རྒྱ་ནག་གིས་བོད་ནང་དམ་དྲག་ཤུགས་ཆེར་བྱས་རྐྱེན་ད་ལྟ་གདན་ས་སེ་འབྲས་དགའ་གསུམ་གཙོ་བྱས་པའི་དགོན་སྡེ་ཁག་ཏུ་གྲྭ་བའི་གྲངས་འབོར་ཉུང་དུ་འགྲོ་བཞིན་ཡོད་འདུག
ཕྱི་ཆེས་ ༥ ཉིན་བོད་ནས་ཁ་པར་བརྒྱུད་ཁུངས་ལྡན་གནས་ཚུལ་འབྱོར་བ་ལྟར་ན། འདི་ལོའི་བོད་ནང་གི་ཞི་བའི་སྒེར་ལངས་སྐབས་མདོ་སྨད་མཚོ་སྔོན་ཆབ་ཆ་ནས་ཡིན་ཞིང་འབྲས་སྒོ་མང་ཀླུ་འབུམ་ཁང་ཚན་དུ་སློབ་གཉེར་བྱེད་བཞིན་པའི་རང་ལོ་ ༤༥ ཡིན་པའི་གྲྭ་བློ་བཟང་ཆོས་འཕེལ་དང༌། རང་ལོ་ ༢༧ ཡིན་པའི་གྲྭ་ཕུན་ཚོགས་ཐུབ་བསྟན། རང་ལོ་ ༢༩ ཡིན་པའི་གྲྭ་ཆོས་གྲགས། རང་ལོ་ ༢༨ ཡིན་པའི་གྲྭ་ཆོས་ལྡན་རྒྱ་མཚོ། རང་ལོ་ ༢༥ ཡིན་པའི་གྲྭ་རིག་བཟང་ཡེ་ཤེས། རང་ལོ་ ༡༩ ཡིན་པའི་གྲྭ་ཚུལ་ཁྲིམས་རྒྱ་མཚོ། རང་ལོ་ ༡༡ ཡིན་པའི་སྤྲུལ་སྐུ་སྒྱུ་དཔོན་བཅས་མི་བདུན་རྒྱ་ནག་ཉེན་རྟོག་པས་མེས་རྒྱལ་ཁ་བྲལ་གཏོང་མཁན་གྱི་ཉེས་མིང་འོག་འཛིན་བཟུང་བཀག་ཉར་བྱས་ཏེ་གར་ཡོད་ཀྱི་བརྡ་ལན་ཅི་ཡང་མེད་པ་དང༌། དུས་ད་ལྟའང་ཕྱིར་ཡོང་མེད་པའི་གནས་སུ་ལྷག་འདུག ཁོང་ཚོའི་ནང་མི་དང་གཉེན་ཉེ་ཚོ་བློ་འཚབ་བྱུང་སྟེ། རང་ངོས་ནས་གོར་མོ་དང་སྟོད་མངའ་རིས་བཙོན་ཁང་སོགས་སུ་འདྲི་བརྩད་བྱས་ཡོད་ཀྱང་གར་ཡོད་ཤེས་རྟོགས་བྱུང་མི་འདུག ཁྱིམ་མི་གཉེན་ཉེ་ཚོས་གྲྭ་བ་དེ་དག་རྒྱ་ནག་གིས་མེད་པར་བཟོས་ཡོད་པའི་ངོས་འཛིན་ཐོག་བཙན་བྱོལ་དུ་ཡོད་པའི་གཉེན་ཉེ་ལ་ཁ་པར་བཏང་སྟེ ༧ གོང་ས་མཆོག་ལ་བསྔོ་སྨོན་ཞུ་རོགས་ཞེས་སྐུལ་ཡོད་འདུག དེ་དང་འབྲེལ་ཡོད་ཀྱི་གནས་ཚུལ་ཞིག་ལ། ལྷ་ས་འབྲས་སྤུངས་དགོན་དུ་ཡོད་པའི་ཀླུ་འབུམ་ཁང་ཚན་དང༌། བིས་མདོ་མུ་བཙན། ཐེ་བོ་ཁང་ཚན་སོགས་སུ་སློབ་གཉེར་བྱེད་བཞིན་པའི་མདོ་སྨད་ཀྱི་གྲྭ་བ ༡༠༠ ལྷག་ཉེས་མེད་བཙན་འཁྲིད་ཀྱིས་ལྷ་ས་ནས་གོར་མོའི་བཙོན་ཁང་དུ་ཟླ་བ་བཞིའི་རིང་འཛིན་བཟུང་བཀག་ཉར་བྱས་ཡོད་པ་དང༌། གྲྭ་བ་དེ་དག་བཙོན་གྲོལ་མ་བཏང་སྔོན་ཁོང་ཚོའི་སྡོད་གནས་སུ་ཡོད་པའི་ཅ་དངོས་ཡོད་ཚད་རེ་རེ་བཞིན་ཕྱིར་མདོ་སྨད་ཀྱི་རང་དགོན་དང༌། རང་ཡུལ་དུ་བསྐྱལ་ཡོད་འདུག་ལ། བཙོན་གྲོལ་བཏང་རྗེས་གྲྭ་བ་རྣམས་ཕྱིར་རང་ཡུལ་དུ་བསྐྱལ་ཡོད་པ་མ་ཟད། རྒྱ་ནག་ཉེན་རྟོག་པས། ཕྱིར་ལྷ་སར་ཕེབས་མི་ཆོག་པ་དང་གལ་སྲིད་ཕེབས་ཚེ་མཇུག་འབྲས་ཡག་པོ་ཞིག་མི་འབྱུང་བའི་ཉེན་བརྡ་དང་བཙན་བཀའ་བཏང་ཡོད་འདུག ད་ལྟ་གྲྭ་བ་དེ་དག་གིས་སློབ་གཉེར་མཚམས་བཞག་སྟེ་རང་ཡུལ་དུ་མི་སྡོད་ག་མེད་ཆགས་ཡོད་པ་རེད། གཞན། རྒྱ་ནག་འཐབ་ཕྱོགས་གཅིག་གྱུར་ཁང་གིས། མདོ་སྨད་ཨ་མདོ་ཁུལ་གྱི་དགོན་པའི་ནང་གྲྭ་བ་རྣམས་ལ་བདེ་འཇགས་དང་ཁྲིམས་ལུགས་སློབ་སྦྱོང་སྤྲོད་བཞིན་པ་དང་ཆབས་ཅིག་༧གོང་ས་མཆོག་ལ་མཚན་སྨོད་སྣ་ཚོགས་བྱེད་བཞིན་ཡོད་འདུག་ལ། ཐབས་ལམ་སྣ་ཚོགས་སྤྱད་དཻ་དགོན་སྡེ་ཁག་ཏུ་ཁྱིམ་ཚང་དབུལ་བོའི་གྲྭ་བ་རྣམས་ལ་སྡོད་ཤག་གསར་བ་རྒྱག་པ་དང༌། དགོན་པའི་གཞུང་སོགས་སུ་རླངས་འཁོར་སྤྲོད་པ་སོགས་དཔལ་འབྱོར་གྱི་ལམ་ནས་གྲྭ་བ་དེ་དག་གི་སེམས་པ་འགུག་ཐབས་བྱེད་བཞིན་ཡོད་འདུག་ལ། གྲྭ་བ་རྣམས་ཀྱིས་འདི་ནི་ཆབ་སྲིད་ཀྱི་གཡོ་སྒྱུ་ཞིག་ཏུ་ངོས་འཛིན་བྱེད་བཞིན་ཡོད་པ་རེད།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
ང་དང་བོད་མི།
ངས་རེ་བ་ང་བོད་མི་ཚོའི་སེམས་ཕྱུག་དེ་རྩ་ནས་མ་ཆག་པར་བྱོད་དགོས་
ཨ་ཧ་བོ། ད་ང་ཚོས་ཅི་ཞིག་བྱས་ན་ཡག་པོ་རེད། པོད་གཞུང་་ཁ་རོགས་ག་ངརྡད་འདུག་ག།