བོད་ཀྱི་རྩ་དོན་སྐོར་ལ་དཔྱད་ཞིབ་མདོར་བསྡུས།
དམིགས་བསལ་ཚོགས་ཆེན་འདིར་ཕེབས་པའི་བོད་མི་སྤུན་ཟླ་ཚང་མ་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་གཅིག་སྐབས་འབྲེལ་གྱི་བརྗོད་གཞི་མདོར་ཙམ་ཞུ་ན།
དང་པོར་བར་ལམ་བོད་ནང་ཛ་དྲག་གི་གནས་ཚུལ་བྱུང་བའི་རྐྱེན་ལ་ཁོ་བོས་རྐྱེན་གཙོ་བོ་གསུམ་ཡོད་པ་མཐོང་ཞིང༌། དེ་རྣམས་འདི་ལོའི་གཟིངས་འཁྲུག་གི་རྐྱེན་ཙམ་དུ་མ་ཟད་ད་བར་བོད་ནང་བྱུང་བའི་ངོ་རྒོལ་སྒེར་ལངས་ཐམས་ཅད་ལ་ཐུན་མོང་དུ་ཡོད་པའི་རྐྱེན་དུ་ངོས་འཛིན་བྱེད་ཆོག །
བོད་མི་སྤྱི་བོ་གནམ་བསྟན་ཡོངས་ཀྱི་སེམས་ཁམས་སུ་རྒྱ་བོད་གཉིས་རྒྱལ་རབས་ལོ་རྒྱུས་ཀྱི་ཐོག་ནས་རྒྱལ་ཁབ་ཐ་དད་དང་མི་རིགས་སོ་སོ་ཡིན་པའི་ངེས་ཤེས་བརྟན་པོ་ཡོད་ཅིང༌། འདས་ལོ་ང་བདུན་ལྷག་ཙམ་རིང་གི་གནས་སྟངས་འཕོ་འགྱུར་ནང་ངེས་ཤེས་དེ་ལ་འགྱུར་ལྡོག་གང་ཡང་ཕྱིན་མེད། ཐུན་མོང་གི་འདུ་ཤེས་བརྟན་པོ་འདིའི་གཞི་རྩའི་ཐོག་དབང་ཤུགས་ཆེ་བའི་རྒྱ་གཞུང་ནས་བོད་མི་རིགས་ལ་དྲག་གནོན་དང་མི་རིགས་ཀྱི་ངོ་བོར་གནོད་པའི་སྲིད་བྱུས་ལག་བསྟར་བསྟུན་མར་བྱེད་བཞིན་པ་དང༌། དེའི་སྟེང་བོད་མི་རྣམས་ཀྱིས་རང་གི་གཞི་རྩའི་ཐོབ་ཐང་ཁྲིམས་ཐོག་ནས་ལེན་ཐབས་བྲལ་བའི་རྐྱེན་གྱིས་སྒེར་ལངས་ཡང་ཡང་ཡོང་ཡོད།།
རྒྱུ་མཚན་གསུམ་ལས་དང་པོ་ནི་བསྒྲུབ་མི་དགོས་པར་ཚང་མས་མཁྱེན་གསལ་ལྟར་ཡིན་ལ། གཉིས་པ་བསྒྲུབ་པ་ལ་སྤྱིར་རྒྱ་གཞུང་ནས་གྲངས་ཉུང་མི་རིགས་ཚགས་དམ་པའི་ས་ཁུལ་དུ་མི་རིགས་དེའི་ཐུན་མོང་མིན་པའི་ངོ་བོ་སྲུང་ཆེད་རང་སྐྱོང་གི་གནས་བབས་བསྤྲད་ཡོད་ཅེས་བརྗོད་ཀྱི་ཡོད་ནའང༌། ལག་ལེན་ངོ་མའི་ཐོག་གྲངས་ཉུང་མི་རིགས་ཀྱི་ཐུན་མོང་མིན་པའི་ཁྱད་ཆོས་རྣམས་བདག་གཅེས་བྱ་རྒྱུ་ལྟ་གཞོག་དེ་རྣམས་ལ་གནོད་པའི་སྲིད་བྱུས་མང་དག་ཅིག་ལག་བསྟར་བྱས་ཡོད། དཔེར་ན་མི་རིགས་ཀྱི་ཐུན་མོང་མིན་པའི་ངོ་བོ་མཚོན་བྱེད་ཀྱི་ཁྱད་ཆོས་ནི་དེའི་རིག་གཞུང་དང༌། སྐད་ཡིག །གོམས་གཤིས། མི་རིགས་དེའི་ཆོས་དང་ལྟ་གྲུབ། འཚོ་ཐབས་སོགས་ཡིན་ནའང༌། བོད་དབང་བསྒྱུར་བྱས་པ་ནས་བཟུང་ད་བར་རྒྱ་གཞུང་ནས་བོད་ལ་འཛིན་པའི་སྲིད་བྱུས་བརྒྱུད་བོད་མིའི་ངོ་བོ་མཚོན་བྱེད་ཀྱི་ཁྱད་ཆོས་སྤྱི་དང་ཁྱད་པར་དུ་ཆོས་དང་སྐད་ཡིག་དང་འཚོ་ཐབས་སོགས་རྩ་བསྒྱུར་རྩ་སྟོང་འགྲོ་བའི་ཐབས་ཤེས་བྱས་ཡོད། དེ་ནི་མི་རིགས་ཀྱི་ངོ་བོ་སྲུང་བའི་ཆེད་དུ་རང་སྐྱོང་གི་གནས་བབས་བསྤྲད་ཡོད་ཅེས་བཤད་པ་དང་རྒྱབ་འགལ་ཏག་ཏག་ཏུ་ཕྱིན། རྒྱུ་མཚན་གསུམ་པ་ཡང་འཐད་དེ་རྒྱ་གཞུང་ནས་རྒྱལ་ཁབ་ཀྱི་སྲུང་སྐྱོབ་དང་སྤྱི་ཚོགས་ཀྱི་བདེ་འཇགས་ལ་ཡང་ཡང་སྙད་དེ་སྒེར་གྱི་ཐོབ་ཐང་རྡོག་རོལ་གཏོང་ཡོད་ཅིང༌། ཁྱད་པར་དུ་གྲངས་ཉུང་མི་རིགས་ལ་ཐུག་སྐབས་རྒྱལ་ཁབ་ཀྱི་ཆིག་སྒྲིལ་ལ་གནོད་པར་སྙད་འདོགས་ཏེ་རང་དབང་དང་ཐོབ་ཐང་རྣམས་རང་འགར་འཕྲོག་གི་ཡོད།
སྤྱིར་རྒྱལ་ཁབ་གང་འདྲ་ཞིག་ཡིན་རུང་དེའི་རྩ་ཁྲིམས་ནང་གསལ་བའི་གཞི་རྩའི་ཐོབ་ཐང་རྣམས་མི་དམངས་ལ་ངེས་པར་འཐོབ་དགོས་ཤིང༌། ཅི་སྟེ་གཞུང་ངམ་འགོ་འཁྲིད་ངན་པ་ལ་སོགས་པའི་རྐྱེན་གྱིས་ཐོབ་ཐང་ལོངས་སུ་སྤྱོད་པར་འགེགས་བྱུང་ཚེ། རྒྱལ་ཁབ་ཀྱི་ཁྲིམས་གཞི་ལྷན་ཁང་བརྒྱུད་ནས་ཐོབ་ཐང་རྩོད་པའི་གོ་སྐབས་ངེས་པར་ཡོད་དགོས། དེ་ལྟར་མ་བྱུང་ཚེ་མི་དམངས་རྣམས་ནམ་ཡང་མནར་གཅོད་དང་སྡུག་སྦྱོང་ལས་ཐར་མི་སྲིད། དེ་བས་ན་ཁྲིམས་ཀྱི་ཐོག་ནས་ཐོབ་ཐང་ལེན་མ་ཐུབ་ཚེ་ཡུལ་མི་རྣམས་ཀྱིས་གཞུང་ལ་ངོ་རྒོལ་གྱི་བྱ་སྤྱོད་སྤེལ་བ་ཡོང་གི་ཡོད་ཅིང༌། མཚམས་རེ་བྱ་སྤྱོད་རྣམས་དྲག་པོའི་རྣམ་པར་འཐོན་པ་ཡང་ཡོང་གི་ཡོད། འདི་ལོ་བོད་ནང་གཞི་རྒྱ་ཆེ་བའི་སྒེར་ལངས་བྱུང་བ་ཡང་རྒྱུ་རྐྱེན་འདི་རྣམས་ལ་བརྟེན་ནས་བྱུང་བ་ཁོ་བོས་འདོད་ཅིང༌། གཞི་རྒྱ་ཆེན་པོར་བྱུང་བ་དེས་བོད་ཆོལ་ཁ་གསུམ་ཡོངས་རྫོགས་ལ་གནས་སྟངས་ཛ་དྲག་ཏུ་འགྲོ་བཞིན་པ་དང་བོད་མིའི་སེམས་སུ་རྒྱ་གཞུང་གི་སྲིད་བྱུས་ལ་འཁོན་འཛིན་ཇེ་ཆེར་འགྲོ་བཞིན་པ་མཚོན།།
བོད་ཀྱི་རྩ་དོན་སྐོར་ལ་དཔྱད་ཞིབ་མདོར་བསྡུས།
སྤྱིར་འཛམ་གླིང་གི་ལོ་རྒྱུས་ལ་བལྟས་ན་རྒྱལ་ཁབ་དང་མི་རིགས་ཀྱི་འཐབ་རྩོད་དོན་འཁྱོལ་ཡོང་བར་གཙོ་བོ་སྒྲུབ་པའི་ཆ་རྐྱེན་གཉིས་དང་དགག་པའི་ཆ་རྐྱེན་གཅིག་བཅས་གསུམ་ལ་བརྟེན་ནས་བྱུང་བར་མངོན་ཏེ། དེ་ཡང་སྒྲུབ་པའི་ཆ་རྐྱེན་དང་པོ་ནི་རྒྱལ་ཁབ་དང་མི་རིགས་དེས་བསྒྲུབ་བྱ་མ་ཐོབ་བར་འཐབ་རྩོད་མུ་མཐུད་བྱ་དགོས་པ་དང༌། གཉིས་པ་ནི་འཐབ་རྩོད་དེ་ལ་སྟོབས་ཆེན་རྒྱལ་ཁབ་ཁག་གི་དོན་དམ་གྱི་རྒྱབ་སྐྱོར་འཐོབ་དགོས་པ་བཅས་ཡིན། ད་ལྟ་བོད་མིའི་གནས་སྟངས་ནི་ཆ་རྐྱེན་འདི་གཉིས་ཀ་དང་བྲལ་ཏེ། གཞིས་སུ་ལུས་པའི་བོད་མི་རྣམས་ནི་རྒྱ་འོག་ཏུ་ཚུད་ནས་ཡོད་པས་རྒྱུན་མཐུད་དེ་འཐབ་རྩོད་བསྟེན་རྒྱུ་ཤིན་ཏུ་དཀའ་བ་དང༌། ཕྱིས་རང་དབང་རྒྱལ་ཁབ་ཏུ་གནས་པའི་བོད་མི་ཚོས་ངོ་རྒོལ་སྐད་འབོད་སོགས་ཀྱི་ལས་འགུལ་སྤེལ་ཀྱང་མཉམ་བཞུགས་བྱེད་མི་ཉུང་བས་ཁྱབ་ཆུང་བ་དང༌། གནས་ཚང་རྒྱལ་ཁབ་ཀྱི་ཁྲིམས་སྒྲིག་འཛུགས་དང་བསྟུན་དགོས་པས་རྒྱུན་གནས་མི་ཐུབ་པ་ཆགས་ཡོད། ཆ་རྐྱེན་གཉིས་པའང་ཚང་བར་དཀའ་སྟེ། རྒྱ་ནག་ལ་གདོང་ལེན་གྱིས་བོད་ཀྱི་རྩ་དོན་ལ་དོན་དམ་པའི་རྒྱབ་སྐྱོར་བྱེད་པའི་སྟོབས་ཆེན་རྒྱལ་ཁབ་མེད་པའི་ཕྱིར། སྤྱིར་དངོས་ཡོད་ཆབ་སྲིད་ལག་བསྟར་སྐབས་སྟོབས་ཆེན་རྒྱལ་ཁབ་ཚོས་རང་གི་དོན་དང་རང་གི་ཁེ་ཕན་ཁོ་ན་ལ་བལྟས་ནས་སྟོབས་ཞན་པའི་རྒྱལ་ཁབ་ལ་རྒྱབ་སྐྱོར་བྱས་པ་ལས་བཟང་སྤྱོད་དང་དྲང་བདེན་ཙམ་ལ་བརྟེན་ནས་རྒྱབ་སྐྱོར་བྱེད་པའི་ལོ་རྒྱུས་དཀོན། དགག་ཕྱོགས་ཀྱི་ཆ་རྐྱེན་ནི་དབང་སྒྱུར་བ་པོའི་གཞུང་དེའི་སྟོབས་ཧ་ཅང་ཉམ་པ་ལས་རང་འོག་ཏུ་ཚུད་པའི་མི་རིགས་རྣམས་ལ་འཛིན་སྐྱོང་བྱེད་མི་ཐུབ་པའི་གནས་སྟངས་དེ་ཡིན། དེ་འདྲའི་གནས་སྟངས་ནང་འཐབ་རྩོད་བྱེད་མཁན་གྱི་མི་རིགས་དེ་ལ་རྒྱལ་ཁ་ཐོབ་པའི་སྐབས་ཡོང་གི་ཡོད། འོན་ཀྱང་ད་ལྟའི་ཆབ་སྲིད་ཀྱི་དངོས་ཡོད་གནས་སྟངས་ལ་བོད་མིར་རྐྱེན་གསུམ་པ་ཡང་ཚང་མེད་པ་ཧ་ཅང་གསལ། ཆ་རྐྱེན་གསུམ་པོ་མ་ཚང་ཁར་ཁ་དད་རྒྱལ་ཁབ་དབང་ཤུགས་ཆེ་བའི་གནས་སྟངས་སུ་རྩ་དོན་སྒྲུབ་མཁན་གྱི་མི་རིགས་དེའི་འདོད་པ་ཇི་བཞིན་ཡོང་རྒྱུ་ཤིན་ཏུ་དཀའ་བས། མི་རིགས་དེས་སྔོན་འགྲོའི་ཆ་རྐྱེན་ཉུང་ཤས་ཤིག་ཁས་མ་ལེན་རང་ལེན་དུ་འགྱུར་གྱི་ཡོད། དེ་ནི་རང་སྐྱོང་གི་གནས་བབས་བཟུང་བའི་གྲངས་ཉུང་མི་རིགས་དུ་མའི་ལོ་རྒྱུས་སུ་གསལ་ལ། ད་ལྟ་བོད་གཞུང་གིས་དབུ་མའི་ལམ་བསྟེན་པའི་གནས་ཚུལ་ཡང་དེ་ཡིན་ནོ།། དེར་བརྟེན་གོང་གི་གནས་སྟངས་དེ་འདྲའི་ནང་བོད་མི་རིགས་ཀྱི་དཀའ་རྙོག་སེལ་བའི་ཐབས་ལམ་ལེགས་ཤོས་ནི་རྒྱ་གཞུང་དང་ཐད་ཀར་ཞི་མོལ་འགྲོ་བཞིན་པའི་དབུ་མའི་ལམ་ཡིན་པར་སེམས།
དབུ་མའི་ལམ་ལ་དོན་འབྲས་མེད་པས་ལམ་དེ་ལས་ཕྱིར་ལྡོག་དགོས་ཞེས་བསམ་ཚུལ་ཡོད་ནའང༌། དེ་ལ་འབྲས་བུ་མེད་པ་མི་མཐོང་སྟེ། ཕྱི་ལོ་ ༢༠༠༢ ནས་ད་བར་ལོ་དྲུག་གི་ནང་རྒྱ་གཞུང་གི་སྐུ་ཚབ་དང་༧གོང་ས་མཆོག་གི་སྐུ་ཚབ་བར་གདོང་ཐུག་གིས་གཏམ་བཤད་ཐེངས་བརྒྱད་བྱས་པའི་གྲུབ་འབྲས་དངོས་རྡོག་ཅིག་བསྟན་རྒྱུ་མེད་ནའང༌། གཏམ་བཤད་དེ་རྣམས་ལས་བོད་མིས་རྒྱ་གཞུང་གི་ཕུགས་བསམ་ཚོད་དཔག་ཐུབ་ཡོད་ལ། རྒྱ་གཞུང་ནས་བོད་མིའི་དགོས་མཁོ་གང་ཞིག་ཡིན་པའང་ཤེས་ཡོད། དེ་ནི་གཏམ་བཤད་བྱས་པའི་གྲུབ་འབྲས་ཡིན་ལ་འགྲིག་འཇགས་བརྒྱུད་རིམ་གྱི་སྔོན་འགྲོའི་ལས་དོན་ཡང་ཡིན། ངེས་དགོས་པ་ཞིག་ལ་ཕྱི་ལོ་ ༢༠༠༢ ནས་ད་བར་ལོ་དྲུག་གི་ནང་ཛ་དྲག་གི་ཐུག་འཕྲད་གཅིག་ཐེ་བས་ཐུག་འཕྲད་ཐེངས་བརྒྱད་བྱུང་ཡོད་པ་དེས་དབུ་མའི་ལམ་གྱི་སྲིད་བྱུས་ལ་རྒྱ་གཞུང་ནས་ཡ་ལེན་མ་བྱེད་ཀ་མེད་ཆགས་པར་མཚོན་ཐུབ་ཅིང༌། མ་བྱེད་ཀ་མེད་ཆགས་པ་དེས་རྒྱ་གཞུང་ལ་རྒྱལ་སྤྱིའི་གནོན་ཤུགས་ཡོད་པར་ཡང་མཚོན་པས་གོང་གི་ཆ་རྐྱེན་གཉིས་པ་སྟོབས་ཆེན་རྒྱལ་ཁབ་ཀྱི་རྒྱབ་སྐྱོར་དང་ལྡན་དགོས་ཞེས་པ་དེ་རྫོགས་པར་ཚང་མེད་ཀྱང་ཆ་ཤས་ཤིག་ཡོད་པ་བརྩི་ཆོག །
འོ་ན་ཉེ་ཆར་རྒྱ་གཞུང་ནས་དབུ་མའི་ལམ་གྱི་དོན་ཚན་གཅིག་རེ་གཉིས་རེ་ནས་སྐྱོན་བརྗོད་དང་དགག་པ་བྱེད་ཡོད་པས་ཇི་ལྟར་བྱ་ཞེ་ན། དེར་ལན་འདེབས་མ་བྱེད་གོང་དུ་སྐྱོན་བརྗོད་བྱས་པ་རྣམས་ཁ་གསལ་འགོད་ན། དང་པོ། དབུ་མའི་ལམ་གྱི་སྲིད་བྱུས་ནང་བོད་འདི་རྒྱལ་རབས་ལོ་རྒྱུས་ཀྱི་ཆ་ནས་རྒྱ་ཁོངས་མིན་པར་གསལ་ཡོད་པས་དབུ་མའི་ལམ་དུ་རང་བཙན་ཡིབ་ནས་ཡོད་ཅེས་དང༌། གཉིས་པ། བོད་ཆེན་པོའི་བསྒྲུབ་བྱ་བཟུང་བ་ནི་རྒྱལ་རབས་དང་འགལ་བ་ཡིན་ཞེས་དང༌། གསུམ་པ། ཚད་མཐོ་བའི་རང་སྐྱོང་གི་གནས་བབས་འདོད་པས་ཞིང་བྲན་ལམ་ལུགས་བསྐྱར་གསོ་བྱ་བ་ཡིན་ཞེས་དང༌། བཞི་པ། བོད་ཆེན་པོ་ལས་རྒྱ་མིའི་དམག་དཔུང་ཕྱིར་འཐེན་དགོས་པར་འདོད་པས་ས་ཁུལ་གྱི་བརྟན་ལྷིངས་དང་བདེ་འཇགས་ལ་གནོད་རྒྱུ་རེད་ཅེས་དང༌། ལྔ་པ། བོད་ཆེན་པོ་ལས་ཧཱན་མི་རིགས་གཞན་ཕྱིར་འཐེན་དགོས་པར་འདོད་པས་མི་རིགས་ཀྱི་དབྱེ་འབྱེད་འབྱུང་བ་ཡིན་ཞེས་སྐྱོན་བརྗོད་བྱས་ཏེ། འདོད་བྱ་དེ་རྣམས་བསྒྲུབ་ཏུ་མེད་པའི་འདོད་ཚུལ་རེད་ཅེས་གསལ་བསྒྲགས་བྱས་ཡོད།
སྐྱོན་བརྗོད་དེ་ལ་བརྟེན་ནས་བོད་མིའི་ཁྲོད་དུ་དབུ་མའི་ལམ་ལ་དྭོགས་པ་ཆེན་པོ་ཞིག་འབྱུང་བཞིན་ཡོད་ནའང༌། རེ་ཞིག་དེའི་སྐོར་དཔྱད་ཞིབ་གསལ་པོ་ཞིག་དགོས་མཁོ་ཆེ་བས་ཅུང་ཟད་དཔྱད་ན། ༡ ཕྱི་ལོ་ ༡༩༨༧ ལོའི་ཞི་བའི་དོན་ཚན་ལྔའི་ནང་༧གོང་ས་མཆོག་ནས་བོད་འདི་རྒྱལ་རབས་ལོ་རྒྱུས་ཀྱི་ཆ་ནས་རང་བཙན་ཡིན་པ་གསལ་པོར་གསུངས་ཡོད་པ་དེར་ཐབས་ཕྱོགས་གཅིག་འགྱུར་གྱི་འགོ་འཁྲིད་ཡང་མིན་ཕུ་ཡིས་དོན་ཚན་ལྔ་འཁོད་པའི་གནས་བྲིས་ཤིག་ཕུལ་བའི་ནང་༧གཽང་ས་མཆོག་གིས་ཁ་བྲལ་གྱི་ཕྱག་ལས་མུ་མཐུད་དེ་གནང་ན་བོད་ནང་དམ་བསྒྲགས་ཤུགས་ཆེ་བྱ་རྒྱུའི་ཉེན་བརྡ་ཕུལ་ཡོད། ༢ བོད་ཆེན་པོ་ཞེས་པའི་སྐྱོན་བརྗོད་འདི་གཏམ་གསར་པ་ཞིག་མིན་ཏེ་བརྒྱད་ཅུ་རྒྱ་གཉིས་དང་རྒྱ་བཞིའི་ནང་བོད་མིའི་སྐུ་ཚབ་བོད་དུ་ཕེབས་པའི་སྐབས་ནས་རྒྱ་མི་དང་མཉམ་དུ་འདོད་བྱ་འདི་རྣམས་ལ་གླེང་སློང་བྱུང་ཡོད་ཅིང༌། ཁྱད་པར་དུ་ཐབས་ཕྱོགས་གཅིག་འགྱུར་གྱི་དཔོན་རིགས་ཅང་པིང་གིས་བོད་ཆེན་པོའི་འདོད་བྱ་མ་དོར་ཚེ་འགྲིག་འཇགས་ཀྱི་གོ་སྐབས་མེད་ཅེས་སོགས་བཤད་ཡོད། ༣ གནད་དོན་ལྷག་མ་རྣམས་སི་ཊ་སི་སྦག་གི་གྲོས་ཆོད་ནང་འཁོད་ཡོད་ལ། དེར་རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་པས་རང་བཙན་དང༌། ཕྱེད་རང་བཙན། མི་མངོན་པའི་རང་བཙན་གང་ཡང་ཁས་ལེན་མི་ཐུབ་ཅེས་ནན་བཤད་བྱས་ཤིང༌། སི་ཊ་སི་སྦག་གི་གྲོས་ཆོད་དེས་ཞི་མོལ་གྱི་གཞི་རྟེན་མི་རུང་ཞེས་དགག་པའང་བྱས་ཡོད། ༤ གནས་སྤོས་ཟིན་པའི་མི་རིགས་གཞན་ཕྱིར་འཐེན་དགོས་པའི་གནད་དོན་དེ་དབུ་མའི་ལམ་དུ་གསལ་གྱི་མེད་པས་སྐྱོན་བརྗོད་དེ་ནི་གཞི་མེད་པའི་སྐྱོན་བརྗོད་ཙམ་ཡིན། དེར་བརྟེན་རྒྱ་གཞུང་ནས་སྐྱོན་བརྗོད་བྱེད་པར་བོད་མི་ཚོ་སྒྲོག་མི་དགོས་ཤིང༌། བློ་ཕམ་དང་དྭཽགས་པ་ཡང་སྐྱེ་མི་དགོས་སོ།། ཡང་སྤྱི་ཚོགས་ནང་རྒྱ་ནག་གཞུང་གིས་ལྷག་བསམ་དང་དྲང་བདེན་མི་བྱེད་པས་གྲོས་མོལ་བྱེད་པར་དགོས་པ་མེད་ཅེས་བརྗོད་མཁན་ཡོད་ཀྱང༌། རྒྱལ་ཁབ་དང་མི་རིགས་ཀྱི་འཐབ་རྩོད་ནང་དབང་ཤུགས་ཆེ་བའི་རྒྱལ་ཁབ་ཀྱིས་ལྷག་བསམ་དང་དྲང་བདེན་བྱེད་པ་ལོ་རྒྱུས་གང་ན་ཡོད། དེ་མེད་ཀྱང་འཐབ་རྩོད་བྱེད་མཁན་གྱི་མི་རིགས་དེས་འབད་རྩོལ་རྒྱུན་འཁྱོངས་ཀྱི་སྒོ་ནས་གནོན་ཤུགས་སྤྲོད་དེ་ཡ་ལེན་མ་བྱེད་ཀ་མེད་བཟོ་དགོས་པ་ནི་འཐབ་རྩོད་ཀྱི་རང་བཞིན་ཡིན་པས་ང་ཚོས་ཀྱང་དེ་ལྟར་བྱ་འོས་པ་ཡིན།
འོ་ན་གོང་གི་སྐྱོན་བརྗོད་དེ་རྣམས་ཇི་ལྟར་བཟློག་རྒྱུ་ཡིན་ནམ་ཞེ་ན། མདོར་བསྡུས་ཏེ་ཞུ་བར་བྱ་སྟེ་ཇི་སྲིད་བོད་ཀྱི་གནས་བབས་གསལ་པོ་མ་བཟོ་བར་དུ་རྒྱ་མིས་དེར་སྙད་འདོགས་བྱ་རྒྱུ་ངེས་པས་རང་གཞུང་ནས་བོད་ཀྱི་ལོ་རྒྱུས་སུ་འཁོད་པ་གཅིག་པུར་ཆ་འཇོག་མི་བྱེད་པར་ཁྱིམ་མཚེས་རྒྱལ་ཁབ་ཀྱི་ལོ་རྒྱུས་དང་དེ་ཚོའི་ཆིངས་ཡིག་རྣམས་ལ་ཞིབ་འཇུག་གིས་བོད་རང་བཙན་ཡིན་པའི་གནས་བབས་བསྒྲུབ་པའི་ཡིག་ཆ་ཕྱོགས་བསྒྲིག་བྱ་སྟེ་འཛམ་གླིང་གི་མདུན་སར་སྤྱན་འབུལ་ཐུབ་པ་བྱ་རྒྱུ་དང༌། ལྷག་པར་དུ་རྒྱ་མི་རིགས་ལ་ངོ་སྤྲོད་ཐུབ་པ་བྱ་གལ་ཆཻ། དེས་རྒྱ་གཞུང་གིས་བོད་འདི་ལོ་རྒྱུས་ཀྱི་ཆ་ནས་རྒྱ་ཁོངས་ཡིན་པའི་ཁས་ལེན་དགོས་པའི་ཆ་རྐྱེན་དེ་དོན་ལ་མི་གནས་པ་དང༌། བོད་གཞུང་གི་དབང་ཚད་ལས་བརྒལ་བ་ཡིན་པ་ཁ་གསལ་སྟོན་ཐུབ་ཅིང༌། བོད་ཀྱི་འདས་པའི་གནས་བབས་བསྒྱུར་ན་བོད་ཀྱི་ལོ་རྒྱུས་བསྒྱུར་དགོསཔ་མ་ཟད་བོད་དང་འབྲེལ་བ་བྱུང་བའི་རྒྱལ་ཁབ་རྣམས་ཀྱི་ལོ་རྒྱུས་དང་ཆིངས་ཡིག་སོགས་ཀྱང་བསྒྱུར་དགོས་པར་འགྱུར་བས་དེའི་དབང་ཚད་སུ་ལའང་མེད་པས་དེ་ནི་ཧ་ཅང་ཐལ་ཆེས་པའི་རྒྱུ་མཚན་བྲལ་བའི་གཏམ་དུ་མཐོང་ངོ།།
གཉིས་པ་བོད་ཆེན་པོའི་གནས་བབས་འདོད་བྱར་བཟུང་བ་དེ་རྒྱལ་རབས་དང་འགལ་ཞེས་རྒྱ་གཞུང་ནས་སྨྲ་བ་དེ་ཡང་དོན་དངོས་ཐོག་བསྒྲུབ་པར་ཤིན་ཏུ་དཀའ། འདོད་བྱ་དེའི་དགོས་པ་གཙོ་བོ་ནི་བོད་མི་རིགས་ཚགས་དམ་པོ་ཡོད་པའི་ས་ཁུལ་ཐམས་ཅད་མཉམ་སྡེབས་ཀྱི་རང་སྐྱོང་གི་ས་ཁུལ་ཆེན་པོ་གཅིག་བསྐྲུན་ཐུབ་པའི་ཆེད་ཡིན། དེ་ལྟར་བྱུང་ན་བོད་མི་རིགས་ཀྱི་ངོ་བོ་ཉར་འཚག་དང་གོང་སྤེལ་གཏོང་ཐུབ་པའི་ཁྱད་པར་ཡོད་པས། རྒྱ་གཞུང་དང་རྒྱ་མི་རིགས་ལ་དགོས་པ་དེ་འདྲ་ཡིན་པ་བསྒྲུབ་ཐུབ་པ་བྱ་དགོས། གསུམ་པ་ཚད་མཐོ་བའི་རང་སྐྱོང་བྱུང་ན་ཞིང་བྲན་ལམ་ལུགས་བསྐྱར་གསོ་ཐེབས་རྒྱུ་ཡིན་ཞེས་པ་ནི་རྒྱུ་མཚན་མེད་པའི་གཏམ་ཞིག་ཡིན། བཙན་བྱོལ་དུ་བོད་མི་རྣམས་ཀྱིས་དམངས་གཙོའི་གཞུང་བཙུགས་ནས་ལོ་བཞི་བཅུ་ལྷག་ཙམ་ཕྱིན་ཡོད་ལ། དེའི་རིང་དམངས་གཙོའི་ཚད་གཞི་ཇེ་མཐོ་ཇེ་མཐོར་གཏོང་ཡོད་པ་དེར་གཞིགས་ན་ཞིང་བྲན་ལམ་ལུགས་བསྐྱར་གསོ་ཐེབས་རྒྱུའི་གོ་སྐབས་ཡོང་མི་ཐུབ། དགག་པ་ཐ་མ་དེ་ཡང་དོན་ལ་མི་གནས་པའི་དགག་པ་ཙམ་དུ་ཟད་དེ་དབུ་མའི་ལམ་དུ་མི་རིགས་གཞན་བོད་ས་ནས་ཕྱིར་འཐེན་དགོས་པའི་དོན་ཚན་འཁོད་མེད་དོ།།
དབུ་མའི་ལམ་གྱི་ཐོག་ནས་གྲོས་མོལ་གནང་བའི་སྐབས་བོད་གཞུང་ནས་ལྷག་པར་དུ་ཐུགས་སྣང་དགོས་པའི་དོན་གནད་གཙོ་བོ་གཉིས་མཐོང་སྟེ། མི་རིགས་ཀྱི་ངོ་བོ་སྲུང་རྒྱུ་ནི་གནད་ཀྱི་དམ་པ་ཡིན་པས་དེར་གནོད་པའི་ཆ་རྐྱེན་གྱི་རིགས་གང་ལ་ཡང་བོད་གཞུང་ནས་འགྲིག་འཇགས་ཀྱི་ཆེད་དུ་ཁས་ལེན་བྱ་མི་རུང༌། གཉིས་པ་འགྲིག་འཇགས་ཡོང་བའི་མཚམས་སུ་ཐ་མའི་ཐག་གཅོད་ཀྱི་དབང་ཚད་བོད་མི་ས་ཡ་དྲུག་གི་ལག་ཏུ་འཇོག་དགོས་པ་ནི་ཤིན་ཏུ་གལ་ཆེ་བར་མཐོང༌། གནད་དོན་འདི་གཉིས་པོར་ཐུགས་གཟབ་མ་གནང་ཚེ་འཐབ་རྩོད་ཀྱི་དགོས་པ་བརླག་ཉེན་ཡོད་ཅིང༌། མ་ཟད་མི་རིགས་ནང་ཁུལ་བར་འཁོན་འཛིན་དང་ནང་འཁྲུག་ཡོང་བའི་ཉེན་ཁའང་མཐོང༌། ལྷག་པར་དུ་མ་འོངས་པར་བོད་ནང་དམངས་གཙོའི་གཞུང་འཛུགས་རྒྱུ་ནི་བོད་གཞུང་དང་དབུ་མའི་ལམ་གྱི་ཆེས་མཐོ་བའི་འདུན་པ་ཡིན་པས་བོད་ཀྱི་ཆབ་སྲིད་ཀྱི་ཐག་གཅོད་མི་དམངས་ཀྱི་ལག་ཏུ་འཇོག་གལ་ཆེ། མང་མོས་ཐག་གཅོད་ཀྱི་ལམ་དུ་ཆས་པར་དམིགས་བསལ་གྱི་ཁེ་ཕན་འདི་རྣམས་ཀྱང་ཡོད་དེ། འགྲན་བསྡུར་ལྷུག་པོ་ཡོང་ཐུབ་པ་དང༌། ཆབ་སྲིད་ཀྱི་གནད་དོན་ནང་མི་དམངས་གང་མང་གི་མཉམ་བཞུགས་ཐུབ་པ། མི་སེར་གྱི་གཞི་རྩའི་རང་དབང་ལོངས་སུ་སྤྱོད་ཐུབ་པ་བཅས་ཚང་གི་ཡོད། འདི་གསུམ་ནི་དམངས་གཙོ་ཡང་དག་པའི་ཀ་རྟེན་ལྟ་བུ་ཡིན་པས་ལམ་འདིའི་ཐོག་བསྐྱོད་ན་བོད་ནང་དམངས་གཙོའི་སྤྱི་ཚོགས་འཛུགས་རྒྱུའི་འདུན་པ་བསྒྲུབ་ཐུབ་པ་དང༌། འཛིན་སྐྱོང་བརྟན་པ་ཡོང་ཐུབ་པ། གཞུང་དེ་མི་དམངས་ཀྱི་གཞུང་ཡིན་པར་མཚོན་ཐུབ་པ་བཅས་ཡོང་ངེས།། །།
