༧གོང་ས་མཆོག་གིས་སི་ཊ་སི་བྷག་ནས་དབུ་མའི་ལམ་གསུངས་ཏེ་ལོ་ངོ་ཉི་ཤུ་འགྲོ་བཞིན་ཡོད་ལ། བོད་གཞུང་སྲིད་བྱུས་ཡང་དབུ་མའི་ལམ་འདི་རེད། འོན་ཀྱང༌། ད་ལྟའི་བར་གཞུང་སྒེར་སུས་ཀྱང་འདི་ལྟར་དབུ་མའི་ལམ་གྱི་ལས་འགུལ་སྤེལ་བ་གཅིག་ཀྱང་བྱུང་མེད། ད་ལྟ་འཕྱི་དྲགས་པ་རེད་ཟེར།
བཞུགས་སྒར་ཁུལ་གྱི་དགོན་པ་དང་སློབ་གྲྭ དེ་བཞིན་ཚོགས་པ་སྒྲིག་འཛུགས་ཁག་བཅས་སུ་ཉིན་འདི་འགར་དབུ་མའི་ལམ་མི་མང་ལས་འགུལ་ཁང་གིས་སྣེ་ཁྲིད་འོག མི་དམངས་ལ་དབུ་མའི་ལམ་གྱི་གོ་རྟོག་སྤེལ་བ་དང་བ་དང་དབུ་མའི་ལམ་གྱི་སྐོར་ལ་དྲི་བ་དྲིས་ལན་དང་གོ་བསྡུར་སྦྱང་བཤད་གནང་མགོ་བརྩམས་ཡོད་སྟབས། ཕྱི་ཚེས་ ༢༤ ཉིན་འདི་གའི་གསར་འགོད་པས་དབུ་མའི་ལམ་མི་དམངས་ལས་འགུལ་ཁང་གི་དགུ་ལོག་དམ་ཆོས་དཔལ་བཟང་ལགས་སུ་བཅར་འདྲི་ཞུས་པར་ཁོང་གིས་བརྗོད་དོན། རྒྱ་ནག་དང་བོད་ཕྱི་ནང་བཅས་སུ་ཆབ་སྲིད་ཀྱི་འཕོ་འགྱུར་ལ་གཞིགས་ཏེ། ང་ཚོའི་ངོས་ནས་གང་ཐུབ་ཀྱིས་མི་མང་ལ་ལས་འགུལ་སྤེལ་དགོས་པ་དང༌། ཡང་དག་གཉིས་ཕན་དབུ་མའི་ལམ་གི་སྲིད་བྱིས་དེ་བོད་གཞིས་བྱེས་གཉིས་དང་རྒྱ་ནག་མི་མང་གིས་ཀྱང༌། ཤེས་རྟོགས་ཡོང་བ་བྱས་ཏེ། བོད་རྒྱའི་མི་མང་བར་མཐུན་ལམ་གཅིག་གྱུར་གྱིས་དཀའ་རྙོག་སེལ་ཐབས་བྱ་རྒྱུ་དེ་ནི་དུས་དང་འཚམས་པའི་སྲིད་བྱུས་ཤིག་ལ་ངོས་འཛིན་བྱེད་ཀྱིན་ཡོད། ལྷག་པར་དུ་བོད་པའི་སྤྱི་ཚོགས་ནང་ལ་དབུ་མའི་ལམ་ལ་གོ་རྟོགས་མ་ཕེར་བར་བརྟེན། དབུ་མའི་ལམ་ལ་གྲུབ་འབྲས་མ་སོན་པ། འུ་ཐུག་གི་སྲིད་བྱུས་ཡིན་པ། དབུ་མའི་ལམ་གྱིས་བོད་རྒྱའི་དཀའ་རྙོག་སེལ་མི་ཐུབ་ཟེར་སོགས་དབུ་མའི་ལམ་ལ་དངོས་ཤུགས་བརྒྱུད་གསུམ་ནས་སྐྱོན་བརྗོད་བྱེད་མཁན་འབྱུང་བཞིན་ཡོད་སྟབས། ལངས་ཕྱོགས་འདི་དང་མི་མཐུན་པའི་ལས་འགུལ་མང་པོ་སྤེལ་བ་སོགས་ཀྱིས་རྒྱ་གཞུང་གིས་གཡས་ཁག་གཡོན་དཀྲི་བྱས་ཏེ། ཞི་མོལ་དུས་འགྱངས་ཀྱིས་གོ་སྐབས་འཚོལ་བཞིན་ཡོད། ༢༠༠༦ ལོ་ནས་ལས་དོན་འདིའི་ཐད་ཐུགས་འཚབ་གནང་མཁན་ཁག་ཅིག་མཉམ་འཛོམས་ཀྱིས་ལས་འགུལ་འདི་འདྲ་སྤེལ་རྒྱུར་གྲོས་བསྡུར་བྱུང་བ་དང༌། དེ་ལ་ཕན་གནོད་གང་ཡོང་སྐོར་ལོ་གཅིག་ལྷག་རིང་གོ་བསྡུར་བྱས་ཏེ། ལས་འགུལ་འདི་མགོ་འཛུགས་བྱས་པ་ཡིན། ད་ལོའི་ཟླ་ ༢ པར་ཚོགས་ཆེན་སྐོང་ཚོགས་ཀྱིས་གོ་བསྡུར་བྱས་བ་ཡིན། མི་མང་གིས་ལས་འགུལ་དེར་རྒྱབ་སྐྱོར་དང་གང་འགྱོགས་སྤེལ་དགོས་པ་དང༌། སོ་སོས་ནུས་ཤུགས་གང་ཐུབ་བཏོན་ཏེ། བོད་དོན་ཐག་གཅོད་མ་བྱུང་བར་ལས་འགུལ་དེའི་ནང་ཞུགས་རྒྱུའི་སེམས་ཐག་གཅོད་མཁན་མང་པོ་བྱུང་སོང༌།
སྤྱི་ཟླ་ ༩ ཚེས་ ༡༠ ནས་ང་ཚོས་ཁག་ཁ་ཤས་ལ་དབྱེ་སྟེ། དྷ་སའི་གཡས་གཡོན་གྱི་ཚོགས་པ་སྐྱིད་སྡུག་ཁག་ལ་ལས་འགུལ་སྤེལ་བཞིན་ཡོད། མི་མང་ལ་དབུ་མའི་ལམ་ངོ་སྤྲོད་དང་བགྲོ་གླེང་བྱ་རྒྱུ་དེ་ཡིན། ཕྱི་ཚེས་ ༡༧ ཉིན་ཤེས་རབས་དགའ་ཚལ་སློབ་གླིང་དང་ནོར་བུ་གླིང་ཁ། སྒྲོལ་མ་གླིང༌། དེ་བཞིན་དྷ་ཡོངས་གླིང༌། ཤོལ་སློབ་གྲྭ རྣམ་རྒྱལ་གྲྭ་ཚང༌། ཀིརྟི་གྲྭ་ཚང་སོགས་ཚོགས་པ་སྐྱིད་སྡུག་བདུན་བརྒྱད་ཅིག་ལ་སྤེལ་ཟིན། དབུ་མའི་ལམ་མི་མང་ལས་འགུལ་ཁང་གི་དམིགས་ཡུལ་ནི། ཚོགས་པ་གཅིག་གི་ལངས་ཕྱོགས་བཟུང་སྟེ། ཚོགས་པ་གཞན་ཞིག་ལ་ཁ་གཏད་ལྕོག་རྒྱུ་མ་ཡིན་པར། ༧རྒྱལ་བ་རིན་པོ་ཆེའི་དགོངས་གཞི་དང༌། བཙན་བྱོལ་གཞུང་གི་ལངས་ཕྱོགས། རྒྱ་ཆེའི་མི་དམངས་ཀྱི་མངོན་འདོད་དེ་དྲིལ་བསྒྲགས་དང༌། གསལ་བོ་བཟོ་རྒྱུ་དེ་ཡིན། ཕྱི་ཚེས་ ༨ ཡས་མས་ཤིག་ནས་རྡི་ར་རྡུན་དང་སིམ་ལ། མི་ན་ལེ། བྷེ་རི་བཅས་སུ་མུ་མཐུད་དུ་ལས་རྒྱ་བསྐྱེད་རྒྱུ་ཡིན། དེ་བཞིན་རྒྱ་གར་ལྷོ་ཕྱོགས་མོན་གྷོ་ཊི་ལ་རྨོག་རི་བསྟན་པ་དང༌། སེ་ར་དང་བྷེ་གྷོབ་བཅས་སུ་འཇིགས་བྲལ་བསྟན་འཛིན་དང༌། སྤྱི་འཐུས་ཟླ་བ་ཚེ་རིང་ཕྱོགས་སྐྱོད་ཀྱི་སྐབས་དང་བསྟུན་ཏེ་ལས་འགུལ་སྤེལ་རྒྱུ་ཡིན།
དྷ་ས་གཡས་གཡོན་གྱི་མི་མང་ཚོས་༧གོང་ས་མཆོག་གིས་སི་ཊ་སི་བྷག་ནས་དབུ་མའི་ལམ་གསུངས་ཏེ་ལོ་ངོ་ཉི་ཤུ་འགྲོ་བཞིན་ཡོད་ལ། བོད་གཞུང་སྲིད་བྱུས་ཡང་དབུ་མའི་ལམ་འདི་ཡིན་རུང༌། ད་ལྟའི་བར་འདི་ལྟར་དབུ་མའི་ལམ་གྱི་ལས་འགུལ་སྤེལ་བ་ཐེངས་གཅིག་ཀྱང་བྱུང་མེད། ད་ལྟ་འཕྱི་དྲགས་པ་རེད་ཟེར་མཁན་འདུག ང་རང་སྒེར་ངོས་ནས་བོད་ནང་གི་ལས་བྱེད་དང་རྒྱ་རིགས་དེ་འདྲར་ཐུག་སོང༌། ཁོང་ཚོས་སྤྱིར་བཏང་དབུ་མའི་ལམ་ཧ་ཅང་ཡག་པོ་རེད། སྤྱི་དམངས་ལ་དབུ་མའི་ལམ་གྱི་གོ་རྟོགས་ཡག་པོ་སེལ་དགོས་ཀྱིན་འདུག འོན་ཀྱང༌། ཅུང་ཙམ་འགྱངས་དྲགས་སོང་བ་རེད། ཁྱེད་ཅག་སྒེར་བ་རེ་ཟུང་ལས། འཛིན་སྐྱོང་བཀའ་ཤག་གཞུང་གི་ངོས་ནས་ལས་འགུལ་སྤེལ་ཐུབ་ན་ཡག་པོ་རེད་ཟེར་ལ། ཡང༌། སློབ་གྲྭ་ཆེན་མོ་བ་དང༌། རྒྱ་ཡུལ་གྱི་བོད་རིགས་ལས་བྱེད་རེ་ཟུང་གིས། ང་ཚོས་བསམ་བློ་མང་པོ་བཏང་བ་ཡིན། རྒྱལ་བ་རིན་པོ་ཆེར་དད་པའི་སྐད་ཆ་གང་ཡང་མེད། འཛམ་གླིང་གིས་བོད་པར་རྒྱབ་སྐྱོར་བྱེད་ཕྱོགས་དང༌། རྒྱ་ཕྱོགས་ནས་ཀྱང་དབུ་མའི་ལམ་ལ་རྒྱུས་མངའ་དེ་ཙམ་མེད་ནའང༌། རྒྱ་བོད་གཉིས་ཀར་ཁེ་ཕན་ཡོད་པ་ཞིག་བཤད་ཀྱིན་ཡོད་པ་དང༌། ད་ལྟའི་བོད་ནང་གི་གནས་བབས་སོགས་གང་ལ་གཞིགས་ན། ལམ་ཁ་འདི་ལས་མེད་པ་ཞིག་ཏུ་མཐོང་གིན་འདུག ཅེས་བརྗོད་མཁན་བྱུང་སོང་ཟེར།
