ཕྱི་ཚེས་ ༣༠ ཉིན་གྱི་ཞོགས་པར་གླང་ཀོག་ར་བཟི་བ་ཞིག་གིས་རྒས་འཁོགས་ལོ་བདུན་ཅུ་ཅན་ཞིག་ལ་བརྡུངས་ཏེ་བཀྲོངས་པ་དང༌། གྲྭ་པ་ཞིག་ལ་ཚབས་ཆེའི་རྨས་སྐྱོན་བཟོས་ཏེ་སྨན་ཁང་དུ་བསྐྱལ་ཡོད་འདུག
ཁ་པར་བརྒྱུད་གནས་ཚུལ་ཤེས་རྟོགས་བྱུང་བ་ལྟར་ན། ལྷོ་ཕྱོགས་འབྲས་སྤུངས་དགོན་དུ་རྒྱ་གར་གྱི་གླང་ཀོག་ར་བཟི་བ་ཞིག་གིས་མོན་གྷོ་གཞིས་གྲོང་བདུན་པའི་རྒས་འཁོགས་ལོ་ ༧༠ བརྒལ་བ་ཞིག་བཀྲོངས་པ་དང༌། གྲྭ་པ་ཞིག་ལ་ཚབས་ཆེའི་རྨས་སྐྱོན་བཟོས་ཏེ་ད་ལྟ་ཧོབ་ལིའི་སྨན་ཁང་ཞིག་ཏུ་མྱུར་སྐྱོབ་བྱེད་དུ་ཕེབས་དགོས་བྱུང་ཡོད་འདུག གླང་ཀོག་དེ་ཉེ་འཁོར་གྱི་རྒྱ་གར་ཡུལ་མི་འགས་ཁྲིད་ཡོང་ཡོད་པ་དང༌། དེ་ནི་རྒྱ་གར་གྱི་ལོ་གསར་ལུགས་སྲོལ་ལྟར་གླང་ཀོག་གི་སྐེར་རྒྱན་གོས་དང་དངུལ་དངོས་སོགས་འདོགས་སྲོལ་ཡོད་ཅིང༌། གླང་ཀོག་ཁྲིད་དེ་གཞན་དུ་དངུལ་སློང་བར་འགྲོ་སྲོལ་ཡང་ཡོད་པ་ལྟར་འབྲས་སྤུངས་བླ་སྤྱིའི་ཆོས་རའི་ནང་དུ་སློང་རྒྱག་ཏུ་ཁྲིད་ཡོང་ནས་ཆོས་རའི་ནང་གི་ཤིང་སྡོང་ཞིག་ཏུ་བཏགས་ཡོད་ཅིང༌། གླང་ཀོག་ལ་ཆང་བླུད་དེ་བཟི་རུ་བཅུག་ཡོད་འདུག ཆང་ལྡུད་པ་ནི་གླང་ཀོག་དེའི་སྐེ་རུ་བཏགས་པའི་རྒྱན་གོས་དང་དངུལ་དངོས་རྣམས་ཡུལ་མི་སུས་ལེན་ཐུབ་ཀྱང་ལེན་ཆོག་པ་དང༌། སུ་ལེན་ཐུབ་ན་དེས་ཁྱེར་འགྲོ་ཆོག་པ་ཞིག་ཡིན་སྟབས་གླང་ཀོག་བཟུ་རུ་བཅུག་ཡོད་འདུག
ཡིན་ནའང༌། སྟབས་མ་ལེགས་པ་ཞིག་ལ་གླང་ཀོག་དེ་བཏགས་ས་ནས་ཤོར་ཡོད་འདུག་ལ། སྐབས་དེར་ཆོས་གྲྭ་ཚོགས་སྐབས་སུ་འཁེལ་ཡོད་སྟབས་སྲང་བར་གྱི་གྲྭ་མང་ཁྲོད་བརྒྱུགས་ཏེ། གྲྭ་པ་ཞིག་ལ་བརྡུངས་ནས་རྨས་སྐྱོན་བཟོས་རྗེས། རྒྱ་ལམ་དུ་བརྒྱུགས་ནས་སྒོ་མང་གྲྭ་ཚང་གི་ཟ་ཁང་ཉེ་འགྲམ་དུ་རྒས་འཁོགས་ལོ་ན་བདུན་ཅུ་ཅན་དེར་བརྡུངས་ཏེ་བཀྲོངས་པ་དང༌། གྲྭ་པ་གཞན་ཁག་ཅིག་ལའང་བརྡུངས་ཡོད་ཀྱང་ཚབས་ཆེའི་རྨས་སྐྱོན་གང་ཡང་བཟོས་ཡོད་མི་འདུག
འདི་གའི་གསར་འགོད་པ་ཨ་རིག་འགྱུར་མེད་ཀྱིས་རྒྱ་གར་ལྷོ་ཕྱོགས་ནས་བཏང༌།
དྲ་གྲོགས་གད་སྙིགས་ཁྲོད་ཀྱི་ནོར་བུ་ལགས། གསར་འགྱུར་ཟེར་བ་ནི་གསར་དུ་བྱུང་བའི་འགྱུར་བ་ཞིག་ལ་གོ་ན་འགྲིག་ཅིང་། གསར་འགོད་པས་གནས་ཚུལ་གསར་བ་ཞིག་མི་མང་ལ་སྒྲོག་རྒྱུར་འབད་གི་རེད། ཡིན་ནའང་། གསར་དུ་བྱུང་བའི་གནས་ཚུལ་དེ་རིམ་གྱིས་འགྱུར་ཅིང་འཕེལ་བ་ལས། བྱུང་མ་ཐག་ནས་མཇུག་བསྡུ་བའི་གསར་འགྱུར་དཀོན་པོ་རེད། དཔེར་ན། དང་ཐོག་གླང་ཀོག་ར་བཟི་བས་མི་བསད་པ་རེད། སྐབས་དེར་གླང་ཀོག་གིས་མི་བསད་པ་དེ་གསར་འགྱུར་ཆགས་པ་རེད། དེ་ནས་རིམ་གྱིས་གླང་ཀོག་དེ་སུའི་ཡིན་མིན་དང་ར་བཟི་ཡོད་མེད་རྩད་བཅད་པ་རེད། ད་དུང་མཇུག་མཐར་གླང་ཀོག་གིས་བསད་པའི་བགྲེས་པོའི་ནང་མིར་ཇི་ལྟར་ཀུན་གསབ་བྱེད་པ་དང་། སྨན་ཁང་དུ་བསྐྱལ་བའི་གྲྭ་པ་དེར་སྨན་རིན་ཇི་ལྟར་སྤྲོད་མིན་ནི་མཐའ་མའི་ཐག་གཅོད་རེད།
ཡང་གནས་ཚུལ་འདི་འདི་ལྟར་སྟབས་བདེ་བོའི་ངང་མཇུག་སྒྲིལ་མི་སྲིད་པར་རྙོག་འཛིང་ཆེན་པོ་ཞིག་གི་རྒྱུ་རུ་འགྲོ་སྲིད་པ་རེད། གང་ལྟར་ཡང་སྤྱི་སྡོམ་ཐུང་ངུ་ཞིག་བྱས་ཏེ། འདི་ལྟར་མཇུག་སྒྲིལ་བའི་དབང་དུ་བཏང་ཡང་། གསར་འགོད་པས་གནས་ཚུལ་འདི་ཁྲིམས་ཁང་ཞིག་ནས་ཐག་བཅད་དེ། ཁྱབ་བསྒྲགས་མ་བྱས་པར་བསྒུག་དགོས་ཚེ། གསར་འགྱུར་འདི་གནས་ཚུལ་རྙིང་བ་ཆགས་ཚར་བ་རེད། དེ་ལ་གསར་འགྱུར་ཟེར་གི་མ་རེད། གནས་ཚུལ་དེ་ཐག་བཅད་ཚར་བ་རེད་ཅེས་བརྗོད་གི་རེད།
གསར་འགོད་པ་ལགས། གནས་ཚུལ་སྤེལ་བར་དགའ་བསུ་ཞུ། འོན་ཀྱང་གནས་ཚུལ་གང་མ་སྦེལ་གོང་གཟབ་པར་བརྩོནརོགས།
གནས་ཚུལ་འདི་དེ་རིང་ཞོགས་པའི་ཆུ་ཚོད་ ༩ ཙམ་ལ་ཤེས་རྟོགས་བྱུང་བ་ཡིན། ཡིན་ནའང་། ད་ལྟ་འདིར་འགྱུར་ལྡོག་ཅིག་བྱུང་འདུག ཡང་བསྐྱར་ཁ་པར་བརྒྱུད་ཤེས་རྟོགས་བྱུང་བ་ལྟར་ན་གླང་ཀོག་དེ་འབྲས་སྤུངས་སྒོ་མང་གྲྭ་ཚང་གི་ཡིན་པ་དང་། དེ་ཁྲིད་ཡོང་མཁན་གྱི་ཡུལ་མི་རྣམས་ཀྱང་སྒོ་མང་གྲྭ ཚང་གི་གླང་རྫི་རྣམས་ཡིན་འདུག་ལ། གླང་རྫི་བ་རྣམས་ལ་ལྟ་རྟོགས་བྱེད་མཁན་གྱི་གྲྭ་པ་རྣམས་ཀྱིས་གླང་ཀོག་དེར་ཆང་བླུད་མེད་ལུགས་དག་ཐེར་བྱས་འདུག་ལ། ཁོང་ཚོས་མནའ་སྐྱེལ་དམ་འཇོག་བྱ་དགོས་ཀྱང་ཡུལ་མི་དེ་ཚོས་གླང་ཀོག་དེར་ཆང་བླུད་མེད་པ་ར་སྤྲོད་བྱ་རྒྱུ་ཡོད་ཅེས་བརྗོད་འདུག