བོད་ཀྱི་དུས་བབ་སྤྱིའི་འདོན་ཐེངས་ ༤༣༡ པའི་སྟེང་གི་རྩོམ་སྒྲིག་པའི་གཏམ།
བོད་མི་རིགས་ཀྱིས་དེ་རིང་འབྲི་བཞིན་པ་ནི་བོད་ཀྱི་ལོ་རྒྱུས་ཐོག་ཚད་མཐོ་ཤོས་དང་ཆེས་ཛ་དྲག་གི་ཤོག་ལྷེ་དེ་ཡིན། ཤོག་ལྷེ་འདིའི་སྒང་དུ་བོད་གངས་ཅན་པའི་མཐོ་རིམ་མི་སྣའི་ཐུགས་རེ་དང་གཞི་རིམ་མང་ཚོགས་ཀྱི་བསམ་ཚུལ་བཅས་གཞི་གཅིག་ཏུ་འབྲི་གི་ཡོད། ཡིན་ཡང༌། གནས་སྟངས་དང་གནས་ཚུལ་ཁག་ཅིག་ནམ་རྒྱུན་ཁ་གསལ་གཏིང་གསལ་དུ་མེད་པའི་དབང་གིས། དམིགས་བསལ་ཚོགས་ཆེན་འདི་གྲོལ་བའི་ཕྱི་ཉིན་ང་ཚོས་ཤོག་ལྷེ་གསར་བ་འདིའི་སྟེང་ནས་ལོ་རྒྱུས་རྙིང་བ་ཞིག་བསྐྱར་དུ་མི་ཀློག་པའི་ངེས་པ་མི་འདུག
བོད་མིའི་དམིགས་བསལ་ཚོགས་ཆེན་དེ་ཉིན་འདི་དག་རིང་ངྷ་སར་འཚོགས་བཞིན་ཡོད་ལ། ཚོགས་མི་ ༥༠༠ ལྷག་བོད་མི་ཁ་འཐོར་དུ་གནས་སའི་འཛམ་གླིང་གི་ཡུལ་ལུང་གང་ས་ནས་ཕེབས་ཤིང༌། ཁོང་ཚོས་ཐབས་དང་ཤེས་རབ་གསར་པ་འཁྱེར་ཏེ་རྒྱལ་བ་རིན་པོ་ཆེ་མཆོག་དང་བཙན་བྱོལ་བོད་གཞུང་ལ་ཕྱར་གྲུ་མཉམ་འདེགས་བྱེད་པར་ཡོང་ཡོད། ཡིན་ཡང༌། ཚོགས་ཆེན་འདིའི་སྟེང་གི་ཞན་ཆ་གཙོ་བོ་ནི་ཚོགས་ཞུགས་པ་དག་ལ་ནམ་རྒྱུན་རང་རང་གི་དྲན་ཕྱོགས་དང་འདོད་ཕྱོགས་ཀྱི་བསམ་ཚུལ་ཙམ་མ་གཏོགས། ལོ་རྒྱུས་ཀྱི་རིན་ཐང་འཇོག་ཐུབ་པའི་ཐབས་དང་ཤེས་རབ་འཁྱེར་ཡོང་རྒྱུ་མེད་ལ། ལྷག་པར་དུ། ད་ལྟའི་བོད་མིའི་འཐབ་རྩོད་ཀྱི་གོ་རིམ་དང་གནས་བབ། འཐབ་བྱུས་སོགས་ཀྱི་ཐད་ནས་ནམ་རྒྱུན་འདེང་ངེས་ཀྱི་གནས་ཚུལ་རག་གི་མེད་ལ། བཙན་བྱོལ་བོད་གཞུང་གིས་ཀྱང་བོད་རྒྱའི་འབྲེལ་མོལ་འདི་མཚམས་མ་ཆད་བར་དུ་བོད་མིའི་ཕྱོགས་ཀྱི་དགོས་འདུན་ཁག་ཁ་གསལ་གཏིང་གསལ་གྱིས་མ་བསྒྲགས་པ་དང༌། རང་གི་མང་ཚོགས་ཁྲོད་དུས་ཐོག་ཏུ་སྦྱང་བཤད་དང་གསལ་བཤད་བྱས་པ་ཉུང་དྲག་པའི་དབང་གིས་མང་ཚོགས་འདི་དག་དུས་ལ་སླེབས་དུས་ཁ་གྲག་མི་ཤེས་པ་ཞིག་ཏུ་གྱུར་ཡོད། འདིའི་དཔེ་མཚོན་ཉེ་ཤོས་ཤིག་ནི། དམིགས་བསལ་ཚོགས་ཆེན་གྱི་ཚོགས་ཞུགས་པ་མང་བོ་ཞིག་གིས་སྐུ་ཚབ་རྣམ་གཉིས་ཀྱི་གསལ་བསྒྲགས་མཐའ་མ་དེ་གོ་མེད་པ་དང༌། ཁག་ཅིག་གིས་༧གོང་ས་མཆོག་གིས་དམིགས་བསལ་ཚོགས་ཆེན་སྟེང་བསྩལ་བའི་གསུང་འཕྲིན་ཡང་གོ་མེད་པ་ལྟ་བུས་མཚོན། འདི་ལྟའི་ཉེར་ལེན་ལ་བརྟེན་ཁ་སང་དེ་རིང་གི་ཚོགས་ཆེན་སྟེང་དུའང་ད་ལྟའི་བོད་རྒྱའི་ཆབ་སྲིད་ཀྱི་གནས་བབ་མ་རྟོགས་པ་དང༌། ༧གོང་ས་མཆོག་དང་བཀའ་ཤག་གི་ཐུགས་རེ་ཅི་ཡིན་མ་རྟོགས་པའི་དབང་གིས་ཚོགས་ཆེན་འདིར་ཞིབ་ལྷོད་ཀྱི་གོ་བསྡུར་ཞིག་ཡོང་ཁག་པར་གྱུར་ཡོད་ཚུལ་ཀྱང་སྒྲོག་གི་ཡོད།
ཚོགས་ཞུགས་པ་དག་གི་དཀའ་རྙོག་གཞན་ཞིག་ནི། ཚོགས་ཆེན་གྱི་གྲོས་གཞི་དང་ཚོགས་ཆེན་གྱི་དམིགས་ཡུལ་གཉིས་མཉམ་དུ་མཐུད་མ་ཐུབ་པའམ་གསལ་བོར་མ་རྟོགས་པའི་དབང་གིས་ཡིན་པར་སྣང༌། བཀའ་ཁྲི་མཆོག་ལྟར་ན། ཚོགས་ཆེན་གྱི་གྲོས་གཞི་ལྟེ་བ་ནི་ད་ལྟའི་དངོས་ཡོད་གནས་ཚུལ་ལ་གཞིགས་པའི་མ་འོངས་པར་བོད་མིའི་རྩ་དོན་སྒྲུབ་ཕྱོགས་ཇི་དགེ་ལ་གཞི་རིམ་མང་ཚོགས་ཀྱི་དགོངས་ཚུལ་དང་མངོན་འདོད་མཚོན་ཐུབ་པ་ཞིག་དགོས་པ་དེ་ཡིན་ལ། དམིགས་ཡུལ་མཐའ་མ་ནི་འབྱུང་འགྱུར་བོད་མིའི་རྩ་དོན་སྒྲུབ་ཕྱོགས་ཇི་འདྲ་ཞིག་བཟུང་ཡང་མང་ཚོགས་ཀྱི་བཀའ་ལུང་ཡོད་པ་གསལ་བོ་ཆགས་ཐུབ་པའི་ཆེད་དུ་ཡིན་འདུག འད྄ིའི་གོ་དོན་ནི་མ་འོངས་པར་མི་དམངས་ཀྱི་མངོན་འདོད་མཚོན་ཞིང༌། མི་དམངས་ཀྱི་བཀའ་ལུང་ཡོད་པའི་སྲིད་བྱུས་ཤིག་འཚོལ་གྱི་ཡོད་པ་གསལ་བོ་ཆགས་ཡོད་པར་འདོད། དེས་ན་ད་རེབ་ཀྱི་ཚོགས་ཞུགས་པ་རྣམས་ཀྱིས་ཀྱང་འདི་ལྟར་མི་དམངས་ཀྱི་མངོན་འདོད་མཚོན་ཐུབ་པ་དང༌། མི་དམངས་ཀྱི་བཀ྄འ་ལུང་ཆགས་ཐུབ་པའི་སྲིད་བྱུས་འཛིན་ཕྱོགས་ཤིག་ལ་གོ་བསྡུར་གནང་རྒྱུ་ནི་གནད་ཆེ་བར་འདོད་དོ།།
![[1/4] A screen capture from video shows trekkers leaving their campsite, as unusually heavy snow and rainfall pummeled the Himalayas, in the Tibet Region, China, October 5, 2025. Geshuang Chen/Handout via REUTERS Purchase Licensing Rights](https://tibettimes.net/wp-content/uploads/2025/10/Untitled-3-360x180.jpg)
ད་ནི་ང་ཚོས་བོད་དོན་འཐབ་རྩོད་ཀྱི་རི་མོ་འདི་ཆེ་རུ་འབྲི་དགོས་གི་འདུག ང་ཚོས་བོད་གཅིག་པུ་མིན་པར་ཧི་མ་ལ་ཡའི་མངའ་ཁུལ་བརྟན་ལྷིང་གླེང་དགོས་གི་འདུག ཆབ་སྲིད་ལ་དབྱེ་ཞིབ་བྱེད་དུས་ཀྱང་ཁ་ཐུག་ཏུ་པེ་ཅིན་དང་ངྷ་ས་གཉིས་ཀྱི་འབྲེལ་བའི་གནས་སྟངས་ལ་བལྟ་བ་ཙམ་མིན་པར། མངའ་ཁུལ་ཧྲིལ་བོ་གླེང་དགོས་པ་རེད། འདི་དང་མཉམ་དུ་རྒྱ་ནག་གིས་བོད་བཙན་འཛུལ་བྱེད་ཀྱིན་པ་འདིས་ཧི་མ་ལ་ཡའི་མངའ་ཁུལ་དང་འབྲེལ་བའི་རྒྱལ་ཁབ་ཚང་མར་ཉེན་ཁ་དང་འཇིགས་སྐུལ་བྱེད་ཀྱིན་པའི་གནས་བབ་བཤད་དགོས་ལ། ཧི་མ་ལ་ཡའི་མངའ་ཁུལ་གྱི་བརྟན་ལྷིང་གླེང་མཁན་མི་རིགས་ས་སྐྱེས་རྡོ་སྐྱེས་ལྟ་བུ་ནི་བོད་མི་རིགས་ཡིན་དགོས་པ་རེད། བོད་མིའི་ཁྲོད་དུ་བོད་དོན་ཁོ་ན་གླེང་མཁན་མང་མོད་ཡུལ་བབ་སྲིད་བྱུས་ཀྱི་ཐོག་ནས་བོད་དོན་འདི་རྒྱལ་སྤྱིའི་རིམ་པ་ཞིག་ལ་སྐྱེལ་མཁན་དཀོན་པོ་རེད། འདི་ང་ཚོས་དོ་སྣང་བྱེད་དགོས་ས་གཙོ་བོ་ཞིག་རེད་སྙམ།
དེ་ལྟར་རེད་བདག་གི་ཟིན་བྲིས་ནང་དུ་གསལ་བ་ལྟར་དེ་ནི་གཞུང་དམངས་གཉིས་ཀྱི་ཆབ་སྲིད་བསམ་བློའི་ཆུ་ཚད་མ་ལོན་པའི་མངོན་རྟགས་ཤིག་རེད། གཞུང་གི་ངོས་ནས་དུས་ཐོག་ལྟར་ཆབ་སྲིད་ཀྱི་གནས་བབ་མང་ཚོཊ་ལ་རྒྱུད་བསྒྲག་མ་བྱས་པ་དང་དམངས་ཚོཊ་ཀྱི་ངོས་ནས་ཀྱང་ད་ནི་མངོན་འདོད་ཤོད་ཟེར་དུས་བསམ་བློ་ལ་གཏད་སོ་མེད་པ་ཞིག་ཆཊ་འགྲོ་གིན་ཡོད་པ་ནི་ང་ཚོའི་སྤྱི་ཚོཊ་ནང་དུ་ཆབ་སྲིད་ལ་དོ་སྣང་མེད་པའམ་མ་བྱས་པའི་རྟགས་རེད། དེ་ནི་ཆེས་ནོར་འཕྲུལ་ཆེ་ཤོས་རེད་ང་ཚོ་ནི་ཆབ་སྲིད་ཀྱི་སྐྱབས་བཅོལ་པ་ཡིན་པས་ཆ་ནས་རང་གཞུང་གི་ཆབ་སྲིད་ལངས་ཕྱོཊ་དང་ལྟ་པ་སོཊ་ལ་བྱང་ཆུབ་པས་སྒོ་ནས་རྒྱལ་སྤྱིའི་ཆབ་སྲིད་ལའང་དོ་སྣང་ཤུགས་ཆེན་པོ་བྱེད་དགོས་པ་རེད། ད་ནི་གང་ལྟར་འདི་དང་དེ་ལྟ་བུའི་ནོར་འཕྲུལ་གང་མང་ཞིག་གི་ཁྲོད་ནས་ཐ་མའི་མི་མང་གི་མངོན་འདོད་དམ་འབབ་ས་ཞིག་རག་ཐབས་ལ་འབད་རྒྱུ་ལས་མ་ཐོན་མ་འཕྱུང་གི་ཚིག་དེ་བཤད་བསྡད་ན་གང་ཡང་ཡོང་རྒྱུ་མེད་པ་འདྲ། དེ་ལས་མ་འོངས་པར་ང་ཚོའི་སྤྱི་ཚོགས་ནང་དུ་ཆབ་སྲིད་ལ་དོ་སྣང་ཡག་ཙམ་ཞིག་བྱེད་རྒྱུ་གལ་ཆེན་རེད།
མི་ཚོས་ལྟོག་པས་ཟས་དང་སྐོམ་པས་ཆུ་ལ་རེ་བ་ལྟར་སྒུག་པའི་དམིགསབསལ་ཚོགས་ཆེན་འདིའི་སྟེང་། རྒོད་པོ་ཐེད་ལ་འབབ་འབབ་དང་། སྤྱང་ཀི་ཤ་ལ་རྒྱུག་རྒྱུག་བྱས་ནས་མི་རྣམས་འཚོགས་རུང་། ད་ནི་སླར་ཡང་འ་ཆད་འུ་ཐུག་གི་སྒོ་ནས་གྲོལ་དགོས་པ་འདྲ།