནི་ཨོ་ལིམ་པིག་རྩེད་འགྲན་མཇུག་སྒྲིལ་ནའང་བོད་དོན་འཐབ་རྩོད་དེ་མཇུག་སྒྲིལ་མེད་པ་མཚོན་གྱི་ཡོད། ད་དུང་ཐག་གཅོད་གང་ཡང་བྱུང་མེད་ནའང༌། མི་འགྱངས་བར་ང་ཚོས་ལས་འགུལ་གང་འདྲ་ཞིག་སྤེལ་དགོས་མིན་ཐད་གྲོས་བསྡུར་བྱ་རྒྱུ་ཡིན་ཞེས་གསུངས་ཡོད།