རེས་གཟའ་ཉི་མའི་ཕྱི་དྲོ་དྷ་སར་ལས་དོན་ཞིག་གི་ཆེད་དུ་བསྐྱོད་དགོས་བྱུང༌། ངའི་གོམས་གཤིས་ཡག་ཤོས་ཤིག་ནི་དྷ་སའི་དཔེ་དེབ་ཁང་དེ་སྒོ་ཕྱེ་ཡོད་ན་དུས་བབ་སོགས་གསར་ཤོག་གསར་པ་ཞིག་ཡོད་ན་ངེས་པར་ཉོ་དགོས་པ་དེ་ཡིན། དེ་རིང་ཡང་སྒོ་ཕྱེ་འདུག་པས་བོད་ཀྱི་དུས་བབ་དང་སྤྱི་ཚོགས་མེ་ལོང་གཉིས་ཀ་གསར་པ་རེད་འདུག དེ་གཉིས་རེ་རེ་ཉོས་ཀྱང་ཀློག་སྟེ་འདུག་ཁོམ་མེད། དྷ་ས་ནས་ཕྱིར་ལོག་རྗེས་ལམ་སེང་རང་གནས་སུ་ལོག་སྟེ་ནང་དུ་འབྱོར་མ་ཐག་ངལ་གསོ་ཙམ་ཡང་མ་བརྒྱབ་པར་དུས་བབ་སྔོན་དུ་ལག་ཏུ་བླངས།
རིམ་པ་བཞིན་རགས་ཙམ་བལྟས་རྗེས་ངའི་དོ་སྣང་ཡོད་ཚད་བོད་ཀྱི་དུས་བབ་སྤྱིའི་འདོན་ཐེངས་ ༤༢༦ སྤྱི་ལོ་ ༢༠༠༨ ལོའི་ ༩ པའི་ཚེས་ ༣༠ ཉིན་ཐོན་པའི་ཤོག་ངོས་འཕར་མ་ ༣ པའི་གཤམ་དུ། བཀའ་བློན་བཀྲས་ཟུར་བསྟན་འཛིན་རྣམ་རྒྱལ་ལགས་སུ་བཅར་འདྲི་ཞུས་པའི་དྲི་བ་དྲིས་ལན་འགོ་བརྗོད་དུ་༼རང་ཐག་རང་གཅོད་ལས་ལྷག་མི་འདུག༽ཅེས་པའི་བརྗོད་དོན་ལ་དལ་གྱིས་ཕྱོགས། དེ་རྣམས་ཀྱི་ནང༌། བོད་ཀྱི་དུས་བབ་འཇིག་རྟེན་འདིར་བྱོན་ནས་ལོ་ངོ་བཅུ་གསུམ་འགྲོ་བཞིན་པའི་དེ་རིང་གི་དུས་འདིར་གློ་བུར་དུ། བོད་ཀྱི་བརྡ་སྤྲོད་པའི་གཞུང་ནས་གསུངས་པའི་སྒྲ་སྦྱོར་གྱི་འགྲོས་དང་མི་མཐུན་འབྲེལ་སྒྲའི་སྦྱོར་ཚུལ་དམིགས་བསལ་བ་ཞིག་ཐོན་འདུག་པས། ངས་དུས་བབ་ཤོག་ངོས་ཚང་མར་སླར་ཡང་རགས་ཙམ་ཞིག་བལྟས་པ་ཡིན། ཤོག་ངོས་གཞན་ཚང་མའི་ནང་དེ་ལྟ་བུའི་སྦྱོར་ཚུལ་ཞིག་མེད་ཀྱང༌། བརྗོད་གཞི་བྱེ་བྲག་པ་འདིའི་ནང་དེ་ལྟར་ཡོང་དགོས་དོན་ཅི་ཡིན་ནམ་བསམ་བཞིན་ཐེ་ཚོམ་དུ་ལུས། ཡང་བསྐྱར་ཐེངས་ཤིག་བཀླགས་པས་ད་དུང་དེའི་ནང་འབྲེལ་སྒྲའི་སྦྱོར་ཚུལ་དམིགས་བསལ་བ་འགའ་ཞིག་གསར་དུ་རྙེད། ངའི་བསམ་པར་བོད་ཀྱི་སྐད་ཡིག་གིས་ཀྱང་མནར་གཅོད་མྱོང་བཞིན་པའི་དུས་སྐབས་དེའི་ནང་མའོ་ཙེ་ཏུང་གི་གསུང་རྩོམ་གཅེས་བཏུས་ཞེས་པའི་དེབ་སོགས་ཀྱི་ནང་ཨི་ལྡན་གྱི་ཕྲད་གི༷་མ་གཏོགས་མེད་པར་ཕྲད་གཞན་རྣམས་རྒྱང་ཕུད་དུ་བཏང་བའི་གཏམ་རྒྱུད་གོ་མྱོང་བ་དེ་སླར་ཡང་དྲན་བྱུང༌། འོན་ཀྱང་བློ་ཕམ་པ་ཞིག་ལ་དཔེ་དེབ་དེ་རིགས་ལྟ་མྱོང་ཙམ་ཡང་མེད། ང་རང་བཙན་བྱོལ་དུ་འབྱོར་བ་དང་དུས་མཉམ་དུ་གསར་དུ་ཐོན་ཅིང༌། དུས་དེ་ནས་ང་དང་ལྷན་དུ་འགྲོགས་མྱོང་ལ། ང་རང་ཆེས་ཀློག་འདོད་པའི་བོད་ཀྱི་དུས་བབ་ནང་ཕྲད་ཀྱི་སྦྱོར་ཚུལ་དེ་མཐོང་སྐབས། འདས་པའི་ལོ་ངོ་བཅུ་གཉིས་ལ་ཕྱིར་བལྟས་བྱས་ཏེ་བསམ་གཞིགས་བྱེད་པའི་ཚེ། འདི་ལྟ་བུའི་སྦྱོར་ཚུལ་མཐོང་བ་དེ་རིང་ཐོག་མ་ཡིན། དེ་བས་ན། བླུན་རྨོངས་ཁོ་བོ་བློ་ཕམ་ཡིད་ཆད་ཀྱི་གནས་སུ་གྱར་ཞིང་སེམས་པ་དུས་བབ་རྩོམ་སྒྲིག་ཁང་ལ་ཕྱོགས།
སྤྱིར་ཚིག་ཕྲད་ཀྱི་སྦྱོར་ཚུལ་ཞུས་ཚེ། སངས་རྒྱས་ལ་ཀ་ཁའི་དཔེ་རུ་འགྲོ་བ་གདོན་མི་ཟ་ཡང༌། དུས་བབ་ཀྱི་མཚན་སྙན་དང་བོད་ཀྱི་སྐད་ཡིག་གི་བླ་སྲོག་ལ་བསམས་ཏེ་གཞེན་སྐུལ་གྱི་ཚུལ་དུ་མི་སྨྲ་མཐུ་མེད་བྱུང༌། བརྡ་སྤྲོད་པའི་གཞུང་ལུགས་ལྟར། གོ་བདེར་བཤད་ན། ལེགས་བཤད་ལྗོན་དབང་ལས། སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི། འ་དང་མཐའ་མེད་འི་དང་ཡི། །ཞེས་ཨི་ལྡན་གྱི་ཕྲད་རྣམས་ཀྱི་སྦྱོར་ཚུལ་ནི། རྗེས་འཇུག་ན་མ་ར་ལ་རྣམས་ཀྱི་རྗེས་སུ་གྱི་དང༌། ད་བ་ས་རྣམས་ཀྱི་རྗེས་སུ་ཀྱི་དང༌། ག་དང་ང་གཉིས་ཀྱི་རྗེས་སུ་གི། འ་དང་མཐའ་མེད་ཀྱི་རྗེས་སུ་རྐང་པ་ཁ་མི་སྐོང་ན་འི་དང་སྐོང་དགོས་ན་ཡི་འཐོབ་ཅེས་གསལ་བར་གསུངས་པ་བཞིན་དོན་ལག་ལེན་གྱི་སྟེང་དུ་དེ་ལྟར་བེད་སྤྱོད་བྱེད་མུས་ཡིན་ལ་གསར་འགོད་པ་ཁྱེད་རྣམས་ལ་ཡང་དེ་བློ་ལ་གཤར་མར་འདོན་རྒྱུ་ཡོད་པ་ང་ལ་ཡིད་ཆེས་ཡོད།
དེའི་ནང་གི་འབྲེལ་སྒྲའི་ཕྲད་ཀྱི་སྦྱོར་ཚུལ་ནི། རྗེས་འཇུག་ ས་ ད་ ན་ མ་ བ་ ར་ མི་ཉུང་བ་ཞིག་གི་རྗེས་སུ་འབྲེལ་སྒྲའི་ཕྲད་གི༷་ཁོ་ན་བེད་སྤྱོད་གནང་འདུག དཔེ་མཚོན་ཙམ་ཞུས་ན། མིང་ཡང་འདོགས༷་གི༷་ཡོད་པ་མ་རེད། ཡིན་ཚུལ་བཤད༷་གི༷་ཡོད་པ་རེད། རྩ་དོན་ལ་ཕན༷་གི༷་རེད་བསམ༷་གྱི༷་འདུག ལབ་ཐུབ༷་གི༷་མ་རེད། ཟེར་གི༷་རེད། ཐག་གཅོད༷་གི༷་ཡིན་ལབ་ན་དེ་ཡོད་མ་རེད་ཟེར་ཐུབ༷་གི༷་མ་རེད། ཆགས༷་གི༷་ཡོད་པ་རེད། ཅེས་སོགས་རྗེས་འཇུག་དེ་རྣམས་ཀྱི་རྗེས་འབྲེལ་སྒྲའི་ཕྲད་བེད་སྤྱོད་གནང་བ་ཁྱོན་སུམ་ཅུ་སོ་བཞི་འདུག་པས། ངའི་བསམ་པར་དེ་རིང་དུས་བབ་གསར་ཤོག་ནང་གི༷་སྒྲའི་ཕྲད་ཀྱི་བཙན་འཛུལ་སླེབས་འདུག་བསམས་ཏེ། བོད་ཀྱི་དུས་བབ་དང་བོད་ཀྱི་སྐད་ཡིག་བར་གྱི་ལས་དབང་ལས་འཕྲོས་པའི་བསམ་ཚུལ་འདི་ཞུ་དགོས་བྱུང༌། ཅི་སྟེ་གོང་འཁོད་ཕྲད་རྣམས་དེ་ལྟར་བེད་སྤྱོད་གནང་དགོས་པའི་དགོས་པ་རྒྱུ་མཚན་དང་རྒྱབ་ལྗོངས་ཀྱི་འགྲེལ་བཤད་སོགས་ཡོད་ན་གནང་དགོས་ཤིང༌། སླད་མར་བཅར་འདྲི་དང་བཀའ་སློབ་རིགས་ཡིག་ཐོག་ཏུ་ཕབ་སྐབས་ཀྱང་བོད་ཀྱི་ཡིག་སྐད་དང་བརྡ་སྤྲོད་པའི་གཞུང་ལུགས་དང་མཐུན་པའི་ཐོག་ནས་ཚགས་ཤོག་སྟེང་སྔར་མུས་བཞིན་འགོད་གནང་ཡོད་པ་ཞུ་རྒྱུ་དང༌། འདི་ནི་བོད་ཀྱི་དུས་བབ་དང་ལྷན་དུ་འགྲོགས་མྱོང་བའི་ཀློག་པ་པོ་ཞིག་གི་ལྷད་མེད་པའི་སྙིང་ཁོང་གི་འབོད་སྒྲ་ཐོག་མ་དེ་ཡིན། འདི་ནི་སྒྲོ་འདོགས་སྐུར་འདེབས་དང༌། ཕྱོགས་ལྷུང་ལིང་ཏོག་གི་ཡོལ་བས་བསྒྲིབས་པའི་བཙག་བུ་དེ་བས་ཀྱང་མིན་པས་ཡིད་འཇགས་ཡོད་པ་ཞུ། མཐར་བོད་ཀྱི་དུས་བབ་འཇིག་རྟེན་འདིར་བོད་མི་རིགས་ཀྱི་ཆེད་དུ་ཡུན་དུ་བརྟན་པར་སྨོན།
ང་ད་དུང་དེའི་ཐོག་བློ་ཡིད་ཚིམ་གྱི་མི་འདུགའདི་བྲིས་དང་དེ་བྲིས་དོན་ལ་འགྱུར་བ་མེད་ཀྱང་།བརྗོད་བདེ་དང་སྒྲ་སྦྱོར་གྱི་ཕྱོགས་གཉིས་ནས་རྩོད་གཞི་དེ་བྱུང་བ་རེད།དུས་བབ་ཀྱིས་གི་སྒྲའི་རང་བཙན་སླར་གསོ་གནང་ཡང་།
བོད་མི་ཤེས་ལྡན་པ་ཚོས་རང་དབང་སྤྲོད་པའི་ཆིངས་ཡིག་ཅིག་མ་བཞག་པ་དེ་སྲིད་དུ་གི་སྒྲར་རང་དབང་ཐོབ་ཀྱི་མ་རེད།
ས་རའི་ཕོ་རྒོད་ངག་དབང་ལགས། ངོ་མ་ཁྱོད་ཀྱིས་བཤད་པ བདེན་ལ་དུས་བབས་ལྷན་ཁང་ནས་ཀྱང་དེའི་ཐོག་ཐུགས་སྣང་དགོས་པ་གལ་ཆེར་བསམ། ཕྱོགས་གཅིག་ནས་ཡར་རྒྱས་གཏོང་བཞིན་ཕྱོགས་གཞན་ནས་མ་དག་རྒྱུན་འཇགས་སུ་གཏོང་བཞིན་པར་བློ་འཕམས་ཡོད།
སུམ་རྟགས་ཁ་སྐོང་ཐོ་རེ་མ།
དགེ་འདུན་རབ་གསལ་གྱིས།
དུས་གསུམ་རྣམ་དབྱེ་སྟོན་པའི་ཕྲད༎
བོད་ཀྱི་སྐད་ལ་འདི་ལྟར་འགྲེལ༎
རྗོད་པའི་དུས་ཀྱི་རྣམ་དབྱེ་ལ།
སྨྲ་བ་བོ་དང་བྱེད་པ་པོའི༎
དབྱེ་བས་རྣམ་པ་གཉིས་སུ་འགྱུར།།
སྨྲ་བོ་བྱེད་པོ་གཅིག་ཡིན་ཚེ།།
ངས་བྱ་ངས་བྱེད་ལྟ་བུ་ལ།།
གི་ཡིན་གི་ཡོད་པ་ཡིན་འབྲི།།
བྱེད་པོ་དངོས་སུ་ཡོད་མེད་ཀྱིས༎
ཚིག་ཕྲད་འདི་ལ་ཁྱད་འབྱིན་ཏེ༎
ངས་མཐོང་ང་ཤི་ལྟ་བུ་ལ༎
གི་རེད་གི་འདུག་པ་རེད་འབྲི༎
འདི་ལ་བྱ་བའི་རྣམ་པ་ཡིས༎
འདས་པའི་ཕྲད་ལ་ཁྱད་པར་འབྱིན༎
ཤེས་སོང་གོ་བྱུང་ལྟ་བུ་ཡིས༎
འདི་དག་རིམ་གྱིས་བསྒྲེས་པར་བྱ༎
སྨྲ་བོ་བྱེད་པོ་ལས་གཞན་ཚེ༎
འདས་དང་མ་འོངས་ད་ལྟ་ལ༎
པ་རེད་གི་རེད་གི་འདུག་འབྲི།།
སྨྲ་བོས་བྱ་བ་མཐོང་མིན་གྱིས༎
འདས་པའི་ཕྲད་ལ་གཉིས་ཡོད་དེ༎
བྱ་ཚིག་མཐའ་ལ་སོང་དང་བཞག
སྦྱོར་བའི་རིམ་པ་ཤེས་པར་བྱ༎
དྲི་བ་དང་ནི་ཐེ་ཚོམ་དང་༎
དེ་བཞིན་མཐའ་བཟུང་ཅན་རིགས་ལ༎
ཡིན་མིན་ཡོད་མེད་གཙོ་བོར་སྤྱོད༎
ཁམས་དང་ཨ་མདོའི་སྐད་ལུགས་ལ༎
དེ་མཚུངས་ཕྲད་ཀྱི་རྣམ་དབྱེ་མཆིས༎
ཕྱིན་ཐལ་འགྲོ་ལེ་ལྟ་བུ་དང་༎
བཏང་ང་བཏང་ཐལ་ལྟ་བུའོ༎
༼གོང་གསལ་འདི་ནི་གླེང་ སློང་གི་བསམ་ཚུལ་ཙམ་ཡིན་ལ། རིམ་གྱིས་རྗོད་པའི་རྣམ་དབྱེ་གཞན་ཡང་འདི་ལྟར་འབྲི་འཆར་ཡིན་པ་ལ་དགོངས་འཆར་ གནང་རོགས་ཞུ།༽
ཁ་བརྡ་དྲ་ཚིགས་ལས་བཤུས་པ་ཡིན།
ངག་དབང་རྡོ་རྗེ་ལགས་ཀྱིས་དུས་བབ་ཚགས་པ་ཉོ་བཞིན་པར་བལྟས་ན་ཚགས་པར་ལས་དུས་བབ་དྲ་ངོས་སྟེང་ཕེབས་གི་མེད་པ་འདྲ། སྤྱིར་བོད་ཀྱི་སྐད་ཡིག་ལ་ཤ་ཞེན་ཆེ་ཐོག་ཆུང་ཚགས་ཕྲད་དང་རྣམ་དབྱེ་ཚུན་ལའང་ཐུགས་ཞིབ་གནང་བཞིན་པ་ནི་དགའ་འོས་པ་ཞིག་རེད། འོན་ཀྱང་གི་སྐོར་ལ་སུམ་རྟགས་གཞུང་ནས་གང་གསུངས་ལྟར་སྦྱོར་དགོས་མིན་དང་དེའི་འཇུག་ཚུལ་ཀྱང་སུམ་རྟགས་གཞུང་དང་བསྟུན་དགོས་མིན་དཔྱད་པ་གཏོང་དགོས་པར་འདོད། འདིའི་སྐོར་ཉེ་ཆར་དྲ་གྲོགས་སྟག་སྨྱོན་དང་རབ་གསལ། ལུང་རིགས་རྒྱལ་གསུམ་གྱི་བགྲོ་གླེང་ཐུང་ཞིང་གནད་དུ་འཁེལ་བ་ཞིག་གནང་འདུག་པས། ངག་རྡོ་ལགས་དྲ་ངོས་དེར་ཕེབས་ཐུབ་མིན་མི་ཤེས་ནའང་རྐང་གླིང་བས་ཐེངས་ཤིག་གཟིགས་ཐུབ་ན་སྙམ། ངའི་བསམ་པར་རིག་གསར་སྐབས་ལྟར་གི་སྒྲའི་བཙན་འཛུལ་སླེབས་པའི་རྣམ་པ་གང་ཡང་མི་འདུག རིག་གསར་སྐབས་གི་སྒྲས་བྱེད་འབྲེལ་གྱི་ཕྲད་གཞན་གི་སྤྱོད་སྒོ་རྒྱ་ནག་གཞུང་གི་དབང་ཤུགས་དང་འགྲོགས་འཕྲོག་ཡོད་སྟབས་དེ་ལ་༼ བཙན་འཛུལ ༽ ཞེས་པའི་མིང་འདི་འབྱོར་བ་ཞིག་རེད། འོན་ཀྱང་གོང་ནས་དྲངས་པའི་བཅར་འདྲི་དེ་ནང་གི་སྒྲའི་སྦྱོར་འཇུག་རྒྱ་ཆེ་རུ་བཏང་འདུག་པས་འདི་ལ་༼ ཡར་རྒྱས་ ༽སམ། དེ་སྔ་ང་ཚོའི་བརྡ་སྤྲོད་མཁན་པོ་དག་གི་ཐུགས་ཉམས་མ་བཞག་པའི་གནད་ཅིག་ལྷིང་ལ་ཕུད་འདུག་པས་༼ ཁ་སྐོང་༽ཞིག་བྱས་འདུག་སྙམ།
ཡག ་པོ ་འདུག