བོད་ཀྱི་དམིགས་བསལ་ཚོགས་ཆེན་འཚོགས་པར་དུས་ཚེས་ཇེ་ཉེ་ལ་འགྲོ་བཞིན་ཡོད་པ་དང༌། མི་མང་གི་བསམ་ཚུལ་དང་སྤྱི་ཚོགས་ནང་གི་གླེང་སློང་ཡང་ཤུགས་ཆེ་རུ་འགྲོ་གི་ཡོད། སྤྱིར་ང་ཚོའི་དུས་བབ་གསར་ཁང་གིས་བོད་གཞུང་ལས་བྱེད་རྣམས་ཀྱིས་ཚོགས་ཆེན་ལ་བསམ་བློ་འཛིན་སྟངས་ཐད་གནས་ཚུལ་མཁོ་སྒྲུབ་བྱེད་པར་འདོད་ལ། དེ་ཡང་མི་མང་གིས་ཧ་གོ་དགོས་པ་གལ་ཆེན་ཡིན་པར་རྩིས་ནས་བོད་གཞུང་བཀའ་དྲུང་ཡིག་ཚང་ལ་སྙན་ཞུ་ཕུལ་ཏེ་ལས་བྱེད་རྣམས་ཀྱི་བསམ་ཚུལ་བརྗོད་པར་ཆོག་མཆན་ཡིག་ངག་གཉིས་ནས་ཞུས་ཀྱང་བཀའ་འཁྲོལ་མ་ཐོབ་པས་འདིར་སྡེ་ཚན་ཁག་གི་འགན་འཛིན་དང་མི་སྒེར་ཁ་ཤས་ཀྱི་བསམ་ཚུལ་བསྡུ་ལེན་བྱས་པ་ཡིན།
བཙན་བྱོལ་བོད་གཞུང་གི་རྩིས་ཞིབ་འགན་འཛིན་བཀའ་རྒྱུད་དོན་གྲུབ་ལགས་ལ་དམིགས་བསལ་ཚོགས་ཆེན་ཐད་དགོངས་ཚུལ་ཅི་ཡོད་དྲིས་པར། ཁོང་གིས། ༧གོང་ས་མཆོག་གིས་བོད་ཀྱི་རྩ་དོན་སྒང་ལ་གོ་བསྡུར་གནང་དགོས་པ་རེད་ཅེས་གསུངས་ཡོད། ད་ལྟའི་དབུ་མའི་ལམ་གྱི་རྩ་དོན་འཐབ་རྩོད་ཀྱི་སྲིད་བྱུས་འདི་༧གོང་ས་མཆོག་དང་མི་མང་གིས་བདམས་པ་རེད། དེ་ཡིན་དུས་ད་ལྟའི་སྲིད་བྱུས་ལ་བསྐྱར་ཞིབ་བྱེད་དགོས་པ་རེད་བསམ་གི་ཡོད། སྐུ་ཚབ་དེ་ཚོ་ཕེབས་ཀྱི་ཡོད་པ་རེད། གཞུང་ཡང་དབུ་མའི་ལམ་ལ་འགྲོ་གིན་ཡོད། ཡིན་ཡང་ཐག་གཅོད་བྱུང་མེད། དེ་ཡིན་དུས་ད་ནི་ང་ཚོས་རྩ་བ་ཞིག་ལ་དགོངས་པ་བཞེས་དགོས། ང་ཚོས་ལངས་ཕྱོགས་དེ་ལ་འཆར་གཞི་བཟོས་པ་སོགས་ཀྱིས་མ་འདང་བ་རེད་མ་གཏོགས་དབུ་མའི་ལམ་ལ་གྲུབ་འབྲས་མེད་པ་མ་རེད་བསམ་ཡོད། ཚོགས་ཆེན་གྱི་གྲོས་གཞི་གསལ་བོ་ཞིག་མེད་པས་ང་ཚོས་སྐད་ཆ་མང་པོ་བཤད་ན་སྔ་དྲག་པ་རེད། རྩ་དོན་སྒང་ལ་གོ་བསྡུར་གནང་དགོས་རེད་གསུངས་ཡོད་པ་ཡིན་དུས་རྩ་དོན་དེ་ག་རེ་སྒང་ལ་ཡང་ཡོང་སྲིད་གི་རེད། མཐའ་དོན་དེ་བོད་གཞིས་བྱེས་གཉིས་ཀྱི་དཀའ་ངལ་འདི་སེལ་དགོས་གིན་ཡོད། བཙན་བྱོལ་གྱི་དཀའ་ངལ་འདི་དོན་དངོས་ཐོག་དཀའ་ངལ་ཆེན་པོ་མ་རེད། དཀའ་ངལ་ལྟེ་བ་དེ་བོད་དུ་ཡོད་པའི་བོད་མི་ཚོའི་དཀའ་ངལ་རེད། དཀའ་ངལ་དེ་སེལ་ཐབས་ལ་བསམ་བློ་གཏོང་དགོས། རྒྱ་གར་ནང་ལ་མཚོན་ན་༧གོང་ས་མཆོག་དང་གཞུང་གིས་དབུ་མའི་ལམ་འདི་གང་འདྲ་ཡིན་མིན་ལམ་སྟོན་བཀའ་སློབ་ཡོད་པ་རེད་དེ། བོད་ནང་གི་བོད་མི་ཚོས་དབུ་མའི་ལམ་གྱི་འགྲོ་སྟངས་དང་༧གོང་ས་མཆོག་གི་ལམ་སྟོན་བཀའ་སློབ་ངོ་མ་དེ་མཁྱེན་གི་ཡོད་མེད་ཐེ་ཚོམ་རེད། དེ་ཡིན་དུས་ངོ་རྒོལ་གྱི་འབོད་སྒྲ་དེ་སྣ་མང་ཡོང་གི་རེད། ཐོག་དང་བོ་དབུ་མའི་ལམ་གྱི་གྲོས་གཞི་སྒང་ལ་བོད་ནང་གི་བོད་མིས་བསམ་ཚུལ་ཡང་བསྡུ་རུབ་བྱས་ཡོད་པ་རེད། ང་རང་གི་བསམ་ཚུལ་ཡིན་ན་བོད་ནང་གི་བོད་མི་ཚོ་ང་ཚོ་ལས་ལྷག་པའི་ ༧ གོང་ས་མཆོག་ལ་དད་པ་དང་ཡིད་ཆེས། བློ་གཏོད་ཡོད་པ་རེད། དེ་ཡིན་དུས་བོད་ནང་གི་བོད་མིས་༧གོང་ས་མཆོག་ལ་བོད་ཀྱི་གནད་དོན་ཐག་གཅོད་བྱེད་པའི་སྐུ་དབང་འབུལ་གི་རེད། དམིགས་བསལ་གྱིས་༧གོང་ས་མཆོག་ང་ཚོའི་བླ་མ་གཅིག་པུ་མ་ཡིན་པར་རྒྱལ་ཁབ་ཀྱི་དབུ་ཁྲིད་ཡིན་པ་མ་ཟད། ༧གོང་ས་མཆོག་གིས་ཆོས་ཕྱོགས་ནས་ཆབ་སྲིད་ཀྱི་གནད་དོན་ཐག་གཅོད་བྱས་པ་མ་ཡིན་པར་འཛམ་གླིང་གི་གནས་སྟངས་ངོས་ཟིན་པའི་ཐོག་ནས་བོད་དོན་ལ་དགོངས་པ་བཞེས་ཡོད། གང་ལྟར་བོད་མིའི་ཁྲོད་ན་༧གོང་ས་མཆོག་ལས་ལྷག་པ་ཞིག་ཕྱོགས་གང་ཅིའི་ཐད་ནས་མེད་ལ་ད་ལྟའི་ཆར་ཁོང་གི་བཀའ་ལས་ལྷག་པའི་འགྲོ་ས་ཡང་མེད། སྤྱི་ཟུར་ཚོ་དང༌། གཞིས་མགོ་ཁག གཞུང་གི་སྡེ་ཚན་ཁག གཞུང་ཞབས་སོགས་ཚང་མ་བསྡོམས་ན་མི་གྲངས་ ༣༠༠ གཡས་གཡོན་རེད། ལས་བྱེད་མི་མང་པོས་ཁ་གྲགས་གི་མ་རེད། ཁ་གྲགས་མཁན་གཙོ་བོ་དེ་མི་མང་རེད་ལ་ཚོགས་ཆེན་སྒང་ནས་ལག་པ་མང་ཉུང་གིས་ཐག་གཅོད་བྱེད་རྒྱུ་མིན་པས་འཐུས་མི་ཡོང་ཁུངས་འདི་གནད་འགག་ཞིག་མ་རེད་བསམ་གི་ཡོད། ཅེས་གསུངས་བྱུང༌།
བོད་ཀྱི་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་ནས། ༧གོང་ས་མཆོག་དབུ་ཁྲིད་ཡིན་པའི་ཆ་ནས་གང་ཐུབ་ཐུབ་གནང་ཡོད་པ་རེད། ཡིན་ཡང་དཀའ་ངལ་དེ་བསྡད་ཡོད་པ་རེད། ད་ནི་ལམ་ཁ་གང་འདྲ་ཞིག་ལ་འགྲོ་དགོས་རེད་དམ། རྒྱ་ནག་གིས་བོད་དོན་ལམ་སེང་ཐག་མ་བཅད་པ་ཡིན་ན་བོད་དོན་ཡོང་ས་མ་རེད་བསམ་སྟེ་རང་གི་ལྟོ་གོས་འགྲིག་ན་འགྲིག་པའི་སྣང་བས་ལུང་པ་གང་སར་སོང་ན་འགྲིག་གི་མ་རེད། མ་འགྲིག་པ་ཡིན་ན་ད་ནི་ང་ཚོའི་བོད་འདི་མི་རབས་མང་པོ་འགོར་ཡང་མ་ཤི་ཐབས་ལ་ག་རེ་གནང་དགོས་ཀྱིན་འདུག གནས་ཚུལ་འདི་ཐབས་ཤེས་དང་གོ་བསྡུར་ཞིག་བྱེད་དགོས་ཀྱི་ཡོད་པ་རེད། སྐྱབས་བཅོལ་དུ་ཡོད་པའི་བོད་མི་ཚོ་རང་དབང་ཆེ་ཙམ་ཡོད་ཙང་མཐུན་སྒྲིལ་བྱས་ཏེ་བོད་དོན་མ་བརླག་པར་ཐབས་ཤེས་དང༌། བོད་ཀྱི་ངོ་བོ་འཛིན་པར་ཁ་ནས་བཤད་པ་ཙམ་མིན་པར་ལག་ལེན་ལ་བསྟར་བར་ག་རེ་གནང་དགོས་ཀྱིན་འདུག་པའི་གནད་དོན་འདི་ཚོ་ཚོགས་ཆེན་སྒང་ལ་གླེང་སློང་ཡོང་དགོས་པ་རེད་བསམ་གྱིན་ཡོད། དེ་བས་ཚོགས་ཆེན་འདིས་འགྱུར་བ་གང་གཏོང་མ་ཐུབ་ཀྱང་གནད་དོན་མང་པོ་ཞིག་ལ་བསམ་བློ་གཏོང་དགོས་ཆགས་གི་རེད་བསམ་གྱི་ཡོད། དྲང་པོར་བཤད་ན་བཙན་བྱོལ་ནང་ལ་བཤད་མཁན་མང་ཐག་ཆོད་ཡོད་ཀྱང་དངོས་སུ་ལག་ལེན་བསྟར་མཁན་དང་ལས་ཀ་བྱེད་མཁན་ཉུང་ཉུང་རེད། ངའི་བསམ་པར་ཆོས་དང་རིག་གཞུང་ལ་འཛིན་སྐྱོང་བྱེད་དགོས་ཀྱི་རེད་ཟེར་ནས་བཤད་ན་དེ་ལག་ལེན་བསྟར་ནས་བྱེད་དགོས་ཀྱིན་ཡོད་པ་རེད། སྡིངས་ཆ་སྒང་ལ་བཤད་རྐྱང་དང་སྡིངས་ཆ་སྒང་གི་མི་དེ་ཚོ་ཕར་སོང་ཚུར་ཡོང་ནས་རང་མགོ་ཐོན་ཐབས་བྱེད་ན་ལག་ལེན་བསྟར་མཁན་སུ་བྱེད་དགོས་པ་རེད། དང་པོ་ང་རང་ཚོའི་ནང་ལོག་གི་བོད་ཀྱི་ངོ་བོ་འདི་ཚོ་མ་བརླག་པ་བྱེད་དགོས། ང་ཚོའི་ངོ་བོ་མ་བརླག་ན་ང་ཚོ་ནམ་ཡང་ཤི་གི་མ་རེད། མ་ཤི་ན་བོད་དོན་གནས་གི་རེད། གྲུབ་འབྲས་ཐོན་དང་མ་ཐོན་ཟེར་བ་དེ་དུས་དང་གནས་བབ། ཁ་གཏད་གཅོག་ས་སོགས་མང་པོ་ཞིག་ལ་མཉམ་དུ་བསྡུར་ནས་སྐད་ཆ་བཤད་དགོས་ཀྱི་ཡོད་པ་རེད། དུས་ཡུན་ཐུང་ཐུང་ནང་ལ་གྲུབ་འབྲས་ཐོན་ཡོད་མེད་བཤད་ཐུབ་གི་མ་རེད། ང་རང་གི་ངོས་ནས་གྲུབ་འབྲས་ཐོབ་ཡོད་པ་རེད་བསམ་གི་ཡོད། དེ་མ་ཡིན་པར་དམག་འཁྲུག་དང་འགད་རྫས་གཏོར་བ་སོགས་བྱས་ན་ཉིན་ཁ་ཤས་ལ་གསར་ལམ་ཁག་ཏུ་ཡོང་སྲིད་ཀྱང་དེ་ནས་གང་ཡང་ཡོང་གི་མ་རེད། རང་བཙན་རྩོད་གི་ཡིན་ཟེར་ནས་ངར་ཆོག་གི་རེད་ལ་ཁ་ནས་ལབ་ཀྱང་ཆོག་གི་རེད། ཡིན་ཡང་ཐབས་ལམ་གང་ལ་འགྲོ་གི་ཡིན། དང་པོ་འཚེ་མེད་ཞི་བའི་ལམ་ལ་འགྲོ་གི་ཡིན་ནམ་མིན། འཚེ་མེད་ཞི་བའི་ལམ་ལ་འགྲོ་ན་སྐད་ཆ་བཤད་ཡ་མི་འདུག་གཱ དེ་ང་ཚོས་བྱེད་བཞིན་པ་འདི་རེད། རང་དབང་ལུང་པར་སོ་སོས་ག་རེ་བྱེད་ན་འགྲིག་པའི་སྣང་བས་ག་རེ་ཡིན་ཡང་བྱེད་ཀྱིན་ཡོད་པ་རེད། བྱེད་ཆོག་གི་རེད། ཡིན་ན་ཡང་མི་མང་ལ་རང་རང་གི་ལངས་ཕྱོགས་ཤིག་མེད་ན་དེ་ནུས་པ་འཐོན་རྒྱུ་ཁག་པོ་རེད། རྒྱལ་ཁབ་ཡོད་པའི་མི་དང་རྒྱལ་ཁབ་མེད་པའི་མིས་རང་དབང་ལོངས་སྤྱོད་བྱེད་སྟངས་ཏོག་ཙམ་འདྲ་གི་མ་རེད་བསམ་གྱིན་ཡོད། རྒྱལ་ཁབ་ཡོད་པའི་རང་དབང་སྤྱོད་མཁན་ཚོས་དཀར་པོ་རེད་དང་ནག་པོ་རེད་མང་པོ་བརྗོད་ཆོག་ཀྱང༌། ང་ཚོའི་བོད་མི་ཕྱེད་ཀ་དགྲ་བོའི་འོག་ན་ཡོད་དུས་ང་ཚོས་སྤྱིའི་ཁེ་ཕན་ལ་བསམ་བློ་གཏོང་དགོས། ང་ཚོར་མི་འབོར་ཉུང་ཉུང་རེད་ལ་ནུས་པ་ཡང་ཆུང་ཆུང་རེད། འདི་ལ་ཡང་ལངས་ཕྱོགས་བརྟན་པོ་ཞིག་དང་འབབ་ས་གཅིག་པ་ཞིག་མེད་ན་དཀའ་ངལ་འཕྲད་གི་རེད་བསམ་གི་ཡོད། ཅེས་གསུངས་བྱུང༌།
དབུ་མའི་ལམ་ལམ་སྟོན་ཚོགས་པའི་འགན་འཛིན་མགོ་ལོག་དམ་ཆོས་དཔལ་བཟང་གིས། མང་པོ་ཅིག་གིས་རང་བཙན་དང་དབུ་མའི་ལམ་མ་གཏོགས་དེ་ལས་བརྒལ་ཐུབ་གི་མི་འདུག ཡིན་ན་ཡང་འགྱུར་བ་གཏོང་ཐུབ་ཀྱིན་ཡོད་མེད་ཀྱི་སྐད་ཆ་འདིའི་སྒང་ནས་རང་བཙན་ལ་འགྱུར་བ་གཏོང་ཐུབ་གི་མ་རེད། དེ་ཚོགས་པ་གཅིག་གི་ལངས་ཕྱོགས་ཡིན་དུས་དེ་ལ་མི་མང་དང་གཞུང་གི་ངོས་ནས་འགྱུར་བ་གཏོང་མིན་བཤད་རྒྱུ་མི་འདུག དབུ་མའི་ལམ་འདི་༧གོང་ས་མཆོག་གི་དགོངས་པ་རེད་ལ། བཀའ་ཤག་དང་སྤྱི་འཐུས་གཉིས་ཀྱི་གྲོས་ཚོགས་ཐོག་ནས་གཏན་ལ་ཕབ་ཡོད་དུས་དེ་མི་མང་གི་མངོན་འདོད་མ་རེད་ལབ་ཐུབ་གི་མ་རེད་ལ། མི་གང་བྱུང་གིས་འགྱུར་བ་གཏོང་ཐུབ་གི་མ་རེད། དེ་ཁྲིམས་དང་གནས་ལུགས་ཞིག་གིས་གཏན་ལ་འབེབ་དགོས། གལ་ཏེ་དབུ་མའི་ལམ་གྱི་སྒང་ནས་གྲུབ་འབྲས་མ་ཐོན་པར་ལྟ་སྐབས་ལག་ལེན་བསྟར་མཁན་གྱི་ངོས་ནས་མ་ཡོང་པ་རེད། སྤྲོད་མཁན་གྱི་ངོས་ནས་མ་སྤྲད་པ་རེད་དམ། ཡང་ན་རྒྱ་ནག་གིས་རྣ་བ་མ་གཏད་པ་རེད་དམ། འདིའི་ཐད་ཚོགས་ཆེན་སྒང་ལ་གླེང་སློང་ཡོང་རྒྱུ་རེད་བསམ་གི་ཡོད། ད་ལྟ་བར་ང་ཚོས་རྒྱ་ནག་གི་རྩ་ཁྲིམས་འོག་ཚད་མཐོའི་རང་སྲིད་རང་སྐྱོང་དགོས་ཟེར་བ་འདི་༧གོང་ས་མཆོག་གིས་འགྱུར་བ་བཏང་མི་འདུག་ལ། བཀའ་ཤག་གི་ངོས་ནས་ཀྱང་འགྱུར་བ་བཏང་ཡོད་མདོག་ཁ་བོ་མི་འདུག འདིར་ཡོད་པའི་མི་ཁ་ཤས་ཀྱིས་རྒྱ་ནག་གི་རྩ་ཁྲིམས་ངོ་མ་དེ་ཤེས་ཀྱིན་ཡོད་པར་ཐེ་ཚོམ་རེད། ད་ལྟ་བར་རྒྱ་ནག་གིས་གྲངས་ཉུང་མི་རིགས་ཀྱི་རྩ་ཁྲིམས་དེ་ག་ཚོད་ཅིག་ལག་བསྟར་བྱས་འདུག་གམ། ཕྱེད་ཙམ་བཏང་འདུག་གམ་ཡང་ན་གཏན་ནས་ལག་བསྟར་བཏང་མི་འདུག འདི་ཚང་མས་ཧ་གོ་བའི་ཐོག་ནས་ད་གཟོད་རང་སྲིད་རང་སྐྱོང་ཟེར་བ་དོན་ངོ་མ་གང་འདྲ་ཞིག་ཡིན་མིན་ཤེས་པ་གནང་དགོས་ཀྱི་ཡོ་པ་ལས། ཧ་མ་གོ་བར་རང་སྲིད་རང་སྐྱོང་ཡིན་ན་ཡོང་གི་མ་རེད། ང་ཚོས་དེ་ལས་མཐོ་ཅིག་རྩོད་དགོས་ཀྱིན་ཡོད་རབས་བཤད་ན་དེ་ཏན་ཏན་ཞིག་ཡོང་གི་མ་རེད། ད་ལྟ་བར་ང་ཚོའི་སྤྱི་ཚོགས་ནང་ནས་ལམ་ཁ་དེ་འགྲིག་དང་མི་འགྲིག་ལས་ལམ་ཁ་གསར་བ་ཞིག་གསར་གཏོད་གནང་ཐུབ་མི་འདུག་ལ་ལག་ལེན་འབབ་ས་ཡང་མི་འདུག བོད་དོན་བཤད་མཁན་དང་གླེང་སློང་བྱས་མཁན་ཚང་མ་བོད་སྤྱི་བའི་དོན་རེད་མ་གཏོགས་གང་ཟག་སྒེར་གྱི་གནད་དོན་མ་རེད་ལ་དེ་ནོར་འཁྲུལ་ཡང་མ་རེད། ཡིན་ཡང་ང་ཚོས་འབབ་ས་ཞིག་དང་ཁེ་ཕན་ཞིག་ལ་ལྟ་དགོས་པར་སྣང༌། འདིར་ཡོད་པའི་མི་དེ་ཚོས་གཞིས་ལུས་བོད་མི་ཚོས་རང་བཙན་ཟེར་ནས་འབོད་ཀྱིན་འདུག་ཟེར་ན་དེ་ཧམ་པའི་སྐད་ཆ་རེད། དབུ་མའི་ལམ་ལ་རྒྱབ་སྐྱོར་བྱེད་ཀྱིན་འདུག་ཟེར་ན་དེ་ལས་ཀྱང་ཧམ་པ་རེད། རང་གི་ལངས་ཕྱོགས་ཀྱི་ཆེད་དུ་བོད་ནང་གི་བོད་མི་བེད་སྤྱོད་གཏོང་བ་ལས་འདི་གཉིས་ཆ་ཏག་ཏག་བསྡད་མེད། ཡིན་ན་ཡང་༧གོང་ས་མཆོག་བོད་ལ་ཕེབས་དགོས་ཟེར་བ་འདི་བདེན་པ་རེད། འདི་ཐུན་མོང་གི་སྐད་ཆ་རེད། གལ་ཏེ་གཞིས་ལུས་བོད་མིར་སྐད་ཆ་བཤད་རྒྱུའི་རང་དབང་ཞིག་ཡོད་ན་༧གོང་ས་མཆོག་བོད་ལ་གདན་འདྲེན་ཞུ་དགོས་པ་དེ་བོད་མི་བརྒྱ་ཆ་ ༩༥ ཡི་རེ་བ་ཡིན་པ་གསལ་བོ་རེད། བོད་དོན་འདི་རྒྱལ་བ་རིན་པོ་ཆེ་དང་འབྲེལ་བ་ཡོད་པ་དེ་རྒྱལ་སྤྱིའི་སྒང་གི་རྒྱབ་སྐྱོར་དང༌། རྒྱ་ནག་གི་ཤེས་ལྡན་མི་སྣ་མང་པོས་༧གོང་ས་མཆོག་གིས་གསུངས་པའི་བོད་ཀྱི་གནད་དོན་འཐབ་ཕྱོགས་ཐད་ལ་རྩ་ཆེན་པོ་དང་དོ་སྣང་བྱེད་ཀྱིན་འདུག དེ་ཡིན་དུས་བོད་འདི་ཛ་དྲག་གི་གནས་སྟངས་ལས་སྐྱོབ་དགོས་ན་༧གོང་ས་མཆོག་གི་དགོངས་གཞི་ལྟར་འགྲོ་དགོས་ཀྱི་འདུག་ཟེར་ནས་བཤད་མཁན་འདུག རང་བཙན་ཟེར་བ་འདི་རྩོད་ཤེས་ཀྱིན་ཡོད་མེད་དང༌། དབུ་མའི་ལམ་ཟེར་བའི་འཐོབ་བྱ་གང་འདྲ་ཞིག་ཡིན་པ། གང་འདྲ་བྱས་ནས་རྩོད་དགོས་པ། མི་མང་གིས་ལས་ཀ་ག་རེ་བྱེད་དགོས་པ་སོགས་གོ་བ་ལེན་ཐུབ་གི་ཡོད་མེད་ཀྱང་ཐེ་ཚོམ་རེད། གང་ལྟར་འགྱུར་བ་གང་ལ་འགྲོ་ཡང་ཚོགས་པ་ཁག་གི་ལངས་ཕྱོགས་ལ་འགྱུར་བ་འགྲོ་གི་མ་རེད་བསམ་གི་ཡོད། ད་ང་ཚོར་ཆིག་སྒྲིལ་དགོས་གི་འདུག་བསམ་ནས་ལངས་ཕྱོགས་ལ་འགྱུར་བ་གཏོང་གི་མ་རེད། ཅེས་གསུངས་བྱུང༌། མིང་འདོད་འདོན་མེད་པའི་གངས་སྐྱིད་ཀྱི་གཞུང་ཞབས་ཞིག་གིས། བོད་མིའི་མངོན་འདོད་ལ་ག་རེ་ཡིན་ཡང་ཡོང་ཆོག་གི་རེད། རང་བཙན་དང་དབུ་མའི་ལམ་སོགས་ཚང་མ་ཡོང་ཆོག་གི་རེད། ང་རང་གི་བསམ་ཚུལ་ཡིན་ན་བོད་མི་ཚང་མའི་མངོན་འདོད་ནི་རང་བཙན་ཡིན་ངེས་རེད། མངོན་འདོད་ཟེར་བ་དེ་རྨི་ལམ་དང་གཅིག་པ་རེད། ང་ཚོས་བོད་མིའི་རྨི་ལམ་བཤད་སྐབས་ཞིག་གཏན་ནས་མ་ཡིན་པར་ང་ཚོས་དུས་རབས་ཀྱིས་སྤྲད་པའི་དོན་དངོས་ལ་ངོས་ལེན་གནང་དགོས། ༧གོང་ས་མཆོག་གིས་ཀྱང་རང་བཙན་ཐོབ་གི་ཡོད་ཀྱང་མི་དགོས་ཟེར་གིན་མེད། ཡིན་ཡང་དངོས་ཡོད་གནས་ཚུལ་དང་ད་ལྟའི་གནས་བབ་སྒང་ནས་མི་ཡོང་བ་ཞིག་རེད། སྒུག་རྒྱུའི་དུས་ཚོད་ཡོད་པ་མ་རེད། དོན་དངོས་དང་མངོན་འདོད་གཅིག་པ་མ་རེད། མངོན་འདོད་དེ་དོན་དངོས་དང་གཏན་ནས་མི་མཐུན། དོན་དངོས་དང་གནས་བབ་ཀྱིས་སྤྲད་པའི་དེ་རིང་གི་འཐབ་རྩོད་ལ་བསམ་བློ་གཏོང་དགོས་པ་རེད། ད་ལྟའི་ཐག་ཉེ་ཤོས་དང་རང་བཙན་དང་བསྡུར་ན་ཐོབ་སླ་བ་དེ་དབུ་མའི་ལམ་འདི་རེད་ཟེར་གི་ཡོད། བོད་ནང་གི་བོད་མི་བེད་སྦྱོད་བཏང་ནས་རང་གི་ལངས་ཕྱོགས་སྒྲུབ་ཚེ་དེ་ཐབས་སྐྱོ་བོ་རེད། བོད་ནང་གི་བོད་མིའི་སྐད་རྒྱག་ཤེས་ཀྱིན་ཡོད་པ་མ་རེད། སྐྱབས་བཅོལ་བོད་མིས་ཀྱང་སྐད་རྒྱག་ཤེས་ཀྱིན་མེད། ད་ལྟ་བར་དུ་བཙན་བྱོལ་བོད་མིས་བོད་རང་བཙན་དང༌། རྒྱ་མི་བོད་ནས་ཕར་རྒྱུག་ཅིག་ཟེར་ནས་སྐད་བརྒྱབས་པ་ལས་ང་ཚོ་ལ་རང་སྐྱོང་དགོས་དང༌། ང་ཚོ་འཚེ་མེད་ཞི་བ་ཡིན་ཟེར་ནས་སུ་གང་གིས་ཀྱང་སྐད་རྒྱག་གི་མེད། དེ་ཡིན་དུས་བོད་ནང་གི་བོད་མིས་རང་བཙན་ཟེར་ནས་སྐད་བརྒྱབས་པ་དེ་བོད་མིའི་མཐར་ཐུག་གི་དོན་དངོས་དང་མཐུན་པའི་མངོན་འདོད་ཡིན་པ་གང་འདྲ་བྱེད་ནས་སྒྲུབ་དགོས། བོད་ནང་གི་བོད་མིར་སྐད་རྒྱག་སྟངས་དང་འཚེ་མཻད་ཞི་བའི་ལས་འགུལ་སྤེལ་སྟངས་ཀྱི་སློབ་སྦྱོང་ཡོད་པ་མ་རེད། སྐད་རྒྱག་སྟངས་ལ་ཡང་སློབ་སྦྱོང་བྱེད་དགོས་རེད། སྐད་རྒྱག་སྟངས་ལ་ཡང་ཆབ་སྲིད་ཀྱི་ལངས་ཕྱོགས་དང་མཐུན་པའི་རིག་པའི་གཞུང་ལུགས་ཡོད་པ་རེད། མི་མང་པོས་དབུ་མའི་ལམ་ལ་གྲུབ་འབྲས་མ་ཐོན་པ་རེད་ཟེར་བ་དེ་དྲང་བདེན་དང་བོད་ལ་ཤ་ཚ་བའི་སྐད་ཆ་མ་རེད། གྲུབ་འབྲས་ཐོབ་ཡོད་མེད་དེ་ལོ་རྒྱུས་ཀྱིས་གཏན་འཁེལ་བྱེད་རྒྱུ་ཞིག་རེད། མཇུག་སྡོམ་འདི་འབྱུང་འགྱུར་གྱི་མི་རབས་གསར་བས་ཐག་གཅོད་བྱེད་རྒྱུ་ཞིག་རེད། དྲི་བ་རྡོག་རྡོག་དེ་༧གོང་ས་མཆོག་གིས་ལམ་སྟོན་གནང་བ་བཞིན་བོད་མི་རེ་རེ་ཡིས་དབུ་མའི་ལམ་འདི་ལག་བསྟར་བྱས་ཡོད་དམ། ཡོད་ཚེ་གྲུབ་འབྲས་ཐོན་ཡོད་མེད་བཤད་ཆོག་གི་རེད། གལ་ཏེ་དེ་ལྟར་མིན་ན་དེ་ག་རེ་བྱས་ནས་གྲུབ་འབྲས་མ་ཐོབ་པ་རེད། དེ་མི་མང་གི་དྲི་བ་རེད། དབུ་མའི་ལམ་འགྲིག་ཡོད་མེད་ཀྱི་དྲི་བ་མ་རེད། དབུ་མའི་ལམ་འདི་བོད་མི་རེ་རེ་ཡིས་ལག་བསྟར་ག་ཚོད་གནང་ཡོད་མེད་དེ་ལ་རང་རང་གིས་བསྐྱར་ཞིབ་གནང་དགོས། དབུ་མའི་ལམ་ལ་གྲུབ་འབྲས་ཐོན་མེད་ན་ད་ལྟའི་བར་བོད་ཀྱི་གནད་དོན་བསྡད་ཐུབ་ཡོད་པ་མ་རེད། དེ་ན་རང་བཙན་རྩོད་སྐབས་གྲུབ་འབྲས་ཐོབ་ཡོད་དམ། གྲུབ་འབྲས་ལ་མཐའ་མཇུག་གི་གྲུབ་འབྲས་དང་སྤྱིའི་གྲུབ་འབྲས་རིགས་གཉིས་ཡོད། མཐའ་མཇུག་གི་གྲུབ་འབྲས་ཟེར་བ་དེ་ཐག་གཅོད་ཡོད་མེད་ལ་གོ་དགོས། མཐའ་མཇུག་གི་གྲུབ་འབྲས་འབྱུང་བར་ད་དུང་འབད་པ་བྱེད་ཀྱིན་ཡོད་པ་རེད། སྤྱིའི་གྲུབ་འབྲས་ཐོབ་ཡོད་པ་རེད། དེ་མིག་མཐོང་ལག་ཟིན་རེད། གང་ལྟར་ཚོགས་ཆེན་འདི་གལ་ཆེན་རེད། ཡིན་ཡང་འདིས་འགྱུར་བ་གང་ཡང་གཏོང་ཐུབ་གི་མ་རེད་ལ། བོད་ཀྱི་དངོས་ཡོད་གནས་ཚུལ་ལ་གཞིགས་ན་ཡང་འགྱུར་བ་གཏོང་རྒྱུ་ཡོད་པ་མ་རེད་བསམ་གི་ཡོད། ཅེས་གསུངས་བྱུང༌།
སྐུ་སྒེར་ཡིག་ཚང་གི་ལས་བྱེད་རྒན་པ་སྣར་སྐྱིད་ངག་དབང་དོན་གྲུབ་ལགས་ཀྱིས། སྐུ་མདུན་གྱིས་རྩ་དོན་སྒང་ལ་གོ་བསྡུར་བྱེད་དགོས་ཅེས་གསུངས་ཡོད་ཀྱང་ང་ཚོ་དམངས་གཙོ་ཡིན་དུས་རང་རང་གི་བསམ་འཆར་བཤད་ཆོག་གི་རེད། ད་ལྟ་ང་ཚོས་རྒྱ་ནག་དང་འབྲེལ་བ་བྱེད་བཞིན་པ་འདི་མཚམས་ཆད་མི་རུང་ལ་དམིགས་བསལ་གྱིས་སྐུ་ཚབ་དེ་ཚོའི་ནང་དུ་རྒྱ་ནག་གི་གནས་སྟངས་དང་རྒྱ་སྐད་མཁྱེན་མཁན་དེ་འདྲ་གོ་སྒྲིག་གནང་དགོས། དེ་བས་ང་ཚོས་ད་ལྟའི་ཆར་དབུ་མའི་ལམ་དང་རང་བཙན་གཉིས་ཀྱི་ལངས་ཕྱོགས་ཙམ་གླེང་རྒྱུ་མཚམས་བཞག་ནས་བོད་མི་ཚོ་ནང་འགལ་མེད་པ་དང༌། རྒྱ་ནག་གིས་ལག་པ་འཆིང་ས་མེད་པ་ཞིག་གནང་དགོས། གལ་ཏེ་ང་ཚོས་ཚོགས་ཆེན་སྒང་ནས་ལངས་ཕྱོགས་ཙམ་གྱི་དོན་དུ་གོ་བསྡུར་བྱས་ཚེ་རྒྱ་ནག་ལ་ལག་པ་འཆིང་ས་ཡོད་པར་བཟོས་པ་རེད་ལ། བོད་མི་ཚོ་ལ་ཡང་ནང་འགལ་གྱི་རྣམ་པ་འབྱུང་གི་རེད། དེ་བས་ཚང་མས་བོད་མི་ཚོ་ཆིག་སྒྲིལ་ཡོང་ཐབས་ཀྱི་གཞི་རྩའི་གྲོས་གཞི་ཞིག་བཞག་སྟེ་དེའི་སྒང་ནས་རྒྱ་ནག་ལ་རྣམ་འགྱུར་གསལ་བོ་ཞིག་སྟོན་དགོས། ད་ལོ་རྒྱ་ནག་གིས་༧གོང་ས་མཆོག་ལ་བོད་ཀྱི་གནད་དོན་ཐག་གཅོད་བྱེད་པའི་དབང་ཆ་མེད་ཅེས་པར་མི་ཚང་མས་མ་གོ་ཁུལ་གྱིས་བཞག་འདུག བོད་མི་ཡོངས་རྫོགས་ཀྱིས་༧གོང་ས་མཆོག་ལ་སྐྱོན་བརྗོད་བྱས་པའི་གྲོས་གཞི་འདི་མ་རྩར་བཞག་ནས་གོ་བསྡུར་གནང་ཚེ་བོད་མི་ཚང་མར་ཆིག་སྒྲིལ་གྱི་རྣམ་པ་མངོན་གི་རེད་ལ། བོད་མི་ཚོས་ཁ་ཚ་དགོས་གཏུགས་ཀྱིས་བྱེད་དགོས་པ་ཞིག་ཀྱང་ཡིན། བོད་མིའི་ཁྲོད་དུ་༧གོང་ས་མཆོག་ལས་ལྷག་པ་སུ་ཡིས་ཀྱང་བོད་མིའི་ཚབ་བྱེད་ཐབས་མེད་ལ་བྱེད་ཐུབ་མཁན་ཡང་མེད། བོད་མི་མང་པོས་རང་གི་ཚོགས་པ་སོགས་ཀྱི་ལངས་ཕྱོགས་བརྟན་པོ་ཡོང་ཆེད་བོད་ནང་གི་བོད་མི་བེད་སྤྱོད་གཏོང་གིན་འདུག བོད་ནང་གི་བོད་མིར་རང་བཙན་མ་གཏོགས་དབུ་མའི་ལམ་གྱི་གོ་བ་བླངས་ཡོད་མཁན་དང་ལེན་ཐུབ་རྒྱུ་ཁག་པོ་རེད། བརྒྱུད་ལམ་གང་ལ་གཞིགས་ཀྱང་བོད་ནང་གི་བོད་མིས་༧གོང་ས་མཆོག་གི་ལམ་སྟོན་དང་དགོངས་གཞི་ལ་ངོས་ལེན་ཡོད་པ་གསལ་བོ་འདུག དེ་ཡིན་དུས་བོད་མི་ཚོས་མ་འོངས་པ་བོད་ནང་གི་བོད་མི་དང༌། རྒྱ་མི་རིགས་ལ་དབུ་མའི་ལམ་གྱི་གོ་རྟོགས་སྤེལ་བར་ལས་འགུལ་སྤེལ་དགོས་ལ། ༧གོང་ས་མཆོག་གིས་གསུངས་པ་བཞིན་རྒྱ་མི་རིགས་ལ་མཐུན་སྒྲིལ་གནང་སྟེ་རྒྱ་ནག་དམངས་གཙོ་ཅན་ལ་འགྱུར་བར་འབད་པ་གནང་དགོས། མདོ་དོན་དེ་ཚོགས་ཆེན་སྒང་ནས་རང་བཙན་གཡུག་ཞོག དབུ་མའི་ལམ་གཡུག་ཞོག བོད་མི་རྣམས་ཆིག་སྒྲིལ་གྱིས་༧གོང་ས་མཆོག་ལ་བོད་གྱི་གནད་དོན་ཐག་གཅོད་གནང་རྒྱུའི་ཐོབ་ཐང་དང་ནུས་པ་ཡོད་པ་རྒྱ་ནག་ལ་གསལ་བོ་ཞིག་སྟོན་དགོས། ཅེས་གསུངས་བྱུང༌།
ཉམས་ཞིབ་པ་ཀླུ་མཁར་བྱམས་ཀྱིས། བོད་གཞུང་གི་ལངས་ཕྱོགས་ལ་འགྱུར་བ་གཏོང་དགོས་པ་གལ་ཆེན་རེད། སྲིད་བྱུས་ལ་འགྱུར་བ་གཏོང་རྒྱུ་དེ་ང་ཚོའི་ལག་ཏུ་ཡོད། བོད་དོན་ལ་འབྲས་བུ་མེད་པ་དེ་བོད་གཞུང་གི་ལངས་ཕྱོགས་ནོར་སོང་བས་རེད་མ་གཏོགས། བོད་ཕྱི་ནང་གཉིས་ནས་མང་ཚོགས་ཀྱིས་ལས་འགུལ་སྤེལ་བ་རྩ་བ་ནས་ཉུང་མེད་ལ། ཚོགས་ཆེན་འདིའི་སྒང་ནས་ལས་འགུལ་སྤེལ་སྟངས་ལ་གོ་བསྡུར་བྱས་ན་གཅིག་ཐོག་ལ་འབབ་ཐུབ་གི་མ་རེད། ད་དུང་རྒྱ་གཞུང་གིས་༧རྒྱལ་བ་རིན་པོ་ཆེ་ལ་མཚན་སྨོད་བྱེད་ཀྱིན་པ་མཚམས་འཇོག་བྱེད་དགོས་པ་རེད་ཟེར་བ་སོགས་བཤད་ན་ཅི་ཡང་ཡོང་གི་མ་རེད། ༧རྒྱལ་བ་རིན་པོ་ཆེ་ལ་མཚན་སྨཽད་བྱེད་མིན་དེ་རྒྱ་གཞུང་གི་ལག་པར་ཡོད། དེ་ལས་སོ་སོའི་ལག་གི་མ་རྩ་འདྲ་བོ་ངོས་ཟིན་པའི་ཐོག་ནས་དེའི་སྒང་ལ་བཤད་ན་འགྲོ་ས་ཞིག་དང་འབབ་ས་ཞིག་ཡོད་པ་རེད། ང་ཚོར་རྒྱ་གཞུང་ལ་གནོན་ཤུགས་སྤྲོད་ཐུབ་པ་དང༌། བོད་མི་མང་གི་སེམས་པ་གཞི་གཅིག་ཏུ་སྐོང་ཐུབ་པའི་ལག་ཆ་ཉག་གཅིག་ཡོད་པ་ནི་བོད་རང་བཙན་ཟེར་བ་འདི་རེད། འདི་བློས་བཏང་ཚར་ན་ད་ནི་ལག་བ་སྟོང་པ་སྟོང་རྐྱང་རེད་དཱ། ཁ་སྟོང་ནང་གི་ཚིག་སྟོང་ལབ་ན་འདི་ལས་གཞན་ཅི་ཡང་མེད། འུ་ཚང་གི་མཛད་གཙོ་རྣམ་པས་ཚོགས་ཆེན་སྒང་ཁ་ཕྱོགས་ལ་འགྱུར་བ་གཏོང་རྒྱུའི་དབང་ཚད་མི་འདུག་ཅེས་གསུང་གིན་ཡོད། བཀའ་སྤྱི་གཉིས་དང་མི་མང་གི་འཐུས་མི། ༧གོང་ས་མཆོག་གི་བཀའ་རྒྱ་སོགས་ཡོད་པའི་ཚོགས་ཆེན་ཞིག་ལ་ད་དུང་དབང་ཚད་ཡོད་པ་མ་རེད་གསུངས་ན། གསུང་མཁན་གྱི་དབང་ཚད་དེ་གང་ནས་བྱུང་བར་ང་ཚོས་དོགས་འདྲི་བྱེད་ཆོག་པ་ཞིག་རེད། ཁ་སྔོན་༧གོང་ས་མཆོག་གིས་བོད་ཁྱིམ་ནས་བཀའ་སློབ་བསྩལ་བའི་ནང་དུའང་བོད་མི་མང་གིས་ད་རེབ་ཚོགས་ཆེན་ཐོག་གང་ཐག་གིས་བཅད་ན་ཁོང་གིས་དེ་ངོས་ལེན་ཡོད་ཅེས་གསུངས་སོང་ན། ཐག་གཅོད་ཟེར་བ་དེ་ཁ་ཕྱོགས་ཀྱི་འགྱུར་བ་ཞིག་ལ་གོ་དགོས་ཀྱི་རེད་པཱ། ཡིན་ན་ཡང་བཀའ་སྤྱི་གཉིས་ཀྱིས་ཁ་ཕྱོགས་ལ་འགྱུར་བ་འགྲོ་གི་མ་རེད་ཟེར་བ་དེ་ཚོགས་ཆེན་འདིའི་རྒྱབ་ལོག་ན་ནང་ཁུལ་ཆབ་སྲིད་ཀྱི་ལག་འབྲེལ་ག་རེ་ཡོད་མེད་ངས་ཧ་གོ་གི་མི་འདུག འདི་ལྟར་བྱས་ན་༧གོང་ས་མཆོག་གི་དགོངས་གཞི་དང་བོད་མི་མང་གི་རེ་བ་ཚང་མ་ཆུད་ཟོས་ལ་འགྲོ་རྒྱུ་ལས་ཅི་ཡང་མེད། ངའི་རེ་བ་ཆེ་ཤོས་ནི་དབུ་མའི་ལམ་ལ་འགྱུར་བ་བཏང་ནས་རང་བཙན་ལ་འགྲོ་རྒྱུ་དེ་ཡིན། གལ་ཏེ་རེ་བ་འདི་མ་ཡོང་ན། གཉིས་པ་ནི་ཚོགས་ཆེན་འདིའི་ཐོག་ནས་བཀའ་ཤག་གི་མི་རིགས་ས་གནས་རང་སྐྱོང་ཟེར་བའི་སྐད་ཆ་མི་བཤད་རྒྱུ་དང༌། རབ་བྱུང་ན་ཆ་རྐྱེན་ངེས་ཅན་གྱི་འོག་ནས་མ་གཏོགས་བོད་རྒྱ་ཞི་མོལ་གྱི་འབྲེལ་ལམ་འདི་གཅོད་དགོས་མོད། ཡིན་ན་ཡང་ཚོགས་ཆེན་འདི་ང་ཚོའི་རྒྱུན་འབྱམས་སྤྱི་ཚོགས་ཀྱི་ཁ་ལོ་བསྒྱུར་བཞིན་པའི་ལས་རིམ་ཞིག་ཏུ་གྱུར་སོང་བར་བརྟེན། ད་ལྟའི་དབང་འཛིན་པ་ཚོའི་མཛད་རྗེས་ལ་རྗེས་སུ་ཡི་རངས་བྱེད་སའི་སྡིངས་ཆ་ཞིག་ཆགས་རྒྱུའི་ཉེན་ཁ་ཡོད་ན། ངས་ཚོགས་འདུར་ཞུགས་རྒྱུའི་ཐོ་འགོད་ཀྱང་བྱས་མེད། ཅེས་གསུངས་བྱུང༌།
