མ་འོངས་པར་ང་ཐའེ་ཝན་ལ་ཐེངས་གཅིག་འགྲོ་ཐུབ་རྒྱུར་སྨོན་ལམ་རྒྱག་གི་ཡོད། ཁྱེད་རང་ཚོས་ཀྱང་སྨོན་ལམ་རྒྱག་རོགས། ང་རང་ནང་པའི་དགེ་སློང་ཞིག་གི་ངོས་ནས། ནང་ཆོས་ལ་དོ་སྣང་ཡོད་མཁན་ཚོར་ཞབས་འདེགས་བསྒྲུབ་རྒྱུ་ལས་འགན་རེད། ང་མ་ཤི་བར་དུ་ལས་འགན་དེ་བསྒྲུབ་རྒྱུ་ཡིན་ལ། རྒྱ་ནག་སྐམ་ས་ཆེན་པོའི་ནང་དུ་ཡོད་པའི་མི་དམངས་ཚོ་ལ་ཡང༌། གོ་སྐབས་བྱུང་ན་དེ་བཞིན་དུ་ཞབས་འདེགས་བསྒྲུབ་ཐུབ་ན་བསམ་ཡོད།
ཤར་ཨེ་ཤ་ཡའི་རྒྱལ་ཕྲན་ཐའེ་ཝན་གྱི་དད་ལྡན་ཆོས་ཞུ་བ་དྲུག་བརྒྱ་ལྷག་གིས་གསོལ་འདེབས་ཞུས་པ་བཞིན། ཕྱི་ཚེས་ ༣༠ ཉིན་ནས་༧སྤྱི་ནོར་གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སློབ་དཔོན་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་བ་བཅས་ཀྱི་གསུང་ཆོས་མགོ་འཛུགས་བྱས་ཡོད། སྐབས་དེར་༧གོང་ས་མཆོག་གིས་ཐའེ་ཝན་གཙོས་པའི་ཕྱི་རྒྱལ་ཡུལ་གྲུ་ཁག་གི་ཆོས་ཞུ་བ་དང༌། བཞུགས་སྒར་ཁུལ་གྱི་དད་ལྡན་ཆོས་ཞུ་བ་སེར་སྐྱ་མི་མང་ ༣༠༠༠ ལྷག་ལ་གསུང་ཆོས་ཀྱི་སྔོན་འགྲོའི་བཀའ་སློབ་གནང་དོན། ཐོག་མར་ཐའེ་ཝན་གྱི་ཆོས་གྲོགས་ཡོངས་ལ་འཚམས་འདྲི་ཞུ་རྒྱུ་ཡིན། ཐའེ་ཝན་ནང་པའི་ཆོས་གྲོགས་ཚོ་དང་ང་ཚོའི་བར་དམིགས་བསལ་འགྲེལ་བ་ཞིག་ཆགས་བསྡད་ཡོད། ཁྱེད་རང་ཚོ་ལ་སོ་སོའི་ལས་འགན་ལ་བྲེལ་བ་ཆེན་པོ་ཡོད་པ་རེད་དེ། ཡིན་ནའང༌། ཁྱོད་རང་ཚོ་འདིར་ཆེད་དུ་ཆིབས་སྒྱུར་བསྐྱངས་པར་ང་རང་ཧ་ཅང་དགའ་བོ་བྱུང༌། སྔོན་མ་ང་ཐའེ་ཝན་ལ་ཐེངས་གཉིས་ཙམ་ལ་འགྲོ་རྒྱུ་བྱུང༌། ཐོག་མའི་འཆར་གཞི་ལྟར་ན། ཐའེ་ཝན་མི་དམངས་སྤྱི་དང༌། ལྷག་པར་དུ་ནང་པའི་ཆོས་གྲོགས་ཚོར་ཕན་ཐོགས་ཕྲན་བུ་འབྱུང་ན་བསམ་སྟེ། ལོ་གཉིས་རེ་མཚམས་སུ་ཐའེ་ཝན་ལ་ཐེངས་གཅིག་རེར་སྐྱོད་རྒྱུའི་རྩིས་བརྒྱབས་ཡོད། འོན་ཀྱང༌། སྤྱི་ལོ་ ༢༠༠༢ ནས་རྒྱ་ནག་དང་ང་ཚོའི་བར་གྱི་ཐད་ཀའི་འབྲེལ་བ་བསྐྱར་གསོ་བྱས་རྗེས་དཀའ་ངལ་འཕྲད་ཡོད། ད་ལྟ་ཁྱེད་རང་ཚོ་འདིར་ཕེབས་རྒྱུ་ལས་ང་རང་ཕར་འགྲོ་རྒྱུར་དཀའ་ངལ་འཕྲད་ཡོད་པ་རེད། འོན་ཀྱང༌། མ་འོངས་པར་ང་ཐའེ་ཝན་ལ་ཐེངས་གཅིག་འགྲོ་ཐུབ་རྒྱུར་སྨོན་ལམ་རྒྱག་གིན་ཡོད་ལ། ཁྱེད་རང་ཚོས་ཀྱང་སྨོན་ལམ་རྒྱག་རོགས། ང་རང་ནང་པའི་དགེ་སློང་ཞིག་གི་ངོས་ནས། ནང་ཆོས་ལ་དོ་སྣང་ཡོད་མཁན་ཚོར་ཞབས་འདེགས་བསྒྲུབ་རྒྱུ་ལས་འགན་རེད། ང་མ་ཤི་བར་དུ་ལས་འགན་དེ་བསྒྲུབ་རྒྱུ་ཡིན་ལ། རྒྱ་ནག་སྐམ་ས་ཆེན་པོའི་ནང་དུ་ཡོད་པའི་མི་དམངས་ཚོ་ལ་ཡང༌། གོ་སྐབས་བྱུང་ན། དེ་བཞིན་ཞབས་འདེགས་བསྒྲུབ་ཐུབ་ན་བསམ་ཡོད། ཅེས་གསུངས་བྱུང་ཡོད།
ཡང་ཁོང་གིས་མུ་མཐུད་དུ་གསུང་ཆོས་དངོས་གཞིའི་སྐབས་དང་བསྟུན་ཏེ་ནང་པའི་ཆོས་ཀྱི་དགེ་མཚན་དང༌། ཉམས་ལེན་བྱེད་ཕྱོགས་རག་ཙམ་གསུངས་དོན། སྤྱིར་ཆོས་ལུགས་གང་དང་གང་ཡིན་ན་འདྲ། ལྷག་པར་དུ་ནང་པ་སངས་རྒྱས་པའི་ཆོས་ལུགས་ལ་ཆ་བཞག་ན། ཆོས་ལུགས་དེའི་འགྲོ་སྟངས་དང་ཆོ་ག་གང་འདྲ་ཞིག་ཡིན་པ་དེ་དག་ཆ་ཚང་བ་ཞིག་ཤེས་པའི་ཐོག་ནས་གཞི་རྟེན་ཡག་པོ་འཛུགས་དགོས། བཅོམ་ལྡན་འདས་ཀྱིས་གསུངས་པ་རེད་ཟེར་ནས་དད་པ་ཁོ་ན་བྱེད་རྒྱུ་ཙམ་མ་ཡིན་པར། བསམ་བློ་ཡང་དག་བཏང་སྟེ། འདི་འདྲ་ཞིག་འགྲུབ་ཐུབ་པ་རེད་བསམ་པའི་ཐོག་ནས་བློ་ལ་ངེས་པར་བྱས་རྗེས། སངས་རྒྱས་ཆོས་དགེ་འདུན་གསུམ་ལ་སྐྱབས་སུ་མཆིའོ་ཞེས་གསུང་དགོས། སངས་རྒྱས་ཀྱི་ཆོས་ངོ་སྤྲོད་གནང་རྒྱུ་དེ་ངས་གལ་ཆེན་ཞིག་ཏུ་རྩི་བཞིན་ཡོད། དེ་རིང་འདིར་ཐའེ་ཝན་དང་ཝེ་ཏི་ནམ། ཀོ་རི་ཡ། ཡི་ཤུ་ཆོས་ལུགས་པ་སྐོར་ཞིག་ཀྱང་སླེབས་འདུག ངས་རྟག་པར་ཡི་ཤུ་བ་ཚོར་ནང་པ་ཕྱེད་ཀ་ཞེས་འབོད་ཀྱིན་ཡོད། ཁོང་ཚོ་ནང་པའི་ཆོས་ལུགས་ལ་དོ་སྣང་ཤུགས་ཆེན་ཡོང་གི་འདུག ངའི་བསམ་པར་ཁོང་ཚོར་ནང་ཆོས་ལ་དོ་སྣང་དང༌། དོན་ཉེར་ཤུགས་ཆེན་ཡོང་གིན་ཡོད་པའི་རྒྱུ་མཚན་དེ་རང་བཞིན་རྩེད་འཇོ་ལྟ་བུ་མ་ཡིན་པར་བརྟག་དཔྱད་ཞིབ་བསྡུར་ནན་གྱིས་བྱས་མཐར། ནང་ཆོས་ཀྱི་ལྟ་བ་ཡང་དག་བདེན་པ་ཡིན་པར་ངོས་ཟིན་གསལ་བོ་བྱུང་སྟེ། ཆེད་དུ་དོན་ཉེར་གནང་གི་ཡོང་གི་ཡོད་པ་རེད་བསམ་གྱིན་འདུག ཁོང་ཚོས་གནང་སྟངས་དེ་འགྲིག་བསྡད་ཡོད་པ་རེད། ངས་དེ་ལ་གུས་བརྩི་བྱེད་ཀྱིན་ཡོད། དེར་བརྟེན། ངས་ནང་བ་ཕྱེད་ཀ་ཡིན་པའི་ཁོང་རྣམ་པའི་སྤྱོད་སྟངས་དེ་འགྲིག་འདུག་ཅེས་ཞུ་རྒྱུ་ཡིན་ཞེས་གསུངས་བྱུང༌།
༧གོང་ས་མཆོག་གི་གསུང་ཆོས་དེ་སྤྱི་ཟླ་ ༩ ཚེས་ ༣༠ ནས་སྤྱི་ཟླ་ ༡༠ ཚེས་ ༤ བར་ཉིན་ལྔའི་རིང་གནང་འཆར་ཡོད་འདུག་ལ། རྒྱ་སྐད་དང་ཀོ་རི་ཡའི་སྐད། དབྱིན་སྐད། དེ་བཞིན་ཉི་ཧོང་གི་སྐད་བཅས་སུ་གསུང་སྒྱུར་གནང་གིན་ཡོད་པ་མ་ཟད། སྔ་དྲོའི་༧གོང་ས་མཆོག་གི་གསུང་ཆོས་ཀྱི་ནང་དོན་ཁག ཕྱི་དྲོ་ཆོས་ཞུ་བ་རྣམས་ཁག་བརྒོས་ཀྱིས་དྲི་བ་དྲིས་ལན་དང་བགྲོ་གླེང་གོ་བསྡུར་གནང་འཆར་ཡོད་པ་རེད།
