བོད་ཀྱི་
བོད་མི་རིགས་ཀྱི་བླ་གང་དུ་ཕྱིན་པ་རེད། ལོ་སུམ་ཅུའི་རིང་གི་དྲག་པོའི་མནར་གཅོད་དེའི་རྐྱེན་གྱིས་བོད་མི་རིགས་འདི་སྐྲག་ནས་བླ་ཆད་ཚར་འདུག་ལ། ད་ནི་ང་ཚོས་བོད་མི་རིགས་ཀྱི་བླ་གསོ་དགོས་ཀྱི་འདུག་ཅེས་བོད་མིའི་འཐབ་རྩོད་འདིའི་སྣེ་འཁྲིད་མྱོང་མཁན་སྲིད་དོན་པ་རྙིང་བ་དང་དམག་དཔོན་རྒན་པ་ཞིག་གིས་གསུངས།
སྐུའི་གཅེན་པོ་བཀའ་བློན་ཁྲི་ཟུར་རྒྱལ་ལོ་དོན་གྲུབ་མཆོག་ཕྱི་ཚེས་ ༢༧ ཉིན་འདི་ག་གསར་ཁང་དུ་ཕེབས་ཏེ་དུས་ཚོད་གཉིས་ལྷག་རིང་ལས་བྱེད་ཚོའི་མཉམ་དུ་བོད་དོན་གྱི་སྐོར་ལ་བཀའ་མོལ་གནང་ཡོད་ལ། ཉིན་དེར་ཁོང་གིས་བོད་མི་རིགས་ཀྱི་ཆིག་སྒྲིལ་དང་ནུས་ཤུགས་ཀྱི་སྟེང་གསུངས་དོན། རྒྱ་ནག་གཞུང་གིས་ ༡༩༤༩ ལོ་ནས་ ༡༩༧༩ ལོའི་བར་བོད་མི་མང་པོ་སྐྱི་གཡའ་བའི་དམར་གསོད་དང་མནར་གཅོད་ཚད་ལས་འདས་པ་བྱས་པའི་རྐྱེན་གྱིས། བོད་མི་རིགས་འདི་ཞེད་ནས་བླ་ཆད་ཚར་འདུག་ཅེས་བོད་མི་རིགས་ཀྱི་བླ་སྲོག་གི་གནས་སྟངས་གསུངས། ཡིན་ནའང་། ཁོང་གིས་ང་ཚོས་ཅི་གང་མ་བརྩད་པའི་སྔོན་དུ་བོད་མི་རིགས་ཀྱི་བླ་གསོ་དགོས་པ་རེད་ཅེས་དང་། འདིའི་ཐད་ནུས་པ་ཆེ་ཤོས་ནི་རྒྱལ་བ་རིན་པོ་ཆེ་མཆོག་ཡིན་ལ། རྒྱལ་བ་རིན་པོ་ཆེ་ཁོ་ནས་བོད་མི་རིགས་ཀྱི་བླ་གསོ་ཐུབ་ལ། བོད་མི་རིགས་ཀྱི་ཆིག་སྒྲིལ་དང་ནུས་ཤུགས་གསོ་ཐུབ་པ་དང་། བོད་མདོ་དབུས་ཁམས་གསུམ་གང་དུ་ཕྱིན་ནའང་ང་ཚོས་གླེང་དགོས་པ་ནི་རྒྱལ་བ་རིན་པོ་ཆེ་ཡིན་ཅེས་གསུངས་བྱུང་།
བོད་མི་རིགས་ཀྱི་ལོ་རྒྱུས་ཁྲོད་ང་ཚོའི་མེས་པོ་ཚོས་མི་རིགས་འདི་ནི་བློ་རིག་བཀྲ་ཤིང་དཔའ་མཛངས་རྟུལ་ཕོད་ཅན་ཞིག་ཡིན་ཅེས་ལོ་ངོ་སྟོང་ཕྲག་གི་རིང་བཤད་ནས་བྲིས་ཤིང་། ཕྱི་རབས་པ་རྣམས་ལའང་འཛམ་གླིང་གི་ཡང་རྩེ་ནས་བཞུད་པའི་ཡབ་མེས་ཚོའི་དཔའ་མཛངས་ཀྱི་ལོ་རྒྱུས་དེ་བཞག་ཡོད། འོན་ཀྱང་། རྒྱ་ནག་གཞུང་གིས་བོད་འདི་བཙན་གནོན་བྱས་པའི་ཐོག་མའི་ལོ་ ༣༠ རིང་དེར་མི་རིགས་འདིའི་མགོར་འཇིགས་པ་ཆེན་མོ་ Great Fear ལྟ་བུ་ཞིག་སླེབས་སྟབས། མི་རིགས་འདིའི་བླ་ཆད་ཡོད་འདུག
དེ་ལྟར་ཡང་། སྐུའི་གཅེན་པོ་རྒྱལ་ལོ་དོན་གྲུབ་མཆོག་པེ་ཅིན་དུ་ཏིན་ཞོ་ཕིན་ལ་མཇལ་འཕྲད་གནང་བ་ནས་བཟུང་རྒྱ་ནག་གི་སྲིད་བྱུས་ཕྱོགས་གང་ཐད་ནས་གུ་ཇེ་ཡངས་སུ་ཕྱིན་ཡོད་ལ། དེ་ནས་བཟུང་རྒྱལ་བ་རིན་པོ་ཆེའི་སྐུ་ཚབ་རྣམས་རིམ་པ་བྱས་ནས་བོད་ཡུལ་གངས་སར་ཕེབས་ཏེ་རྒྱལ་བ་རིན་པོ་ཆེ་མཆོག་གི་འཚམ་འདྲི་ཕུལ་ཞིང་། རིམ་བཞིན་བོད་མི་རིགས་ཀྱི་བླ་གསོ་བའི་གལ་ཆེའི་ཕྱག་ལས་འདི་མགོ་བཙུགས་ཡོད་པ་རེད། འདས་པའི་ལོ་ ༣༠ གྱི་རིང་དུ་བོད་མི་རིགས་ཀྱི་བླ་སླར་གསོ་བྱས་པའི་དུས་རིམ་ཡིན་ལ། འདིའི་རྐྱེན་གྱིས་བོད་མི་རིགས་ཀྱི་ཆིག་སྒྲིལ་དང་ནུས་པ་ཡང་མིག་མཐོང་ལག་ཟིན་གྱི་སླར་གསོ་ཐུབ་ཡོད།
རྒྱ་ནག་གིས་འདིའི་རྒྱུ་རྐྱེན་མཐོང་སྟེ། ཐོག་མར་རྒྱལ་བ་རིན་པོ་ཆེ་མཆོག་ལ་ཆེད་དུ་མཚན་སྨོད་གཏོང་བ་ནས་མགོ་བཙུགས་ཏེ། འགལ་བ་ཆེན་པོ་ཞིག་གི་ས་བོན་བཏབས་པ་དང་། འགལ་བ་དེ་སྣག་ཁྲག་ལྟར་བརྡོལ་བའི་སྐབས་སུ་སླར་ཡང་འཇིགས་པ་ཆེན་མོ་དེ་སྤྱད་ནས་བོད་མི་རིགས་ཀྱི་བླ་ཆད་ངེས་པའི་ལས་ལ་འཇུག་གི་ཡོད། དེ་ནི་ལོ་འདིའི་ཕྱི་ཟླ་གསུམ་པ་ནས་མགོ་བཙུགས་པའི་དམར་གསོད་དང་མནར་གཅོད་ཀྱི་ལས་འདི་ཡིན། དེས་ན་ང་ཚོས་གནས་སྐབས་འདིར་གཟབ་དགོས་ས་དང་སྐྱོབ་དགོས་ས་ཡང་མི་རིགས་འདིའི་བླ་ཡིན་པར་འདོད་དོ།།
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
མི་གཅིག་གི་སེམས་ཤི་སོང་ན། བོད་ཤི་རྒྱུ་ཡིན་པའི་ཁྱབ་ཀྱི་མ་རེད། ལྷག་པར་དུ་ད་ལོའི་ཟླ་གསུམ་པ་ནས་མགོ་བཟུང་བའི་བོད་ནང་གི་གྱེན་ལངས་དེས་ག་རེ་གསལ་བཤད་བྱེད་ཀྱི་ཡོད་དམ། བླ་གསར་བ་ཞིག བོད་ཁྱོན་ཡོངས་གཅིག་ཏུ་གྲིལ་བའི་འཕག་འཚག་གསར་བ་ཞིག བོད་མིས་རང་ཉིད་ལ་གཏོགས་པའི་ཁེ་ཕན་རྩོད་ལེན་གྱི་འགོ་འཛུགས་ཤིག འདི་བླ་ཆད་ཀྱིན་པ་མ་ཡིན་པར་བླ་གསོ་བཞིན་པ་རེད། འོ་ན། སྐུ་ངོ་རྒྱལ་དོན་གྱིས་ཅིའི་ཕྱིར་བླ་ཆད་ཀྱིན་པར་གསུངས་ཀྱིན་ཡོད་དམ། དེ་ནི་ཁེ་བཟང་ཟ་མཁན་ཚོའི་ཁེ་ཕན་སྲུང་ཐབས་ཙམ་ལས་དོན་དག་གཞན་མེད། དཔེར་ན། སྔར་ཨ་རིའི་གཞུང་གིས་མུ་ཟི་ཐང་གི་བོད་དམག་ལ་ཨ་རིའི་དམག་ཕོགས་སྤྲད་ནའང་། སྐུ་ངོ་གཙོས་འགོ་ཁྲིད་ལྷན་ཚོགས་ཀྱིས་བོད་དམག་དཀྱུས་མར་ཟླ་རེར་བལ་སྒོར་བརྒྱ་ལས་སྤྲད་ཀྱི་མེད་པའི་ཁར། དཀའ་ངལ་ཞུ་དུས་ཏྰ་ལའི་བླ་མ་ཁ་ལ་ཁྱེར་ནས་གནོན་རྐྱང་བྱེད་ཀྱིན་ཡོད་ཅིང་། རྗེས་སོར་ཨ་རིས་དམག་རོགས་མཚམས་འཇོག་དང་འབྲེལ་འགོ་ཁྲིད་ལྷན་ཚོགས་བར་དངུལ་དངོས་བགོ་འགྲེམས་དོ་མ་མཉམ་པའི་ནང་ཟིང་བྱུང་བ་རེད།
བོད་ཤི་རྒྱུ་ཡིན་པ་གསལ་བོ་རེད། ང་ལ་གནས་ལུགས་རྒྱུ་མཚན་མང་པོ་ཡོད། ཡིན་ནའང་ད་ལྟ་ནས་བསྒྲགས་ན་འོས་འཚམ་མ་རེད། གལ་སྲིད་ཡིད་མི་ཆེས་མཁན་ཡོད་ན་ང་ཚོས་རྩོད་པ་བྱེད་ཆོག་གི་རེད། ཁོང་ཁྲོ་ལངས་པ་དང་ཞེན་ཁོག་ཁྱེར་བ་ཙམ་གྱིས་ཅི་གང་ཕན་གི་མ་རེད། ང་ཚོས་རྩོད་པ་མ་བྱས་པའི་སྔོན་ལ་བོད་ཤི་རྒྱུ་རེད་དང་མ་རེད་ཀྱི་ཕྱོགས་ལ་ང་ཚོས་རྒྱུ་མཚན་འཚོལ་ཆོག་གི་རེད། ང་ལ་རྒྱུ་མཚན་ ༡༠ ཐམ་པ་ཡོད། ཁྱེད་ཚོ་ལ་བོད་ཀྱི་ཤི་གསོན་གྱི་ཐད་ནས་ལྟ་ཚུལ་ཨེ་ཡོད། གལ་སྲིད་ཡོད་ན་རྒྱུ་མཚན་རྣམ་གྲངས་ཅི་ཙམ་ཡོད། བླ་ཆད་ཚར་བའི་མི་རིགས་ཤིག་སླར་ཡང་བསྐྱར་གསོ་བྱེད་དགོས་དུས་ཁག་ཚར་བ་རེད། དྲིན་ཆེན་ཚོ།
ཏྰ་ལའི་བླ་མས་བོད་མིར་ཤུགས་རྐྱེན་ཡོད་པ་བདེན་ནའང་། ཐ་གཅིག་ཏུ་ཁོང་ཁོ་ན་བོད་ནང་ཁྱབ་བསྒྲགས་བྱས་པ་ཡིན་ན། ཁོང་སྐུ་མ་བཞུགས་པའི་ཕྱི་ཉིན་ནས་བོད་མིའི་བླ་གསོ་རྒྱུ་ཕར་ཞོག་སྤུར་ཟིན་པ་མིན་ནམ། དེ་བས། ཆོག་མེད་རིང་ལུགས་པའི་སྐད་ཆར་ཚང་མས་ཆོག་ཤེས་བྱེད་རྒྱུའང་གལ་ཆེན་པོར་འདོད།