རྒྱ་ནག་གིས་བཤད་དོན། ཏཱ་ལའི་བླ་མ་དང་ཁོང་གི་རྒྱབ་སྐྱོར་བ་ཚོས་ཏང་ཀྲུང་དབྱང་ལ་འབྲེལ་བ་ཇེ་ལེགས་སུ་གཏོང་འདོད་ཡོད་ན། ཕྱི་ཟླ་བདུན་པའི་ནང་གི་ཁས་ལེན་དེ་དག་བརྩི་སྲུང་བྱེད་དགོས་ཟེར།
༧རྒྱལ་བ་རིན་པོ་ཆེ་མཆོག་གིས་ཕྱི་ཚེས་ ༢༥ ཉིན་ངྷ་སྟེང་བོད་ཁྱིམ་གྱི་མཛད་སྒོའི་ཉིན་ཁོང་གིས་རྒྱ་ནག་གཞུང་དང་མཉམ་དུ་འབྲེལ་བ་གནང་སྟེ་བོད་ཀྱི་གནད་དོན་སེལ་རྒྱུའི་ཐུགས་རེ་དེ་ད་ཆར་སྐྱོ་རུ་འགྲོ་གི་འདུག་ཅེས་གསུངས་ཡོད་ལ། འདིའི་ཐད་རྒྱ་ནག་གཞུང་གིས་༧རྒྱལ་བ་རིན་པོ་ཆེ་མཆོག་དང་ཁོང་གི་རྒྱབ་སྐྱོར་བ་ཚོས་རྒྱ་ནག་དབུས་གཞུང་མཉམ་དུ་འབྲེལ་བ་མུ་མཐུད་ཇེ་ལེགས་སུ་གཏོང་འདོད་ཡོད་ན། ལོ་འདིའི་ཕྱི་ཟླ་བདུན་པའི་ནང་ཁས་ལེན་བྱས་པ་དག་བརྩི་སྲུང་བྱེད་དགོས་པ་རེད་ཅེས་ཕྱི་ཚེས་ ༢༨ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ ཅང་ཡུ་ ཡིས་གསར་འགོད་འདུ་འཛོམས་ཤིག་གི་སྟེང་བཤད་ཡོད་པ་རེད།
ཅང་ཡུ་ཡིས་གསར་འགོད་པའི་དྲི་བར་ལན་འདེབས་སྐབས། རྒྱ་ནག་དབུས་གཞུང་གིས་ཏཱ་ལའི་བླ་མར་བཟུང་བའི་སྲིད་བྱུས་ནི་འགྱུར་བ་མེད་པ་དང་། གསལ་བོ་ཡིན་པ་མ་ཟད། ཁོང་དང་མཉམ་དུ་འབྲེལ་བ་འཛིན་པ་དེར་ཡང་ལྷག་བསམ་རྣམ་དག་གི་རྣམ་འགྱུར་ཞིག་བཟུང་ཡོད་ཅེས་བཤད་འདུག
མུ་མཐུད་དོན། ང་ཚོའི་རེ་བར་དབུས་གཞུང་དང་མཉམ་དུ་འབྲེལ་བ་བཟུང་བ་བརྒྱུད་ཏཱ་ལའི་བླ་མས་ད་ཡོད་ཀྱི་གནས་སྟངས་ངོས་ཟིན་པ་དང་། དོན་དངོས་དང་མཐུན་པའི་ལྷག་བསམ་འཁྱེར་ཡོང་བ་དང་ཕྱག་ལས་གནང་བ། ཁོང་གི་མི་ཚེ་རིང་བོད་མི་རིགས་ལ་ཕན་ཐོགས་ཡོད་པ་ཞིག་སྒྲུབ་གི་རེད་བསམ་ཡོད་ཟེར།
དེ་བཞིན་དུ་ཁོ་མོས། དབུས་གཞུང་གིས་ཏཱ་ལའི་བླ་མ་སྐུ་ཚབ་ཚོ་མཉམ་དུ་འབྲེལ་མོལ་ཐེངས་བརྒྱད་པ་ཞིག་སྐོང་རྒྱུའི་སྐོར་དེ་ཡང་ཟླ་འདིའི་ཟླ་མཇུག་ལ་གནང་རྒྱུའི་ཐད་གོ་སྒྲིག་བྱེད་བཞིན་ཡོད་ཅེས་ཀྱང་བརྗོད་འདུག
ལོ་འདིའི་ཕྱི་ཟླ་བདུན་པའི་ནང་གི་འབྲེལ་མོལ་ཐེངས་བདུན་པའི་སྐབས་རྒྱ་ནག་གིས་༧རྒྱལ་བ་རིན་པོ་ཆེ་མཆོག་ལ་རྒྱབ་སྐྱོར་མི་བྱེད་པ་བཞི་ཞེས་པའི་ཆ་རྐྱེན་བཏོན་ཡོད་ལ། དེའི་ནང་གི་གཅིག་གི་གཞོན་ལྷན་གྱི་རང་བཙན་ལས་འགུལ་ཡིན།
རྩོམ་སྒྲིག་པ་ལགས་ཁྱེད་ཀྱིས་གསལ་བཤད་ཐུང་ཐུང་ཞིག་གནང་བ་དེར་ཐུགས་རྗེ་ཆེ་ཞུ། ཡིན་ཡང་། ང་ཚོས་གསལ་བོ་ཞིག་ཤེས་འདོད་ཡོད་པ་ནི། ནམ་རྒྱུན་དུ་ང་ཚོས་མི་དམངས་ཀྱིས་སྐུ་ཚབ་ཚོས་རྒྱ་ནག་སྲིད་གཞུང་ལྷན་དུ་གྲོས་མོལ་ཡིན་ན་རེད། འབྲེལ་མོལ་ཡིན་ན་རེད། དེའི་མཇུག་འབྲས་གསལ་བོ་ཞིག་མི་དམངས་ཀྱིས་ཤེས་མ་ཐུབ་པར་བསྡོད་དགོས་པའི་གནད་དོན་གང་ལ་ཐུག་ཡོད་པ་རེད། བཙན་བྱོལ་གཞུང་གིས་ནམ་རྒྱུན་དུ་གླེང་བཞིན་པ་ནི་ང་ཚོས་གཞུང་འདི་ཕྱི་གསལ་ནང་གསལ་ཡིན་ཟེར་གྱི་ཡོད་ན། གཞུང་གིས་སྐུ་ཚབ་དག་གིས་ག་རེ་བྱེད་བཞིན་པ་དང་བྱས་ཟིན་པ། ཡང་ན་བྱེད་སྲིད་པ་དག་རང་གི་མི་དམངས་ཀྱིས་ནམ་ཡང་ཤེས་སུ་མི་འཇུག་དོན་ག་རེ་ཡིན་ནམ། དགོང་འགལ་མེད་པར་ཞུ། རྩོམ་སྒྲིག་པ་ལགས་ཀྱིས་ང་ཚོ་ལ་དེའི་ལན་ཞིག་གཞུང་གིས་ལས་ཀྱི་སྣེ་མོ་བ་དེའི་སྐོར་ལ་གསལ་ཆ་ཡོད་པ་ཞིག་ལ་བཅར་འདྲི་གསལ་བོ་ཞིག་བྱེད་ཐུབ་ཀྱི་ཡོད་ན། གལ་སྲིད་ངས་བཤད་པ་འདི་ཧམ་པ་ཆེ་སོང་བ་དེ་འདྲའི་དགོངས་ན་བཟོད་པར་གསོལ།
བོད་གཞུང་གིས་རང་བཙན་རྩོད་ཀྱི་མེད་པ་དང་། འཚེ་མེད་ཞི་བ་ལ་འགྱུར་བ་མེད་པ། ཨོ་ལིམ་པིག་ལ་རྒྱབ་སྐྱོར་ཡོད་པ་བཅས་དུས་ནས་དུས་སུ་གསལ་བཤད་བྱས་ཚར་བས། ཆ་རྐྱེན་དེ་དག་ཁས་བླངས་ཡོད་མེད་ཀྱི་བར་ནས་མང་ཚོགས་མགོ་འཐོམས་སུ་མ་བཅུག་ན་བཟང་གི་རེད་སྙམ།
གཅིག་བྱས་ན་སྐུ་ཚབ་རྒྱ་རིས་པེ་ཅིང་དུ་མ་ཕྱིན་པའི་ཡར་སྔོན་གསལ་བཤད་བྱེད་སྲིད་ཀྱི་རེད། གལ་སྲིད་དེ་འདྲའི་རིགས་མ་གནང་བ་ཡིན་ན། ཁས་ལེན་བྱས་ཟིན་པ་བདེན་པ་ཆགས་ཚར་བ་རེད་ལ། དེང་ཕྱིན་ག་རེ་ལབ་ནའང་རྒྱལ་སྤྱིའི་སྒང་ཆ་འཇོག་ཡོང་གི་མ་རེད། གསར་འགོད་པས་ཅིའི་ཕྱིར་རྒྱ་རི་ལགས་ལ་ཁ་པར་བཏང་ནས་དྲི་བ་མི་འདོན་པ་ཡིན་ནམ།
ཨ་ལེ། སྐུ་ཚབ་ཚོས་དེ་འདྲ་ཞིག་ཁས་ལེན་བྱས་ཡོད་པ་བདེན་ཤས་འདུག རྒྱ་གར་གཞུང་གིས་སྐུ་སྲུང་ལ་དོ་དམ་བྱེད་སྟངས་ལས་ཤེས་ཐུབ་ཀྱི་འདུག འོ་ན། ད་ང་རང་ཚོ་གླེང་ཡ་ལྷག་མི་གཱ ཚང་མ་ལོས་བལྟས་ན་གང་འདྲ་འདུག་གམ།
རྒྱ་ནག་གིས་གཤིས་བཟང་དང་ཉམ་ཆུང་གི་བོད་པ་འདི་ལ་མཐོང་ཆུང་དང༌། ཁྱད་གསོད་བྱེད་པ་དང༌། ༸་གོང་ས་མཆོག་ཞལ་བཙུམ་ནས་བཞུགས་དགོས་པར་འདོད་པ་འདྲ།
རྩོམ་སྒྲིག་པས་གསལ་བཤད་གནང་བར་ཐུགས་རྗེ་ཆེ།
རྩོམ་སྒྲིག་པས་གསལ་བཤད་གནང་བར་ཐུགས་རྗེ་ཆེ།
རྒྱ་ནག་གིས་བཤད་ན། འབྲེལ་མོལ་ཐེངས་བདུན་པའི་སྐབས་ཏཱ་ལའི་བླ་མའི་སྐུ་ཚབ་རྣམས་ཀྱིས་ཏང་ཀྲུང་དབྱང་གི་ཆ་རྐྱེན་ཁག་ཅིག་ལ་མོས་མཐུན་བྱས་ཡོད་ཟེར་ལ། དེ་དག་ནི་ཨོ་ལིམ་པིག་རྩེད་འགྲན་ལ་བར་ཆད་དུ་འགྲོ་གཞིའི་ལས་འགུལ་ལ་རྒྱབ་སྐྱོར་མི་བྱེད་པ། ལྐོག་ཇུས་པ་དག་གི་དྲག་པོ་དང་ཉེས་ཅན་གྱི་ལས་འགུལ་ལ་རྒྱབ་སྐྱོར་མི་བྱེད་པ། ཁ་བྲལ་བ་གཞོན་ནུ་ལྷན་ཚོགས་ལ་རྒྱབ་སྐྱོར་མི་བྱེད་པ་དང་ཁོང་ཚོའི་དྲག་པོ་དང་འཇིགས་སྐུལ་རིང་ལུགས་པའི་ལས་འགུལ་དག་ཁ་ཡོད་ལག་ཡོད་ཀྱི་ཐོག་ནས་འགོག་སྡོམ་བྱེད་པ། བོད་རང་བཙན་རྩོད་མཁན་གྱི་ལས་འགུལ་དང་རྩོད་གླེང་རིགས། མངའ་ཁུལ་འདི་ཀྲུང་གོ་ལས་ལོགས་སུ་གཅོད་མཁན་ལ་རྒྱབ་སྐྱོར་མི་བྱེད་པ་བཅས་ཡིན་ཟེར།
སྐུ་ཚབ་རྣམ་པས་སྐབས་དེར་རྒྱ་ནག་གིས་༧རྒྱལ་བ་རིན་པོ་ཆེ་ལ་ཆ་རྐྱེན་འདི་དག་འདོན་གི་འདུག་ཅེས་བཤད་པ་མ་གཏོགས། འདི་དག་ལ་ཁས་ལེན་བྱས་ཡོད་ཚུལ་བཤད་མ་སོང་། འོན་ཀྱང་རྒྱ་ནག་གཞུང་གིས་བཤད་ན་སྐུ་ཚབ་ཚོས་གོང་གི་རྒྱབ་སྐྱོར་མི་བྱེད་པ་བཞི་དེར་ཁས་ལེན་བྱས་ཡོད་ཟེར།
དུས་བབ་ཀྱིས་ལོ་འདིའི་ཕྱི་ཟླ་བདུན་པའི་ནང་གི་ཁས་ལེན་དེ་དག་ག་རེ་ཡིན་པ་ཤེས་ཀྱི་ཡོད་དམ། ཤེས་ཀྱི་ཡོད་ན་དེ་དག་རེ་རེ་བཞིན་དྲ་ཐོག་ཏུ་འགོད་ཐུབ་བམ། ཤེས་ཀྱི་མེད་ན་མ་ཤེས་པའི་རྒྱུ་མཚན་བོད་གཞུང་གིས་གསང་རྒྱ་བྱེད་ཀྱི་ཡོད་པའི་རྐྱེན་གྱིས་ཡིན་ནམ། གསལ་བཤད་གནང་རོགས་ཞུ། ཐུགས་རྗེ་ཆེ།
རྒྱ་ནག་དབུས་གཞུང་གིས་ཏཱ་ལའི་བླ་མར་བཟུང་བའི་སྲིད་བྱུས་ནི་འགྱུར་བ་མེད་པ་དང་། གསལ་བོ་ཡིན་པ་མ་ཟད། ཁོང་དང་མཉམ་དུ་འབྲེལ་བ་འཛིན་པ་དེར་ཡང་ལྷག་བསམ་རྣམ་དག་གི་རྣམ་འགྱུར་ཞིག་བཟུང་ཡོད་ཅེས་བཤད་འདུག་པ་འདི་བདེན་པར་འཛིན་ཆོག་པ་ཞིག་ཡིན་པས་དབང་དུ་བཏང་ན། རྒྱ་ནག་སྲིད་གཞུང་གིས་འགྲིན་ཚབ་པ་དང་རྒྱ་ནག་ནང་གིས་སྲིད་གཞུང་གིས་༧གོང་ས་མཆོག་ལ་སྐྱོན་བརྗོད་ཤུགས་ཆེན་གནང་དགོས་པའི་རྒྱུ་མཚན་དེ་ཅི་ཞིག་ཡིན་ནམ། དེ་ལ་རྒྱ་ནག་གཞུང་གིས་འགྲིན་ཚབ་ཅང་ཡི་ཡིས་གསལ་བཤད་གང་ཡང་མེད་དོན་གང་ཡིན་ན། ད་དུང་། ཁོ་མོས་སྤོབས་པ་ཆེན་པོ་ཡོད་འདོག་གིས་དབུས་གཞུང་གིས་ཏཱ་ལའི་བླ་མ་སྐུ་ཚབ་ཚོ་མཉམ་དུ་འབྲེལ་མོལ་ཐེངས་བརྒྱད་པ་ཞིག་སྐོང་རྒྱུའི་སྐོར་དེ་ཡང་ཟླ་འདིའི་ཟླ་མཇུག་ལ་གནང་རྒྱུའི་ཐད་གོ་སྒྲིག་བྱེད་བཞིན་ཡོད་ཅེས་༧གོང་ས་མཆོག་སྐུ་སྒེར་གྱི་ཚོགས་པ་ཞིག་ལ་ངོས་བཟུང་དེ་སྐད་ཆ་བཤད་པ་ལས་བོད་གཞུང་གི་སྐུ་ཚབ་ཞེས་མི་གླེང་བའི་རྒྱུ་མཚན་གང་ལ་ཐུག་ཡོད་པ་རེད་དམ། ༧རྒྱལ་བ་རིན་པོ་ཆེ་མཆོག་ལ་རྒྱབ་སྐྱོར་མི་བྱེད་པ་བཞི་ཞེས་པའི་ཆ་རྐྱེན་བཞི་གང་གང་ལ་ངོས་འཛིན་བྱེད་ཀྱི་ཡོད་དམ། རྒྱ་ནག་སྲིད་གཞུང་གིས་ང་ཚོ་ལ་ཆ་རྐྱེན་གང་མང་མང་ཞིག་འདོན་ཆོག་པའི་དབང་ཚད་དེ་རྒྱ་ནག་སྲིད་གཞུང་ལ་སུས་གནང་གི་ཡོད་པ་རེད་དམ། བོད་བཙན་བྱོལ་གཞུང་གིས་གནང་གི་ཡོད་པ་རེད་དམ། ཡང་ན་བོད་མི་དམངས་ཀྱིས་གནང་གི་ཡོད་དམ། དེ་མིན་ན་༧གོང་ས་མཆོག་གིས་གནང་གི་ཡོད་པ་རེད་དམ། རྒྱ་ནག་སྲིད་གཞུང་གིས་ག་དུས་བར་དུ་ང་ཚོ་ལ་ཆ་རྐྱེན་བཏོན་ནས་འདུག་ངེས་པ་དང་ང་ཚོས་ག་ཚོད་བར་དུ་ཆ་རྐྱེན་བཏོན་པར་ཉན་ནས་འདུག་དགོས་པ་རེད་དམ། ནམ་ཞིག་ང་ཚོས་རྒྱ་ནག་སྲིད་གཞུང་གིས་ཆ་རྐྱེན་ཡོད་ཚད་ལ་ཁས་ལེན་བྱེད་དགོས་པ་ཡིན་ནམ། ང་ཚོ་བོད་པ་ཚང་ལ་འདི་ལས་གཞན་པའི་ལམ་ཁ་ཞིག་མེད་པ་ཆགས་ཚར་པ་ཡིན་ནམ། ད་ལྟ་ཡང་མུ་མཐུད་དུ་རྒྱ་ནག་སྲིད་གཞུང་གིས་ཆ་རྐྱེན་རེད་ཟེར་འདུག་དགོས་པ་ཡིན་ནམ་ཅི། ང་ཚོ་བོད་པ་ཚང་གི་གང་ཡང་བཤད་ཐུབ་པ་ནས་གང་ཡང་སྒྲུག་མི་ཆོག་པ་ཡིན་ནམ་ཅི།