མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ཏེ། འདས་པའི་ལོ་གསུམ་རིང་དགེ་ལས་ཚོས་དཀའ་སྡུག་སྣ་ཚོགས་ལ་གདོང་ལེན་བྱས་ཏེ་སློབ་ཕྲུག་གི་ཉིན་རེའི་སློབ་ཚན་གོ་སྒྲིག་དང་ནང་ལས་ཞུ་དག སློབ་ཕྲུག་ཚོས་ནང་སྔ་ལངས་དང་དགོང་འཕྱི་ཉལ་གྱིས་སློབ་སྦྱོང་ལ་ཧུར་བརྩོན་བྱས་པས་འབྲས་བུ་གཡུར་དུ་ཟ་བ་བླངས་ཡོད་འདུག 
ཟླ་གཅིག་གི་རྗེས་ཏེ། ཕྱི་ཟླ་ ༡༠ ཚེས་ ༡༠ ཉིན་ནི་བཙན་བྱོལ་བོད་མིའི་ཤེས་ཡོན་སྲིད་བྱུས་གསར་བ་དངོས་སུ་ལག་བསྟར་མགོ་བཙུགས་པ་དང༌། ྋགོང་ས་མཆོག་གིས་བོད་ཀྱི་ཆོས་རྒྱལ་མེས་དབོན་རྣམ་གསུམ་སྐབས་བོད་མི་རིགས་ཀྱི་རིག་རྩལ་ལ་སྟོབས་ཤུགས་གང་ཡོད་པ་དེ། མ་འོངས་པའི་མི་རབས་ཚོས་བསྐྱར་གསོ་དང་རྒྱུན་འཛིན་བྱེད་ཐུབ་པ་ཞིག་ཤེས་ཡོན་སྲིད་བྱུས་ཀྱི་ལམ་སྲོལ་འདིའི་འོག་ནས་ཡོང་རྒྱུ་ལ་ཐུགས་སྨོན་ཡིད་ཆེས་གནང་ཡོད་པའི་མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ནས་མི་ལོ་ཧྲིལ་བོ་གསུམ་འཁོར་བའི་ཉིན་ཡིན་ལ། ད་ནི་སློབ་གྲྭ་འདི་དབུ་བརྙེས་ནས་མི་ལོ་ཧྲིལ་བོ་གསུམ་རིང་གི་ཤེས་ཡོན་སྲིད་བྱུས་ཀྱི་གནས་བབ་དང༌། སློབ་ཕྲུག་ཚོའི་ཤེས་ཡོན་གནས་ཚུལ་ལ་རྒྱུས་ལོན་ཞིག་བྱེད་པའི་དུས་ཀྱང་ཡིན་སྟབས། ཕྱི་ཚེས་ ༨ ཉིན་འདི་གའི་གསར་འགོད་པ་ཆེད་དུ་མེས་དབོན་གཙུག་ལག་དཔེ་སྟོན་སློབ་གྲྭར་བསྐྱོད་དེ་སློབ་སྤྱི་དང་དགེ་རྒན། སློབ་ཕྲུག་ཁག་ཅིག་ལ་ཐུག་འཕྲད་ཀྱིས་ལོ་གསུམ་རིང་གི་ཤེས་ཡོན་གནས་ཚུལ་རྒྱུས་ལོན་རག་ཙམ་བྱས།
སློབ་གྲྭའི་ཁོར་ཡུག་གི་རྒྱ་ཁྱོན་ཤིན་ཏུ་ཆུང་ཞིང༌། ཡིག་ཚང་དང་འཛིན་ཁང༌། ཉལ་ཁང་བཅས་ཀྱི་བར་ཐག་ཧ་ཅང་གུ་དོག་པའི་སློབ་ར་ཆུང་ཆུང་འདིའི་ནང་དུ། ྋགོང་ས་མཆོག་གིས་ད་བར་ཤེས་ཡོན་འདབ་གཤོག་གཉིས་ལྡན་ཞིག་དགོས་པ་རེད། དེ་ནི་སྲོལ་རྒྱུན་ཤེས་ཡོན་གྱི་འདབ་གཤོག་དང་དེང་དུས་ཤེས་ཡོན་གྱི་འདབ་གཤོག་གཉིས་ཡིན་པ་རེད་ཅེས་གསུངས་པ་ལྟར། རེ་བ་དང་ཡིད་ཆེས་ཀྱིས་ཁེངས་པའི་འདབ་གཤོག་གཉིས་ལྡན་གྱི་བྱེའུ་ཆུང་ཆུང་རེ་འཁྲུངས་ཀྱིན་འདུག་སྟེ། ངས་སློབ་གྲྭའི་སྤྱི་ཁྱབ་ཡིག་ཚང་བརྒྱུད་རྒྱུས་ལོན་བྱས་པ་ལྟར་ན། སློབ་མའི་དུས་ཚིགས་རེའི་རྒྱུགས་འབྲས་ཀྱི་ཚད་འཇལ་སྟངས་ནི། སློབ་ཕྲུག་གི་ཡིག་རྩལ་ལ་བརྒྱ་ཆ་ལྔ་བཅུ་དང་རྒྱུན་ལྡན་གྱི་ཉམས་ཞུགས་དང་བློ་འཛིན། ལས་འཁུར། དཔོད་བྲིས། ཚོད་ལྟ་བཅས་ཀྱི་ཆ་སྙོམས་ཀྱི་བརྒྱ་ཆ་ལྔ་བཅུ་བཅས་རེད་ལ། ཕྱོགས་བསྡོམས་ཀྱི་བརྒྱ་ཆ་མཐོ་ཤོས་ལེན་མཁན་ལ་ཀ་དང་དེ་ལས་ཅུང་ཞན་པ་ལེན་མཁན་ལ་ཁ། དེ་བས་ཀྱང་ཞན་པ་ཚོར་ག་དང་ང༌། ཅ་བར་དུ་ཡོད་ཅིང་ཀ་མེད་སུམ་བཅུའི་ནང་གི་ཕྱོགས་སྡོམ་གྱི་བརྒྱ་ཆ་ཅ་ལེན་མཁན་ནི་སྤྱིར་བཏང་སློབ་སྦྱོང་དང་ཀུན་སྤྱོད། སྒྲིག་ཁྲིམས་གང་གི་ཆ་ནས་ཀྱང་སྡུག་ཤོས་ཡིན་མོད། ད་བར་ག་ལེན་མཁན་རེ་ཟུང་མ་གཏོགས་སློབ་ཕྲུག་ཕལ་ཆེ་བས་ཀ་དང་ཁ་བླངས་ཡོད་པ་དགེ་རྒན་ཚོའི་སློབ་ཁྲིད་འཆར་འགོད་ཀྱི་དེབ་ནང་དུ་གསལ་བོར་འཁོད་འདུག་ལ། སློབ་སྦྱོང་གི་རྒྱུགས་འབྲས་ལ་བལྟ་སྐབས་སྐད་ཡིག་སློབ་ཚན་ལྟ་བུར་མཚོན་ན། རྒྱུགས་འབྲས་ཀྱི་ཀློག་རྩལ་ལ་སྒྲ་གདངས་དང་གོ་རྟོགས། འབྲི་རྩལ་ལ་ཡིག་གཟུགས་དང་འབྲི་རྩོམ། བརྡ་སྤྲོད་ལ། དག་ཆ་དང་མིང་ཚིག བཤད་རྩལ་ལ། གྲོས་མོལ་དང་ངག་འདོན། ཉན་རྩལ་ལ། གོ་རྟོགས་བཅས་ཀྱིས་གྲུབ་ཡོད་འདུག
སློབ་སྤྱི་ཚེ་རིང་གཡུ་སྒྲོན་ལགས་ཀྱིས་གསུངས་དོན། སྔོན་འགྲོ་ནས་འཛིན་གྲྭ་གསུམ་པ་བར་བོད་ཡིག་གཅིག་པུ་ཡག་པོ་བསླབ་ཁྲིད་བྱེད་ཀྱིན་ཡོད་ཅིང༌། སློབ་ཕྲུག་ཚོར་ཡང་བོད་ཡིག་གི་འབྲི་ཀློག་ཡག་པོ་ཡོད་པ་མ་ཟད། འཛིན་རིམ་བཞི་བ་ནས་དབྱིན་ཡིག་བསླབ་ཀྱིན་ཡོད་ནའང༌། ཆུང་ཆུང་ནས་སྐད་ཡིག་གཅིག་ལ་སྦྱང་བརྩོན་ཡག་པོ་ཡོད་སྟབས། སློབ་གྲྭ་གཞན་གྱི་འཛིན་རིམ་བཞི་བའི་སློབ་ཕྲུག་དང་བསྡུར་ན་ང་ཚོའི་སློབ་ཕྲུག་ཚོར་དབྱིན་ཡིག་གི་འབྲི་ཀློག་ཡག་པོ་འདུག་ཟེར་ལ། ཁོང་དང་མཉམ་དུ་འཛིན་ཁང་འགའི་ནང་ཕྱིན་སྟེ། ངས་སློབ་ཕྲུག་ཁག་ཅིག་གི་འབྲི་ཀློག་ལ་རྒྱུས་ལོན་བྱས་སྐབས། ལོ་ན་ཧ་ཅང་ཆུང་བའི་སློབ་ཕྲུག་འདི་དག་གིས་བྲིས་པའི་ཡིག་གཟུགས་ཤིན་ཏུ་ལེགས་ཤིང༌། ངག་འདོན་སྐབས་སྒྲ་དག་ཅིང༌། གཅོད་མཚམས་རན་པ་ཞིག་རེད། དགེ་རྒན་ཚོས་སློབ་ཕྲུག་ཚོར་དབྱིན་ཡིག་གི་རྩོམ་ཐུང་བོད་ཡིག་ནང་བསྒྱུར་རྒྱུ་དང༌། རི་མོར་བལྟས་ནས་རྩོམ་ཡིག་འབྲི་བ། ཉིན་རེར་ཉིན་ཐོ་འབྲི་བ་སོགས་ཀྱི་ལས་བྱ་སྣ་ཚོགས་གོ་སྒྲིག་བྱས་འདུག་ལ། ངས་སློབ་ཕྲུག་བཅུ་ཙམ་ལ་བོད་ཡིག་དང་དབྱིན་ཡིག་ཀློག་འདོན་བྱེད་དུ་བཅུགས་ཤིང༌། ཁོང་ཚོ་སྤྱིར་བཏང་ཤེས་ཡོན་དང་གོ་རྟོགས་གང་འདྲ་ཡོད་མེད་ཀྱང་རྒྱུས་ལོན་བྱས། ཡིན་ནའང༌། ནམ་རྒྱུན་ནས་བཙན་བྱོལ་བོད་གཞུང་གི་ཤེས་ཡོན་སྲིད་བྱུས་ཀྱི་ལངས་ཕྱོགས་ལ་འདོད་བློ་ཁེངས་ཀྱི་མེད་ཅིང༌། སློབ་གྲྭར་ཡོད་སྐབས་དགེ་རྒན་ཚོས་སློབ་ཁྲིད་བྱེད་སྟངས་དང་སློབ་ཁྲིད་འཆར་འགོད་བྱེད་སྟངས་ལ་གཏན་ནས་འདོད་བློ་ཁེངས་མྱོང་མེད་པའི་ཕྲན་ལ། ཐེངས་འདིར་སྔར་བྱུང་མྱོང་མེད་པའི་རེ་བ་དང་ཡིད་ཆེས་གསར་བ་ཞིག་རྙེད་བྱུང་ལ། ད་དུང་འཛིན་གྲྭ་རེ་འགའི་ནང་དགེ་རྒན་ཚོ་སློབ་ཕྲུག་དང་མཉམ་དུ་སར་བསྡད་དེ་བྱམས་བརྩེ་དང་ཐབས་མཁས་ཀྱི་ངང་ནས་སློབ་ཁྲིད་བྱེད་ཀྱིན་འདུག་ཅིང༌། ཚུལ་དེ་ནི་སྲོལ་རྒྱུན་གྱི་རིག་གནས་རྨང་གཞིར་བྱས་པའི་སློབ་གྲྭ་འདི་ལྟ་བུར་མཚོན་ན་དེང་གི་ཤེས་ཡོན་སྲིད་བྱུས་ཀྱི་ལེགས་ཆ་ཞིག་སྟེ། དགེ་སློབ་ཕན་ཚུན་བར་རྒྱང་ཐག་རིང་བོ་མེད་ཅིང༌། དགེ་རྒན་ཚོས་སློབ་ཕྲུག་ཚོར་བྱམས་སྐྱོང་གིས་སློབ་ཁྲིད་བྱེད་ཀྱིན་པ་དང༌། སློབ་ཕྲུག་ཚོས་ཀྱང་རང་གིས་མི་ཤེས་པ་དེ་ཉིད་དགེ་རྒན་ཚོར་འཚེར་སྣང་མེད་པའི་ཐོག་ནས་འདྲི་ཆོག་ཆོག་ཅིག་ཏུ་མཐོང༌།
བོད་དགེ་དཀོན་མཆོག་ཚེ་བརྟན་ལགས་ཀྱིས་བརྗོད་དོན། དང་པོ་འདིར་ཡོང་བའི་སློབ་ཕྲུག་ནང་དུ་ཨ་སམ་ཆོས་འཕེལ་གླིང་དང་དར་རྒྱས་གླིང་གི་སློབ་ཕྲུག་རེ་ཟུང་ཡོད་ཅིང༌། ཁོང་ཚོས་བོད་སྐད་བོད་ཡིག་ཤེས་ཀྱི་མི་འདུག ཡིན་ནའང༌། དེང་སྐབས་བོད་སྐད་ཡག་པོ་ཤེས་པ་མ་ཟད། བོད་ཡིག་གི་འབྲི་ཀློག་ཧ་ཅང་ཡག་པོ་ཤེས་ཀྱི་ཡོད་ཅེས་དང༌། ཁོང་གིས་བོད་ནང་ལྟ་བུར་མཚོན་ན་སློབ་ཕྲུག་ཚོས་ཡི་གེ་མི་ཤེས་ནའང་བོད་སྐད་ཡག་པོ་ཤེས་ཀྱི་ཡོད་པ་རེད། འདིར་སློབ་ཕྲུག་རེ་ཟུང་གིས་བོད་སྐད་ཀྱང་མི་ཤེས་པ་ནི་དགེ་རྒན་ལ་མཚོན་ན་ཧ་ཅང་དཀའ་ཁག་ཡིན་ནའང༌། ངས་རང་ཉིད་ཀྱིས་གང་ཤེས་པ་དེ་ལྷག་བསམ་རྣམ་དག་གིས་སློབ་ཕྲུག་ཚོར་འཁྲིད་ཐབས་བྱེད་ཀྱིན་ཡོད་ཅིང༌། སློབ་ཕྲུག་རེ་འགའ་ཧ་ཅང་འཚུབ་པོ་ཡིན་སྟབས་དང་པོ་བསླབ་བྱ་རྒྱག་པ་དང་རྔན་པ་སྤྲོད་པ་སོགས་བྱས་ཀྱང་ཁར་མ་ཉན་ཚེ་ཕྲན་བུ་རྡུང་གི་ཡོད། ཡིན་ནའང༌། སྒྲིག་ཁྲིམས་ནང་སློབ་ཕྲུག་ལ་རྡུང་ཆོག་གི་མེད་སྟབས་གཙོ་བོ་བསླབ་བྱ་བརྒྱབ་ནས་སློབ་གསོ་སྤྲོད་ཀྱིན་ཡོད་ཅེས་བརྗོད་སོང་ལ། སློབ་མ་བསྟན་འཛིན་ལྷ་སྒྲོན་གྱི་ཨ་མ་དབྱངས་སྐྱིད་སྒྲོལ་མས། ངས་བུ་མོ་དཔེ་སྟོན་སློབ་གྲྭར་བསྐྱལ་ནས་ད་བར་ལོ་གཅིག་འགོར་མེད་ནའང༌། བོད་ཡིག་གི་འབྲི་ཀློག་དངོས་གནས་ཡག་པོ་ཆགས་འདུག་ལ། ཀུན་སྤྱོད་ཀྱང་སྔར་དང་མི་འདྲ་བར་ཧ་ཅང་ཡག་པོ་ཆགས་འདུག་ཅེས་བརྗོད་སོང༌།
ད་ལྟའི་སློབ་ཕྲུག་ཚོའི་བསླབ་གཞིའི་རྩ་འཛིན་ནི་ཕྱི་ལོ་ ༢༠༠༧ ཟླ་ ༤ ཚེས་ ༢༡ ཉིན་བཙན་བྱོལ་བོད་མིའི་སྔོན་འགྲོ་དང་གཞི་རིམ་འོག་མའི་བསླབ་གཞིའི་རྩ་འཛིན་བཟོ་འགོད་ཚོགས་ཆུང་དང་པོས་བཟོ་འགོད་བྱས་ཤིང༌། ཕྱི་ལོ་ ༢༠༠༨ ལོའི་ཟླ་ ༤ ཚེས་ ༣ ཉིན་བོད་གཞུང་བཀའ་ཤག་ནས་ཐུགས་ཞིབ་ཀྱིས་གཏན་འབེབས་གནང་བའི་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་བཞིན་སྔོན་འགྲོ་དང་གཞི་རིམ་འོག་མའི་བསླབ་གཞིའི་རྩ་འཛིན་ཞེས་པ་དེ་ཡིན་འདུག གཟའ་རེའི་གཟའ་སྤེན་པའི་ཉིན་རྒྱབ་བཟོ་རིག་གི་ལས་གཞི་དང༌། ཟླ་རེའི་སྤེན་པ་བཞི་བར་སློབ་ཕྲུག་གི་ཕ་མ་དང་དགེ་རྒན་ཐུག་འཕྲད་ཀྱིས་སློབ་ཕྲུག་ཚོའི་ཤེས་ཡོན་གནས་སྟངས་དང་ཀུན་སྤྱོད་བཅས་ལ་ཕན་ཚུན་དོགས་འདྲི་དང༌། གྲོས་བསྡུར་བྱེད་བཞིན་ཡོད་འདུག
སློབ་གྲྭ་དང་པོ་མགོ་འཛུགས་སྐབས། སློབ་ཕྲུག ༩༤ དང་དགེ་ལས་བསྡོམས་པའི་མི་ ༡༧ ཡོད་ལ། དེང་སྐབས་སློབ་ཕྲུག་ ༡༧༠ ལྷག་ཡོད་ཅིང་ལྷོ་ཕྱོགས་མོན་གྷོ་དང་སྤེལ་ཀོབ། ཀོ་ལི་གྷལ། སྤོན་ཊ། ཨོ་རི་ས་བཅས་ཕྱོགས་མཐའ་ཁག་ནས་ཡོང་བའི་སློབ་ཕྲུག་ ༩༥ ཡོད་པ་དང༌། དགེ་རྒན་ ༡༥ དང་ལས་བྱེད་དང་མ་ཚབ་བཅས་བསྡོམས་དགེ་ལས་ ༢༦ ཡོད་འདུག དགེ་རྒན་རྣམས་ནི་བོད་ཁྱིམ་སློབ་གྲྭ་ཁག་ཏུ་སློབ་མཐར་ཕྱིན་རྗེས་ས་རཱར་ལོ་ལྔའི་རིང་སློབ་སྦྱང་གནང་སྟེ། དེ་རྗེས་དགེ་རྒན་འོས་སྦྱོང་ནང་དམིགས་བསལ་ཤེས་ཡོན་སྲིད་བྱུས་ཐོག་སློབ་སྦྱོང་གནང་མྱོང་མཁན་ཁྲོད་ནས་ཤེས་རིག་ལས་ཁུངས་བརྒྱུད་འདེམས་སྒྲུག་གནང་ཡོད་འདུག
very good