བོད་མི་རིགས་ལ་མུ་མཐུད་མནར་གཅོད་གཏོང་གི་ཡོད།

རྒྱ་ནག་གཞུང་གིས་བོད་མི་རིགས་ལ་གཏོར་རྒོལ་བྱས་པའི་སྙན་ཐོ་ཞིག་ཕྱི་ཟླ་ ༩ ཚེས་ ༢༩ ཉིན་བཙན་བྱོལ་བོད་གཞུང་གིས་མཉམ་འབྲེལ་རྒྱལ་ཚོགས་ཀྱི་མནར་གཅོད་ལ་རྒོལ་བའི་ཚོགས་ཆུང་གི་མཚན་ཐོག་ལ་ཕུལ་ཡོད་པ་རེད།

བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱིས་ཇེ་ནེ་ཝར་ཡོད་པའི་བོད་ཀྱི་དོན་གཅོད་ཁང་བརྒྱུད་དེ་ཕུལ་བའི་སྙན་ཐོ་དེར་ཤོག་ངོས་ ༣༣ ཡོད་པ་དང་། དེའི་ནང་དུ་ ༢༠༠༠ ལོ་ནས་ ༢༠༠༨ ལོའི་བར་གྱི་དོན་རྐྱེན་གྱི་བྱུང་རིམ་རྣམས་ཕུལ་ཡོད་པ་དང་། ལྷག་པར་དུ་ལོ་འདིར་བསང་ཆུ་དང་རྨ་ཆུ། ཀིརྟི་དགོན་པ། ལྷ་ས་བཅས་སུ་ཞི་བའི་ངོ་རྒོལ་སྐབས་རྒྱ་ནག་གཞུང་གིས་དྲག་རྡུང་དང་བཀར་ཉར། བཙོན་འཇུག་བྱས་པ། ནེ་ཆུང་འབོད་པའི་བུད་མེད་ཅིག་མནར་གཅོད་ཀྱི་འོག་གྲོངས་པ། མང་པོ་ཞིག་དེ་ནས་བཟུང་གར་སོང་ཆ་མེད་དུ་གྱུར་བའི་གནས་སྟངས་སོགས་བཀོད་འདུག་ལ། དེ་བཞིན་ལོ་འདིའི་གསུམ་པའི་བཅུའུ་ཡར་སྔོན་ནས་བཟུང་བོད་ནང་གི་མནར་གཅོད་ནི་རྒྱུན་མཐུད་ནས་ཡོད་ཅིང་། སྤྲུལ་སྐུ་བསྟན་འཛིན་བདེ་ལེགས་དང་བློ་བཟང་དོན་གྲུབ་སོགས་རྒྱ་ནག་གི་མནར་གཅོད་འོག་བཞུགས་པ་དང་སྐུ་ཚེ་མ་ཟིན་པ། རྒྱང་ཕུད་དུ་བཏང་བ། འགྲོ་འདུག་གི་རང་དབང་བྲལ་བ་སོགས་མིག་མཐོང་ལག་ཟིན་གྱི་ཁུངས་སྐྱེལ་དག་སྒྲིག་སྟེ་རྒྱ་ནག་གིས་རྒྱལ་སྤྱིའི་མནར་གཅོད་ལ་རྒོལ་བའི་བཅའ་ཁྲིམས་གཏོར་བཤིག་བཏང་བའི་སྐོར་སྙན་ཐོའི་ནང་བཀོད་ཡོད་པ་རེད།

སྙན་ཐོའི་ནང་བཀོད་དོན། རྒྱ་ནག་གི་ཁྲིམས་ལུགས་ནང་དུ་མནར་གཅོད་འགོག་པའི་བཅའ་ཡིག་ལག་བསྟར་དོན་འཁྱོལ་བྱུང་མེད་པ་དང་། རང་དབང་གི་ཁྲིམས་བཤེད་མེད་པ། དེའི་ཁར་རྒྱ་ནག་གཞུང་གིས་བོད་མིའི་ཁྲིམས་རྩོད་པར་ལངས་མཁན་རྒྱ་ནག་གི་ཁྲིམས་རྩོད་པ་རྣམས་ལ་འཇིགས་སྐུལ་བྱས་པ་སོགས་ཀྱང་བཀོད་ཡོད་པ་རེད།

བཙན་བྱོལ་བོད་གཞུང་གིས་སྙན་ཐོའི་མཇུག་སྡོམ་ནང་མཉམ་འབྲེལ་རྒྱལ་ཚོགས་ཀྱི་མནར་གཅོད་འགོག་པའི་ཚོགས་ཆུང་ལ་ཞུ་སྐུལ་བྱས་དོན། ཚོགས་ཆུང་འདིས་རྒྱ་ནག་གིས་དམིགས་བཀར་གྱིས་བོད་མི་རིགས་ཐོག་མནར་གཅོད་ལག་བསྟར་བྱེད་ཀྱིན་པའི་གནས་སྟངས་ལ་ཞིབ་འཇུག་བྱེད་དགོས་པ་དང་། རྒྱ་ནག་གིས་བོད་ནང་ཆབ་སྲིད་ཀྱི་དྲག་གནོན་བྱེད་སྐབས་མནར་གཅོད་ནི་བོད་ཡོངས་ཁྱབ་རང་བཞིན་དང་གོ་རིམ་ཡོད་པའི་སྒོ་ནས་ལག་བསྟར་བྱེད་ཀྱི་ཡོད་ཅེས་དང་། བོད་ནང་གི་ད་ཡོད་ཀྱི་ཁོར་ཡུག་ནི་རྒྱ་ནག་གི་མི་སེར་སྤེལ་ཡུལ་དུ་གྱུར་ཡོད་པ་དང་། རྒྱ་ནག་གཞུང་གིས་བོད་མི་རིགས་ཀྱི་རང་ཐག་རང་གཅོད་ཀྱི་ཐོབ་ཐང་ལ་ངོས་ལེན་བྱེད་ཀྱི་མེད་པ་འདིས་བོད་མི་རིགས་ནི་མནར་གཅོད་དྲག་པོའི་འོག་ལྷུང་ཉེན་གྱི་གནས་སྟངས་ཤིག་སྐྲུན་གྱི་ཡོད་ཅེས་བཀོད་ཡོད་ལ། ཚོགས་ཆུང་དེས་རྒྱ་ནག་ལ་ཞུ་སྐུལ་བྱེད་རྒྱུའི་དོན་ཚན་ཁག་སྟེ། རྒྱ་ནག་གིས་མནར་གཅོད་ལ་འགོག་པའི་བཅའ་ཡིག་གི་ཚིག་དོན་ཇི་བཞིན་རང་ཉིད་ཀྱི་ཁྲིམས་ལ་བསྒྱུར་བཅོས་གཏོང་དགོས་པ། རྒྱལ་སྤྱིའི་རང་དབང་ལྡན་པའི་འགྲོ་བ་མིའི་ཐོབ་ཐོང་གི་རྟོག་ཞིབ་ཚོགས་པ་གང་མྱུར་བོད་ནང་ཡོང་དུ་འཇུག་རྒྱུ། རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལགས་བོད་ནང་ཕེབས་ཏེ་དངོས་ཡོད་གནས་སྟངས་ལ་རྒྱུས་ལོན་བྱེད་དུ་འཇུག་རྒྱུ། དེ་བཞིན་རྒྱ་ནག་གཞུང་གིས་གོང་ས་མཆོག་དང་བཙན་བྱོལ་བོད་གཞུང་མཉམ་དུ་གྲོས་མོལ་བརྒྱུད་བོད་ཀྱི་གནད་དོན་སེལ་དགོས་པ་སོགས་ཀྱི་ཞུ་སྐུལ་དོན་ཚན་ ༡༩ བཀོད་ཡོད་པ་རེད།