གསེར་གྱི་རྟཌ་མའི་དུས་དྲན།

གསེར་གྱི་གཟེངས་རྟགས་ཞེས་པའི་དུས་དེབ་ཅིག་གིས་ལོ་རྒྱུས་ཀྱིས་བརྗེད་མི་སྲིད་པའི་ཕྱི་ཚེས་ ༡༧ ཉིན་གྱི་དུས་དྲན་སྲུང་གཙི་བྱས་ཡོད།

ཕྱི་ཚེས་ ༡༧ ནི་ལོ་རྒྱུས་ཀྱིས་བརྗེད་མི་སྲིད་ཅིང་བོད་མི་རིགས་ཀྱི་སེམས་ཁོང་ནས་འབོར་མི་ནུས་པའི་དུས་ཆེན་གལ་ཆེན་ཞིག་ཡིན་ལ། ཉིན་དེར་སེ་ར་ཐེག་ཆེན་ཆོས་གླིང་གིས་ཉིན་གཅིག་རིང་གྲྭ་མང་ལ་གུང་སེང་བཏང་སྟེ། ལོ་རྒྱུས་ཀྱིས་བརྗེད་མི་སྲིད་པའི་ཉིན་མོ་འདི་སྲུང་གཙི་གནང་ཡོད་ལ། ཨ་རིའི་གྲོས་ཚོགས་ཀྱིས་ྋགོང་ས་མཆོག་ལ་གསེར་གྱི་རྟགས་མའི་གཟེངས་རྟགས་ཕུལ་ཏེ་ལོ་གཅིག་འཁོར་བའི་དུས་དྲན་དུ་སེར་བྱེས་མཁས་སྙན་གྲྭ་ཚང་གི་གསེར་གྱི་གཟེངས་རྟགས་རྩོམ་སྒྲིག་ཁང་གིས། གསེར་གྱི་གཟེངས་རྟགས་ཞེས་པའི་དུས་དེབ་ཅིག་དབུ་འབྱེད་དང་འགྲེམས་སྤེལ་བྱས་ཡོད་ཅིང༌། དུས་དེབ་དེར་བཙན་བྱོལ་བོད་གཞུང་གི་ཆོས་རིག་བཀའ་བློན་ཚེ་རིང་ཕུན་ཚོགས་དང་ཤེས་རིག་བཀའ་བློན་ཐུབ་བསྟན་ལུང་རིགས། བདེ་སྲུང་བཀའ་བློན་འབྲོང་ཆུང་དངོས་གྲུབ། ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད། བཀའ་ཟུར་སྐལ་བཟང་ཡེ་ཤེས་བཅས་ཀྱིས་ལེགས་གསོལ་ཡི་རང་གི་འཚམས་འཕྲིན་ཕུལ་འདུག་ཅིང༌། བོད་མི་མང་སྤྱི་འཐུས་བེ་རི་འཇིགས་མེད་དབང་རྒྱལ་དང་སྤྱི་འཐུས་གསེར་རྟ་ཚུལ་ཁྲིམས། སྤྱི་འཐུས་ཆབ་བྲག་ཕོ་ཉ། སྤྱི་འཐུས་ཐུབ་བསྟན་འཕེལ་རྒྱས། སྤྱི་འཐུས་བསོད་ནམས་བསྟན་འཕེལ། སྤྱི་འཐུས་སྨོན་ལམ་མཐར་ཕྱིན། སྤྱི་ཟུར་ཧོར་གཙང་འཇིགས་མེད་དང་སྤྱི་ཟུར་རོང་པོ་བློ་བཟང་སྙན་གྲགས་བཅས་སྤྱི་འཐུས་དང་སྤྱི་ཟུར་ཁག་ཅིག་གི་ལྗགས་རྩོམ་དང༌། གདན་ས་ཁག་གི་བླ་སྤྲུལ་དགེ་བཤེས་དང་སྐྱ་སེར་ཤེས་ལྡན་པ་དང་སྙུག་ཐོགས་པ་བདུན་ཅུར་ཉེ་བས་རྩོམ་ལུས་འདྲ་མིན་སྟེང༌། ྋགོང་ས་མཆོག་གིས་ཨ་རིའི་གསེར་གྱི་གཟེངས་རྟགས་བཞེས་པར་ཕུལ་བའི་རྩོམ་ཡིག་བཀོད་འདུག དུས་དེབ་འདི་འདོན་སྤེལ་བྱེད་དགོས་དོན་ྋགོང་ས་མཆོག་ལ་ཨ་རི་སྟོབས་ཆེན་རྒྱལ་ཁབ་ཀྱིས་གྲོས་ཚོགས་ནས་ཆེས་མཐོའི་གསེར་གྱི་གཟེངས་རྟགས་སྙན་གྲགས་ཆེ་བ་འབུལ་བཞེས་ཞུས་པར་བཀའ་དྲིན་རྗེས་དྲན་དུ་ཡིན་སྐོར་སྔོན་འགྲོའི་གཏམ་དུ་བཀོད་ཡོད་ནའང༌། མུ་མཐུད་འདོན་སྤེལ་བྱེད་མིན་གྱི་ཐད་གང་ཡང་གསལ་མི་འདུག་པས། འདི་གའི་གསར་འགོད་པས་རྩོམ་སྒྲིག་པ་དགེ་འདུན་ཉི་མ་ལགས་སུ་མུ་མཐུད་དུས་དེབ་འདི་འདོན་སྤེལ་བྱ་མིན་ཐད་བཀའ་འདྲི་ཞུས་པར་ཁོང་གིས་གསུངས་དོན། དཔལ་འབྱོར་གྱི་འགྲོ་སོང་རག་ཚེ་མུ་མཐུད་དུ་འདོན་སྤེལ་བྱ་འཆར་ཡོད་ནའང༌། ད་ལྟའི་ཆར་དུས་དེབ་འདི་མུ་མཐུད་འདོན་སྤེལ་བྱ་རྒྱུར་དཔལ་འབྱོར་གྱི་རྒྱབ་རྩ་གང་ཡང་མེད་ཅིང༌། ཐེངས་འདིའི་འགྲོ་གྲོན་ཡང་བུ་ལོན་དུ་ལུས་ཡོད་ཅེས་འགྲེལ་བརྗོད་གནང་སོང༌། ཉིན་དེར་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་ཀྱང་མིག་འབྱེད་ཅེས་པའི་ན་གཞོན་སློབ་མ་རྣམས་ལ་དམིགས་པའི་དུས་དེབ་ཅིག་དཔར་སྐྲུན་འགྲེམས་སྤེལ་གནང་ཡོད།

ཕྱི་ཚེས་ ༡༧ ཉིན་ནི་ྋགོང་ས་མཆོག་གིས་ཨ་རིའི་གསེར་གྱི་གཟེངས་རྟགས་བཞེས་ནས་ལོ་ཧྲིལ་བོ་གཅིག་འཁོར་བའི་དུས་དྲན་ཀྱི་ཉིན་མོར་ཁེལ་ཡོད་པ་རེད། ཡིན་ནའང་བཙན་བྱོལ་བོད་གཞུང་དང་ཚོགས་པ་ཁག་གིས་དུས་དྲན་སྲུང་བརྩིའི་མཛད་སྒོ་ཅི་ཡང་གོ་སྒྲིག་བྱས་མེད་པ་རེད།